إعـــــــلان

تقليص
لا يوجد إعلان حتى الآن.

الورقة الصفراء

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • الورقة الصفراء

    السلام عليكم ورحمة الله وبركاته
    سؤال صغير جدا
    بالنسبة للورقة الصفراء اللي كياخدها الزوج ملي يعمل استقدام لزوجته للسعودية شحال مدة الصلاحية ديالها وشكرا


  • #2
    السلام عليكم ورحمة الله
    بما انه الحمد لله ساليت اموري على خير والموضوع مفتوح مفتوح فغادي نكتب التفاصيل د الاستقدام ربما يستفيد منها شي حد غير ما تنساونيش بشي دعيوة زوينة بشي وليد ولا شي بنيتة الله يكرمكم
    بسم الله
    بالنسبة للاستقدام الاوراق اللازمة
    -نسخة من اقامة الزوج
    -نسخة من عقد الزواج وانا صادقت عليها من المقاطعه ديال مدينتي بزوج دراهم
    -تذكرة مراجعه التاشيرات الاصلية او الورقة الصفراء وهادي ماشي شرط الراجل يسيفط لك الاصلية يكفي انه يسيفطها لك بالفاكس او عن طريق الانترنت غير انما هو خص تكون واااااضحة باش ما يردوكش فالسفارة
    -ثلاث صور خاصة بالفيزا حجم 4*6 وتكون الخلفية بيضاء والوجه باين مزيان
    -الفحص الطبي وهذا كتعمليه بالف درهم اما فمصحة شالة او مصحة السلاوي الفرق اللي كاين ان شالة بعيدة على السفارة وكيدوزو مزيان ام السلاوي قريبة من السفارة وعلى حسب ما قالولي اللي دوزا تماك ماشي شي فحص حتى لهيه والله اعلم
    -جواز السفر ويكون على ساري المفعول يعني اذا بقالك شي ثلاث اشهر ديال الصلاحية سيري عاوديه حيت غادي يرضوك

    بالنسبة للخطوات كانت كالتالي
    مشيت للسفارة مباشرة ودفعت الاوراق اللي لفوق كاملة يعني الورقة الصفرا وجواز السفر و صورة من عقد الزواج وصورة من اقامة الزوج وطلب مني الموظف صورة واحدة وعطاني ورقة مكتوب فيها كشف طبي وقالي رجعي مع الزوج د العشية وخرجت بحالي بعدما سولت واحد الموظف اخر واش نعمل الفحص ولا شنو والصراحة ما عطانيش راس الخيط وانا نخرج قلت احسن شي نربح الوقت ونعمل الفحص وفعلا خديت تاكسي ومباشرة على مصحة شالة والطريق شوية بعيدة منين وصلت كان خاوي تقريبا
    اول شي عطيتها تحليلة ديال les urines وعملت الراديو ديال الصدر ثم خدات مني تحليلة ديال الدم وطلبت مني صورة و شي زوج دراهم ونص ماعرفتهاش ديالات ودخلت عند الطبيب عملي فحص بسيط بيديه فالبطن وقاس ليا الضغط وصافي
    انا مشيت ما فاطراش شربت غير شوية ديال الما على ود الطريق بعيدة وشي ثاني كنت من قبل تلاقيت شي سماسرية وخديت منهم كارت فيزيت وبقيت مخبعاها فالبزطام قلت ربما نحتاجها منين ساليت قاتلي الممرضة واش عندك شي كارت فيزيت وانا نتفكر قلت ايه عندي زوج قاتلي صافي غادي تخلصي غير 950 درهم ههههههههه والكارت فيزيت شي ثلاث اشهر وهي عندي
    المهم الممرضة دورت معاها لحقاش عاملاتني مزيان هي واللي عملي الراديو ولكن ماشي ضروري
    فاش ساليت الفحص قاتلي رجعي مع الزوج لعندنا قلت ان شاء الله
    مشيت قضيت شي امور فوزارة الخارجية ومع الوحدة كنت فالسفارة وبقيت نستنى تماك تلاقيت مع السكيوريتي وانا قوليه خويا راني عملت الفحص واش صافي غير هادشي للي مطلوب قالي زربتي ماكانش عليك تعملي الفحص حتى يعطيك واحد لورقة حيت ممكن المعاملة ما تقبلش ونضيع فالف درهم وانا نخاف هههههههههههه
    قلت للي بغاها الله هي اللي تكون بقيت نساين كيف خلق الله وصلتني النوبا والحمد لله المعاملة اتقبلت عطاني الباسبور ومعاه واحد المطبوع نعمرو زائد ورقة نديها للمصحة هوما يعمروها لي زائد ورقة باش نخلص 135 درهم فالبنك العربي
    انا الحمد لله عملت الفحص يعني كان خصني غير نمشي نخلص فالبنك وفعلا مشيت وعطاني توصيل الدفع وبقوة التلفة وتماااااااااااارة نسيت ان الممرضة قاتلي رجعي مع الزوج وهكدا انتهى اليوم الاول
    اليوم الثاني
    مع الثامنة والنصف راني فالمصحة وبسلامتي مجتهدة انا الاولى وصلت قبل كاع من الطبيب ههههههههه
    غير شافتني صاحبتي الممرضة وهي تقولي مالكي ما رجعتيش مع الزوج وانا نتصدم قلتها والله حتى نسيت قاتلي ايوا سايني الطبيب حتى يجي باش يوقع لك على الورقة قلت يالله فيها خير
    بقيت نستنى فالطبيب وماجا بسلامتو حتى للعشرة وانا فداك الوقت عمرت الورقة اللي عطاوني فالسفارة وعطيتها هي الورقة اللي قالولي نعطيها ليها وصافي من بعد التوقيع خديت اوراقي كاملين ومبااااشرة على السفارة دفعت ليهم الملف كامل
    وفيه جميع الاوراق اللي لفوق ومعاه زوج ديال الصور للي بقاو يعني مجموع الصور اللي غادي تحتاجي هو اربعه وقالي رجعي مع الزوج تاني
    تلاقيت مع شي بنات تماك الله يعمرها دار وجلسنا مجمعين داخل السفارة حيت الله يكثر خيرهم خلاونا ندخلوا من دوك الشموسات وصافي مع الزوج الحمد لله خديت جواز السفر ومطبوعة فيه الفيزا وفيها تسعون يوم
    وهادي كل حكايتي مع الاستقدام بالتفصيل الممل ههههههههههههه
    البنات اي وحدة عندها تساؤل مرحبا ما تحشمش وانا باش ما قدرني ربي غادي نجاوبها والله يسهل عليا وعليكم وعلى جميع المسلمين

    تعليق


    • #3
      مبروك عليك ختي زمرده ياربي يرزقك بالسعاده والذرية الصالحه ..غير بغيتك توضحيلي الله يجازيك بخير واش الجواز ضروري الجديد ولا العادي حينت سمعت تايقولو الى بدلتي لاكارت ضروري تبدلي حتى الجواز لان القديم مابقاش يتقبل واخا صلاحيته تبقى فيها اكثر من سنه ....شكرا وأكرر دعواتي لك بالسعاده والذريه التقيه النقيه
      السلام عليكم ورحمة الله وبركاته

      اللهم صل على محمد وعلى آل محمد كما صليت على إبراهيم وعلى آل إبراهيم.اللهم بارك على محمد وعلى آل محمد كما باركت على إبراهيم وعلى آل إبراهيم في العالمين إنك حميد مجيد

      بسم الله الرحمن الرحيم (وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34) وَمَا يُلَقَّاهَا إِلا الَّذِينَ صَبَرُوا وَمَا يُلَقَّاهَا إِلا ذو حَظٍّ عَظِيمٍ (35) . سورة فصلت

      تعليق


      • #4
        السلام عليكم ورحمة الله
        الله يبارك فيك اختي وجزاكي الله الف خير
        بالنسبة لجواز السفر انا عملتوا فاواخر 2009 تحديدا اخر شهر ديسمبر وكان وقتها مازال مابان البيومتري كنت عملتوا هو ولاكارت الجديدة حيت غيرت المهنة والعنوان ودابا فاش دفعت فالسفارة ماقالو لي والو مع انه غادي ينتهي فاواخر 2014
        ولكن واحد السيدة لقيتها فالسفارة كان بقى ليها شهرين تقريبا فالباسبور القديم ورفضوا وقالوليها عملي باس جديد واضطرت انها تغيره
        عموما انتي اذا قرب يسالي لك وغادي تبدلي لاكارت عملي البيومتري وريحي راسك

        تعليق


        • #5
          اختي راجلي الباس قرب يتسالى ليه باقي ليه شي 3 شهور و شوية شي 13 ليوم تقريبا وباقي مطبع الفيزا خلعتيني قلتي لي ممكن يرجعوه و عارفتي اجراءات المغرب ديالنا متخررج الكارط جديدة حتى يطلع عينك محيت معندوش الكارط جديدة عاد الباس واش ممكن يرضوه
          sigpicاللهم اغفر لامي وابي ورحمهما كما ربياني صغيرا
          اللهم فرج همي وهم المسلمين ويسر امري وامر المسلمين

          تعليق


          • #6
            اختي زمردة ما عندي حتى اسفسار دخلت غير نقولك مبرووك عليك الفيزا والله يوفقك ويكتب لك الله سعادة والدرية الصالحة
            الهي كيف أدعوك وأنا انا وكيف أقطع رجائي منك وأنت أنت .الهي ان لم أسألك فتعطني فمن دا الدي أسأله فيعطني؛وان لم أدعك فيستجيب لي ؛وان لم أتضرع اليك فترحمني فمن دا الدي أتضرع اليه فيرحمني.

            تعليق


            • #7
              لهلا يخطيك اختي خديجة وشكراااااااااا بزاف على احساسك الطيب

              تعليق


              • #8
                المشاركة الأصلية بواسطة دكتورة ام رشى مشاهدة المشاركة
                اختي راجلي الباس قرب يتسالى ليه باقي ليه شي 3 شهور و شوية شي 13 ليوم تقريبا وباقي مطبع الفيزا خلعتيني قلتي لي ممكن يرجعوه و عارفتي اجراءات المغرب ديالنا متخررج الكارط جديدة حتى يطلع عينك محيت معندوش الكارط جديدة عاد الباس واش ممكن يرضوه

                اهلا ام رشى
                والله الحبيبة ما بغيت نخلعك ولكن انا عاودت اللي جرا تماك حيت السيدة جلست معاها وهضرت معاها وجينا بزوج من الرباط لمكناس وهي كملت لفاس وعاوداتلي بنفسها
                من هادشي تلات اشهر راه يقدروا يطبعوها ليه وفاش يمشي يجدد الجواز فالسفارة المغربية فالسعودية ولكن اول شي يتصل بالسفارة ويسولهم واش يطبعوا الفيزا على جواز باقي فيه اقل من اربعه اشهر او لا باش ماشي يتسخسخ حتى لتماك ولاقدر الله يرفضو ليه الطلب

                تعليق


                • #9
                  شكرا اختي زمردة الله يسر ليك ويفرحك ويكمل عليك بالف خير ياربي تسهل الالمور انشاءالله
                  sigpicاللهم اغفر لامي وابي ورحمهما كما ربياني صغيرا
                  اللهم فرج همي وهم المسلمين ويسر امري وامر المسلمين

                  تعليق


                  • #10
                    للرفع

                    تعليق


                    • #11
                      السلام عليكم اختي زمردة.
                      واش ممكن نعرف فاشمن مدينة انتي ف السعودية؟
                      حتي انا ساكنة ف السعودية و بغيت نتعرف علي بنات لبلاد و شكرا.

                      تعليق

                      يعمل...
                      X