آجي نوريك كيفاش تنقصي عليك تمارة نهار العيد

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • آجي نوريك كيفاش تنقصي عليك تمارة نهار العيد

    باسم الله الرحمن الرحيم،

    كيدايريين يا الحبيبات مع التوجاد ديال العيد، عارفة كلشي حداك و خمل و حك الحيوط و الثلاجة و البوطة... تكرفيسة و خلاص. إيوا هادشي كله، و نهار العيد كلشي يولي حالتو بالدم وليدام و الدخاخن و عاوتني نبداوا حك ياما تحك حتى يطيبوا لينا لديدات.

    أنا الصراحة كنعيد عند الميمة العزيزة الله يحفظها و يطولينا عمرها.. وقولوا أمييين هههه حيت مسكينة عيات و ما كاين اللي عاونها. المهم ديما كنتكرفس فالحكان ديال الحيط و الأرض و خلاص البلاصة اللي فيها الحولي، كتكون معفنة، خصك تحكي بجافيل و تعاودي و ياترى تحايد الريحة. وعاد حنى كندبحوا في بيت التصبين وعندنا مشروك مع الكوزينة. فإما كنضطروا نخرجوا كلشي أو كلشي غادي توسخ. سمحولي طولت عليكم واقيلا ههه و صبروا هانا جايكم. واحد النهار طاحت علي هاد الفكرة حتى هرست لي الراس. و الفكرة ساهلة و رخيصة و من تما ارتاحيت بزاف,
    هاد الفكرة يا الحبيبات هي القلوعة ديال الميكة إيه الميكة دوك اللي كيتباعوا عشرة ب 10 دراهم و كيستعملوهم في العراضات كياكلوا عليهم و يرموهم.

    إيوا تبعي معايا آش كندير صباح العيد بهاد الميكة :

    أولا : كناخد شيفونة نسردها شوية بالماء وندوزها على الحيوط ديال المكان اللي غنذبحوا فيه، وكنلصق القلوعة عليهم كاملين
    [IMG]




    ثانيا : كنغطي البوتاجي والبلاكارات ديال التحت حتى هما مزيان باش ما يقيسهمش الدم


    http://www.anaqamaghribia.com/pic/im...ej0sp2431z.jpg

    رابعا : كنلصقهم على البوتاغاز و مكينة الصابون و الثلاجة

    http://www.anaqamaghribia.com/pic/im...55br9r3p3e.jpg

    http://www.anaqamaghribia.com/pic/im...p6j4tqk8y4.jpg

    -الصورة البوتاغاز تحركات هههه-

    المهم كنخلي الكوزينة كلها ملمطة وكتبري بالقلوعة. عاد كنحزم بيها اللي غادي يدبح واخا يكون لابس التزارة ديال البلاستيك القاصح و اللي غيخدموا معاه بما فيهم أنا باش يبقاوا التزارات و الحوايج نقيين ونقص من الفريك ديال الدم. و هاكا غير كنكملوا الدبيحة كنسيق الأرض هي الأولى عاد نحيد القلوعة. نرمي اللي موسخين و اللي مازالوا نقيين كنغطي بيهم الطبلة اللي غادي نقطعوا عليها الكبدة و المكان اللي غنعلقوا فيه البطانة و حتى الحيط اللي معلق الحولي قريب ليه.

    و الصراحة وااله العطيم إلى ارتاحيت ووليت كنكمل بزربة و ما نبقاش مداربة مع الحكان.

    و نزيدكم، هاد الفكرة ممكن تستعملوها في أي مكان، في السطح ، فلاكور، فالجردة وإلى كان الحيط حرش لصقوهم بالسكوتش لكن من الأحسن تستعملوا السكوتش اللي كيستعملوا الصباغة باش متخليش ليكم الحيوط فيهم اللصقة. وإلى كنت كتشوطوا الراس فالدار استعملوهم للشراجم باش ما يتغبروش والحيط اللي قريب باش ما يكحالش. وإلى كانوا عندكم المحابق ثقال غطيوهم باش ما يتغبروش.
    http://www.anaqamaghribia.com/pic/im...t2sr4dscgs.jpg


    أما بانسبة للناس اللي عندهم الضيق و كيجيبوا الحولي للدار، استعملوهم مع السكوتش مزيان للحيوط و الأرض عاد غطيوا الأرض بالكرتون اللي غتبدلوه يوميا باش ما تبقاش الريحة والوسخ.

    وإلا عنك الوليدات مشطونين، وكايمشيوا للكومبيوتر وقت الماكلة عليك بالبلاستيك لكن هاد المرة الغذائي :



    http://www.anaqamaghribia.com/pic/im...oeb5hbxo8k.jpg


    وما تنسايش التيليكوموند، حيت كياكلوا القطيبات وعينيهم في التلفاز


    http://www.anaqamaghribia.com/pic/im...dzvz08xhxx.jpg



    و في الأخير، ما تنسايش تلبسي القفازات البلاستيك باش تحافظي على ليديدات.

    هانا عطيتكم الفكرة، نتمنى تكون عجباتكم وتطبقوها فهاد العيد باش تنقصوا عليكم تمارة و تحاولوا على الصحة شوية.

    أرجو ما نكونش ثقلت عليكم بزاف و نتشنى شي دعيوات من عندكم ربي ينولي اللي فبالي و يسر لي أمري و فرج كربي,

    و السلام




  • #2
    تبارك الله عليك وخلاص الله يحفظك وااخة انا عندي سطاح واسع ما تلقاش مشكل

    تعليق


    • #3
      شكرا اختي بزاف على هاد الفكرة جبتيها لاصقة تحيتي لكي من مدينة خريبكة عاصمة الفوسفاط العالمية و شكرا

      تعليق


      • #4
        تبارك الله عليك وخلاص زعما ماعندي ما يتسالك و الله ينولك لي فبالك شكرا

        تعليق


        • #5
          tbarek alah 3lik fikra momtaza
          استغفر الله العظيم
          sigpic

          تعليق


          • #6
            الله يجازيك بخير يالله خملت لوالدة الكوزينة او حكيت ليها لحيوط او عندها بلاكار ابيض او قلت مع راسي دابا العيد كلشي يتكرفس والله فكرة جيدة جدا الله يجازيك بخير الالة الحادكة

            تعليق


            • #7
              زعما ماعندي ما نقول ليك الله انول ليك لي فبالك والله اجازيك كل خير

              تعليق


              • #8
                تبارك الله عليك
                حتى انا تقريبا كندير نفس العملية حتى الحولي كنفرشو ليه 2 ميكات كبار كنجمعو فيهم كلشي حتى الدم والبطانة مكيدوز والو حيت ختك في الغربة وكنتسناو حتى لليل عاد يمشي راجلي يلوحهم في شي منطقة بعيدة

                تعليق


                • #9
                  موضوع يستحق التثبيت
                  رائع غاليتي


                  معسكر لاستقبال رمضان بأبهى حلة وعلو همة
                  http://www.anaqamaghribia.com/vb/sho...42#post9973142

                  معسكر لاستقبال رمضان بأبهى حلة وعلو همة ( للدروس فقط )
                  http://www.anaqamaghribia.com/vb/sho...d.php?t=395421

                  تعليق


                  • #10
                    شكرا اختي,فعلا نصائح قيمة,عيد مبارك سعيد.

                    تعليق

                    الأعضاء المتواجدون الآن 2. الأعضاء 0 والزوار 2.

                    أكبر تواجد بالمنتدى كان 2,525, 26-09-2016 الساعة 21:58.

                    شاركي الموضوع

                    تقليص

                    يعمل...
                    X