إعـــــــلان

تقليص
لا يوجد إعلان حتى الآن.

جيت عاوتاني وهاد المرة بحلويات العيد ديالي كاملين يالله دخلو

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • جيت عاوتاني وهاد المرة بحلويات العيد ديالي كاملين يالله دخلو

    :s10295:
    السلام عليكم ورحمة الله وبركاته
    تبارك الله عليكم حبيباتي وعيدكم مبارك سعيد وتعيدو بالصحة والهنا ادا بقا لينا العمر
    هانا ديت عاوتاني نصدعم هاد المرة ببلاطو د الحلوة الي عدلت للعيد ان شاء الله
    وهاد البلاطو وجدتو باش نهبطو لعجوزتي ايوا قولولي ما تحشموش كيف جااكم
    اللهم ادمها نعمة يا رب













    وهادا حلا المريا حتى هو يصلاح لهاد العيد مع العصير
    هادا ديال الكاكاو والنيسكافيه


    وهادا بمداق الفريز زحيت ما لقيتش الفريز زوقت بالبنان




    السلام عليكم الغزالات وصباح الرباح على الناس الملاح
    نزولا عند طلبكن وخاصة طلب اختي بنت المغرب غادي نكمل بمقادير وطريقة حلا المرايا
    بالنسبة للحلا الاول
    الطبقة الاولى

    عندك اختياري اما طبقة الجنواز او بيسكوي انا
    عملت بيسكوي ماريا عملت 2 باكيات يعني 400 غرام كنطحنوه ونزيدو عليه 2 معالق الزبدة دايبة و2 معالق الحليب و2 معالق كاكاو حتى تتجمع العجين ديال البيسكوي وتكون شادة فراسها مزيان ونبدا نطلقها فطبسيل الفرن حتى تتسوى ونعوط من فوق بضهر المعلقة حتى تجي مزيانة
    ممكن تعمل الجنواز كيف الحلا التاني غادي نجيولو لان هناك نصاءح للجنواز باش يصداق
    نعمل الفران يسخن من فوق ونوجد الطبقة التانية
    الطبقة التانية
    2 ساشي ديال نيدو د 65 غرام مع 3 دانون مسوس و2 معالق السكر نخلطوهم بمعلقة و نعملوهم يتطحنو مع بعضهم ف مولينكس كيرجع عندنا خليط سائل
    كنكبوه فوق عجينة البيسكوي الي حضرنا من قبل وندخلوه للفران نعملوه بعيد على الشعله ونخليه الفوق شاعل ونخليواه واحد 10 دقايق على حسب الفران كل مرة نقيسوه بيدينا حيت كيجمد مع السخانة حتى يجمد مزيان غتحسيه بصبعك بلا ما يتحمر خصو يبقى لونه بيض
    نخرجوه من الفران
    ونوجدو
    الطبقة التالتة
    هنا عملت ربع ليترديال الما مع واحد فلان صغير وملعقة نيسكافيه وملعقة كاكاو والسكر على حسب دوقك انا عملت 3 كبار دالسكر
    ادا بغيتو تكون الطبقة عالية شوية على هادي خصك تعمل كاس كبير ونص د الما يعني ما كاملش نص ليتر و2 فلان
    نعملوهم فوق العافية حتى يغلاو مع التحريك ونخلياه يبرد شوية وعاد نكبوه فوق من خليط نيدو بالمعلقة يعني ماشي مباشرة للخليط نكبوه بشوية فوق المعلقة وهو غادي يهبط للخليط
    وندخلوه للتلاجة من الاحسن يبات ليلة باش يشبر مزيان ونقطعوه مربعات القياس الي بغينا ممكن تخليواه كيف هو او تزوقوه اختياري


    هنا بعد ما خرجتها من الفران كيف كتشوفو جامدة موقفة الطبسيل



    بالنسبة للحلا التاني فهو بمداق الفريز وبجينواز
    الجنواز عملت 3 بيضات كبار وممكن تعملو 4 موسطين 120 غرام السكر و120 غرام الدقيق
    نعزلو البياض على الاصفر وكل واحد نخدموه بحدو مع نص القياس د السكر
    نطلعو البيض حتى يطلع ونخدمو الاصفر مع السكر ونزيدو الدقيق والفاني ونضيفوه على البيض بشوية بالمعلقة د الخشب
    نعملوه ف طبسيل الفرن مدهون بالزبدة والدقيق وندخلوها الفرن حتى تطيب وتبدا تتحمر نطفيو لتحت ونشعلو لفوق واحد شوية باش تشد فراسها وتبدا فحال تتحمر ونطفي عليها
    ونخليوها تبرد ونوجدو الطبقة التانية فحال الاولى غير هنا عملت دانون فلوتي ديال الفريز وما زيدش السكر ومن بعد ما بردت الكيك عملت من فوقها الخليط ونفس العملية تدخلو الفران شاعل من فوق
    ملي خرجتها ستفت دواءر البنان من الاحسن تكون فاكهة اخرى فحال الفريز هو احسن ادا ما كانش نعملو الكيوي او الاناناس حيت البنان كيكحل ما كيصبرش
    الطبقة التاتلة عملت نص ليتر ديال مونادا بايطة ناقص منها كاس صغير يعني فحال السفن اب وعملت معاها 2 فلان وملون احمر وقطرات روح الفريز وعملتها فوق العافية حتى يغلى
    ممكن تعوضو هاد الشي بسيرو د الفريز او سيرو الرمان وتضيفولو الما حتى تحثلو على كاس ونص د الساءل وضيفولو 2 فلان وصافي
    ونخليواه يبرد شوية باش ما يقطعناش خليط نيدو ونعملوه فالتلاجة من الاحسن يتوجد بليلة باش عاد كيزيان






    صفحة الدروس الحصرية لفن الحلويات و الطرطات المناسبات
    http://www.anaqamaghribia.com/vb/sho...=443791&page=4



  • #2


    غريبة او سابلي المشوك
    المقادير
    250غرام زبده +150 سكر كلاصي سكر او روح الفاني 2 صفار البيض وواحدة كاملة
    نصف معلقه صغيره خميره الدقيق حسب الخليط

    نخلطو المقادير بالترتيب
    الزبده + السكر ثم الفاني و الصفاروالبيضة
    ثم الخميره و الدقيق
    نختفضو ببياض البيض

    نشكلو كويرات قد الكركاعه و نعملو فيها حفره من الوسط بالصبع
    ندوزوها فالبياض دالبيض ثم اللوز مقلي مهرمش او الكوك الي بغيتو ونعملو ف الوسط نص حب الملوكة مرقدة او قطع الفاكهة الميبسة اللون الي بغينا
    ادا ماكانش عندنا هاد الحب الملوك كندخلوها للفران هاكداك وحتى تخرج عاد نعملو الكنفتير اما الفريز او المشماش وادا بغينا اللون الاخضر كنعملو الناباش نسخنوه ونزيدو عليه قطرات الملون ونعملوه ف الحفيرة
    ندخلوها للفرن نخليوها شي 10 دقايق و نجبدو الطاوه بلا ما تخرج لبرا
    و نعاودو نوركو بشويه على ديك الحفر حيث كطلع مع الخميره و السخونه
    و غير بشويه لا تشتت لكم وادا بدات كتفرق من جناب كتعاود تعوطها غير بصبعك وترجعها تاني تطيب يعني مرة مرة خصك تطل عليها باش الخغرة الي فيها الحب الملوك ما تطلعش








    بالنسبة للبليغة والصريرة سبقلها طرحت ف المنتدى يعني مفهومة كيفاش كتعدل
    انا عملت اللوز وكل واحد يمكن ليه يعمل الي بغا الكاوكاو او البندق

    الحلوة البليغة والصريرة عملتهم ف مرة واحدة بنفس العقدة ونفس العجينة ديال الكعاب كنعمل شوية شوية
    العقدة نص كيلو اللوز مسلوق ومطحون مع رباع كيلو السكر وكنضيفو نص كاس صغير الزبدة دايبة و2 معالق كبار ما زهر وشوية المسكة ادا توجدت ورشة قرفة
    العجينة نص كيلو الدقيق و ملعقة كبيرة السكر كلاصي ونص كاس الزبدة دايبة ونص كاس المزهر وبيضة صغيرة
    بالنسبة للبليغة كنعملو قضيب العقدة وكنطلقو العجين ونعملو قضيب اللوز ونليوو العجين على القضيب ونلصقوه مزيان ونقطعوه معينات خص التقطيعة تكون مايلة نوقفو المعين وعاد نضغطو على واحد الجهة باش تجي فحال البليغة
    ونرشموها ونعملولها العقيقات ونخليوها حتى الغدا عاد نطيبوها وندهنها بالناباج حتى هي اختياري



    حلوة الكموسة او الصريرة
    كنطلقها بالمطلق ما تكونش رقيقة بزاف غلط من الكعاب كنفضل نقطعها مربعات بالناعورة حسن من الدوائر باش ما نبقاش نجمع العجين الي كيبقى ف جناب انا كنعملها مربعات وكنعمل الحشوة كويرة د اللوز ف الوسط وكنجمع لفوق باش تتشكل كموسة وكتبقى ليلة وكنتقبوها بالابرة ونطيبوها وملي تخرج اما نعلموها فالعسل او ندهنوها بالناباج
    بالنسبة للالوان الي ف الحاشية ملي طابت وبعد ما دهنتها بالناباج شديت شيتة رقيقة وكنعملها ف الملون وندوز على الحاشية فقط تدويزة خفيفة


    السابلي بالكنفتير
    المقادير ديال السابلي
    رباع كيلو الزبدة + رباع كيلو السكر نخدمهم مزيان نزيدو كاس الزيت و 3بيضات ممكن تنسميه بحامضة محكوكة او ساشي ديال فلان هاداك ديال الشينوس ههههههههه هاد البيسكوي عملت فيه 200 غرام اللوز مطحون بقشوره ممكن تستغني على اللوز ادا ماكانش موجود
    بعدا المرات كنضيف كاس صغير الكوك كيعطي حتى هو مداق مزيون
    المهم من بعد كنضيفو خميرة الحلوة والدقيق على حسب الخليط كتجي رطبة والعجين تكون خفيفة شوية
    ندردرو الدقيق فوق السطح ونطلق بالمطلق ونقطعها كيف بغينا اما دوائر او قليبات او على حسب المرشم الي بغينا
    وملي تطيب نلصقها اما بالكنغتير او الشكلاط او الكراميل
    هادي ملي خرجتها من الفران دردرت عليها السكر كلاصي عاد لصقتها بالكنفتير د التوت
    ممكن من بعدا تخرج تعملها الشكلاط الابيض وتزوقها بعقيق او بالشكلاط ملون بالملونات المهم الزواق على حسب الوجود

    طريقة اخرى كنعملها وكتعجبني ف المداق ادا ما فيا ما نزوق كنطلق العجين فوق السطح العمل وكنطرب البيض وندهنها بششوية البيض وندردر عليها الكوك مزيان وعاد كنرشمها وندخلها تطيب وعاود نجمع العجين ونطلق الي بقالي مرة تانية ونعمل نفس العملية وملي كتخرج كنلصقها بالكنفتير او الكراميل نسلي كتجي لديييييييييدة او تخليها كيفما هي
    بالنسبة ادا ما عندكش المرشم يمكن ليك ترشمي بكاس صغير او غلاقة مدورة د الزيت والقطع الي من فوق تقبيها بطوبو د الستيلو بيك وتعمل الدواور الي بغيت ان شاء الله تكونو فهمتوني

    هادي صورة من كتاب الحلويات




    صفحة الدروس الحصرية لفن الحلويات و الطرطات المناسبات
    http://www.anaqamaghribia.com/vb/sho...=443791&page=4


    تعليق


    • #3



      نجيمات البندق
      هادي عملت فيها البندق لك الاختيار تعمل الي بغيتي اللوز او الكركاع او الكاوكاو

      العقدة
      500 غرم البندق غادي نحمروه ف المقلاة شوية غادي ناخد 300 غرام نطحنوه ونخليه 200 للتزيين من فوق
      بالنسبة للتزيين كل حبة كنقسمها على 2
      نزيدو عليه 250 غرام السكر وشوية الزبدة نص كاس صغير تقريبا عينا ميزانا ونضيف الما زهر 2 معالق كبار المهم ما خصهاش تجي كتلصق خصها تكون مجموعة
      والعجينة تطلقها معوطة ما رقيقة ما غليضة تقطعها مدورة وتعمل الحشوة تم القطعة الاخرة وتضغط من الجناب مزيان وتعمل حبة البندق من فوق وترشمها على الدورة د الدائرة 7 رشمات تكون مسافة متساوية وتدهن بالابيض البيض باش تلصق البندقة مزيان وتخليها للغد وتقبها من تحت وتطيبها ف عافية مهيييييلة
      والصور توضح







      حلوة اللوز بالمرشم


      ممكن تعملها ف كويغطات صغار د الحلوة انا ما عنديش قلت بلاش
      العجينه:
      500 غرام دقيق + 125 غرام زبده ذايبه
      4 معالق ماء الزهر + معلقه كبيره سكر +قبصة ملح

      الزبده + الدقيق حتى يتخلطو مزيان
      عاد باش نزيدو باقي المقادير و نعجنو بالماء
      نعملوهم كويرات شي 6 متلا وتليوها فالبلاستيك حيت كتجمد دغيا
      لأن العجينه فيها الزبده غير كنطلقوها
      و نقطعو الاشكال اللي بغينا كيجي صعيب تعاودي دلكيها و تكوريها

      العقده:
      500 غرام لوز ممسوح و مطحون بقشوره + 250 غرام سكر
      بياض البيض كنبقاو نزيدوه شويه بشويه حتى تخلط العقده
      و شويه الفاني ....
      المهم نحصلو على عقده متجانسه و مكتلصقش فاليد
      نقطع الشكل اللي بغيت بالطابع
      و نطلق العجينه غلظ شويه من ديال الكعاب و نقطع اشكل بالطابع
      ناخد قطعه من العقده و نحطها بين قطعتين من العجينه وحده تحتها وحده فوقها
      و نضغط بشوية باش تشد و ننقشها بالنقاش و ندهن الوسط ديال الحلوى بالبياض ديال البيض و نلصق فيه حبة لوز ملي تخرج من الفران نعملها ف العسل مخفف او ندهنها بالنابج







      صفحة الدروس الحصرية لفن الحلويات و الطرطات المناسبات
      http://www.anaqamaghribia.com/vb/sho...=443791&page=4


      تعليق


      • #4
        تبارك الله عليك وسعدات عجوزتك بيك....
        الله يعطيك الصحة...وعيد مبارك سعيد ان شاء الله

        تعليق


        • #5
          ربي يخليك اختي ياسمينة الصغيرة وتعيدي بالصحة والهنا ويفرحك ربي بالي تمنيتي دنيا واخرة
          شكرا يا عسل على ردك وكلامك نورتي

          [IMG]
          حلوة اللوز والبسكوي
          اللوز 250 غرام فهو مطحون بقشوره كيبقى مهرمش شوية وملي كتطحنو كتحمرو انا حمرتو غير ف المقلاه د الرغايف فوق البوطة كيكس ماريا باكية ونص حتى هو مهرمش 30 غرام السكر الصقيل وملعقة الزبدة كبيرة وملعقة العسل وكريم فريش وعملت ف كسرولة عملت ملعقة كبيرة د الزبدة 50 غرام فوق العافية مع ملعقة كبيرة العسل وديك 30 غرام السكر وخليتهم يغلاو عاد ضفت داك الحك د كريم فريش سائلة وبقيت نحرك وخلتهم يغلاو وحيدتها وضفتها على خليط اللوز والصابلي وتبدا تجمعها ادا دات خفيفة ممكن تزيدي البيسكزي او شوية الكوك ممكن تعوض خليط الكريم والعسل والزبدة بحليب نسلي فحال كراميل وتجمع بيه صافي كتطلقها فوق سطح مدهون بشوية الزيت باش ما تلصقش وخليها تبرد مزيان من الاحسن عملها ف بلاطو ودخلها للتلاجة وقطعها معينات وغمس القنات ف الشكلاط مدوب وخليها تبرد مزيان ف التلاجة شي يومين عاد كتولي مزيانة ويمكن ليك تكورها كويرات صغار وتعملها ف شكلاط ابييض او اسود وتزوقها كيف بغيتي او تعملها قضبان وتقطعها مربعات وتعملها ف الشكلاط
          [/IMG]


          حلوة الورقة والقلب

          هي عجينة واحدة وحشوة واحدة


          العجينة
          فحال دايما 500 غرام الدقيق نص كاس الزبدة مدوبة والما زهر ونص بيضة او بيضة صغيرة
          الحشوة
          اما اللوز او الكاوكاو الرومي او البلدي الي بغيتو
          500 غرام اللوز مسلوق ومقلي ومطحون + شوية الما زهر يعني 2 معالق و2 معالق الزبدة و4 معالق العسل والي بقا نزيدو السكر كلاصي على حسب الحلاوة الي بغينا
          ادا عملتو الكاوكاو نفس الشي غير الكاوكاو كتحمرو ف المقلا وتحيدلوشوية القشرة ممكن تضيف قطرات روح اللوز مع الكاوكاو الرومي كيجي فحال اللوز
          كنخليو العجينة ترتاح شي ساعة من الاخسن باش كتولي رطبة وكتساعدنا فالخدمة

          الطريقة

          حلوة الوريقة

          خديت نص العجين عملت شوية الملون الاخضر ف العجين ودلكتها مزيان حتى نسجم اللون مع العجينة
          وطلقتها بالمطلق على سطح مرشوش بالدقيق ورشمتها بالمرشم ونفس الشي للحشوة طلقتها فوق سطح مرشوش بشوية الدقيق وقطعتها بنفس المرشم كنعمل الحشوة بين قطعتين من العجين وحدة من تحت وواحدة من فوق من الافضل نلصق العجين مع الحشوة بشوية بياض البيض باش ما تحلش لينا ونضغط شوية بالخف ونرشم القطعة الي من فوق بالسكين ونعمل عقيقة
          نطيبهم ف جهة الوسطانية د الفرن على نار مهييييييلة حتى تطيب العجين بلا ما تحمر
          وملي تخرج من الفران عملت شوية الناباج يسخن وزدت عليه قطرة الملون الاخضر ودهنت الحلوة باش عطات داك الوون زاهي وممكن تدهنها بالعسل

          بالنسبة للقلب
          كنعملو قضيب ديال الحشوة ونطلق العجين ونعمل الحربول ونليو عليه العجينة ونلصق مزيان العجينة مع بعضها ونقطع الوائد ديال العجينة يكون عندنا قضيب طويل نقطعو قضبان صغار تقريبا 10 سنتيم ف
          كل قضيب نخلي واحد الجهة ملصقة ونقطع القضيب من الوسط طولا بلا ما نوصل للطرف التاني ونرجع نلفو ونجيب الاطراف بجوج ن القدام باش يعطينا شكل القلب وتكون الحشوة من برا والعجينة من الداخل ديال القلب
          نتمنى تكون الشرح مفهوم لاني ما تمكنتشي نصور وقت الي كنت كنعدل للاسف نسيت
          ونطيبهم بنفس الطريقة ونزوقهم بعقيقات اختياري ودهنتهم بالناباج وممكن تدهنهم بالعسل
          وبالصحةوالراحة





          صفحة الدروس الحصرية لفن الحلويات و الطرطات المناسبات
          http://www.anaqamaghribia.com/vb/sho...=443791&page=4


          تعليق


          • #6
            تبارك الله عليك هاد الشي كيحمق بصحتك وراحتك وعيدك مبروك الله يدخلو عليك بالصحة والسلامة
            وعلى جميع المسلمين



            [IMG]http://vip-chart.freeiz.com/7/9.gif[/IM
            ]
            sigpic

            تعليق


            • #7
              مرحبا بلي جا و جاب
              حليوات غزالين الله يعطيك الصحة
              الأهل أهلي والمكان مكاني .. ما كان هـجر الدار في إمكاني
              فإذا ابتعدت لفترة يبقى هنا .. قلبي يدق يقول : ذا عنوانـــي
              المغـرب المعـطاء أجمل جنة .. فيها وجـدت سعـادتي وأمـاني

              تعليق


              • #8
                تبارك الله عليك



                تعليق


                • #9
                  تبارك الله أعليك وعيدك مبارك سعيد
                  sigpic

                  تعليق


                  • #10
                    7adga omtwla lah ybark f s7tk o y7ali yamk kima 7liti 3inina bchoft 7liwatk li kaychahio 5asna lma9adir ok

                    تعليق


                    • #11
                      السلام عليكم
                      عيدكم مبارك اخوااااتي
                      اختي اناقة طنجوية ما شاء الله تبارك الله
                      الله اسهل امرك و يجعله في الميزان المقبول
                      تم التثبيت

                      تم التثبيت


                      وحي القبور

                      http://www.anaqamaghribia.com/vb/sho...098&highlight=

                      تعليق


                      • #12
                        تبارك الله عليك وسعدات عجوزتك بيك
                        و عيدكم مبارك سعيد اللهم اجعل كل ايام المسلمين اعياد
                        sigpic

                        {إن مرت الايام ولم تروني فهذة مشاركاتي فتذكروني
                        وان غبت ولم تجدوني أكون وقتها بحاجة للدعاء }

                        **فادعولي**

                        تعليق


                        • #13
                          السلام عليكم ورحمة الله وبركاته
                          تبارك الله عليك أختي أناقة طنجوية حلويات مشهية الله يعطيك الصحة ومبروك العيد

                          تعليق


                          • #14
                            تبارك الله عليك اختي حلويات مزيونين بزاف
                            مبروك العيد

                            اللهم اجعل آخر كلامنا اشهد أن لا اله الا الله و أشهد أن محمداً رسول الله

                            تعليق


                            • #15


                              ان غبت عنكم
                              و ساغيب في يوم من الايام
                              فاتمنى من العلي القدير
                              ان يكون لي نصيب خير بما خطته يدي
                              يصلني بدعائكم لي
                              اينما كنت فوق الارض او تحتها


                              أمنارAmanarre
                              أم ريان و كاميليا
















                              فهرس اطباقي المصورة (متجدد ان شاء الله)




                              ترقبن جديد وصفاتي المصورة بإذن الله



                              تعليق

                              المتواجدون الآن 1. الأعضاء 0 والزوار 1.

                              أكبر تواجد بالمنتدى كان 2,525, 26-09-2016 الساعة 21:58.

                              يعمل...
                              X