إعـــــــلان

تقليص
لا يوجد إعلان حتى الآن.

قالك بنتي مشات لابيسين، دخلي نعاود ليك

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • قالك بنتي مشات لابيسين، دخلي نعاود ليك

    أخواتي، أنا عشت واحد الموقف، أو بالأحرى بنتي هي اللي عاشته، أثر في بزاف و بغيت ناخد رأيكم فيه و تجاوبوني الله يجازيكم على بعض الاستفسارات.

    بنتي (11 عام) كانت مصدعانا باش تمشي لأحد المسابح اللي كتعتبر شوية غالية و ماشي في متناول الجميع بالدارالبيضاء، و هاد الأيام، داها باباها ليه باش يدير ليها خاطرها ومشات فرحانة عاجبها الحال. و حيت بنتي كتلبس الحجاب، فهي كتعوم بلباس مخيط خصيصا للبحر من الثوب ديال المايوهات كيستر جسمها تقريبا و كتحط بوني ديال البحر على شعرها. المهم، بنتي كتحماق على السباحة و غتموت باش تلعب في الطوبوكون (tobogan) إوا شدات المسيكينة الصف ومانكولكش شحال وهي كتسنى باش توصلها النوبة (حيت تبارك الله حنا في المغرب عندنا الفلوس ما كاين غير اللي مدخل 3 و4 ديال الدراري وانا راجلي غير وحدة و جاتوا غالية تقامت عليه الخرجة ب600 درهم) إوا ملي جاتها النوبة منعوها المسؤولين تلعب وقالوا ليها لا اللباس ديالك ماصالحش خصك تكوني عريانة. واخا المحاولات ديال راجلي و الغوات ديالو ما بغاوش يخليوها و بكاوها مسكينة و سيفطوها مقهورة.

    ما نكدبش عليكم، هادشي أثر في بزاف و ليت كنقول بحالنا و بحال وليداتنا فين يمشيوا يفوجوا؟ في مريزيكة ؟ هادشي اللي بغاوا واقيلا...

    أنا كنشوف هاد المشاريع و الأماكن السياحية كيداروا غير للأجانب و لصحاب الفلوس. حتى ملي كتمشي لشي فندق مشكلة : أولا، كتشوفي شي مناظر خايبة، و ثانيا، ما كايعاملوكش مزيان حيت محجبة هادا أصلا إلى قبلوك و ما قالوش ليك : الفندق عامر.

    بغيت عافاكم اللي كتعرف شي أماكن اللي يقدروا يمشيوا ليها الناس اللي في الظروف بحالي و يحسوا بشوية الراحة و بعدم الرفض تقولها لينا؟

    و اللي عندها أفكار للناس و خصوصا البنيتات اللي بحال بنتي تمكنهم من قضاء عطلة مريحة بحالهم بحال أي طفل تعتقنا بيها الله يرحم ليها الوالدين ؟

    أنا أصلا كنحس براسي غريبة وانا في بلادي، حيت حتى ملي تدخلي لأي محل في البرانس ولا المعاريف كيبقاوا يطلعوا فيك و نزلوا بحالا جايا من جزيرة الواق واق مع أنني كنلبس مودرن ماشي دايرا الخمار (الله يعاونهم مساكن) وفي بعض الأماكن -خصوصا ملي كتكون معايا بنتي- كيوليوا غير يخزروا فيك وكيخصوا ليك واحد حاضيك كأنك داخلا تفركعي ماشي تشري و ملي دخل شي ممسوخة عريانة تلقايهم يضحكوا و يستقبلوها بحال شي سفيرة. في الخارج، هادوك الناس اللي خصهم يخافوا منا، كيحتارموا المرا ملي يشوفوها مستورة واحنا العكس صحيح. ولينا في بلادنا - بلد إسلامي زعماك- محكورات و العريانات مقدرات و معززات. الله يلطف بينا و اخلاص

    سامحوني راني طولت عليكم لكن والله العظيم كون ما فشيت قلبي عليكم كون تفركعت ههههه عا بالبكاء ماشي بشي حاجة أخرى.

    وا جاوبوني وما تخليونيش مقهورة، عافاكم إلى ما فوجوا علي.




  • #2
    السلام عليكم ورحمة الله وبركاته

    اختي آش داك لشي لابسين... البنيتة قوليها راه ماصالحش ليك

    ويا الحبيبة عطا الله البحورا اللي مافيهمش كثرة الناس وكيجيو ليهم غير

    العائلات.. وماتشوفي فيهم لا عرا لا منكر.

    مادام انتي من الدار البيضاء فأقرب شاطئ مناسب هو المنصورية جهة المحمدية

    هو فعلا شاطئ صخري ولكن فيه اماكن زوينة للسباحة

    نهار نمشي كندخل نعوم بعبايتي وخماري ومانسخاشي نخرج من الما لانه مافيهش الامواج

    وتلاقي العيالات جاو يعومو حداك ووليداتك حتى هما مبرعين حسن من لابسين

    غير نصيحة تستعملي صنيدلات ديال الميكة فحال حلومة او حنيقيزة هههههه

    باش مايجرحكش الصخر.

    وهذيك 600 درهم نوفرها وعطا الله مايدار بيها.

    ايوا نتلاقاو شي نهار فيه ههههههه

    تعليق


    • #3
      حبيبتي الله يخلي ليك بنيتك ويحفظها ويكملها بعقلها وما عندك لاش تستغربي الحبيبة راه احنا في زمن المتناقضات والله يرد بنا وخلاص وختاما الخص لك مشاركة في ادا لم تستحي فافعل ما تشاء لا حول ولا قوة الا بالله العلي العظيم

      تعليق


      • #4
        اختي رايي من راي ام ايوب فالبحر احسن الف مرة من المسبح على الاقل الماء نقي ماشي بحال لابسين نتي عارفة اش كيديروا فيه الناس هههه غير خاصك تنوضي بكري فصباح حيت كيكون خاوي او تبحري مع راسك حتى تشبعي او كانصحك تبعدي من الاماكن الهاي باش ماتعقديش ما كاينش احسن من الاماكن الشعبية و الاسواق الشعبية

        تعليق


        • #5
          حجزت مكاني وعدت إليه هههه
          في الحقيقة رأيت أن الموضوع بالفعل يحتاج إلى نقاش ..وقد علمت بدوري أن إحدى الجرائد كتبت عنه...
          نعم أختي بالفعل لست وحدك من تعانين فهناك الكثيرات ..فقد ذهبت ابنة أخت زوجي إلى مسبح خاص بالفتيات والنساء فمنعنها من الاستحمام لأنها كانت تلبس ملابس محتشمة ولكنها خفيفة جدا مع ذلك فرضوا عليها لبس ال"مايو" كأن هذا اللباس - الذي ليس بلباس أصلا - كأنه قدر مقدر ولا يمكن تغييره رغم أنهم يغيرون موضة الملابس في كل فصل وزمان إلا أنهم ماضون على سنة العري ولا يحيدون عنها قيد أنملة ..
          أتمنى حقيقة أن يعيد المسئولون عن هذه الأماكن حساباتهم ..
          أنا ما كتبت الشعر يوما متباهية...وما شدوت بمجد أسلافي أو نسبي أو مالِيةْ
          ولا استجدت كلماتي منّة قوم تذللا ... تعاف نفسي صغارا فما كنت له ساعية
          إنما حرك نبضَ يراع ســــــــاكن ..... مصائبُ حلّت بأمتي متتــــــــــالية










          تعليق


          • #6
            السلام عليكم و رحمة الله و بركاته،

            أولا:

            بغيت نقدم جزيل الشكر للأخوات اللي حسوا بي و جاوبوني :

            أم أيوب : اختي راه البنية عزيز عليها البيسين أما أنا ما كانمشيش، كنت أصلا كنمشي للتماريس ملي كان خاوي أما دابا عمرا بالقرى االسياحية و القهاوي. كنعرف المنصورية لكن ما عمري ما مشيت ليها حيت كايبان لي الصخر و كنخاف على البنية, إن شاء الله انتلاقاوا. يكون لي الشرف.

            أم الشهيد مروان : شكرا على مرورك الجميل، آمين الحبيبة و الله يحفظ ليك كل ما عز عليك.

            أزهار : عندك الحق أختي وأنا من الناس للي عزيز عليهم المناطق الشعبية و الأحياء الشعبية، ونبغي نمشي للبحر الصباح، لكن راجلي معكاز هههه و نعاس هدي هي المشكلة.

            ثــــــانيا :

            اللي زاد ثلج صدري و حسسني بأنني ماشي بوحدي كنعاني أن البارح جاب زوجي جريدة المساء (العدد893 ليوم الثلاثاء) حيت سمع أنها كتبت على هاد الموضوع في الصفحة الأولى وهذا نصه نقلتوا ليكم :

            منع استحمام النساء في مسابح «أكوابارك» بلباس آخر غير «المايو»

            خديجة الرياضي تصف المنع بـ«التعسفي إذا ارتبط بأذواق لباس بعض النساء»

            يوسف ججيلي


            "منعت إدارة مسبح «أكوابارك»، كما هو الشأن بالنسبة إلى بعض المسابح بمنطقة طماريس بالدار البيضاء، على المحجبات الاستحمام في مختلف المسابح واستعمال الزلاجات، واشترطت لباس «المايو» على كل النساء اللاتي أردن الاستحمام واستعمال مختلف وسائل الترفيه المخصصة لرواد هذا الفضاء العمومي.
            والأمر ذاته ينطبق على النساء، غير المحجبات، اللاتي لا يفضلن لباس «المايوهات»، حيث يدفعن ثمن التذكرة لولوج الفضاء، إلا أنه يمنع عليهن الاقتراب من الماء أو الاستحمام في المسبح وكذا استعمال باقي وسائل الترفيه الموجودة في المكان.
            وتعليقا على نهج بعض إدارات المسابح سياسة المنع في حق النساء المحجبات أو اللائي يفضلن عدم لباس «المايوهات»، قالت خديجة الرياضي، رئيسة الجمعية المغربية لحقوق الإنسان «من الناحية المبدئية، الإنسان حر في ارتداء ما يريده»، وأضافت، في تصريح لـ»المساء»: «إذا كان منع النساء من الاستحمام مرتبطا بأذواق اللباس لدى البعض فهذا غير مقبول ويعتبر تعسفا في حق النساء».
            ومن جانبه، قال المحامي مصطفى الرميد إنه «ليس من حقهم القيام بذلك»، وأضاف: «المحجبات مواطنات لا يمكن منعهم من ارتياد المسابح العمومية، سواء كانت خاصة أو عمومية». وقال الرميد: «إنه ليس هناك قانون يفرض لباسا معينا على النساء»، مضيفا: «ليس من حق أحد أن يمنع نساء لا يستجيب لباسهن لأذواق البعض، وهذه الأذواق ليست معيارا للسماح للنساء بالاستحمام في المسبح أو رفض ذلك»، معتبرا هذا السلوك «تعسفا»، خصوصا إذا فضلت المرأة لباسا لا يضر ولا يثير أحدا.
            ولا تخبر مثل هذه المسابح زوارها بأن الاستحمام دون ارتداء «المايوهات» ممنوع من خلال يافطة توضح ذلك أمام أبوابها، بل تفضل أن يدفع الزبون ثمن التذكرة قبل اصطدام النسوة، الرافضات لارتداء «المايو»، بواقع المنع من الترفيه مثلهن مثل باقي النساء ممن فضلن الاستحمام في المسبح وهن مرتديات «المايوهات».
            وفي سياق متصل، أكد مسؤول بقسم الاتصال بوزارة الداخلية، في اتصال بـ«المساء»، أن «الوزارة لا ٍرأي لها في الموضوع»، وفي اتصال أيضا بمديرية الشؤون الداخلية، أكد مسؤول بهذه الأخيرة أن المديرية غير معنية بهذا الموضوع."


            والواضح أن الحيحة نايضة ههههه وانا ما سايقة خبار، المحامين و حقوق الإنسان ...و، لكن الصراحة : أنا ما كنبغيش العيالات يعوموا في مكان عامر و مفضوح بحال هكذا ولو بلباس محتشم. ولكن في نفس الوقت ضرني خاطري على التفاعل ديال الوزارة و المديرية مع هذا المشكل : اللامبـــــالات التــــــامة. أنا أكيدة لو كان الموضوع معكوس : أي أنهم منعوا شي وحدة تعوم بلباس المايو الفاضح و لزموا عليها تلبس لباس محتشم كانت غتقوم القيامة و كاع الوزارات غتفيق و تبان، و خصوصا إلى كانت ماشي مغربية ........... لنا الله و حسبنا الله ونعم الوكيل.

            وانتوما آش رأيكم ؟



            تعليق


            • #7
              ايوا هذي جديدة توصل حتى للصحافة

              زمان العجب الله يعمل تاويل دلخير

              تعليق


              • #8
                يهدي الله من خلق ولا حول ولا قوة إلا بالله .
                وربي يحفظلك بنيتك ويثبتها على دينها وإيمانها ؛ وربي يبلغك ووالدها الجنة على هالتربية الصالحة .

                تعليق


                • #9
                  الاقتباس غير متاح حاليا

                  شكرا أختي لبنى الله يحفظك و يجعلك في كل كلمة حسنة.



                  تعليق


                  • #10
                    السلام عليكم اختي

                    و الله الا صدمني كلامك
                    و استغرب كثيرا مثل هدا التصرف..تمنع فتاة صغيرة من السباحة

                    في الحقيقة اختي انا معمري دخلت بيسين في حياتي هههههههههههه و افضل البحر في الصباح الباكر و يكون خاوي

                    احسن مانخسر كل هداك المبلغ في مكان كله عري و فضائح
                    اختي هدوك الاماكن أصلا داروهوم من اجل طبقة معينة و نحن لسنا منهم

                    الله يخلي ليك بنتك
                    و السلام عليكم

                    تعليق


                    • #11
                      انا براسي تنقول واش حنا في المغرب و لا غير كنحلم

                      هادشي الله يستر ولا بزاف

                      انا الحمد لله محتجبة و مرة مرة كنلبس زيف طويل و عريض يلاه كنولف عليه

                      وا ملي كنحرج كيعبروني من الفوق تال التحت الله يستر و يهدي الجميع

                      تعليق


                      • #12
                        السلام عليكم ورحمة الله وبركاته
                        "جاء الدين غريبا و سيعود غريبا كما بدا فطوبا للغرباء قيل و من الغرباء يا رسول الله قال الذين يصلحون اذا فسد الناس"
                        صدق رسول الله
                        chandelle

                        sigpic

                        تعليق


                        • #13
                          السلام عليكم ورحمة الله تعالى وبركاته

                          لاحول ولاقوة إلا بالله زمن الغرايب هو هذا مابقيتش عارفة المغرب واش بلد إسلامي ولا لا وليت كنسمع الغرايب والعجايب الي ما كنشوفهمش في أوروبا
                          بزاف على هاد الشي الي بغيت نعرف هو اعلاش ما كيقولوهاش فالبداة مع صندوق الخلاص ولا حتى يدخلوا التعريفة فالصندوق عاد يحرمو الناس من المتعة الي دفعو فيها فلوسهم السراقين
                          بالمناسبة أختي الأقحوانة ابنتك اتشهرات هههههه شفت مقتطف من هاد الموضوع بجريدة إلكترونية

















                          ياما كان فيها ممالك .. إلاوجهه كله هالك

                          من ترابها ولترابها .. من وكان في الدنيا مالك
                          مين وكان في الدنيا ملكه .. إلا جاله يوم وهلكه
                          مهما نوره طال ظهوره .. جاي ليل ع الدنيا حالك

                          جاي ليل ع الدنيا ضلمة .. ياما ناس في الدنيا ظالمة
                          في المظالم كل ظالم .. جايله ليل أسود وحالك
                          ياما كان فيها وياما .. من هنا ليوم القيامة
                          الممالك والمهالك .. مالي يا دنيا ومالك











                          شكرا غاليتي أمنار


                          حملة الدعاء لاخواننا السوريون يوم الجمعة هلمي اختي


                          ،أستحلفكن بالله..الدعاء ثم الدعاء ثم الدعاء لاخواننا في سوريا.







                          تعليق


                          • #14
                            لاش تستغربي الحبيبة راه احنا في زمن المتناقضات والله يرد بنا وخلاص وختاما الخص لك مشاركة في ادا لم تستحي فافعل ما تشاء لا حول ولا قوة الا بالله العلي العظيم

                            تعليق


                            • #15
                              لا حول ولا قوة الا بالله العلي العظيم

                              تعليق

                              المتواجدون الآن 1. الأعضاء 0 والزوار 1.

                              أكبر تواجد بالمنتدى كان 2,525, 26-09-2016 الساعة 21:58.

                              يعمل...
                              X