السلام عليكم و رحمة الله و بركاته
بلا ما نطول عليكم اليوم جبت ليكم طريقتي فتحضير البغرير بالقمح الكامل كايجي غزال و لديد و سريع فالتوجاد
نبداو بالمقادير
زلافة و نصف دقيق القمح الكامل
2كيسان ماء دافي
معلقة كبيرة سنيدة
شوية ملح
2 خمارات حمر

الطريقة
ساهلة و كولشي يعرفها:نديرو الما فمولينكس و نزيدو عليه الملح سنيدة و الدقيق و نخلطوهم مزياااان حتى نشوفو الرغوة طلعت من الفوق
من بعد نضيفو الخميرة و نضربو مزيان عاوتاني شي 2 دقايق

و فهاد الأثناء نكونو حطينا المقلة تسخن و نبداو نطيبو البغرير ديالنا مباااشرة
ملاحظة:فكل مرة نبغي نطيب بغريرة نشلل المقلة بالماء بارد

شوفو تبارك الله كيف متقب كلو و كايشهي ههههه

و كانقدمو مدهون بزبيدة بلدية و عسيلة أو زويتة بلدية يا سلااام شهوة منو

و بالصحة و الراحة
تقبل الله منا و منكم الصيام و القيام و كل رمضان و أنتم إلى الله أقرب
ماتنساونيش من دعواتكم أخواتي بفكاكة ساهلة ليا و لجميع الحوامل و بالذرية الصالحة لجميع المنتظرات
دمتن في رعاية الله و حفظه