ملوي ومسمن معمر من مطبخي تفضلوووووو
في 2012 -21 -07
السلام عليكم أخواتي أولا رمضان مبااارك سعيد يدخل عليكم باليمن والبركات
درت البارح شوية الملوي ومسمن معمر وفكرت نحطو هنا لمزيد من الافادة حيت الأكيد أن أغلبية ان لم نقل كل المغربيات الحادكات كايعرفو يديروه غير هي كاتبقى كل وحدة وطريقتها
المهم هادي طريقتي البسيطة نتمنى تعجبكم
المقادير
3 زلافات كبار فورص
شوية الملحة
قبيييييصة خميرة الخبز
الما الكافي للعجن
الطريقة
الصور كاتوضح كلشي
هنا درت الطحين والملحة وشويييية الخميرة فالعجانة وبقيت كانزيد الما شوية شوية حتى ولات العجينة شوية خفيفة
قسمت العجين لكويرات وغطيتو بميكة وخليتو يرتاح تقريبا سااعة
استعملت للتوراق الزبدة دايبة مخلطة مع الزيت والسميدة كانرشها باش يجي مفرووق
هنا سرحت كويرة من العجين ودهنتها بالزبدة والزيت ورشيتها بالسميدة
هنا بديت كانتني العجين كيف كاتشوفو
مللي طويتو بديت نلويه بهاد الشكل
هنا سليت الكويرات وخليتهم شوية يرتاحو على بال ماجبدت المقلة ودرتها تسخن
نطلقو شوية
وهاهي مللي طابت
كايجي هشيييش ومفروق كيف كاتشوفو
هاهي صورة جماعية ههههه يلا لاحظتو شي وحدين ماحمرتهمش مزيان بحساب مللي نبغي نجبدهم ونسخنهم يلاه يجيو هما هدوك ومايقصاحوش
دابا ندوزو لمسمن المعمر كانستعمل نفس العجينة وكاندير فالتعميرة
البصلة مقطعة كارويات
قصبور ومعدنوس
فلفلة خضرة مشوية ومقطعة كارويات
مطيشة الحك
ابزار+ملح+تحميرة
وكانزيد شوية الهريسة كاتعطي نسمة زويييينة
وأخيرا شوية ديال الشحمة محكوكة فحكاكة مطيشة
كنشحر كلشي حتى ينسجمو وهاالتعميرة وااجدة
كانطلق العجين ونحط واحد المقدار من التعميرة وندهن بيه العجينة كااملة
كانتنيه على شكل مربع ونطلق كويرة ثانيية وندير نفس العملية بالتعميرة ونحط المسمنة اللولة فقلب الثانية بهاد الشكل
نطلقها شوية ونطيبها فمقلة الثقيلة تكون سخووونة
هاهو مللي وجد
نتمنى نكون وفقت فالشرح وعجبكم هاد الشي
وماتحرمونيش من دعواتكم
في أمان الله
الله اعطيك الصحة ملوي معتبر تبارك الله عليك انا لسبقت غدي نخد طبسيل انفطر به عواشر مبروكة
الله يعطيك الصحة
الله اعطيك الصحة اختي
بارك الله فيك أختي وبالصحة والراحة تستاهلي كل خيرالمشاركة الأصلية كتبت بواسطة عائشة99
بارك الله فيك أختي
شكرا ليك أختي
ضوابط المشاركة
للتسجيل اضغط
هـنـا
رد مع اقتباس
المفضلات