تويت
اليوم غادي نقدم لكم انيقاتي وصفة la galette des rois سهلة ولديدة وف المتناول هاد الكاليط غادي نخدمو ب 2 مكونات العجين المورق والحشوة كريمة frangipane الي هي كريمة اللوز
المقادير
700 غرام العجين المورق ناخدوه جاهز او نعدلوه المسالة كترجاع لكم
للحشوة كريمة الفرانجيبان كنحتاجو
100 غرام الزبدة الاكل لينة
100 غرام السكر
100 غرام لوز مطحون بودرة اما بقشوره او مسلوق ومحيد القشرة ومنشف مزيان ومطحون
2 بيضات نقصو منهم باش ندهنو من فوق او ناخدو اصفر بيضة للدهن
مملعقة صغيرة روح فانيل
بالنسبة لي العجين المورق المعتمداه ف هاد النوع د الحلويات غادي نحتاجو
500 غرام الدقيق
500 غرام زبدة التوريق اللدة مقطعة مربعات صغيرة وبااااااااااااردة
250 ملل ماء متلج
ملح
كنخدموالدقيق والزبدة باصابع اليد حتى يترمل الخليط ونعملوه فحال طريقة الي كنفتلو به سكسو حتى تغلف الزبدة بالدقيق ونضيف الملح تم نبدا نضيف الما بشوية بشوية حتى يتجمع العجين بلا ما ندلكوه ولا نعجنوه مجرد ما تجمع العجينة ما نزيدوش الما ونخليوها ترتاح ربع ساعة ونبدا عملية التوريق دون اضافة الزبدة
كنطلقو العجين طولي ونطويوها على 2 تم 4 ونخليوها ترتاح ف التلاجة اقل حاجة نص ساعة ونعاودو العملية 4 او 5 مرات وف كل مرة غير نجبدوها ونطلقوها بشكل طولي ونطويها على 3 ونرجعها للتلاجة
من الافضل نعملوها من قبل والنهار الموالي نجبدوها للاستعمال
الصور غادي توضح
ننتقل الى الحشوة
الطريقة
كنطربو الزبدة مع السكر حتى ينسجمو مع بعضم ونضيفو مسحوق اللوز تم نضيفو البيض واحدة بوحدة حتى نحصلو على كريمة خفيفة
غادي نقسمو العجين ل قسمين نطلقو العجين الاول على شكل دائري او مربع الي عجبكم يكون السمك سنتيم ونعملوه ف طاوة مغلفة بورق الطبخ باش ما تلحقش وتاخد وقتها ف الطياب من تحت وباش تسهل علينا نزولوها من الااطة ونوضعوها ف طبق التقديم
بعدها نوضعو الحشوة فوق العجين الاول ونوزعوها بشكل متساو ونخليو واحد السنتيم من الاطراف باش نلصقو عليه العجين التاني تم نغطيو بالعجين التاني بنفس الشكل والقياس والسمك يكون غليط شوية باش ما تقطعناش العجين من الوسط ونقادو الجوانب بقرفصة العجين من الطراف او بالضغط بالموس بعدها ندهنو من فوق بشوية البيض مع سكر كلاصي مخلطين او اصفر بيضة مع قليل من نسكافيه
ونرشمو رشيمات من ابداعاتنا بالموس غير من فوق باش ما نوصلوش للحشوة و تخرجش لينا الحشوة ويتفتح العجين ف الفرن ضروري العجين من فوق يكون سمكه غليض باش ملي نرشمو بالموس ما نتقبوش العجين و ما نوصلوش للحشوة
كنسخنو الفرن على درجة 220 وندخلوها ف الرف الوسط تطيب 30 دقيقة من فوق وتحت من الافضل ونخليوها على درجة 180 مع مراقيبة لتحت ادا تحمرت من تحت نطفيو ونحمروها و ف الاخير ندهنوها بالعسل وندخلوها للفرن يعطيها اللمعان وصافي نخرجوها
هنا عملتها بالشكل الداءري و خليت شوية من الحشوة و من العجين باش عدلت قطع فرديين
من داخل ملي قطعت طرف من الشكل الداءري هنا عملتها ببدرة اللوز مصلوق ومقشر ومنشف ف الفرن ومطحون
وبالصحة والراحة
ردك الي زين احبيبة
اختي عندي هواية وصافي واني محبة للطبخ بكل انواعه وكل الوصفات كنبحت ف المواقع الاجنبية هدا ماكان اما اني قريت الباتسري فعمري ما دخلت كيف قلتلك الا عبر النت