إعـــــــلان

تقليص
لا يوجد إعلان حتى الآن.

عافاكم علموني نطيب الكسكسو را ما خليت ما درتكيجيني باسل الله يرحم الوالدين

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • عافاكم علموني نطيب الكسكسو را ما خليت ما درتكيجيني باسل الله يرحم الوالدين

    السلام عليكم
    اليوم قلت نتعلم الككس و نطيبو درت القوام الي لقيت في النت و الي شفت الناس كيديرو اوالو جاني باسل ما فيه ما يتكل انا مبتدئة في المطبخ عاد كنتعلم و الصراحة ما كاينش معايا شي حد الي يوريني كندوق الكسكسو عند الناس كنبغي ندير بحالو خصوصا الدكالي و لكن هيهات اليوم بنت اختي قالت لي بغى غير الي يحطو لك فوق راسك هههههه انا خايفة الضياف يبداو يجيوني وما عارفاش له حيت سبق جاو اهل راجلي وقالو لي بغاو الكسكس وطلبت الجارة الي طيباتو ليا هي من دكالة باو يحماقو عليه كيحساب لهم انا الي درتو ساعدوني الله يساعدكم بالخير و يحقق لكم ما تمناو
    اريد مقابلا وراء كل اشتراكاتي لن يكلفكم كثيرا سوى ان تنطقوا بلسانكم كلمات تدعون بها لماما وبابا بالرحمة و المغفرة والسعادة لي مع زوجي ولكم خير الجزاء
    بنت المغرب

  • #2
    يسر الله أمرك أختي دنيا سأساعدك بما أعرف لكن احيطك علما أنني مبتدئة ولكن ولله الحمد لا أجد مشكل مع الكسكس

    خاصك تعرفي ان الكسكس ايلا بغيتي تصيبيه ويجي بنين سرو الماطيشة والبزار والملح تيجي بنييييييين بزااااف وايضا منساوش التكسكيسة

    غادي نعطيك القوام ::: ديري الدجاج ايلا بغيتيه بالدجاج ديري الملح والبزار ومتنسايش تديري الملح والبزار وتديري في بالك راكي غادة تزيدي الروا يعني ديري الملح والبزار وطلقي فيهم ايديك
    ديري شوية سكيجبير ديري البصلة والزيت وحطيه فوق النار شحري شي شويا البصلة والدجاج وليقامة ديري السمن وزيدي شوية الروا ديري الماطيشة جهد شي ثلاثة متوسطين محكوكين خلي داكشي يغلى شويا زيدي الروا وغطي البرمة شي شوية يغلى البلول ديري الخضرة ديالك

    ايوا بالي بالسميدة بلليها شويا وبداي تفتلي فيها متكتريش الما وما تنقصيش بين وبين من بعد بغيتي تدوزيها من الغربال دوزيها احسن ديريها تفور فوق البرمة مني يطلع الفار حيدي الكسكس وبداي تروي وتفتلي على حسب ايلا كنتي تبغيه مفتول بزاف غير فتليه روي وفتلي مني تسالي خليه ينشف شي شوية في القصرية ومن بعد رجعيه للكسكاس ايوا التفيرة مني تطلع حيديه وديري شوية الما وحليه وديري الزيت والملح وفتليه شوية وعاود حطيه في الكسكاس مني يطلع الفار سقيه وكولي بالصحة والراحة فقط معلومة بالطبع القرعة الخضرة والحمرة ديريهم في التفويرة الثانية حيت متيبغيوش الطياب بزاف

    نتمنى نكون افدتكي وسأطلع على الموضوع من حين لآخر ان أردتي المساعدة

    لا تنسيني من خالص دعائك فأنا أمر بضروف صعبة قليلا

    تعليق


    • #3
      وسر بنة الكسكس الماطيشة والملح والبزار

      تعليق


      • #4
        السلام اختي انت كمبتدئة كنصحك بالكسكس مفتول ماشي السميدة دهنيه بالزيت فاللول وخلطيها مزيان ورشيه بالماء فيه الملح باش ميجيكش باسل
        اما بنسبة لبلول انا عندي طريقة مختلفة والعطرية انا بنسبة لدجاج او اللحم كندير الالبصلة تخمر عاد الدجاج وضرس واحد ديال الثوم ماشي الكركوبة اي سنة وحدة وتشحر كنزيد 2ماطيشات مقطعين راس معلقة بسيبسة ونويورة راها عطرية كتباع عند العطار ديما ديي غير شوية منها حيت الى كترتي كتجي مرة ومعلقة الخرقوم عواد ومعلقة البزار ومعلقة اسكنجبير والملحة معلقة كبيرة لانه كيف ماكالت الاخت كين الروا وتروي على احساب الناس ومنتغلي البرمة ارمي الخضرة ماعدا اكرعة الخضرة واللحمرة والفلفلا حارة وديري لكسكس من تغلي البرمة من يتفور 2مرات حيدي الدجاج الى شفتيه طاب ليتشتت ورمي الخضرة لبقات
        من تفوري 3مرات الكسكس دريفيه لبزار شوية وزبدة 2معالق كبار 1 السمن
        اما الروى دوقيه وزيد فيه السمن ولخاص الملح ولبزار زديه وحد الطريقة ساهلة خلطي شوية لكسكس وروى فطبسيل ودوقه هكدا غد تعرفي اش نقص واش السمن او الملح اولبزار
        منبعد سكيه وبصحة والراحة انتمنا نكون فدتك
        او تقداي لجارتك شي نهار فلعشية وكليها انا غادي نطيب وشوفيني اشتندير ولاغلط صحي ليا هكدا تعلمي احسن او نهار ميكونش راجلك جربي شوية حتى تعلمي
        حاجة اخرى لكسكسو خاصو اكون شابع ماء وليني ماشي كيعوم فيه هههههههههه
        والا اجيك قاصه كرملة ومنت تروي روي لقياس ولبغا دري لبلول فزلافة باش مدريش لبيسين

        تعليق


        • #5
          السلام عليكم
          كامل كنا بحالك ودك تعلمنا الحمد لله يا الله نبداو نطيبيو على بركة الله
          1 نضع اللحم و البصل مرابي يعني مسكرفج ونصف حبة طماطم رابي باش ماجيش المرقة حمرا نزيد التوابل فلفل اسود الملح والعكري والزيت +قليل من الماء +الحمص+جزر مقطعها بطول ونخليهم يتحمسو على نار قليلة
          2 اذا كان عندك الكسكس انتاع الشرية مثل سيم فرغي الكسكس في جفنة عريضة وبللي الكسكس بقليل من الماء يعني رشيه بيدك حتي يتشمخ الكل بالكي اديريلو بزاف الماء علا خاطرش اولي عجين ويتبركس
          3 حلي الكسكس بين يديك باش ما يبقاوش الحبات وخليه ينشف
          4 انروحو للقدرة انتاعنا ونمرقوها بالماء حتى يتغطى اللحم
          5 نديرو الكسكس في الكسكاس ونضعه فوق القدر ونخلوخ ايفو 10 دقائق
          6 عندما يفور ننزع الكسكاس ونضع فوق الكسكس الملح عبارمغرف قهوة + كاس ماء ثم نفرغ الكسكس في الجفنة ونضيفلو مغرف اكل زيت ونحلوه مليح بيدينا
          7نضيفو للقدر الماء والخضر اللفت والقرعة مقطعين بطول
          8 نرجعو للكسكس انديره يفور المرة الثانية مدة 20 د ودوقيه للتاكدي بلي طاب
          9عندما يطيب الكسكس نفرغو في الجفنة ونضيفلو الزبدة شرحيه مليح باش يبرد
          10ننزع اللحم من القدر ونترك المرقة تثقال والخضر طيب
          ملاحظة اذا درتي الدجاج انزعيه قبل التفويرة الثانية الدجاج بلخف يطيب
          ادا درتي الكسكس المصنوع في البيت بليليه مليح بالماء متخفيش يخسر

          شهية طيبة مع الكسكس الجزائري انشاء الله نكون فدتك ادعيلي شي دعوة متنسينيش

          تعليق


          • #6
            ماعاندك علاش تقالقي كاملين كنحصلو مرة مرة أنا الكسكس ديالي طنجاوي تكلي عليه يدك وساهل
            نبداو بسكسو بتفاية يعني الزبيب والبصلة والدجاج
            من أجل التفاية غانحتاجو 5 بصلات مشنفين نعملوهوم فمقلة والزيت تكون كتيرةباش متحراقشي البصلة مغرفة صغيرة قرفة مغرفة سكر زعفران شوية إبزار والزبيب شحري كلشي مزيان ونقص العافية ومرة مرة حرك باش متلساقشي
            ندوزو نالدجاج نشرملوه بصلة محكوكة زيت بلدية ورومية قزبر ومعدنوس نصف معلقة صغيرة قرفة نصف معلقة كبيرة سكنجبير نصف معلقة كبيرة خرقوم إبزار ملح خلط كلشي وحط فيه الدجاج فالبرمة وأهم حاجة فالطياب حتى تشحري اللحم أو الدجاج مزيان عاد روي بالماء طايب باش المرقة متبسالشي
            ودابا سكسو أنا كنستعمل تريا وكنفورو مرة وحدة دهنو بالماء والزيت والملح وباي تفتلي فيه حتى تجبار تنفاخ والماء رشي بشوية بشوية وفتليه ملي تغلا البرمة حط عليها الكسكاس يفور وملي يتبخر مزيان حركيه فصط الكسكاس ورشيه بالماء وخليه يزيد يفور شوية ومن بعد ملي تطفي عليه كبيه فقصعة وباي تصبي فالمرقة وتخلطيه كامل ماسي غير من فوق لأن حن الشماليات سكسو كنسقيواه كامل باش يجي بنين ماشي يبق بياض من تحت باسل ومن فوق شوية دالمريقة لا ألالة عطيه حقو وشي شوية دسمن ملي تجبريه تخلط كامل بسطو وحط عليه الدجاج والتفاية من فوق جربيه ورد علينا الخبار

            تعليق


            • #7
              بارك الله فيكم على نصائحكم و الله ينولكم ما تمناو فخاطركم مازال قدامي بزاف باش نتعلم الطياب ادعاو معايا ربي ياخد بايديا
              اريد مقابلا وراء كل اشتراكاتي لن يكلفكم كثيرا سوى ان تنطقوا بلسانكم كلمات تدعون بها لماما وبابا بالرحمة و المغفرة والسعادة لي مع زوجي ولكم خير الجزاء
              بنت المغرب

              تعليق


              • #8
                اختي دنيا الحب حتى واحد مازاد معلم ولكن الحمد لله الاخوات موجودات غير طلبي وكلشي يعاونك
                تبعي التعليمات دياول الاخت شادية باين طيابها غزال
                كولي ليا علاش جارتك ما تعلميش عندها مادامت طيبات ليك الكسكسو لانها قريبة ليك وبالتطبيق ، هدا نظري انا وشوفي انت.
                انا غادي نزيدك واحد السر عندي هو اني ملي كا نغسل الخضرة مزيان ما كانخليهاش في الماء كانديرها في شي اناء بلا ماء ونزيدها التوابل بحال لبزار مليحة شوية سكين جبير وشوية خرقوم بلدي باش تشرب التوابل ونخلطها مزيان وتجي بنينة ونزيدك الا كنت دايرة الدجاج الرومي كانقليه مزيال نزيدو شوية سمينة شوية زيت الزيتون وبصلة كبيرة و2 مطيشات منقيين ونقلي مزيان ونرمي الخضر كلها الا القرعة الحمراء والخضرا لانهم دغيا كايطيبو ونحرك مزيان حتى تدخل الشرمولة مزيان فيهة عاد نكون موجدة الماء طايب ونبلل البرمة وما يكونش الماء بزاف تجي المرقة باسلة الا جاتك باسلة زيدي كنور غنمي
                اما الكسكسو بحال كيف كالت ليك شادية , انا كنختار كسكسو رقيق احسن من الغليض والله يسر ويوفقك آختي
                دابا تعلمي ان شاء الله خاص غير الارادة تكون عندك قوية باش تعلمي ، انا تعلمت ما كانتش عندي برمة درت كوكوط وحك تاع نيدو درت ليه تقبة من لتحت وفورت فيه الكسكس, جات عندي صديقة ولقات الكسكسو كالت فاش طيبتيه كلت ليها حك نيدو الله يجعل فيه البركة خاص الواحد غير يفكر
                لاني كنت باقة ما مزوجاش.

                تعليق


                • #9
                  هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 640x480 والحجم 78 كيلوبايت .

                  الكسكس باللحم والخضر السبعة، وهو طبق مغربي تقليدي ذو شعبية كبيرة، يكاد يميز يوم الجمعة عندنا بالمغرب إذ تعكف جل البيوت المغربية على تحضيره خلال هذا اليوم المبارك من الأسبوع، هي أكلة لذيذة وغنية بالمواد الضرورية لصحة أجسامنا،


                  هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 640x458 والحجم 77 كيلوبايت .

                  المقادير:

                  1 كلغ من الكسكس
                  1 كلغ من اللحم
                  كأس شاي زيت
                  بصلتان مقطعتان طوليا
                  الملح حسب الذوق
                  ملعقة صغيرة فلفل أسود (إبزار)
                  ملعقة صغيرة زعفران
                  ملعقة صغيرة زنجبيل (سكين جبير)
                  نصف كلغ من الجزر (ينقى ويقطع طوليا ويزال عنه اللب)
                  نصف كلغ من اللفت الأبيض والأصفر (ينقى ويقطع طوليا)
                  نصف كلغ من القرعة السلاوية (تنقى وتقطع طوليا)
                  نصف كلغ من القرعة الحمراء (تنقى وتغسل جيدا)
                  نصف كلغ من الفول الأخضر
                  نصف كلغ من الملفوف (الكرمب) (les choux)
                  نصف كلغ من الطماطم (تغسل وتزال قشرتها والزريعة وتقطع قطعا صغيرة)
                  باقة من القزبر مربوطة بخيط
                  الماء الكافي (تقريبا 3 لترات)
                  100 غرام من الحمص المنقوع في الماء ومغسول جيدا




                  هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 640x456 والحجم 76 كيلوبايت .

                  طريقة تحضير الكسكس:
                  يوضع 1 كلغ من الكسكس في قصعة ويرش بنصف لتر من الماء المملح ويطلق باليدين في خفة لفصل الحبات بعضها عن بعض ويضاف ملعقتين كبيرتين من الزيت وتذهن بها جميع حبات الكسكس تقريبا.
                  يوضع الكسكس في الكسكاس المدهون بقليل من الزيت الذي يوضع بدوره على القدر (البرمة).

                  بواسطة قفال تقفل القدر حتى لا يتسرب البخار من جوانبها.
                  عندما يصعد البخار بكثافة فوق الكسكس يرفع الكسكاس من على القدر ويصب الكسكس في قصعة ويرش بربع لتر من الماء البارد مع فتله بخفة من أجل فصل الحبات بعضها عن بعض.
                  يعاد وضع الكسكس في الكسكاس لانضاجه مرة ثانية مدة نصف ساعة تقريبا (أي عندما يصعد البخار بكثافة على الكسكس). ثم يرفع من على القدر (البرمة) ويوضع في قصعة ويرش بحوالي 125 سل من الماء البارد مع فتله بخفة من أجل فصل الحبات عن بعضها البعض، يعاد مرة ثالثة الكسكس في الكسكاس لانضاجه مرة ثالثة، وعندما يصعد البخار فوق الكسكس بكثافة يرفع الكسكاس من فوق القدر (البرمة) ويصب في قصعة ويدهن بالسمن البلدي، مع الحرص على فصل حبات الكسكس الواحدة عن الأخرى بخفة وهو لازال ساخنا.
                  * وأخيرا يوضع في قصعة مستديرة ويجوف وسطه.

                  هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 640x458 والحجم 101 كيلوبايت .
                  .
                  تقدم القصعة مع زليفات من المرق في جوانب المائدة وأكلة شهية.


                  طريقة تحضير مرق الكسكس
                  :


                  توضع قطع اللحم والبصل المقطع في القدر (البرمة) ويفرغ الزيت والملح والفلفل الأسود (الابزار) والزعفران وملعقة صغيرة من السمن البلدي والزنجبيل ويقلى الكل جيدا مع الاستمرار في التحريك، بعد ذلك يضاف لتران من الماء ثم يغلق القدر ويترك لينضج لمدة نصف ساعة.
                  يضاف الحمص والجزر واللفت والكرمب (الملفوف) والطماطم والفول وكذلك باقة القزبر المربوط بخيط والقرعة الحمراء والقرعة السلاوية ويضاف قليل من الماء الكافي لإتمام الطهي على نار معتدلة حتى ينضج الكل فترفع القدر على النار.
                  يوضع الكسكس المذهون بالسمن البلدي في قصعة مستديرة ويجوف وسطه، ثم توضع فيه قطع اللحم وتغطى بالخضر ويسقى الكل بالمرق ويقدم ساخنا.
                  تقدم القصعة مع زليفات من المرق في جوانب المائدة وأكلة شهية.


                  تعليق


                  • #10
                    ايلا خفتي تتعجن ليك السميدة فوريها المرة الاولى وهي مدهونة غير بالزيت بلا بمترشيها بالماء حتى للتفويرة الثانية وسقيها مزيان والثالةذثة شوية
                    ايلا جاك البلول باسل فالاخير عتقي بواحد ضامة كنور وشي سمن ايلا كاين
                    يمكن تضيفي له شوية مطيشة الحك
                    ايلا استعملتي الكسكس يمكن فالتفويرة الاخيرة تدهني الكسكس بنصف بصلة محكوكة تيجي بنين فاش يتسقى راني مجرباه

                    تعليق

                    المتواجدون الآن 1. الأعضاء 0 والزوار 1.

                    أكبر تواجد بالمنتدى كان 2,525, 26-09-2016 الساعة 21:58.

                    يعمل...
                    X