إعـــــــلان

تقليص
لا يوجد إعلان حتى الآن.

الشوهة ديال الرشوة في مطار محمد الخامس

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • الشوهة ديال الرشوة في مطار محمد الخامس

    البنات بغيت نطرح موضوع ديال الرشوة في مطار محمد الخامس واللي هو ياحسرة الواجهة ديال البلاد
    لاحول ولا قوة الا بالله
    ماعمرني ماسافرت شي مرة الا وشفت التلميح واللمز والغمز باش ندور مع الي خدامين كرهت ومليت
    من أصغر شرطي لأكبر واحد كيتسناو فيك تمدي لهم بأي صفة؟
    واش غير المطار ديالنا هو الوحيد الي لازم ندفعو لهم ضريبة وحنا مسافرين وحنا راجعين
    حتى واحد فيهم ماكايحشم ماعمرني ماننسى بنت شرطية دخلاتني قالك تفتش وطلبات مني عيني عينك الفلوس
    صراحة ماكانتش عندي الشجاعة الي عندي دابا ولا كون عرفت كيفاش نجاوبها مزيان
    لأني دابا كنعرف انه الله لعن الراشي والمرتشي
    واش هاذ الناس الي فالمطارات ماكيقبطوش راتب شهري؟
    مامقنعهومش؟
    أو على بالهم أي واحد مسافر ولا راجع راه عاجبه الحال؟
    كلنا عارفين أن اغلبيتنا كيسافرو مهاجرين
    يعني لتمارة وكل واحد فاين مرمي فشي قهرة ربي الي عالم بيك وهاذشي راه مايعرفو غير الي جرب الغربة
    وتجي انتا يالسي الشرطي دالمطار وتبغيني نعطيك فلوس بدون أي مبرر؟
    مرة كنت راجعة للمغرب وعندي بارفانات والي في الجمرك طلب نفتح الشنطة وشي بسالات والشنطة ثقيلة يعني شافني ماقادراش نهزها وهو هانية عنده كيشوف فيا وأنا يطلعلي الدم للراس بدا كيسول فيا وأنا كنجاوبو بواحد الطريقة خايبة ومنين شاف البارفانات عينيه خرجوه وبدا كيتبحلس قالي فين حقي؟
    قلت له ديالاش؟
    قالي وأنا ماتعطينيش شي بارفان؟
    قلت له هاذو هدايا خاصة كل واحد بسميته سمحلي ماشي هدرة هاذي
    والمواقف بزاف بزاف راه غير نسيتهم
    أما راجلي مسكين لاحول ولا قوة مع كيسافر ويجي شي ربعة ولا خمسة دالمرات فالعام
    مسكين ولا كيهز الذبيلة ليهم تايقولي أف عاود شرطة المطار كيحشموه وكيحرجوه واذا مابغاش كيرميو ليه كليمات لانه براني وباين اعليه حشومي
    عمره ماجا فرحان ديما كيقلقوه ومنين كيكون غادي كنوصلو كيعطيني الصرف كامل باش مايبقاوش اعليه شحال فلوس مغربية عندك شحال هاز معاك وذوك الاسئلة ديال الهم تخيلو وصلات بيهم الوقاحة انهم كيرميو ليه الكلام الخايب لأنه ماشي مغربي كيسحاب ليهم جاي باش داكشي اللي على بالكم واحد قالهالو فوجهو منين مابغاش يعطيه تخيلو قاله فلوس :mad:راكوم عارفين الكلمة الخانزة فلوس ديكشي عندك وباش تعطينا حنا ماعندكش؟راجلي اتصدم وخلاه وزاد منين عاودهالي حلفت ليه هاذ المرة الى شي حد وجه ليه الاهانة يكبرها مزيان ويجمع اعليه أمة محمد
    اتفقست واتحشمت
    حشمونا مع البراني ولات سمعة المطار حتى هي كثر من ديكشي الاخر
    المطلوب الان
    الي عمرها طاحت فهاذ الموقف القبيح تعاود لينا شنو وقع
    عافاكوم فيدونا كيفاش نتعاملو بهاذ المواقف
    واللي عندها خلفية قانونية واخا القانون فالمغرب ماكاياكلش ولكن فيدونا كيفاش نحاربو هاذ الظاهرة الي كتحطم ببلادنا ؟للأسف سافرت كذا بلد ولم اتعرض لهذا الموقف الا ببلدي الحبيب
    حسبي الله ونعم الوكيل على كل موظف لم يتق الله في مسؤوليته
    وكل شخص مد يده للرشوة وابتزاز المواطن المغربي اعباد الله مواطن بحالك بحاله خوك ولا اختك اعتابرو
    ماشي تبغي تمص ليه الدم لأنه راكب طيارة
    صراحة هاذ الموضوع في قلبي من سنين
    واللي بقا فيا واحد الجملة قالها لي راجلي
    قالي معرفتش حسيت انكم المغاربة كتحسدو بعضياتكم حسيت ان الي في المطار حاسدين حتى ذاك المهاجر
    وطبعا أنا ماكنرضاش على بلادي كلمة وحده
    ولكن حتى المطار وتقاضاو ليا
    ماشي عاود دخلو وتخرجو
    فيدونا كيفاش نتعاملو فهاذ المواقف :)
    والى كان مكرر نبهوني لانني بصراحة لم أنتبه

  • #2
    السلام عليكم
    اختي هذه الظاهرة انتشرت واستفحلت كثيرا في جتمعاتنا ,واخذت تسميات مختلفة للتغطية على هذا الفعل المحرم فحديث رسول الله صلى الله عليه وسلم صريح "لعن الله الراشي والمرتشي"لكن من يستمع ويعلم ان من ياتي هذا الفعل قد خرج من رحمة الله واصبح ملعونا..
    اختي الامر لا يقتصر على المطارات فقط ,بل شمل جميع القطاعات بتنوعها,وشملت ايضا جميع الاوساط غنيها وفقيرها,وبالطبع الامر راجع لغياب الوازع الديني ,وقلة الوعي ,والمفروض ان وسائل الاعلام بنبغي ان يكون لها دور في التوعية ,فكما تقيم حملات واعلانات توعية بخصوص حوادث السير وغيرها فالمفروض ان هذه اولى ان يتم التوعية بخصوصها,للنقص منها ,لان فعلا المواطن مقهور فزيدة لمعاناته مع مصاريف المعيشة الغالية تضاف له فاتورة اخرى زيادة
    يجب ان يدفعها لتقضى مصالحه..
    نسال الله تعالى ان يبعد عنا هذا الوباء الذي نخر في مجتمعنا ..

    تقبلي مروري





    تعليق


    • #3
      السلام عليكم ورحمة الله وبركاته

      أختي أنا أسافر كثيرا إما عبر مطار محمد الخامس أو عبر وجدة أنجاد ولا مرة طرح معي المشكل، حتى أني في مرة نسيت وثيقة مغادرة الثراب الوطني، فبهاتف بسيط لعميد المؤسسة التي أشتغل فيها مررت بدون مشاكل.
      بالنسبة للمشكل الذي طرحتيه هو مشكل شائع والحمد لله في السنوات الأخيرة تراجعت هذه الظاهرة بالرغم من تواجدها.
      لا بد من وعي الناس بضرورة محاربتها، وعدم التمادي في إعطاء الرشوة لقضاء الحاجيات هو خطأنا بامتياز، فارتكابنا لبعض الأخطاء وعدم احترامنا للقوانين ما يدفعنا للتملص من أداء واجباتنا
      تقبلي مروري




      لتنظيم المسابقات

      [





      بداية الحمية في 12/06/2012[/CENTER]

      تعليق


      • #4
        أختي ب الفعل موضوع مهم و خطير و كيف ماقالت الأخت في الرد الأول أن هد الظاهرة مشي غير ف مطار فين مامشيت
        صراحة لواحد يدير قانون ماتكون حتى حاجة عنده ناقصة و يدخل وديك ساعة إلى هدر شي حد ماعنده منين يشدك
        حتى أنا سافرت شحل من مرة ماعمرني مريت ب هد القضية
        صراحة
        ولكن هذا أ لا يعني أنه ماكاينش بالعكس كانشووف بعض مرة شي مسائل كيبقا فيا حال على بلادنا و صورتها خاصة أن مطار راه بوابة المغرب لي خاص تكون فيها واجهة جميلة لي داخل و لي خارج
        إوا الله يدير تاويل ديال خير هذا مكان


        هذا رأي متواضع أرجو أن تتقبلي مروري عزيزتي و الله يبعد عليك ولاد حرام







        تعليق


        • #5
          أختي حتى أنا شحال من مرة ماشاء الله لاقوة إلا بالله ركبت من المطارات المغربية ولكن عمرني ماوقع لي هادشي ،ولكن منين تانقرر نجي فالباطو،غير تانزلو فالميناء تايتجمعو عليك الكورتيا،وقوم وحدا خرين ماتاتعرفيهوم منين خرجو ليك،آخر مرة واحد الماركا أعوذ بالله ، تابع لشي باطو جا عيني عينك لعندنا فالطوموبيل تايقولينا عطيوني لفلوس المغربية اللي عندكوم را ماعندكوم ماديرو بيها راكوم خارجين من المغرب،وراجلي على نيتو خرج لفلوس وعطاهوم لو ! بقيت غير تانشوف فيه ،وهو يدخل راسو مزيان فالطوموبيل تايحنزز فيا وتايتبحلس عليا بلا حشما بلا حيا وتايقول لي إوا زيدوني را ماعندكوم ماديرو بيهوم ،وفقسني راجلي مسكين بغاغير يتفك من ديك الماركا المقزدرا وعطاه كاع اللي فجيبو،وطلع الجاج .
          حيت إلى ماطلعتيش الجاج كاينين بزاف منهوم (الكورتيا واللي تايخدمومعا الباطُوُوَّاتْ )تايتسناو غير الغفله الله يحفظنا ويسلمنا من شرالخلق ياربي آمين.

          تعليق


          • #6
            شكرا اخواتي على المررور وعلى ارائكم القيمة
            راه المشكلة انه كتكون أوراقك مضبوطة والتذكرة وكولشي ومع ذلك كيبغيوك تعطيهم شي مبلغ كيف ماكان
            وحتى تعاملهم في المطار ماشي راقي العكس كيهدرو معاك بالنفخة بحال الى انتي منعرف مرتكب جريمة
            كنتمنى اللي تعرضت لموقف مماثل ماتبخلش اعلينا
            وكيف ماقلتو اخواتي حتى حنا مسؤولين لما كنخضعو لهم ونعطيوهم كيف مانقولو كيولفو هاذ القضية
            اما الضاهرة راه مازالة ماتقولوش ماكايناش راه معاناة زوجي دائمة معاهم
            اخواتي لاتبخلو بأرائكم ومواقفكم لانه بالنسبة لي موضوع كيضايقني بزاف بزاف

            تعليق


            • #7
              يسعد مساكم اخواتي

              بصراحة هذه كثر من عشرين سنة وانا نسافر سنويا بين اوروبا والمغرب , ووقعت لي مثل هاد المشاكل وانا باقي بنت مراهقة. مرة جيت من هولندا على مطار الحسيمة وكنت برفقة الأهل ومع اننا كنا في اول الصف بقينا تما تقريبا حنا الاخرين. وانا نحلف لوالديا لا خذا مني باش ينقي سنانه, وبا الله يرحمه كان يقول خلني نعطيه ونتفكوا وانا نحلف وفي الاخر رجعوا لينا الباسبور الي كانوا شدوه عندهم على ان فيه شيء ماشي مظبوط.
              ثاني مرة كانت في نفس المطار بعد عامين من الحادثة الاولى, جيت بوحدي للبلاد وهو واحد خينا يد لي الباسور ويغيب ويرجع بلا به ويروح يساعد ناس اخرين, انا تعصبت منين حتى ماعبرني ورحت دخلت المكتب الي كان فيه وشفت مجموعة ديال الجوزات فوق المكتب وكلهم خضر ماعدا واحد حمر فرحت خذيته وطلعت برا, شيرت له به وحملت شنطتي وجيت خارجة بحالتي لاني كنت طبعت قبل مانوصل عنده.
              في الدار البيضاء, فاس ووجدة والناظور عمرني مامريت بشيء حالة مماثلة وتبارك الله المعاملة تما مختلفة كليا , ونستغرب الي قريته والي شفته.

              الي بغيت نقوله اننا نتحملوا جزء كبير من المسؤولية في مشكلة الرشوة, لاننا احنا الي بيدنا نوقفوها وبيدنا نسجعوها.
              فيك اختي ترفضي هادشي وتقولي اش هاد المنكر فيك تنتقديهم في كل مكان وفي كل فرصة تتاح ليك. واذا انتي درتي فيهم ويجي واحد اخر يدور فيهم وغيركم اكيد راح يخاف على مركزه وعمله حتى هو.

              الرشوى اختي بكل مكان للاسف ببلادنا الحبيبة, في المكاتب والطرقات وكل مكان يخطر لك على بال. لكن السكوت عن الحق حرام لاننا نسجعوهم اكثر.


              لكن الي قاله زوجك ان المغاربة يحسدون بعضهم فهذه للاسف ايضا صائبة واسئل الله الهداية والرحمة للجميع.
              sigpic

              ليكن حــرفكِ كالمـطـر ..أينما وقع نفع

              تعليق


              • #8
                احساس خايب كيحس الانسان بيه منين كيتعرض لطلب التدويرة
                كنحس أنني غريبة فبلادي
                حقوقي مهضومة
                شخصيتي ضعيفة
                بلادي مازل متخلفة
                كنتألم منين البراني كيقول راه ابتزوني في المطار
                عندي غيرة على بلادي ماكانرضاش ذاك الشرطي و لا الجمركي لابس ذيك اللبسة اللي كلهاهيبة يحطم براسه على خمسين ولا مائة درهم
                زيدو فيدونا فين نقدرو نحطو الشكاية واش نوضو الصداع ولا كيفاش نتصرفو
                شكرا للردود القيمة ديالكم كل وحدة باسمها
                :)أسعدتني مشاركتكن

                تعليق


                • #9
                  تاتعاود لي واحد صاحبتي هي من مدينة الخميسات مشيت عندها هاد الصيف كانت تدير لبيرمي،إوا دارُو لْها هاه وعاودو لها هاه كيما تانقولو هاداك المونيطور ماتايعلمها حتى حرف فصوكان وماتايقلع غير ب50 درهم،وماتايكمل بيها حتى ربع ساعة ويقولها را خصني ندوز عند هادا ولا هادي باش يخليها بلاتعلام
                  أما منين بغات دوز الإمتحان ديال الصوكان هادوك اللي تايدوزو لهوم واحد الجوج بقيت عاقلا على سميت واحد فيهم (منتصرالهاكور)تايجمعو 4000 ريالات عيني عينك بلا حشما بلا حيا قدام عباد الله ولا من يقول اللهم هاذا منكر,قلتلها شكيو بيهوم أصاحبتي ،قالت لي لمن نشكيو بيهوم الشكوى بيهوم لله ،الله ياخود فيهوم الحق وصافي.

                  تعليق


                  • #10
                    صدقتي أختي و الله أني كرهت ننزل للمغرب و السبب الرشوه اللي عيقوا بيها في المطار ( الصراحة أنا كنسميها سرقة ) نعم عيني عينك كيسرقونا بدون أي وجه حق و كيطلبوا الفلوس بدون و جه حق.الواحد كيدمر و يتكرفس و يتغرب علي ديك الفليسات وهما كياخذها باردة مبردة بحال لا راحنا كنصيبهم في الأرض .حتي أنا مواقفي اللي كتبكي الصراحة في المطار خلتني نكره النزلة للمغرب
                    أخر مرة نزلت نزلة ببنتي عمرها شهر وما منزلة معيا غير خوايجها صافي في شنطة صغيرة باش منتكرفش بها و بالثقل .ملي وصلت ديك خينا اللي في التقلاب بقا كيقلب وي شقلب فديك البليزة شي نص ساعة وشايف بلي مافيها والو غير حوايج البنية و أنا كنشوف فيه ملي عيا قالي وزعما مابغيتش تفهمي راسك ....درت فيه واحد الشوفة و مارديتش عليه حتي بكلمة وهو يدفع لي الشنطة قدامي و قال خزيت علي بشر والله العظيم في هذيك اللحظة حسيت بمخي كيغلي من القهر و جاتني البكية.

                    تعليق


                    • #11
                      اختي مانكدبش عليك كاين هاد المشكل فالمطار
                      انا شحا ل من مره تعرضت ليه غير منين تنكون مع راجلي اما منين تنرجع بوحدي مكاينش الي هضر معايا
                      وصلات بيهم الشوهه حتى واحد النها رخداو لينا الباسبورات انا وراجلي انا عطاوني باسبوري وبقا شاد باسبور راجلي تيقلب فيه منين قلت ليه اشهادشي قالي سيري انتي
                      وانا نقول لصاحبو الي معاه قول لصاحبك يحشم
                      وهويقولي حنا تنديرو الاجراءات
                      وعينيهم تيخرجو منين تيشوفو البراني الله يستر عليهم ويهديهم
                      اما راجلي فينما تيرجع بالدرهم تيحيدوه حتى ولا تيعطيني الي عندو عاد تيدخل تيقول لي اللهم فيك انتي
                      وماشي حشمه هادي

                      تعليق


                      • #12
                        اختي اكثر الابتزاز كيكون على الرجال اما النساء كيتساهلو معاهم حيت مين نمشي بوحدي مايكلمك حد ولكن غير يمشي الراجل كيلصقو تقولولي ماتعطيوهمش ايوى مين يضيع ليك الباسبور ويقولك ماعطيتينيش اش تقوليلو وفين تمشي تشكي وحتى واحد ماكيعرفك هه خصلة في المغاربة الا من رحم ربي وكاين قليل بنادم غير يتبلى بالرشوة مايقدرش يتخلى عليها لو كان كانت هناك مراقبة كاع مانوصلو لهاد الشي والصراحة كنلقى بزاف انتاع المغاربة هنا كيكرهو يهبطو للمغرب على ود بزاف انتاع التعكاس غير الله يهدي ماخلق يسحاب ليهم كاع لي في الخارج راه ناعس ويتخلص ماشفوش ان الانسان العام كامل وهو يدمر في الخدمة ويمشي للمغرب يرتاح ويشوف الاحباب يصدق في التعصاب ولغدايد لا حول ولا قوة الا بالله



                        حبيبتي ام الصالحين لا تنقطعي عن حبيباتك فغيابك كربيع بدون زهور

                        تعليق


                        • #13
                          اخني حتى انا كرهت مطار محمد الخامس حينت وقع ليا بحالك حشموني مع راجلي وانا اللي كنت كنقول ليه المغاربة كرماء وعزيز عليهم البراني ملي جا معايا اول مرة كيقولو ارا ندوقو فلوسكم حتى من ديك اللي كيوقفوملي كيتبغي توزني اوكيداوزو لك الباليزات كيمدو ايديهم بحال الطلابين ومتقدهمش 20 درهم ولا 50 حينت عارفين البراني اما ملي كنوصل داك الشرطي اللي كيطبع الباس يقولك فين حقي بالحق عمرني عطيت لشي وحد منهم الا دوك شفارة اللي كيقلبو الا حطيت ليه 50 درهم فالباس دوزي بلا تقلاب وخا تكون جايبة 10 شوانط اما الا معطيتهش وخا تكوني هزا غير صاك صغير يقلبوه ويرونوه دانا الله يسمح ليا ديما كنوجد 50 درهم معاية باش ميجرتلوش ليا شوانطي
                          صراحة فمطار ابو ظبي الله يعمرها دار ميقلبوكش كيدوزو الشوانط فالسكانير صافي بلا تعطال ومازال الموظفين يرحبو بك ويضحكو فوجهك

                          تعليق


                          • #14
                            :mad:لاحول ولا قوة الا بالله
                            بقاو فيا البنات الي تعرضو لهاذ الموقف القبيح راني حاسة بشعوركم مزيان والله
                            انا واحد صاحبتي من النوع المقزدر الله يعطيها الصحة فيهم واحد المرة جاية من سلطنة عمان مابغاتش اتدور معاه تقريبا شبع فيها معيار بالهدرة دالزنقة لانها هي جميلة وعاطية للعين على باله راها من هاذوك خوتنا الي بالي بالكم وهي مسكينة ربي اللي عالم بيها وعارف ظروفها وتمارة اللي كتضرب تماك مسكينة خدامة فصالون ديال هندية تخايلو كتقيل تجبد في شعاكك عباد الله سمحو لي على التعبير
                            ولكن عجباتني فيه بقات فمه بفمها قالت لي وصافي انا رجلي طابو بالوقفة ديال الصالون نصاوب اللي تسوى واللي ماتسوى وهو بشلاغمه ندور معاه
                            بقات فيا واخا هي ماسكتاتش له وعطاته ولكني استغفر الله مابقاش هذا مطار ولا حمام
                            اما مطار الشحن واحد المرة نزلت شوانط ديالي تماك عماني الله
                            والله الى اتقامو عليا بثمن الطيارة من سماسرية وشي تشلهيب ماكاين غير فالمغرب
                            واش هاذشي مابغاش يتقاضى ويلي
                            لدرجة مابقيت نحمل ندخل راجلي للمطار نوصله غير للباب ونرجع لأني عارفة يشوفونا بجوج كتبدا البسالة وقلة الادب
                            وعاد الهدرة القبيحة بره فالزنقة هاذيك بوحدها تناقشي مع شي حد على شي كلمة جوج يقولك كلمة قد راسه
                            انا راجلي كيقولي هدرتكم قبيحة بزاف وشبابكم مامؤدبش
                            ماتقولوش هاذشي كاين فكل بلاصة لأني عشت وزرت كذا كذا بلد عربي واجنبي وفترات طويلة واحتكيت فيهم مافيهمش تخسار الهدرة الي عندنا في الزنقة
                            كنبقى ماشية معاه كتسمعي غير كلمة عورة على اختها وراجلي عربي وكيفهم بزاف دالكلمات
                            لاحول ولا قوة امتى نتقدمو أعباد الله
                            بلاش التقدم نلتزمو غير بالاداب الاسلامية بالحوار
                            انا راه تكلمت من واقعي اللي كنعيشو وزيدو السعاية والطلابة اللي كيلصقو فجنبك والى ماعطيتيهوم كيعايروك انا فالرباط بقا شوية واحد السعاية تنتفني فأكدال لانه كانت معاها بنيته عندها شي أخمس سنين كتحمق بالزين وقلت لها عيب الشريفة اتقاي الله فهاذ البنت حشومة تسعاي بيها وتعلميها القباحة من دابا هجمات عليا بواحد الفم خانز وراجلي ضارب معايا قالي بقا لك غير السعايات تضاربي معاهم علاش نزلتي للمستوى ديالها رجعنا مخاصمين بسبابها دعيتها للله
                            راه قلبي طايب والله شنو نقول وشنو نخلي
                            مابقيت نلقى شي حاجة زوينه فالمغرب نفتاخر بيها الا انني ماكانزلش الارض وديما كنفتاخر بالزز
                            سمحولي خويت قلبي لاني ماكانرضاش هكذا واخا يديرو هاذشي مع حد أجنبي ماكانعرفوش
                            لأني نبغي ديما نكونو مصدر افتخار لبلادنا
                            ولااله الا الله الله يهدي ماخلق
                            راني شاركت شعبان مع رمضان قبلو عليا وصافي

                            تعليق


                            • #15
                              السلام عليكم ورحمة الله وبركاته

                              أخواتي أنتن غير مضطرات لاعطاء لا تدويرة ولا غيرها، عند وصولكن للمطار
                              فحملكن لأمتعة تفوق القانون هي التي تجعل البعض مضطرا للرشوة
                              فكن واثقات من ـنفسكم، وبإمكانكن تقديم شكوى في الموضوع لأن هناك عدد من الخلايا داحل نهايات المسير سواء الموانئ أو المطارات تأخذ حقكن، فلا داعي للتخوف، خرجي عينيك راهم جنس كاموني




                              لتنظيم المسابقات

                              [





                              بداية الحمية في 12/06/2012[/CENTER]

                              تعليق

                              المتواجدون الآن 1. الأعضاء 0 والزوار 1.

                              أكبر تواجد بالمنتدى كان 2,525, 26-09-2016 الساعة 21:58.

                              يعمل...
                              X