إعـــــــلان

تقليص
لا يوجد إعلان حتى الآن.

و اني احبك ...قصة مغربية روووعة

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • و اني احبك ...قصة مغربية روووعة

    السلام عليكم و رحمة الله و بركاته




    هاذا جزء اول من القصة و اذا عجباتكم و لقيت منكم تشجيع نكملها لكم

    سلامي





    - ليلى : ايمان و يا قطيب اللوز خليوها تدوز.ا ايمان و يا الوردة و عليك يطيح الندى
    - ايمان و خدودها موردة: ههههههه سكتينا يا الهبلة فضحتينا...
    -عزيزة : ههههههههه ويلي ويلي على الدرية تزنجات (الجيم مصرية و المعنى خدودها احمرت) ههههههههههههه
    -ايمان : صافي صافي راه تيشوف فينا
    -ليلى : واخا ا لالا خوذي ليا راحتك مع الزين الصافي ديالك
    -ايمان : هههه الله يستر ما كتسكتيش بلاتي حتى يبان الزين الصافي ديالك حتى انتي
    -ليلى: انا الدنيا هانية عندي..هاذاك غ خضرة من فوق الطعام اما الزين الصافي ديال بصح راه بعيد على هنا


    ايمان و عزيزة و ليلى ثلاث بنات جمعتهن الدراسة في مجموعة حلوة اضافة لدنيا, سعيدة و حنان.

    ايمان بنت زوينة, ملامحها هادية و جذابة.. قامة صغيرة و عامرة شوية (مكتنزة)..بشرتها بيضا و شعرها احمر طويل..شخصيتها هادية و طيبة.. رومانسية و حساسة..و ذكية.

    عزيزة بنت حلوة و ناعمة, طولها متوسط ,حتى هي مكتنزة هههه, ملامحها حلوة: صغيرة و مريحة و هذا نابع من شخصيتها الجميلة من ذكائها و لباقتها و حنانها على الغير.

    ليلى فرفوشة الكليك(الشلة) ,شخصية اجتماعية بزاااااااااف ,مرحة, عفوية و رومانسية... سمرة و جميييلة .


    - عزيزة: الجرس صونا (دق) يالا ندخلو و لا حلات ليك الوقفة? و غمزت لايمان
    - نقزات ليلى باستنكار: فين هي هاذ الوقفة و هي ملي وقف و هي عاطياه بالظهر..غير قولي ليا عمرك شفتي بحال هاذي?! السيد غادي يولي يقشعها من بينن مليون بنت غير من ظهرها هههههههههههه
    -ايمان: هههههههه لعن حسك ..نقصي من الفولوم (الصوت) فضحتينا..شبغيتي ندير ليك, انا تنحشم ماشي بحالك نتي مقزدرة و عينيك غتيدوروا
    - ليلى: ياكي وا عقلي على هاذ الشي اللي قلتي..اذا ما زال قلت ليك و اش تيشوف فيك او لا راني ماشي ليلى
    - ايمان: ههههه علاه انتي تقدري ما تقوليش..انتي الا ماعطيتيش تقريرك باللي طاري (حاصل) فالسيكتور (فالمجال المحيط) غ تمرضي و لا تحماقي خخخخخخخ
    - ليلى : زيدي زيدي نستاهل
    - ايمان: انتي اللي زيدي قدامي ندخلو نقراو شي حاجة تنفعنا
    - عزيزة : ايمان عرفتي السيد ما تيرمش تقريبا..عينيه غيخرجوا من تحنزيزو (بحلقتو) فيك
    ابتسمات ايمان بخجل و التفتات ناحية امين بحذر و دخلت للمدرسة بعد ما زلزلاتها نظرتو القوية و الدافئة.
    - ااااه زفر امين بقوة بلا ما يحس براسو و ضحك عليه محمد
    - محمد: ههههههههههههههههه مالك ا صاحبي سالات معاك (انتهت معاك او قضت عليك)
    - امين و هو حشمان: جمع راسك ا صاحبي
    - محمد: غا قول ا صاحبي و حتى اذا ما قلتيش باين عليك كلشي
    - امين: ما عرفتش مالي..كل ما شفتها ما تنقدرش نحيد منها عينيا و ملي تكون بعيدة كنظل نفكر امتى غنشوفها ثاني
    - محمد: الله الله مشيتي فيها ا خويا..غلباتك هههههههههه
    -امين: زيد زيد قدامي, راه غيسدوا الباب و بركة من الهضرة الخاوية
    - محمد: زعما باغي تقرا هههههههههه قول باغي تتبعها وهي داخلة مع صحاباتها و بلا تفلسيف
    ضحك امين باستعلاء و جرو يمشي معاه.


    امين شاب وسيييييم بزااااف طويل القامة و ذو هيبة..ابيض البشرة و قسمات ملامحه متناسقة و جذابة

    محمد بنفس طول امين انما امتن بزيادة طيب و مرح و اهم شيئ موضع ثقة

    ابطالنا على مشرف بداية العشرينات ..كيقراو فثانوية وحدة فالدار البيضاء و بالضبط فالسنة الاخيرة من الباكالوريا...البنات كلهم شعبة ادبي و الشباب علمي.

    كل كليك ايمان عارفين ان امين معجب بزااااف بايمان و باينة من تواجده الدائم حداها و نظراته الجميلة ليها.

    طول السنة الدراسية و هو على هاذ الحال .و.ايمان كانت دائما كتتسائل علاش عمرو ما حاول يتكلم معاها خصوصا و ان السنة الدراسية قربت تسالي (تنتهي) و كل واحد يمشي فطريقو..كانت عاجزة تفهم او حتى تتصور ان اللي كانت عينيه تنطق بيه كذوب (اكاذيب) او لعب بمشاعرها او اوهام من تخيلاتها..

    - ليلى: ماشي اوهام و لا تخيلات ..امين تيبغيك و باينة حتى للعمى
    - ايمان: و من بعد? العام قرب يسالي و هو عمرو ما جرب يهضر معايا من غير ذيك المرة
    - ليلى: ناري(يا ويلي), سمحي ليا انا اللي خربتها عليكم
    - ايمان: لا لا ما تديري فراسك والو..اصلا انا كنت خايفة و مرعوبة و هو اكثر مني ..ما كانش غ يزعم, واخا كون ما خرجتيش لينا من الجنب و غمزات ليها
    - ليلى: ما تعرفي
    - ايمان: لا نساي ذاك النهار ما كانش مكتاب (مقدر)...دابا (الان) انا اللي محمقني هو" و من بعد? شنو مورا (ورا) هاذ الشي?..انا كنت تنقول يمكن بغى يتسنى اخر السنة باش يهضر معايا و لكن دابا اشنو تيتسنى?
    - ليلى: و انا شنقول اللي 4 سنين هاذي
    - ايمان: انتي حالتك مختلفة ا ليلى, ماشي بحالي..انتي يوسف كبير و خدام و اذا كان مازال ما هضر معاك فغير حيت لانك ما زال ما خذيتي الباك (الباكالوريا), نهار تاخذيه غادي يخطبك..
    اما انا و امين قدامنا طريق و ما يمكنش ليا نستحمل هاذ الطريق كلها هكذا.. و انا حتى كلمة منو تتبث افعالو و نيتو ما عنديش.
    - عزيزة: السلام عليكم
    - ايمان و ليلى: و عليكم السلام و رحمة الله
    - عزيزة: لاباس عليكم
    - ايمان بحزن: الحمد لله
    - عزيزة: مالك?
    - ايمان: راكي عارفة مالي
    - عزيزة: ايمان عييت ما نقول ليك ما تتشائميش و ما تتعجلييش الامور..و ما تبقايش تشوفي غير الحاجات الخايبة ..تفكري الحاجات الزوينة و كلشي غادي يكون كيف بغيتيه ان شاء الله
    - ليلى: بصح الانسان ديما خاصو يبقى متفائل
    - السلام عليكم
    كانت هاذي دنيا اللي جات عند البنات و وقفات معاهم
    - دنيا: البنات السبت العشية دايرة حفلة فالدار نتجمعو نفوجو على ريوسنا شوية و حتى وحدة فيكم ما تقول ليا ماما ما بغاتش..بابا ما بغاش ..طارت معزة..السبت كلكم تكونوا عندي
    - ايمان: انا راكي عارفة ما نقدرش
    - دنيا بعصبية: وا عيقتي (زودتيها) ا ايمان.بزاف هاذ الشي..قولي لماماك تجيبك و لا جيبي معاك اختك ..ما نعرف ..بزاف هاذ الشي على الزيار (شد الاهل على الابناء فالخرجات)
    - ايمان: عييت معاها و والو..انا راه حتى دار خوالي ما تتخليناش نباتو فيها
    - عزيزة: شلحة(امازيغية) حرة هههههههههه
    - دنيا دايما بعصبية: حتى حنا شلوح و لكن والدينا ما دايرينش لينا هاذ الحالة كلها و انتي معايا و لا ضدي
    - عزيزة: واخا نكون معاك..انا اللي صاحبتها ثلث سنسن هاذي عمرها ما عتبت داري و ليلى حتى هيا
    - دنيا: وا بزااف ..الحبس هاذا
    - ايمان: ههههه ماشي مشكل انا ولفت (تعودت)
    - دنيا: المهم انا علمتك..حاولي مع ماماك و اذا بغيتي ماما تتصل بيها و تحاول معاها باش تخليك قوليها ليا..قولي ليها كلشي جاي عزيزة..ليلى ..حنان كلشي
    - ايمان: دابا نحاول و الله حيت محتاجة نبدل جو
    - دنيا: اوكي ايوا مشات على السبت اذا..ها كل وحدة تجيب معاها شي حاجة..ما غنوجد ليكم غ الكواسط (جمع كاسيط) و التدرديك(الشطح بنشاط خخخ)
    - ليلى: ارا برع (هات الفرجة)هههههه ما ترفديش الهم ..القص (مفردة شبابية معناها الاكل) علينا و النشاط عليك
    - دنيا: هههه غير كنتفلا معاك..انتي درتيها بصح..ما تجيبوا والو
    - عزيزة: حنا ما عندناش مشكلة عادي المهم نتجمعوا بوحدنا و على راحتنا (لوحدنا)
    دنيا- ان شاء الله


    محمد و قرعة الكوكا فايدو- ايه فين مشيتي
    - امين: معاك
    - محمد: منين معايا...هاذي نص ساعة و انا تنهضر معاك و انت حال فمك و مغيب
    - امين بزفرة: مخنوق و طالع ليا الدم و ماحاملش راسي (ما طايق نفسو)
    محمد- علاش مالك? اه ايمان
    امين- ما عرفت اش غندير معاها
    محمد- هضر معاها و هني قلبك
    امين- نهضر معاها? اش نقول ليها? الهضرة د المسلسلات ديال والو? صبري عليا نقرا و نكون راسي و وو.... متاكد غادية ترفض و اذا ما رفضاتش.. اصلا انا ما يمكنش ليا نقبلها ليها و انا ما عارفش امتى نقدر نكون راسي
    لا ما يمكنش ..ايمان مستواها اكبر من هاذ التخربيق (الخرابيط) ما يمكنش ليا نربطها بيا و انا ممتاكدش واش نقدر نوفي بعهدي او لا ...ايمان
    ..قاطعو محمد- و انت علاش تقرر بوحدك..هضر معاها ,صارحها و خليها هي تقرر
    - امين: ولكن فهم ا صاحبي فهم
    - قاطعوا محمد: ما عندي ما نفهم.. ملي انت عارف هاذ الشي علاش خليتي راسك تبغيها من الاول و علاش جريتيها معاك حتى هي..دابا هي غتقول عليك اناني و كذاب و عندها الحق لانك ناوي تتهرب منها
    - امين بغضب: محمد جمع راسك..انا ماشي بحال هكذاك و انت اكثر واحد عارف شحال تنبغيها و عارف بلي تنموت عليها و انا ملي بغيتها, ما تقصدتهاش بغيتها هكداك من قلبي و بلا ما نشعر
    - محمد: سمح ليا و لكن بقات فيا, حرام عليك البنت محترمة و ما تلقاش احسن منها و ..ما عرفت..ما عرفت حياتك و انت حر فيها
    - امين: خليها على الله


    دخل امين لبيتو (غرفتو) و من بعد ما صلى العشا..اتكى على ناموسيتو (سريرو) و عينييه فالسقف و مشا بالو لعندها..تفكرها كيف شافها هاذ الصباح..كانت قمة في الجمال و النعومة كيف ديما..لابسة شوميز شيبي (قميص ازرق فاتح) و سروال رمادي غامق و هازة شعرها الاحمر المتموج لفوق و حاطة فشعرها بروش ازرق ..الازرق تيهبل على بشرتها البيضا الصافية ..لكن ماشي غير زينها اللي قاتلني..كلها تتسالي معايا..برائتها..اخلاقها..تعاملها مع صحاباتها..ابتسامتها اللي تتحمقني و صوتها ااااااااااااااااااه من صوتها كيزلزلني
    يا ربي شنو ندير معاها مستحيل ننساها..عمر شي وحدة ما قدرات تحرك فيا الشعرة كيف ما بغات تكون..شفت ازين منها و لصقوا فيا ازين منها و حتى وحدة فيهم ما قدرات تشغلني و جات هيا فدقيقة غلباتني
    يا ربي تجمعني بيها برحمتك يا ربي و تجعلها من نصيبي..يا ربي

  • #2

    - ايمان وهي تبوس امها: السلام عليكم ..ماما كيدايرة
    - فاطمة(امها): الحمد لله سيري تاكلي مع الاولاد فالكوزينة (المطبخ) مريم وجدات كلشي و راها عمتك فاطمة جات فالعشية تدوز عندنا شي ثلث ايام
    عمة ايمان هاذي مطلقة من اعوام ..طلقها راجلها لانها عاقر و رجعات سكنات مع اختها فمدينة اخرى و مولفة (متعودة) منوقت لوقت تجي لبيت ولد عمها (ابو ايمان) تقضي معاهم ايام تبدل فيها الجو
    - ايمان: مرحبا بيها ..واخا من بعد ما نصلي نسلم عليها و نمشي ناكل
    و هي نايضة (قايمة) دخلت عمتها اللي كانت تتصلي فالصالون ..
    -ايمان و هي تتسلم عليها: اهلا عمتى..زارتنا البركة..كيدايرة و كيدايرة عمتي عيشة و ولادها
    - عمتها: الحمد لله ربي يخليك كلنا بخير..و انتي كيدايرة الصحة و كيدايرة مع القراية
    -ايمان: الحمد لله ها حنا ما بقلى والو
    -عمتها: ايوا الله يعاونك ا بنتي و ينجحكم كاملين
    -ايمان: اللهم امين

    كانت ايمان غادية تخليهم لوحدهم ملي فكرت تستغل وجود عمتها باش تطلب من امها تخليها تمشي لحفلة دنيا ..رجعات جلسات حدا مها و قالت ليها : ماما بغيت نمشي عند دنيا نهار السبت دايرة حفلة غيكونوا فيها البنات كاملين و بغيت نمشي..عافاك قولي اه (نعم)
    ضحكات امها من كل قلبها و باستهزاء جاوبتها: اه واخا سيري و لكن ما ترجعيش بقاي عندهم ديما هههههه ياك ما سخن عليك راسك ا بنتي ?او حماقيتي?..انا من امتى تنطلق لبناتي يمشيو فين ما بغاو و رجلي ماشي فوق رجلهم?
    - ايمان: و لكن ماما
    -امها: صافي بلا كثرة هضرة بلا فايدة, سيري لشغالك و لقرايتك و خليني مع عمتك بوحدنا
    -عمة ايمان: علاش ما تخليهاش..خليها ياك البنات اللي معاها تتعرفيهم و عارفة دار البنت فين جات?
    -ايمان: اه تتعرفهم, كلهم تيجيو عندي, و تتعرف ام حنان من زمان و حتى هي غادية تكون حاضرة
    - ام ايمان بتوتر: فاطمة ما تحاوليش ..بناتي ..
    -قاطعتها : عارفة و لكن دابا كبروا و تبارك الله عليهم بعقولهم و مادام رضيتي على صحاباتهم, فمعناها انهم بنات مزيانيين, ايوا علاش ما تخليهاش تمشي لعندهم?
    -ايمان وهي تتبوس ايد امها و احساسها انها ممكن لاول مرة فحياتها توافق:عافاك ا ماما عمتي عندها الحق و انا ديما تنقولها ليك..صافي (خلاص) كبرنا و عارفين نحضيو (نحصنوا) ريوسنا (انفسنا)..ما عندك ما تخافي علينا..و زيدون (زيادة) دنيا ما عندهاش اخوتها رجال كبار..عندها اخ واحد اصغر منها و مني و غنكونوا مجموعة د البنات بوحدنا و امها مع جاراتها بوحدهم...عافاك ..انا غنقول لحنان تدوز لعندي, عاد نمشيو لعندها..عافاكي وافقي
    سكتت ام ايمان لفترة و من غير رضى قالت: واخا و لكن حنان تدوز لعندي و عطيني نمرة تيلفون دار دنيا فايدي
    نقزات عليها ايمان و حضناتها و هي كتبوس فيها بجنون و هي ممصدقاش خخخخخخخخخخ, البنت حماقت ملي جاها الافراج و نقزات على عمتها حتى هي تتبوس فيها
    و هي تقول ليها امها: دابا ضرجي (الجيم مصريةو المعنى قلبي) عليا وجهك لا نبدل ريي
    ما كملاتش الجملة حتى غبرات ( اختفت) البنت من قدامها خخخخخخخخخخخخخخ
    ********************************



    السبت فالعشية فدار ايمان
    - مريم (اخت ايمان): سربي (اسرعي)..حنان من شحال و هي كتسناك
    - ايمان: صبري 5 دقايق و انا معاها..عطيني صاكي (شنطتي) و صندالتي (عزكم الله)
    كانت ايمان لابسة او نسومبل جينز ازرق غامق مع بلوزة وردية و حاطة مكياج خفيف بزااف و خلات شعرها مطلوق على راحتو و متزينة بساعة وردية و اونسومبل حلقات و سلسلة عنق على شكل فراشتين متشابكين.
    طلات لمرة اخيرة على راسها فالمراية و خرجات.لقات حنان جالسة مع امها و عمتها و سلمات عليها
    - حنان: هاي هاي على لالا (لا لا معناها مثل الشيخة) ايمان..عيني عليك باردة..تتحمقي
    - ايمانز ربي يخليك ا الزين ..حتى انتي تبارك الله عليك جيتي غزالة

    حنان صديقة ايمان من ثاني ثانوي و بالاصل كانوا كيقراو فمدرسة ابتدائية وحدة و ساكنين فحي واحد و ملي انتقلوا دار حنان لحي ثاني انقطعات خبارهم

    - حنان: صافي نمشيو راه تعطلنا على البنات
    ام ايمان بتهديد لانها ما زالا ما بلعات خرجة بنتها بوحدها: ايمان ما تنسايش 6 و نص تكوني هنا
    باست ايمان راسها و ايديها بالزربة (بسرعة) و هي خايفة لا تبدل رايها و قالت ليها: انا غنكون هنا قبل ان شاء الله
    و سلموا على عمتها و خرجوا

    فدار دنيا كانت الموسيقى خدامة و البنات كلهم وصلو و كانت كل وحدة فيهم اكثر اناقة من الثانية..جلسوا فالصالون و خذاو راحتهم فالجلسة و بدات رسميا جلسة الهضاضر و التبرجيج (الجيم مصرية و معناها الحش)

    - دنيا: ايوا ليلى..عاودي لينا على يوسف..شخبارك معاه
    - ليلى: اش غنقول ليك, ممممممم شفتو اليوم ملي كنت جاية لهنا..باقي الحال على ما هو عليه..دزت من حداه و كان تيخرج الطوموبيلة (السيارة)من الكراج ..ملي شافني و قفها فالنص و نزل منها و دار بحال الا غادي باش يجبد شي حاجة من الكوفر اللوراني (يطلع شيئ من ورا)
    - ايمان: هههههههه تحفة ذاك السيد عندك
    - ليلى: بحال الا ديالك انتي حسن منو ...راكي شفتيه فالصباح اش دار ...تزنجات ايمان و قالت
    - عزيزة: اش دار ..انا الصباح كلو معاها, ما شفت والو
    ليلى و هي كتضحك على ايمان : كنا واقفين انا وياها و حنان كيف العادة حدا الشجرة المعلومة و هو واقف مع صحابو جهة الباب..شوية هو يخليهم و جا وقف قدامنا و حط ايدو على الشجرة, اتكى عليها و دار لجهة ايمان و شاف فيها ديريكت فعينيها و بقاو شي دقيقة هاكذاك ههههههههههههههه حسيت بايمان حتى النفس قطعاتو و فجاة هبط ايدو و مشى رجع لعند اصحابو و هو غيطير بالفرحة بحال الا ما عرفت اش دارهههههههههههه

    انفجروا البنات بالضحك و هوما كيتخيلوا المنظر الغريب و كملت ليلى و هي كتموت بالضحك ههههههههه عرفتو و الله حتى فيلم صافي هههههه ما عرفت السيد اش من جن ضربوا و شنو قال ليه راسو و لا شقصد بذاك الفلاش اللي دار
    ايمان و هي تتضحك حتى هي على هبال امين و طريقة ليلى : هههههههه واخا عليك يا البرهوشة ..شوهتينا..المهم..كلهم بحال بحال ..حماق ههههههه
    -عزيزة: لا و لكن هاذي واااعرة.ههههههههه
    -حنان: ههههه كون شفتيه..حنا ما فهمنا والو..خلانا مبهوتات
    -ليلى: و لكن الصراحة كيهبل..شوفتو كانت واعرة..انا و حمقاتني.. و زادت و هي كتشوف بنص عين فايمان:حسب لك احم احم ...شي ناس
    شيرات عليها ايمان بمخدة( رماتها بمخدة)و هي مزنجة: صافي درتي لينا فضيحة
    و ضحكوا البنات على هبالهم ...شوية و ناضت دنيا بدلات السيدي و حطات cdديال جدوان و قالت ليهم: البنات, ما محتاجينش عراضة (عزومة) ..ما بغيت نشوف حتى وحدة جالسة
    و ما عاوداتهاش كلشي تحرك مع الموسيقى الشعبية و ناضوا يشطحوا و انواع الهبال و الضحك...و على هكذا كملوا عشيتهم بين شطيح و مزاح و قص خخخخخخخخخخخخ



    و مرات الايام و جات وقت الامتحانات......

    خرجات ليلى و تمشات لعند البنات اللي كانوا كيتناقشوا على الاختبارات و هي الدخان خارج ليها من وذنيها بالفقصة (الغيظ)
    -ايمان: ليلى مالك..اش طرا?
    -ليلى: ذيك بنت الذين ديال امال..شوية و كنت غنتفها
    -ايمان: علاش شنو دارت ليك?
    -ليلى: سولاتني على واحد السؤال..قلت ليها ما زال ما وصلت ليه..ملي نوصل ليه غنقول ليك جوابو..هي تقول ليا لا دابا بغيتو..قلت ليها لا حتال من بعد..هي تحط ليا التحجيبة (البرشام) فوق الطاولة و قالت ليا دوري بالاحمر على الجواب
    -عزيزة: ا ويلي على مسخوطة..ياك ما حصلاتك الاستاذة?
    -ليلى: شوية و كنت نحصل..عرفتي بغيت ناكلها
    -ايمان: ههههههههههه صرعاتك خخخخخ و الواعرة (الاروع) هي عندها التحجيبة و ما عارفاش شناهو الجواب..مكلخة بالجهد (غبية بقوة) هههههههه
    -ليلى: انتي تتضحكي..ما شفتيش انا اللي كنت غنمشي فيها
    -عزيزة: ههههههههه صافي نساي
    -ليلى: لا و الواعرة..ملي خرجنا ..جات عندي و هي هازة نيفها (انفها) للسما و قالت ليا..الا (اذا) عقلت عليك فالعربية دفلي عليا (اذا ساعدتك فالعربية تفلي عليا).....وا شوفو يا اختي اللي ما تيحشم..توريني فالعربية بحال الا جدها هو سيبويه..(قالت تغششني فالعربية كما لو ان جدها هو سيبويه)
    -عزيزة: ههههههههه ما كتقشرش (ما عندها قشرة وجه تخاف عليها تطيح يعني وجهها مغسول بمرقة خخخخ)
    -ايمان: قلبي عليها و ما تسوقيش '(لا تهتمي) دابا ترجع تطلبك فالفخونسي
    -ليلى: ذاكشي اللي تنتسنى باش نجاوبها بالفعايل على هضرتها الخاوية
    -ايمان: ياك ما غتعطيها اجوبة غلط هههههههه? هي ما غتدي ما غتجيب (ما راح تلاحظ)
    -ليلى بضحكة شريرة:ههههههههه فكرة عندك
    -ايمان: لا حشومة, انا غتنضحك, عنداك تمشي تديريها بصح(اياكي تمشي تعمليها)
    -ليلى: لا, غير غنمرضها مزياااااااااان و نخليها تسنى تا تقرب الحصة تسالي عاد نعتقها
    -عزيزة: التعذيب هههههههههه
    -ليلى: باش تتعلم تنكر الجميل
    ههههههههههههههههههههههههه


    مرت ايام الامتحانات كيف البرق و الحال على ما هو عليه لابطالنا نظرات جميلة و التفاتات ملحوظة و ايضا توتر من القادم و جا وقت حصاد العام (الفصحى كتقاتل عندي خخخخ)

    تجمعات الكليك كلها عند لوحة النتائج و الكل فرحانين و تيهنيو بعضياتهم الا ايمان اللي كانت واصلة معاها للعظم من التوتر و العصبية
    جراتها ليلى برا الكليك و لحقات عليهم عزيزة ..

    -ليلى: ايمان مالك?
    -ايمان: والو ..ما ماليش
    -عزيزة: ايمان بلا ما تصدعي راسك, الا مكتاب ليكم شي خير, راه حتى حاجة ما تفرقكم
    -ايمان و الدموع متحمعة فعينيها و رافضة تخليهم يخرجوا : اللي طعني انه حتى كلمة مبروك ما قدرش يقولها ليا..ما طلبت والو..ما طلبت منو حتى حاجة زيادة عليها..فقط يقولها و ذيك الساعة نتفرقوا..عالاقل نكون تاكدت باللي اللي كان بيناتنا ماشي وهم ...عرفتوا باش حاسة?حاسة بالقهر..حاسة باللي كنت اغبى وحدة فالعالم و انا زعما مولاة العقل..ما بغاتش تهضم ليا..كنكرهو..بغيت ربي يلاقيني بيه و نوريه النجوم بالنهار..

    و شهقات بالبكا و حضناتها عزيزة و هي كتمسح على راسها و دخلاتهم ليلى لقاعة خاوية

    حسوا البنات بالم كبير على صاحبتهم و هوما اللي عمرهم ما شافوها بهاذ الحالة و لا عمرهم شافوها ضعيفة و مفضوحة المشاعر بهاذ الطريقة..حسوا بالقهر عليها و بالغضب على امين, اللي ما كلفش راسو حتى يبقى لغاية ما تاخذ ايمان نتيجتها من عند المعيدات و اختفى......



    دقت زينب (ام امين) على باب بيت امين, بعد ما سمعات صوت غريب بحال الا شي حد ضرب فالحيط و ما جاهاش جواب ...عاود دقات و شوية و خرج ليها امين و حالتو حالة..لحيتو طالعة و الهالات تحت عينيه كحلين و منفوخين
    -زينب: ياك لاباس ا ولدي..ياك ما طحتي?
    -امين: لا والو ..
    -زينب: و اش هاذ الحالة اللي انت فيها اولدي?..علاش ما بغيتيش تقول ليا شفيك?...
    -امين: ا الوالدة, عييت ما نقول ليك ما فيا والو, غير العجز و صافي و دابا شوية تفوتني هاذ الحالة
    -زينب: الله يهديك ا ولدي ..خرج بدل جو و شوف صحابك و حيد عليا هاذ المنظر اللي انت فيه و تهلا فراسك(اهتم بنفسك)
    -امين: واخا ا لالا ..ما يكون غ خاطرك...
    و باسها على راسها و رجع لبيتو و دور عينيه فيه و هو تيحمد ربي اللي ما شافتهاش امو و لا لاحظات الالم اللي فيه من ايدو اللي خبطها بالجهد فالحيط قبل ما تدق عليه..كانت البيت كلها مقلوبة و كانها اشهر ما تجمعاتش ...شاف انعكاس وجهو فالمراية و شاف حالتو و حشم اللي خرج ثاني لعند امو بذيك الحالة ...

    جلس عند بيروه (مكتبو) و داتو افكارو ثاني لعندها..تفكر بطعنة فالقلب للمرة المليون اخر مرة شافها يوم النتائج ..تفكر كيف كانت كي عادتها رووعة بطلتها البسيطة الناعمة و تفكر ملامحها اللي انحفرات الى الابد فقلبو و عقلو..كانت ذاك النهار منتظرة منو ردة فعل.. كلشي فملامحها كان تينطق بيها..


    تقريبا هرب منها ذاك النهار..هرب من نظراتها المتسائلة والمتهمة ليه و رجع سد على راسو فبيتو و هو منهار.. بارادتو انهى كل شي و هد كل ما تبنى بيناتهم فهاذ السنة...عفط (داس) برجلو على مشاعرو و قلبو و اختار ينهيها من حياتو..لكن ما قدرش و لو ثانية ينهيها من افكارو..خيالها و صورتها ملازماه ليل نهار و مطيرة النعاس من عينينه.
    تفكر هضرة محمد اللي كان يقول ليه يخطبها و يضمنها ليه و فكر بقلق انه يمكن يكون على حق..و لكن مستحيل... انا بغيت نقرا و نتخصص فالبورصة و قرايتي لازمها وقت طويل و خاصني نكون راسي ماديا باش نقد باسرة ..عالاقل خاصني 10 سنين لهاذ الشي ..ما يمكنش نكون اناني لدرجة نخليها تسناني هاذ المدة كلها..مستحيل

    تنهد بعمق و نفض افكارو و فكر بصوت عالي و بحزم : اللي درتو هو الحل..و الا كان ليا فيها نصيب..مسير ربي يجمعنا ان شاء الله
    ناض جمع بيتو و غسل و توضى يصلي باش يخرج يشوفو صحابو اللي من زمان ما شافهوم و فقلبو غصة ان اللي باغي يشوفها من كل قلبو بعيدة عليه بعد السما عن الارض...












    كانت ايمان متكية و حاطة السماعات فودنيها تتسمع ل لو اننا لم نفترق لكاظم و الدموع فعينيها..
    لو اننا لم نفترق
    لبقيت بين يديك طفلا عابثا و تركت عمري في لهيبك يحترق
    لا تسالي العين الحزينة كيف ادمتها المقل
    لا تسالي الطير الشريد لاي اسباب رحل
    رغم الرحيل..رغم ما فعلت بنا الايام
    قلبي لم يزل..يحيا و حيدا بالامل
    انا يا حبيبة كل ايامي
    قتيلك في الهوى

    ما قدراتش رغم الالم و الغضب, الا انها تقر بينها و بين نفسها ان امين كان على حق فتصرفو و كرهات انها كانت مغيبة حقيقة صعوبة نجاح قصتهم فظروفهم ..لكنها ما قدراتش تحيد من قلبها الغضب عليه..سمعات صوت التيلفون و ناضت تجاوب

    - ليلى و هي كتغوت و حلقها غيخرج من التلفون: هضر معايا هضر معايا..ايمان عتقيني هضر معايا
    -ايمان بدهشة و فرح عارم: شنو? امتى? عاد دابا?
    -ليلى: اه دابا(الان) يلاه(توني) دخلت للدار قلتها لماما
    -قاطعاتها ايمان: مبرووووووووووك مليون مرة مبروووك و اخيرا ...تستاهلي و الله.. ههههههههههه ليلى غادية تزوجي ههههههههههه مبرووووووووك
    -ليلى : ههههههههه الله يبارك فيك ma puce =حبيبتي, عرفتي هههههههههه فلاشات هوما دار (عمل) باش يهضر معايا و اختك غتموت, ما عرفت لا ما نقول لا ما ندير هههههههه, خصني نعاود ليك بالتفصيل الممل
    -ايمان: خذي طاكسي و جي عندي دابا
    -ليلى: ما تحتاجيش تقولي..انا جاية

    حطات ايمان السماعة و هي طايرة بالفرحة لصاحبتها و ما دازت (مرت) 10 دقائق الا و هي عندها..سدوا باب البيت عليهم و جلسات ليلى تعاود (تحكي)لايمان..

    -ليلى: كنت راجعة انا و اختي من المكتبة اللي فالمعاريف, شوية و صونا تلفون اختي و كانت صاحبتها بغاتها تمشي لعندها ..قلت ليها تمشي و انا غنكمل للدار..هيا هاذيك, انا غادية داخلة لدربهم, بانت ليا طوموبيلتو فالكراج عرفتو كاين..
    صافي كملت طريقي عادي و انا حانية راسي... شوية و انا نلقاه حدايا..عرفتي تخلعت (ارتعبت) ما عرفتو منين خرج ليا..
    -ايمان: هههههههههههههه قلت ليك جن
    -ليلى: جن يركبك..الله ينجيه.. سكتي خليني نكمل
    -ايمان: ياك ا بنت اللذين ..صافي قلبتي علينا
    -ليلى: هههههه كلشي الا الزين الصافي .. ما نعقل على حد على قبلو
    -ايمان: الله الله..الحب و ما يدير... سعداتو..(نيالو) هههههه
    -ليلى و هي مزنجة : صافي(خلاص) ما تحشمينيش
    -ايمان: ههههههه ويلي ويلي عشت و شقت ليلى مزنجة
    -ليلى : ايه ..جمعي راسك ..علاه مالي راجل ما تنحشمش?!
    -ايمان :هههههههه لا حاشا بنت, غير وجهك صندالة عزك الله(عزكم الله)
    -ليلى: الصندالة هي اللي غننزل بها عليك الا ما سكتيش و خليتيني نكمل
    -ايمان: هههههههههه كملي
    -ليلى: ايوا, بقى ساكت و انا ساكتة..مليت و انا نزيد خطوة باش نكمل طريقي..هو يوقفني, عيط عليا بسميتي
    - ايمان و هي مركزة معاها- الله الله كون راكي (تلقاكي) ذبتي خخخخخخخخخ
    - ليلى: لهلا يوريك (الله لا يوريك) الهوا تقادا (خلص) ذيك الساعة
    - ايمان: هههههههههه يا عيني على يوسف و ما داير (عامل) فيك..كملي كملي
    -ليلى: ايوا, بدا تيلعثم , شوية قال ليا: سمحي ليا اللي زعجتك و تجرات عليك هكذا..بغيت نهضر معاك الا سمحتي ليا
    قلت ليه تفضل هو يقول ليا شكرا ,انا بغيت نقول ليك غير انني هاذي مدة ماشي قصيرة باش شفتك, و بصراحة عجبتيني و دخلتي ليا لخاطري و ظليت تنراقبك مدة طويلة و سولت عليك و على داركم...سكت شوية و كمل ..انا بصراحة بغيت نتقدم ليك..انا هضرت مع دارنا عليك و بغيت نشوف والديك و لكن قبل بغيت نعرف رايك
    -ايمان: باش جاوبتيه?
    -ليلى: سكت حتى قلت فخاطري غيمل و لا يتسحاب ليه (يظن) راني زيزونة (بكما) و يمشي فحالو ..ما عرفت ما نقول ..
    -قاطعاتها ايمان: ههههههه كاع (كل) الهضرة اللي فيك و ما لقيتي ما تقولي?!!!!!
    -ليلى : هههههه اه تقولي لساني تشل و الvocabulaire (القاموس) مشا خخخخخخ
    -ايمان: هههههههههههههههههه
    -ليلى: المهم, اخيرا خرجات ليا الهضرة بصوت تقولي ماشي ديالي ههههههه خرج زوين و ناعم هههههههه
    ايمان- هههههههه, كتضحكي يا الهبلة ..عنداك غ شي نهار تنساي راسك و تهضري معاه بطريقتك معانا..و الله تيهرب خخخخخخخخخخخخ
    -ليلى: ههههههه لا ا ويلي ...ما لني حمقة!!
    -ايمان: و ا ما نعرف..معاك انتي كلشي ممكن
    -ليلى: هههههه ايوا الله يستر...نكمل ليك...قلت ليه حتى تجي مع والديك ان شاء الله و يكون خير
    -ايمان: برافو..ثقلي و ثبثي مع راسك ههههه
    -ليلى: سكتي......هو يقول ليا..ان شاء الله..قريب غنتصل بداركم باش ناخذ موعد مع الوالد ديالك
    قلت ليه ان شاء الله..و سمح ليا دابا خصني نمشي...قال ليا اه معلوم و مرة اخرى سمحي ليا اللي ..ما خليتوش يكمل و قلت ليه و انا مبتسمة ما كاين باس..بالسلامة و ردها ليا و طرت للدار ماشي غير مشيت هههههههه

    ما جاوباتهاش ايمان و بقات ساكتة تتشوف فيها بتمعن و فجاة نقزات عليها حضناتها و قالت ليها: مبرووووووك عليك ما شيغي (حبيبتي بالفرنسية)

    تزنجات ليلى و ضحكات و عينيها دامعين و قالت ليها: ما تتخيليش باش تنحس..عرفتي انك توصلي لشي حاجة اللي سنين هاذي و انتي كتحلمي بيها..توصلي لانك تكوني مع الشخص اللي سنين هاذي و انتي كتسنايه (تنتظريه)..ماشي احساس ..احاسيس هي..فرح, امل, خوف على عصبية لذيذة على ..اش غنقول ليك جنون و خلاص..احاسيس بغيتك تعرفيها ان شاء الله ا ايمان و غادية تعرفيها ان شاء الله.. انا متاكدة
    -ايمان و الطعنة تحركات فجرحها ثاني: ان شاء الله..
    و زادت بغمزة لليلى: خلينا فيك دابا مبروك عليك الزين الصافي ديالك ههههه تستاهليه و تستاهلى كل خير
    -ليلى: ربي يخليك ..العقبى ليك و لخواتاتك ان شاء الله
    -ايمان: امين


    انتشرات بسرعة خبار خطبة ليلى من يوسف لباقي البنات و كلشي فرح لليلى اللي كسبات قلوب الكل بمرحها و عفويتها و شخصيتها الجذابة..اللي خلات يوسف تعلق بيها اكثر ملي تكلم معاها اكثر

    مر اسبوع قبل يوم الخطبة, دوزوه ليلى و ايمان و عزيزة فالتحضير ليوم مجيتهم..ساعدوا البنات ليلى فشغل الدار و مشاو معاها لعند الخياط باش تختار قفطانها و حجزوا ليها موعد مع الكوافورة لنهار السبت... و وصاو ليها فالباتيسري (المخبزة) على بلاطوهات الحلوى و نهار السبت كانت معاها ايمان فبيتها..

    -ايمان و هي تتشوف فيها باعجاب: صداااااع تبارك الله عليك..سعداتو ههههههههه
    - ليلى و هي حشمانة و مخلوعة (خايفة): ياك ما الماكياج معيق (مبالغ فيه)
    -ايمان: لا بالعكس خفيف ظريف..ناتوغيل (طبيعي) و جاك فن مع الابيض

    كانت ليلى لابسة كيف عادة يوم الخطبة قفطان ابيض سامبل(بسيط) بفصالة مبتكرة ..مخيط بخيوط الصقلي (الذهبي) و حاطة مكياج خفيف..كحل و جلوص غوز بيش (وردي خوخي ) و ظل جفون بني خوخي و جاها غزال على لون بشرتها السمرة..
    فالصالون...كان يوسف بحال الا جالس على الشوك و هو كيتسنى المجاملات و المقدمات يساليو (ينتهوا)و يدخلو فالموضوع..

    -بات يوسف (بتشديد الباء): كيف ما قال ليك ولدي نهار اتصل بيك ..حنا جيناكم طالبين راغبين القرب فبنتكم لالا ليلى ان شاء الله
    -بات ليلى: مرحبا بيكم..الدار داركم..ولدكم ولدنا و بنتنا بنتكم..ولدكم جا عندي هاذي السيمانة(الاسبوع) للمحل و هضر معايا فالموضوع.. و الحمد لله ملي سولنا عليكم, كلشي ما ذكركم الا بكل خير
    -بات يوسف: الله يبارك فيك ا خويا..حتى نتوما و نعم الناس
    -بات ليلى: الله يبارك فيك..ربي يخليك....وانا هضرت مع البنت و تشاورت مع امها و هي موافقة..بجوجهم (اثنيناتهم) موافقين
    -بات يوسف بفرح: ايوا هي نقولو مبرووك..و نقراو الفاتحة
    -بات ليلى بابتسامة كبيرة: مبروك علينا و عليكم..الله يكمل كلشي بخير..و التفت ليوسف اللي كانت الضحكة واصلة لوذنيه و عينيه تيلمعوا بالفرحة مبروك عليك ا ولدي و ما نوصيكش على بنتي
    -يوسف: الله يا ودي ا عمي..بنتك فعينيا ان شاء الله..ما تحتاجش توصي


    و تسمعت من صالون العيالات (النساء) زغرودة كبيرة وصوت السلامات و التهاني اللي و صلات للبنات فبيت ليلى...


    تعليق


    • #3
      القصة فعلا رائعة
      سبحان الله اليوم فكرت باش ننقلها لهاد المنتدى بعد ما اعطيتي الاذن و سمحتي بنقلها للمنتديات اخرى
      تبارك الله عليك

      تعليق


      • #4
        الله يبارك فيك ا الزين

        ربي يخليك
        و تفضلي كملي نقلها..غننقل هاذ الجزء بما انني هنا و كملي انتي

        تعليق


        • #5

          تدق بابها و دخل عندهم خوها الصغير باش يقول ليها تخرج عند الناس يشوفوها..شافت فايمان و هي مصدومة ههههه و هي تقول ليها ايمان و هي حابسة الضحكة-:مالك صفاريتي
          -ليلى: يالاهي معايا
          - ايمان و عينيها خارجين-:شنووووو? تسطيتي !!!!( هبلتي) ..بسم الله عليك ا بنتي..انتي العروسة و غادية يشوفوك..انا شنو محلى من الاعراب تما?!!!! و زادت بغمزة و لا النجافة ? ههههههههههه, يالاه سيري و انا نتبعك بالصلاة و السلام على رسول الله..الا...

          قاطعاتها ليلى بمخدة جابتها ليها للراس ههههههههه

          -ايمان و هي تتصاوب (تعدل) شعرها اللي خربقاتو طيحتها-:هههههههه, ها هي ليلى اللي تنعرف رجعات خخخخخخخخخخ و على أي.. واخا ما نقولهاش انا , ملي غتدخلي عندهم حماتك العزيزة اللي غتقولها ههههههههههههه

          -ليلى و فيها البكية: عافاكي ا ايمان..الله يخليك..يالاهي معايا..... بليييييييز بلييييز..
          -ايمان بجدية : انتي را طار ليك الفريخ (بمعنى مخك طار)على ما بان ليا...سيري خرجي عند الناس حشومة تخليهم يتسناوك..و عيطات (نادت) محمد خو ليلى و قالت ليه : ها هي واجدة سير قدامها باش تتبعك لعندهم ..يالا ليلى سيري
          -ليلى بترجي : ايييمان..
          -ايمان-:شششش سيري و دفعاتها بشوية ناحية الصالون..



          دخلات ليلى ورا خوها للصالون الكبير اللي تجمعو فيه والديها و يوسف مع والديه و اخوه و قلبها كيضرب بجنون..و مع دخلتها تسمعات الصلاة على النبي عليه الصلاة و السلام من صالون العيالات اللي كانت فيه اختها و خالتها

          " الصلاة و السلام على رسول الله..لا جاه الا جاه سيدنا محمد..الله مع الجاه العالي"
          و تبعاتها زغروتة كبيرة هههههه ..سلمات على الجميع و هي حشمانة و ملي وصلات ليوسف..ترددت و فالاخير سلمات عليه ..يوسف حس بيها وضغط ضغطة خفيفة على ايدها اللي كانت باردة كي الثلج


          جلسات حدا امها و هي صافي ميتة من الخجل..قالت ليها مت يوسف( بض اليم و تشديدها) باعجاب – تبارك الله على عروستنا
          -ليلى و هي غتموت من الخجل: الله يبارك فيك ا خالتي..

          و بقات مت يوسف تتسولها على دراستها و صداقاتها و لقات بطريقة مدروسة باب باش تسولها على الطبخ و امور البيت بانها تسولها اذا كانوا من هواياتها..(هاذي حتى ام ما تتنسى تسول عليها خخخخخ)
          ليلى فطنات ليها و جاوباتها بذكاء و فعلا ليلى حاذقة بزااف فامور البيت كلها لانها هي اللي هازة دارهم من هاذ الناحية من فاش كانت صغيرة
          شوية و غمزات مت ليلى بنتها باش تنوض اللي كانت تتسنى ذيك اللحظة من قبل ما تدخل عندهم اصلا خخخخخخخخ

          و طارت لعند ايمان
          - ليلى و كلها تترعد: اووف كان قلبي غيخرج....يا ربي يا ربي يدوز كلشي على خير
          - ايمان: ان شاء الله ا الزين...اجي بعدا ما كنتيش ناوية تسلمي عليه و لا شنو?!! ههههه مسكين كان غيذوب فحوايجو (ملابسو) كون درتيها
          - ليلى: ما زجلتي والو (الجيم مصرية و المعنى ما فاتك شي) هههههههههه
          - ايمان بخبث-: وعلاه غتفلتوا مني
          - ليلى: ههههههههه
          - ايمان: ايوا قولي... اش طرا ليك?

          جلسات ايمان و هي حشمانة و قالت : ما عرفت خفت و حشمت و ارتبكت ما بقيت عرفت واش خصني (لازمني) نسلم عليه او لا
          - ايمان: ههههههههههههههههههه هاذشي كلو و هو عاد جا يخطب ..ملي غتكونوا بوحدكم اش غ يطرا..كون را غادي تقربليها (تنسفيها) عليه هههههههه
          - ليلى و هي مزنجة: لعن حسك ....سكتي فين ما نتفكر ذاك النهار..تنحس براسي غ نموت غير بالخلعة (الخوف)
          - ايمان: الله يحفظك و ينجيك ..واخا نتي ميتة ميتة و لكن حب ان شاء الله هههههههههههههههه
          - ليلى و هي ميتة خجل : بلاتي (مهلا) يا البرهوشة (البزرة)حتى تجي نوبتك(دورك) و تشوفي اش غندير ليك
          - ايمان و نظرة الحزن رجعات لعينيها: حتال ذيك الساعة و يحن الله
          - ليلى: ايمان, وربي حتى عندي احساس كبير و انا احساسي عمرو ما خيبني ان ربي غيجمعكم و غتكونوا لبعض

          ناضت (قامت) ايمان بغضب من بلاصتها (مكانها): و شكون قال ليك انني اصلا ما زال باغاه..امين خرج من حياتي بخاطرو ..الله يعاونو اذن..ما حاقداش عليه و الله.. و لكن جرحني بانانيتو فكرامتي و مستحيل ننسى انه فضل ين..
          - ليلى: و لك..
          -ايمان: .. ما تقاطعينيش عافاك..اللي تيبغي فعلا تيدير المستحيل..انا ما طلبتش ما عرفت شنو..انا كنت مستعدة نتسناه شحال ما حتاج من وقت و مستعدة نصبر معاه على أي ظروف..و لكن هو ما همو الا راسو ..قرايتو و نجاحو..شنو اللي كان غيمنعوا ما انه يجمع بين هاذي و هاذي..والو ..غير هو انااااني..و عمر الانانية ما تتلاقى مع الحب..اللي تيبغي تيضحي..هاذ الشي اللي تنعرف..صافي امين سيرة و تسدات (تقفلات)...امين ماضي و عمرو ما غيرجع لحياتي

          ناضت لعندها ليلى و حضناتها بكل حب و قالت ليها: الله يجيب ليك و لد الناس اللي يستاهلك و يرزقك كل خير يا رب
          - ايمان : امين ويتمم عليك عليك حتى انتي بخير و يرزقك الذرية الصالحة ان شاء الله و بغمزة ماكرة لانها حبات تغير الجو: مع حبيب القلب
          - ليلى و رجع ليها الخجل: ههههههه امييين



          مرات ايام الاستعدادات للحنا و للعرس بسرعة و خلالها..عاونوا البنات ليلى فالاستعدادات..كل نهار فالسوق باش يساعدوها تشري مستلزماتها من حوايج (ملابس) و مستلزمات الحمام من ارواب و باغفان و كريمات و ما نساوش الاحذية و الصنادل عزكم الله و ايضا الماكياج و الاكسسوارات

          حجزوا ليها عند كوافورة و بدات معاها جلسات تحضير العروس
          دارو معاها عند النكافات (الكاف تنطق جيم مصرية و هي المختصة فملابس العروس) و لقاو اخيرا نكافة عجبوهم الملابس اللي عندها و اتفقوا معاها على اللبسات ديال الحنا و العرس

          اختارو لديال الحنا: قفطان من الموبرا (مثل القطيفة) اخضر مطرز بالذهبي غامق تقليدي و معاها الاكسسوارات المصاحبة :

          (مفرش مكان جلوس العروس من نفس لون القفطان مع مخداتو + ستارة فنفس الثوب للحائط اللي ورا مكان الجلوس باش يكمل منظر الكوشة الخضرا التقليدية + غطاء بنفس الثوب لقالب السكر + مجموعة الاواني الخاصة بيوم الحنة و تكون من نفس الموديل و فيها طاسة الحنا..زلافة الحليب..علبة الكلينيكس..صحن التمر و حامل الشمعة ) و لجوانب الكوشة 2 طبيقات (الطبيقة هي السلال على شكل قبة) و اختاروها ايضا مغلفة بنفس لون القفطان و مطرزة بالذهبي.

          و اختاروا ديال العرس اللي هوما 4 تكاشط ..فضية و ذهبية و تركواز و وردية ثم اللبسة الامازيغية و اللبسة الفاسية هاذا غير عن التكشيطة البيضاء للعروس اللي دفعاتها ليلى على مقاسها عند مصممة و اختارت موديل مبتكر :

          ثوب القفطان(الثوب الداخلي) بدون اكمام منقوش كلو نقش خفيف و مخيط بالسفيفة و ثوب الدفينة (الثوب الخارجي) ابيض ناصع مطرز و منبت سطراس شفاف و الدفينة مفتوحة مخيطة بالسفيفة كلها و الاكمام مخيطة بالسفيفة من الوسط و الحزام عريض و مطرز و التكشيطة ضيقة من الوسط مفتوحة من الاسفل مثل الفستان (evasée )

          و الغوب بلونش (الفستان الابيض بالفرنسية) اللي كراتها من عند بوتيك مختصة و اختارت موديل ناعم بزاااف ضيق من الصدر و كلوش من الاسفل كله ابيض بتطريزات فضية خفيفة في الصدر و تطريزة رئيسية عللى شكل مثلث من الاسفل و الطرحة متوسطة الطول مشدودة بتاج ناعم و بسيط ..و المسكة من نفس الباقة اللي اختاروها البنات ورد ابيض مشكل بطريقة فنية رااااائعة

          و شافو مع النكافة بالنسبة للكوشة و اختاروها ليها عبارة عن محاكاة للهودج فضية باعمدة فضية و مكان جلوس العروسة كنابي canapé فضي عالي توصل ليه العروس بثلاث درجات و معاه على طول الجانبين..انارات تقليدية عبارة عن حاملي اضاءة مشغولين تقليديا ..و اختارو العمارية (الطيفور اللي تحمل عليه العروس) من نفس اللون و على شكل هودج حتى هي و طبعا الكوشة تتوصل ليها العروسة على بساط احمر


          بالنسبة للازهار و طاولة العروس تكفلات بيها عزيزة و ايمان من الفها لياءها و اختارو لوسط الكوشة على الدرجة الثانية باقة كبيرة بزاف روووعة كلها ورد ابيض فقط..حبوها تكون بسيطة وناعمة لان الكوشة منقوشة تقليديا و للدرجة الاولى و الثالثة ورد البيض منثور عليها كلها

          اتفقوا مع النقاشة (الحناية) حتى هي و مع المصورة على موعد الحفل

          و اختارت ليلى موديل الدعوات اللي خذاتو بسيط : ابيض مكتوب بالفضي و مزين من الحواف بنقوش فضية


          الباقي تكفلوا بيه الرجال (كراو القاعة مجهزة و اختارو الاكل اختارو ليه عدا التمر معمر باللوز و الحليب بما الزهر فالبداية .. حلوى السواريه مع العصاير+ اتاي مع اطباق الحلوى المغربية اللي كتمر على المدعوين كل ساعة + الدجاج محمر كطبق اول و نصف خروف مشوي كطبق ثاني مصحوبين بالمونادا (الليمونادة)و الفواكه مشكلة للتحلية ثم التمر و الشباكية و الحريرة و القهوة لللي بغاها ملي يقرب الفجر)

          و اختارت ليلى موديل الكيكة البيضا اللي خذاتها 4 طوابق بالشكوكولا من الداخل و بيضا كلها من برا و مزينة بورد ابيض بطريقة روعة..و اختارت لحلوى التززيع للضيوف موديل فضي بسيط و ناعم....طاولة العروسة تكفلوا بها البنات و زينوها بذوووق عالي و جات فنننة






          نهار الحنا كانت دار ليلى بحال شي خلية ديال النحل........






          استقبلوا البنات نساء الفاميلات (العائلات) بجوج (اثنيناتهم) بالتمر معمر و الحليب محلي بما(ء) الزهر و تكفلوا بتدواز (تمرير) الحلوى و العصير و من بعد الحلوى و اتاي عليهم
          كانوا مجموعين فالصالون الكبير, اللي فوسطو منصوبة الكوشة ديال العروسة و كانت فيها ليلى روووعة..دخلتها و من وراها صحاباتها بصوت الزغاريد و الصلاة و السلام على رسول الله (عليه الصلاة و السلام) كانت حكاية بوحدها..الاخضر مع الماكياج الذهبي اللي حطات ليها الماكييوز, جاها تحححفة..جات كي شي اميرة خارجة من شي حكاية بتاجها و اكسسواراتها التقليدية

          و البنات تيشطحوا على الموسيقى المغربية حداها و كل وحدة احلى من الاخرى و كانوا صحابات حورية متالقااااات

          ايمان لبسات قفطان ف لون تركوازي بحزام عريض, جاها على بياض بشرتها روعة و لبسات معاه فالرجلين صندالة عالية بلون ذهبي (ضروري الطول خخخخخخ) ..خلات شعرها الطويل محلول (مفتوح) على راحتو ..وجمعاتو فقط من جهة وحدة من الأمام ببروش للشعر ذهبي ناعم بزاااف..جات الحركة حلووووة بزاااف...حطات ازرق بدرجات خفيفة للعيينين مع لمسة خفيفة ذهبية مع كحل و احمر شفاه غوز بيش مع لمعة جلوص عليه..و حطات طقم ذهبي تقليدي ..جات انييييييييقة

          عزيزة اختارت ليها قفطان بنفسجي غامق, مطرز بلون افتح و تعمدات تختارو بسيط و بلا حزام..لأنها كتموت على البساطة ..و خلات شعرها الشاتان (الكستنائي) و اللي واصل لاول كتفها محلول ...و حطت مكياج بنفسجي فاتح للعيون مع الكحل و وردي شوية غامق للشفاه..و حطات حلقات ذهبية تقليدية و خاتم بسيط مع ساعة موف (بنفسجية)

          دنيا لبسات قفطان اسود ناعم مبتكر القصة; بحيث خلات الاكمام بثوب مغاير مزركش شفاف و جاها الموديل روعة..جددت قصة شعرها القصيرة و حطات ماكياج خفيف فقط جلوص و كحل و اعتمدات على العدسات اللاصقة اللي حطاتها فلون عسلي و جاوها روووعة مع لون بشرتها الاسمر

          حنان لبسات قفطان بيج (كريمي) بحزام عريض على الموضة مع ماكياج هادئ ذهبي و طقم ذهبي عصري خفيف..و جمعات شعرها الطويل شينيون خفيف..جات راقية و عصرية


          - دنيا: ليلى تبارك الله جات تتهبل..
          - حنان: اه الله يحفظها و يحرسها..جات غزاااالة
          - ايمان: ليلى من ديما غزالة بماكياج و لا بلاش
          - عزيزة: اه تبارك الله عليها..زينها سبيسيال (خاص)
          - دنيا: ايوا الصراحة, جاب ليها الله انسان مزياااان على قد نيتها الصافية و زيادة تيبغيو بعضياتهم
          -عزيزة: الله يكمل عليهم بالخير و يسعدهم ان شاء الله
          الكل- امييييييييييييين
          - دنيا بتنهيدة و ملامح كتضحك : اااااااه و العقبى لنا حتى حنا
          - حنان: هههههههههه مالكي كتنهدي..ناقصك الحنان خخخخخخخخخ
          - عزيزة: هضري على راسك ا ختي انا ما زالا ما باغا نتزوج
          - دنيا: مالكم كليتوني..مالها حرام?!!!! اه تنقولها بالفم المليان ..انا باغا نتزوج..شفيها الا بغيت نعيش حياتي!!!!!
          - عزيزة وحنان بمكر: اااااااااه تعيشيي حياتك .. دابا فهمنا خخخخخخخخ (الان فهمنا)
          - ايمان و هي رااحمة دنيا اللي تزنجات ز هههههه رخفوا (حلوا) على دنيا..ما قالت عيب..
          - دنياز تفو على برهوشات ..ديما بالكم غادي بعيد..ما قصدتش ذاكشي اللي نويتوا..انا تنهضر على لاموغ..لي سونتيمون (الحب..المشاعر)
          - عزيزةز واخا الالا ..هانا غندعي معاك..سيري ا دنيا..الله يرزقك بشي راجل يظل يتدفق (القاف تنطق جيم مصرية) عليك اموغ أي سونتيمون

          تفرقعوا (القاف تنطق جيم مصرية) البنات بالضحك و دنيا ندمات علاش حلات (فتحات) فمها و لا قالت شي حاجة و تقلقات (زعلت) عليهم و فالاخر ضحكات حتى هي على هبالهم لانها عرفاتهم غير شادين فيها (فقط لاعبين على اعصابها)

          كانت ليلى تتشوف فيهم و بغات تموت و تعرف علاش كيضحكوا..و تحلفات عليهم اللي مخليينها و مجمعين مع بعض بعيد عليها .. الفضول و ما يدير خخخخخخخخخخخخخ






          نقشات العروسة يديها و رجليها و نقشوا البنات كلهم من وراها يديهم, اللي اختارت النقش الفاسي و اللي اختارت الامازيغي و اللي اختارت الخليجي ...كل وحدة و ذوقها.. و كملوا العشية رقص و ضحك ..دردكوا (شطحوا مزيان ) على الاغاني الشعبية المغربية


          فاخر العشية ناضت ليلى بدلات القفطان الاخضر بتكشيطة بيضا مع اكسسواراتها .. و انتقلات للصالون الصغير مع بنات عائلتها و صحاباتها و بقاو النسا فالصالون الكبير..جلسات قدام المائدة المستطيلة اللي كانت عليها الشبكة اللي جاب ليها يوسف, مشكلة من طقم ذهبي فخم و سلسة (السلسلة هي مجموعة من 6دمالج ذهبية) بالاضافة لخاتم الزواج و مقدمة بشكل حلووو رتبوه بيها البنات

          جاو الاب ديال ليلى و راجلها و باه و خوه , اللي جابو معاهم كتاب العدول (الكاتبين العدلين) باش توقع عليه..و تم التوقيع..و ولات (اصبحت) ليلى زوجة يوسف على سنة الله و رسوله..

          انحنى يوسف على اذن ليلى و قال ليها: مبروك عليا حياتي معاك..تزنجات حورية و بابتسامة جاوباتو: مبروك علينا بجوج

          البنات ما فلتوش المنظر و ارخوه بالتصاور (الصور) و الفيديو خخخخخخ وخذات المصورة حتى هي صور للعروسة بنقشها و مع راجلها و والديها وسط الزغاريت و الصلاة و السلام..و بعد ساعة بدات الدار كتخوى (تفضى)



          كانوا البنات طيلة ايام الاستعدادات للعرس عايشين فعالم ثاني, كلو ضحك و فرحة و امل فالمستقبل...تاكدوا من باقي الحجوزات و اكدوا عليها..و كانت الاتصالات ليلية نهارية بين ليلى و يوسف خخخخخخخ

          - ايمان: وا صافي قولي ليه يقطع..غتملي منو قبل العرس
          - سمعها يوسف و قال لليلى: قولي ليها دخلي سوق راسك (اهتمي بامورك), ما بين الظفر و اللحم غير.. و سكت..
          - ليلى: ايوا حتى ل ايمان و وقف..عينيا هاذيك
          - يوسف بغيرة: و انا شنو الا كانت هي عينيك?!!!!
          - ايمان بغيظ: اش قال ثاني هاذاك ال..
          - قاطعاتها ليلى و هي حمرة من كلامو: اوووف, هلكتوني بجوج..دايرين كي المش و الفار (كيف القط و الفار)
          - يوسف: انا المش و غنتبعها و نشدها و ناكلها باش نتهنى منها ذيك الفارة اللي دايرة ليا القلق و مزاحماني على حبيبة ديالي

          ماتت ليلى بالضحك و حسات ايمان باللي الهضرة عليها و بغات تمرضو فحياتو و هي تقول ليها
          Viens que je t’embrasse ma chérie je vais rentrer chez moi
          (تعالي ابوسك حبيبتي انا راجعة البيت) و ناضت لعندها و باستها بصوت مسموع مواح مواح على الحناك (الوجنين) بجوج باش تغيظ يوسف اللي مات قهر منها ههههههههههه
          -يوسف بغيظ-:بنت اللذين.. دارتها بلعاني (متقصدة)..بغات تمرضني و تقهرني عليك
          - ليلى بمكر: باش (كي) تعرفنا حنا النسا ملي تنحطوا شي حد اذانا فبالنا; على شنو قادات (قادرات)
          - يوسف و هو فاهم المقصود: ممم.... ايوا اللي ما يديرش, ما يخافش (اللي ما يعمل شيئ ما يخاف)
          - ليلى: هههههه طبعا..لكن يا ويلو الا دار, او حتى فكر يدير
          -يوسف بنبرة اسرة: و هو يقدر ?!
          - ليلى صافي هنا ذابت..بزز (بالغصب)قدرات تجاوب و حاولات تكون نبرتها متعجرفة: طبعا لا
          ضحك يوسف من قلبو وقال: اه منك و من غرورك اللي غيحمقني..هههههه

          و كملو ليلتهم حتى الفجر فالهضرة و الضحك و بلا شك فكلام كلو غزل و حب ..

          تعليق


          • #6
            salam yalah kmilli al9ssa schw9ttiniyyi

            تعليق


            • #7
              [align=center]
              واااااااااااااااااااااااااااااااااو قصة زوينة بزاف و مشوقة بحال لراني متبعا فيلم ولكن سربي جيبي لينا الكمالة اصاحبتي دايرة لينا التشويق
              [/align]

              تعليق


              • #8
                pleaaaaaaaaaaaaaase kamliha 3afak

                تعليق


                • #9
                  كملي لينا القصة عافاك شوقتيني باش نعرف الكمالة



                  توقيع زهرة الليل :
                  اللهم أتينا في الدنيا حسنة وفي الأخيرة حسنة وقينا عذاب النار

                  تعليق


                  • #10
                    [type=593719]
                    ولالا نعيمة فين غبرتي ليلى ويوسف واقيلا دارو الوليدات وحنا ما زال ما حضرنا للعرس عفاك كملي القصة

                    [/type]

                    تعليق

                    المتواجدون الآن 1. الأعضاء 0 والزوار 1.

                    أكبر تواجد بالمنتدى كان 2,525, 26-09-2016 الساعة 21:58.

                    يعمل...
                    X