إعـــــــلان

تقليص
لا يوجد إعلان حتى الآن.

حكايات 7 نساء مطلقات /حكاية شامية شعبية

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • حكايات 7 نساء مطلقات /حكاية شامية شعبية

    كان يا مكان في قديم هالزمان بذكر النبي عليه الصلاة والسلام، كان في سبع نسوان مطلقات من ازاجهن وبعيشوا بقرب بعض وكل ليلة كانوا يسهروا بعد المغرب عند واحدة واتفقوا في يوم من ايام الربيع الحلو انهم يغسلوا اواعيهم (ملابسهم) على النهر من الساعة الرابعة في الصباح الباكر وطبخوا وحضروا نفسهم واخذوا معهم حصيرة ليقعدوا عليها عند النهر، جمعوا الملابس لغلسها هناك على النهر ومشوا اكتر من ساعتين ووصلوا وبدو يغسلوا حتى الظهر ونشروا الغسيل على الشجرة وعلى الحجارة وحطوا الأكل وتغدوا وصلوا وقالوا لبعض يالله كل واحدة فينا تحكي سبب طلاقها من جوزها والباقي يحكم على مين الحق عليها والا على جوزها.
    وبدت الأولى وقالت: اسمعوا يا اخواتي انا جوزي كان تاجر حنا كل يوم يجيب اكياس الحنا ويحطها في البيت حتى صرنا ما نقدر نمشي وكان في السقف والجدران شقوق ومرة كان جوزي غايب من شان تجارته فقلت في عقلي هو مشغول وبتعب وحزنت عليه اقوله سدد هالشقوق في الحيطان لانه دايما مشغول وشقيان قلت احسن انا بقوم بها العمل فصرت اجبل (اي اضع عليها ماء لتصبح متماسكة مثل الباطون) حنا واسكر الحيطان والدنيا بره كانت مطر أنا احط الحنا على الحيطان والمطر يغسل الحنا وضليت هيك للعصر والحمد لله الدنيا اصحت وخلصت كل الحنا بالكياس وتحمرت وتبودرت وقعدت استنا جوزي لابشره باني اشتغلت عنه، رجع جوزي تعبان وشاف الأرض فاضية فقال وين الحنا يا وليه فحكيت له الحكاية وأني حبيت أريحه فسددت الشقوق بالحنا فصاح وصاح ولم علينا الحارة وقال انت مجنونة خربت بيتي الله يخرب بيتك ياللللللللللللللله على دار ابوكي تكوني طالقة بالثلالثة،
    بالله عليكم يا جماعة الحق علي والا عليه؟؟؟
    صاحوا النسوان مع بعض لا والله الحق عليه درب الي يخلع رقبته بدل المعروف ضرب كفوف...
    وبدت الثانية تحكي قصتها وقالت: انا جوزي تاجر رز كل يوم يقول لي بحب شعيرية الهريز (شوربة بقطع اللحم) وكل يو أنا أنسى من كثرة اشغالي وتعب الأولاد ويم تذكرت وقلت بدي اعمله شوربة تشبعه لسنه وصرت أدير اكياس الرز كيس ورا كيس في الطناجر وشعلت النار وحطيت الشوربة على النار في كل محل في طنجرة وادير كيس ورا كيس ورا كيس لحد ما خلصت كل الاكياس الي خازنهم جوزي في الدار
    وبعد ما خلصت الشوربة الي بتكفيه للعمر كله تحمرت وتبودرت وقعد استنى جوزي لما يرجع من شغلة، ولما اجا جوزي سألني وين حاطة كياس الرز يا ام علي ضحكت وقلتله عملتلك مفاجئة، عملتلك شوربة تكفيك طول العر وبدل ما يرضى علي صار يسبني ويطرني وقالي علي الطلاق بالثلالثة ما انت باقية بداري يالله على دار ابوك
    بالله عليكم يا نسوان الحق علي والا عليه
    والستة قالوا بتم واحد الحق عليه الله يقصف رقبته البيت الي رباك ما هرب وخلاك لابدك بدار ابوك تجوعي ولا تعري.

    وقالت الثالثة: أنا جوزي دايما بقول هالمخدة يابسة يا ام اسماعيل انفش قطنات هالمخدة واطرقها بالعصا بس بظل يقول لساها يابسة ويوم قلت احسن شغله اشتري رطلين لية خروف واحطها جوا المخدة اكيد راح يشوفها طرية وهيك عملت، وقام جوزي بعد ما رجع من شغله تعبان وقال الله يرضى عليك المخدة طرية وبعد يومين ثلاث دودت اللية وطلعت الدود على خد جوزي وفكرت كثير اذا جيب بدي اقيمها بايدي بخاف يصحى لانه تعبان مسكين احسن شغله اقتلها بالبابوج (الشبشب) وهيك صار حملت البابوج ورقعته على خد جوزي فصحي زي المجنون وصال يا مرة انجنيتي فقلت له والله يا ابن الحلال خفت اصحيك لو قمت الدودة بايدي فقتلتها بالبابوج وصاح مرة تانية وقال ومن وين اجت الدودة فحكيت له الحكاية فقالي باختصار ما بدي احمل دمك يالله على دار ابوكي طلاق ثلاثة ما تكوني الي مرة اصحك ترجعي على بيتي، خرجت من عنده وكانت اخر مرة اشوفه فيها وحرمني من شوفة اولادي، ها الحق علي والا عليه؟؟؟
    النسوان بصوت واحد الحق عليه الله يكسر رقبته
    اجا دور الرابعة: انا جوزي اله اخ بدو يتجوز جاب لي خروف منشان نوخذو معانا على العرس واعطاني مصاري لاشتري ملابس وحضرت حالي واستنيت جوزي علشان يجي وياخدنا على العرس وقعدت في الأوضه والخروف على العتبة (باب الغرفة) وصرت اتحمر وهو يقول ماع، فقتل مسكين اكيد غار مني بدو يتحمر فحمرته، صرت اتبودر صار يقول ماع، قلت مسكين بغار فبودرته، جيت البس البدلة قال ماع، حنيت عليه وقلت مسكين عمره ما لبس بدلة يالله المعاملة المنحية مع الله لبسته البدلة، جيت البس قلادة الذهب قال ماع، قلت يالله الي بيعمل منيح بلاقيه في الأخرة لبسته القلادة وقلتله اسبقني على العرس وقلهم هسة كمان شوي بنيجي بس يجي جوزي وفتحت الباب وخرجته، وضليت استنى جوزي وبعد ساعة ضحر وقالي: مالك ليش مش لابسة البدلة بدي اشوفها عليكي، قلتله موتي شفقت على الخروف لبسته البدلة وقلادة الذهب وقلتله اسبقنا هينا جايين، قالي صحيح الي بتحكيه والا بتمزحي، قلتله آه صحيح انت عارف قلبي رقيق وحزنت عليه المسكين،
    وهون طار عقله البعيد وصار يصيح باعلى صوته يالله على العصفورية بره من هالدار علي الطلاق بالثلاثة ما انت باقية بداري، شو رأيكم يا نسوان الحق علي والا عليه؟؟؟
    وقالوا الستة مع بعض الحق عليه هذا انسان لئيم شو همه الحيوانات ما بحسوا ومالهاش نفس.
    قالت الخامسة: كنا أنا وجوزي بشهر رجب باقي على رمضان شهرين صار جوزي كل يوم يحضر من السوق ومعه أشكال وألوان يوم زنجبيل ويوم قمر الدين ويقول لرمضان يجيب شعيريه ويقول لرمضان رز ويقول لرمضان سكر جوز لوز كله لرمضان، انتلت الأوضة بالكياس والعلب وطلعت روحي من كثرة الزحمة في الأوضة ويوم كنت نايمة بعد ما صليت الظهر والا واحد بينادي على واحد ثاني يا رمضان، فقلت الله ريحني وطليت من الباب وناديت يا رمضان فرد علي الرجال وقال نعم يا اختي، فقلت تعال خود اغراضك وطلع الرجال وشاف الأوضة مليانة وقلتله جوزي الو زمان بجيبلك بالاغراض وصار يحمل وينقل والحمد لله فضيت الأوضة ونمت وأنا مرتاحة، ورجع جوزي وشاف الأوضة فاضية وقالي وين اغراض رمضان؟؟ فقلتله اعطيتهم لصاحبهم فتعجب وقال مين صاحبهم هدول لشهر رمضان فسكتت فترة وبعدين قلتله والله افتركت لرمضان الرجال الي في الحارة، صار يضرب بوجهه وينتف شعره وصاح طالقة طالقة يالله على دار ابوكي، بالله على مين الحق علي والا عليه؟؟؟
    الستة مع بعض الحق عليه دم الي يبقق من حلقه.
    وقالت السادسة: انا جوزي تاجر قماش كل يوم بحط هالثواب عندي في الأوضة وفي يوم حسيت هالقماش لقيته يابس فقلت في قلبي مساكين هالخياطات ما انا قاعدة فاضية لو اني اغسلهم هالقماش علشان يطرا شوي، صرت انقل القماش على الميه واغسل وانشر على الحيطان وعلى السطوح وعلى البواب وانتلت الحارة وراحت الناس لجوزي بدكانه وحكوله من دارك في نهر من جميع الألوالان الاحمر والاخضر والاصفر شو في؟؟ ركض جوزي على الدار لقى جميع القماش مرمي هون وهون وكنت انا لسه مشغولة بغسلهم صاح فيّ وقلي شو بتعملي يا مجنونة قلتله بغسل يا ابن الناس شفقت على الخياطات لما شفت القماش يابس قلت اريحهم، سكت شوي وبعدين حمل العصا بدا يضرب في حتى نزل الدم مني وحلف علي طلاق ما بقعد في داره، ها يا نسوان شو رأيكم بدل ما يكافئني على قلبي الطيب على مين الحق عاد؟؟
    وبصوت واحد همه الرجال عندهم قلوب قلوبهم متحجرة الله لا يرده بيت ابوكي احسن عليك من الي ضربوك وطموك
    وقالت السابعة: انا جوزي كان عنده عزيمة كبيرة على العشا وقال بشتريلك خاروف للحشي وخاروف مقطع واطبخي اشكال كثيرة وبديت احضر وانقر واحشي واقطع حتى حضرت جميع الطناجر وصارت جاهزة، قلت في عقلي الدنيا لسه بدري خليني اروح عند جارتي اتسلى واشوف اخبار البلد وبرجع الظهر بحط الطبيخ على النار والعشا بكون مستوي، وهيك عملت لكن جارتي ام عبدالله حكيها حلو وظريف وسيرها ما بتخلص يعني من سيرة لسيرة طلعت من عندها الا الدنيا مغرب وانا نسيت حالي صرت اركض على البيت اولع الحطب ومش ملحقة من طنجرة لطنجرة الا وجوزي جاي قال الله يرضى عليك استوى الطبيخ قلت هلقيت اجيت من عند الجارة وبتعرف شو قالتلي سعاد زعلت من جارتها وفاطمة حردت من جوزها وصالحة حردت على دار ابوها، فقام صاح في وقال المهم شو بدي اطعمي هالمعازيم؟؟ سكت شوي وقلتله خليهم لبكرة بنغديهم غدا وكان المعازيم واحد ورا الثاني جايين على الدار، جوزي صار يحمل الطناجر ويدير على راسه ويصيح بين المعازيم مرتي انجنت مرتي انجنت ويحلف ما بخش على داره مرة ثانية وطلقني، بالله الحق علي والا عليه؟؟؟
    الستة مع بعض قالوا الحق عليه الله يخرب بيته خرب بيته بايده مين له مرة معدلة...........

    توتة توتة خلصت الحدوتة


    اوا قولو لي الغلط منين :d
    []







  • #2
    بارك الله فيك أختي,طبعا من الرجال - سيرا على نهج الحكاية - تعددت الأسباب والطلاق واحد
    sigpic

    تعليق


    • #3
      شكرا الحبيبة على مرورك العطر
      []






      تعليق

      المتواجدون الآن 1. الأعضاء 0 والزوار 1.

      أكبر تواجد بالمنتدى كان 2,525, 26-09-2016 الساعة 21:58.

      يعمل...
      X