هل طفل واحد يكفي؟؟

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • هل طفل واحد يكفي؟؟

    السلام عليكم ورحمة الله
    معشر الأمهات والزوجات

    فالفترة الأخيرة ألحت علي فكرة عجيبة غريبة وبدات تتجذر في ذهني "أني نكتفي بطفل واحد وما نزيدش نولد" حيت عندي وليد واحد دابا ربي يحفضو وينجيه وعندو سنتين و4أشهر.

    المشكل ماشي مادي ولا صحي ولله الحمد والمنة, ولكن ممكن مقدار الحب اللي كنحس بيه تجاه ولدي وخوفي عليه خصوصا فمرضه وهو كثير المرض كيخليني نقول بيني وبين راسي واش بصح عندي استعداد نعاود نعيش هادشي اللي عايشاه مع ولدي مرة أخرى .. بمعنى .. واش نقدر نعاود نحمل و نولد قيصرية ونقفز من بلاصتي فالليل على راس كل 2 ساعات باش نبدل ليه ولا نرضعو وواش نقدر نعاود نعيش لحظات مرضه وألمه وهادي كتقتلني فكل مرة .. زيد على هادشي ماعطياهش حقو كامل لأني موظفة .. يعني واش نزيد طفل آخر نكرفصو حتى هو مسيكن على صغرو .. وخا هدا ماشي هو السبب الرئيسي لأنه ممكن نسمح فالخدمة من بعد ما نكمل 15 سنة ديال الأقدمية ونزيد وليدات .. ولكن المشكل الحقيقي فأني ماقدراش نفسيا وعصبيا نزيد نولد وخا راني كنحماق على الوليدات .

    شكون يا أنيقات عمرها فكرات بحالي؟؟
    وشكون فكرات أن طفل واحد يكفي أو فعلا عندها غير طفل واحد؟؟

    نتمنى نقرا أراءكم وأسأل الله تكون هادي فرصة باش نبدل شوية هاد الأفكار اللي فراسي لأن المفروض ديننا يحثنا على الإكثار في الأبناء وبطبيعة الحال ماشي على حساب الجودة فالتربية.

    إليكن الكلمة

  • #2
    السلام عليكم اختي
    ممكن تحس لمراة هاد الاحساس ووارد جدا
    انا اختي بحالك غير الفرق في الاسباب انا عندي ولد عندو دابا عام و سبع شهور و حتا انا كنفكر بجدية مانزيدش عليه .وقعوا لي مشاكل في الحمل و الولادة و زائد البعد على العائلة كرهوني في شي حاجة سميتها الحمل و مني كنقول لزوجي بارك غي رهاد الولد كيتقلق مزيان
    لي عودة

    تعليق


    • #3
      انا فالراي ديالي انك لازم تفكري فالانجاب مرة تانية
      فكري فابنك لازمو اخ او اخت فالحياة اتمنى تفكري كويس لانو موضوع جدي
      و ربنا بحسبنا على اي كلمة بنقلها
      اتمنى تفهمي

      تعليق


      • #4
        السلام عليكم انا العكس كنقول باغا مزال نزيد حتى انا عندي بنية واحدة وخا كيفما قالت اختي ام اسعد كرهت شي حاجة سميتها الحمل والطبيب والدواء لانني دازت عليا ماتو لي 4وليدات في سبيل الله
        وباغا نزيد وخايفة مايعيش لي حيث ما شفت بنتي حتى شفت الويل كنموت على الوليدات وعلى بنتي
        الله يخلي لكم وليداتكم ولهلا تحرم شي مسلمة من الذرية
        sigpicاللهم احفظ لي ابنتي واجعلها من الذرية الصالحة وبارك اللهم لي فيها واجعلها من الشاكرات

        تعليق


        • #5
          نتمنى اختي الهام تبدلي رأيك لان الاطفال نعمة كبيرة
          زيدي وخ غير واحد راه يجي واحد الوقت وتندمي يبغي ولدك خوه هدا رأي وانت احبيبة تعرفي
          بحال خالتي ولدات بنية وحبسات من عند الله دبا بنتها اتعقدات كتبكي كتقوليها بغيت خويا واش غنعيش وحيدة كون لقات اتشريه بالفلوس
          سمحي لي طولت عليك
          sigpicاللهم احفظ لي ابنتي واجعلها من الذرية الصالحة وبارك اللهم لي فيها واجعلها من الشاكرات

          تعليق


          • #6
            المشاركة الأصلية بواسطة زوجة اسعد مشاهدة المشاركة
            السلام عليكم اختي
            ممكن تحس لمراة هاد الاحساس ووارد جدا
            انا اختي بحالك غير الفرق في الاسباب انا عندي ولد عندو دابا عام و سبع شهور و حتا انا كنفكر بجدية مانزيدش عليه .وقعوا لي مشاكل في الحمل و الولادة و زائد البعد على العائلة كرهوني في شي حاجة سميتها الحمل و مني كنقول لزوجي بارك غي رهاد الولد كيتقلق مزيان
            لي عودة
            شكرا أختي على الرد .. وسعيدة بيه الصراحة, الله يخلي ليك وليدك وتفرحي بيه .. اتفهمك جيدا خصوصا إلى كان الحمل والولادة صعاب, وبعيدة على والديك .. أنا براسي سبحان الله باقي ما قدرتش ننسى التكرفيسة ديال الحمل والشهور الأولى التي تليه خصوصا أن زوجي ما كانش كيساعدني أو كيتقاسم معايا المهام .. غير هو فاش كنقولو واش نكتفيو بوليد واحد كيقولي إلى تقدري عليها ديريها :) عارفني عزيز عليا الوليدات ولكن -الله يسمحلي- أعصابي على قد الحال وأي حاجة كتوقع للولد كتكحل الدنيا قدامي.
            ما عرفتش فوقاش ممكن ننسا التكرفيس ديال الولادة الأولى :) وفوقاش نولي نتعامل مع مرض ولدي بطريقة انفعالية أقل رغم اني عارفة أن الوليدات كاملين كيمرضو وكيبراو.
            الله يهدينا

            تعليق


            • #7
              فعلا أختي كنقاسيو مع وليداتنا في سبيل الله حتى كنكبروهم... ولكن الحمد لله كلشي كيتنسى!

              أنا ملي كان ولدي صغير... كنت كنقول بحالك، ما يمكنش نزيد عليه خصوصا مع الغربة والبعد على الأهل وقلة التجربة... وملي كنشوف الناس ما شاء الله والدين 2 و 3 و 4 كنقول واقيلا أنا مريضة وماشي طبيعية لي ما قادراش ندير بحال هاد الناس كاملين... ولكن الفكرة بدات كتزحزح مرة مرة وكيراودني الحنين للحمل بكل صعوباته وللولادة ولاحتضان طفل رضيع... ولكل الأشياء لي كنت خايفة منها...

              وزادت واحد صديقتي سافرت وجا عندنا راجلها وأولادها ما شاء الله 2 والثالت سافر مع الأم ديالو... كنت كنشوف هادوك الإخوة بزوج شحال محانين فبعضياتهم ورادين البال لبعضياتهم... وأنا نقول مع راسي: كيفاش نحرم ولدي من هاد الإحساس ومن هاد الأخوة؟ وملي يكبر ويكون غير شي عيد، عند من غيمشي وشكون غيجي عندو، وغير فالمدرسة، لمن غادي يقول هادا خويا ولا هادي ختي!!

              بصراحة حسيت بنفسي أنانية وخوفي ما عندو حتى معنى... وفكرت وقلت: تمارة ضاربينها ضاربينها والنهار فيه 24 ساعة فيه 24 ساعة، طفل آخر ما غاديش يزيدني فسوايع العمل!

              إيوا صافي، الحمد لله هاد الفكرة ديال نخلي ولدي بوحدو مشات لي تماما من راسي... وبغيت إن شاء الله نزيد على الأقل 2 على ولدي... يا ربي ترزقنا الذرية الصالحة والخلقة الكاملة المكمولة يا ربي يا كريم... وترزق كل محرومة

              تقبلي مروري

              وينقل الموضوع لمنتدى النقاشات... بما أنه فيه الرأي والرأي الآخر!

              تعليق


              • #8
                أخواتي ملكة العشق و حلمي الأمومة, الله يجازيكم بخير على المداخلة والله يسعدكم.
                بغيت غير نوضح أمر .. أنه إلى ربي كتب لي نزيد نحمل وخا شنو ما ندير, فمرحبا وألف مرحبا ,, هدي نعمة ورزق من عنده.
                لكن واش ما كتحسوش بحالي أننا ولينا مضغوطين وعصبيين ومقلقين أكثر من اللازم .. والدينا ولدو 4 و 5 و 9 وحنا رغم أن ضروفنا اللي أكيد أحسن من ضروفهم فداك الوقت (الضروف المادية) ما بقيناش نقدرو على أكثر من طفل .. أعرف سيدات بناتهم فاتو 4 سنوات وباقي ما كيفكروش يجيبو ليهم إخوة.

                والنقطة اللي أشارت ليها أختي "حلمي الأمومة" صحيحة, يعني أكيد الطفل غادي يحتاج أخ أو أخت!! وخا ما كيجيوش بالساهل

                تعليق


                • #9
                  المشاركة الأصلية بواسطة أم الشهداء مشاهدة المشاركة
                  فعلا أختي كنقاسيو مع وليداتنا في سبيل الله حتى كنكبروهم... ولكن الحمد لله كلشي كيتنسى!

                  أنا ملي كان ولدي صغير... كنت كنقول بحالك، ما يمكنش نزيد عليه خصوصا مع الغربة والبعد على الأهل وقلة التجربة... وملي كنشوف الناس ما شاء الله والدين 2 و 3 و 4 كنقول واقيلا أنا مريضة وماشي طبيعية لي ما قادراش ندير بحال هاد الناس كاملين... ولكن الفكرة بدات كتزحزح مرة مرة وكيراودني الحنين للحمل بكل صعوباته وللولادة ولاحتضان طفل رضيع... ولكل الأشياء لي كنت خايفة منها...

                  وزادت واحد صديقتي سافرت وجا عندنا راجلها وأولادها ما شاء الله 2 والثالت سافر مع الأم ديالو... كنت كنشوف هادوك الإخوة بزوج شحال محانين فبعضياتهم ورادين البال لبعضياتهم... وأنا نقول مع راسي: كيفاش نحرم ولدي من هاد الإحساس ومن هاد الأخوة؟ وملي يكبر ويكون غير شي عيد، عند من غيمشي وشكون غيجي عندو، وغير فالمدرسة، لمن غادي يقول هادا خويا ولا هادي ختي!!

                  بصراحة حسيت بنفسي أنانية وخوفي ما عندو حتى معنى... وفكرت وقلت: تمارة ضاربينها ضاربينها والنهار فيه 24 ساعة فيه 24 ساعة، طفل آخر ما غاديش يزيدني فسوايع العمل!

                  إيوا صافي، الحمد لله هاد الفكرة ديال نخلي ولدي بوحدو مشات لي تماما من راسي... وبغيت إن شاء الله نزيد على الأقل 2 على ولدي... يا ربي ترزقنا الذرية الصالحة والخلقة الكاملة المكمولة يا ربي يا كريم... وترزق كل محرومة

                  تقبلي مروري

                  وينقل الموضوع لمنتدى النقاشات... بما أنه فيه الرأي والرأي الآخر!

                  أختي أم الشهداء .. يمكن خاصني نلصق فيك شي سيمانة باش منوراها نولي من دعاة إكثار النسل :)
                  الله يجازيك بخير .. كلامك حلو .. والله يسمح لينا وصافي .. يمكن كيما قلتي, هادي غير أنانية فينا وصافي

                  على ما فهمت , حتى انت باقي عندك غير وليد واحد .. ممكن نعرف شحال فعمرو الله يخليه ليك؟؟

                  تعليق


                  • #10
                    المشاركة الأصلية بواسطة إلهام مشاهدة المشاركة

                    أختي أم الشهداء .. يمكن خاصني نلصق فيك شي سيمانة باش منوراها نولي من دعاة إكثار النسل :)
                    الله يجازيك بخير .. كلامك حلو .. والله يسمح لينا وصافي .. يمكن كيما قلتي, هادي غير أنانية فينا وصافي

                    على ما فهمت , حتى انت باقي عندك غير وليد واحد .. ممكن نعرف شحال فعمرو الله يخليه ليك؟؟
                    نعم أختي عندي هاد الساعة ولد واحد ربي يحفظو ويحفظ أولاد المسلمين أجمعين، فعمرو ما شاء الله 3 سنوات وبعض الشهور...

                    نصيحتي ليك، ما تخليش ولدك بوحدو... راهم غيكبرو إن شاء الله... كلشي كيفوت غير الصبر... وراهم إن شاء الله ينفعونا حتى حنا فكبرنا! الله يحقق آمالنا فيهم ولهلا يحاشمنا معاهم

                    تعليق

                    المتواجدون الآن 1. الأعضاء 0 والزوار 1.

                    أكبر تواجد بالمنتدى كان 2,525, 26-09-2016 الساعة 21:58.

                    شاركي الموضوع

                    تقليص

                    يعمل...
                    X