ArabicEnglishFrenchSpanish

إعـــــــلان

تقليص
لا يوجد إعلان حتى الآن.

الدورة الثالثة للعناية بالجمال بوصفات طبيعية مرحبا بكن

تقليص
هذا الموضوع مغلق.
X
هذا موضوع مثبت
X
X
تقليص
يشاهد الموضوع حاليا: 1 (0 عضوات 1 زائرات)
  • تصفية - فلترة
  • الوقت
  • عرض
إلغاء تحديد الكل
مشاركات جديدة
    • WhatsApp

    الدورة الثالثة للعناية بالجمال بوصفات طبيعية مرحبا بكن






    مرحبا بكم بالدرس الاول من دورتنا المختصرة ان شاء الله



    طبعا ككل مرة قبل ما نفكروا في وضع اي وصفة طبيعية على البشرة خاص يكون عندنا معرفة بنوعها وهذا تعرفنا عليه في الدورة الاولى بالتفصيل باش اي وصفة وضعتيها تتعطيك نتيجة ايجابية وتخدم الغرض لي درتي عليه الوصفة هذا من جهة، ومن جهة اخرى تنعرفوا ان التنظيف هو اهم عنصر باش تتبدا العناية بالبشرة ولي تيكون مرتين في اليوم مرة في الصباح ومرة بالليل والبشرة الدهنية يمكن تنظف ثلاث مرات في اليوم، وهاذ التنظيف فيه المقشر لي تيكون اسبوعيا او كل 15 يوم حسب نوع البشرة واحتياجها لهاذ المقشر ثم حمام البخار بالاعشاب مرة كل شهر تينقي البشرة بعمق وهذا كبداية ان شاء الله ثم تيجي دور التنظيف اليومي تقدري تستعملي غاسول طبيعي تعتمديه يوميا يكون من صنعك ويعطيك فوائد لي محتاجاها البشرة ديالك.

    من بعد تيجي الترطيب لي ضروري ومؤكد باش تبقى البشرة طرية ومتماسكة ونبعدوا عليها شبح التجاعيد لي تتظهر قبل وقتها حتى لو كانت البشرة دهنية خاصها ترطيب وكل انواع البشرة يلزمها مرطب يومي وان شاء الله غادي نحضروا كريمنا المرطب اليومي بايدينا بمواد كلها طبيعية ومدة الصلاحية ديالو ما تفوتش 10 ايام لانه خالي من المواد الحافظة،وهكذا ما غاديش تعكزي الى كمل لك كريمك ويبقى عندك تواصل مع الوصفات الطبيعية باستمرار ولي تتبغي المتابعة باش تبقاي دائما 10/10 ثم تيجي دورالكريم الواقي من الشمس سواء في الصيف او في البرد، وبالليل سيروم لكل من هي في سن 30 وما فوق، هاذ السيروم فيه بزاف الانواع تيكون جدار قوي يحمي البشرة من الخطوط الرفيعة لي تتكون منها التجاعيد وتيغذيها وتيحافظ على شبابها وكاين سيروم لمنطقة محيط العينين وثمن السيروم دائما تيكون غالي لانه مركز من مواد جد فعالة في جعل البشرة مشدودة وتحارب التجاعيد الرقيقة لي عاد تتكون وتيخلي البشرة رطبة ومتماسكة طبعا عندنا سيروم طبيعي غادي نحضروه بايدينا وعندو مفعول احسن من مفعول السيروم الكيماوي لي تيتباع غالي .


    و كل هاذ الامور غادي نتعرفوا عليها في وقتها من خلال وصفاتنا الطبيعية وغادي نتعرفوا على نتائجها الرائعة بالتطبيقات ديالنا والمنافسة بيننا ولي غادي تخلينا نجتاهدوا اكثر ان شاء الله


    كبداية مع دورتنا المتجددة اول شيء كما قلنا هو التنظيف اذن اجيوا نعملوا مقشر طبيعي قبل ما نستعملوا حمام بخار كمرحلة اولى نقيوا فيها المسام بعمق ونزولوا الخلايا الميتة ولي غادي يكون بسيط جدا وفي متناول الجميع والنتائج ديالو جد رائعة
    .

    المقشر الطبيعي:

    اليوم اخترت لكم مقشر بسيط لكن مفعوله جد رائع ومميز ولي تيصلح جميع انواع البشرة ولي هو:
    مقشر
    النخالة والحليب كلشي تيعرف مزايا النخالة لي جد غنية بالالياف ومكونات مركبة تخدم صحتنا من الداخل ومن الخارج ومفيدة للبشرة بحيث تتنقيها وتصفيها وتخليها رطبة وتزول منها الخلايا الميتة.

    الحليب غني عن التعريف مغذي ومرطب للبشرة الجافة والعادية والحساسة البشرة الدهنية يمكن لها تعوضو بماء الورد يكون احسن بكثير

    واحسن توقيت لاستعمال الاقنعة هو الفترة المسائية تتنتفع بهم البشرة بزاف الا الى ما كنتيش غادي تخرجي تقدري تستعمليه بالنهار لا اشكال غير بالليل تتغذى البشرة منهم وكتبقاي مرتاحة لانه ربما تبغي تخرجي بالنهار او الوقت غير كافي باش تحضري امورك الخاصة ولي منها العناية براسك فالوقت المفضل هو الفترة بعد الظهر تكوني كملتي اشغالك بالنسبة لربة البيت او السيدة العاملة بالليل، ونرجع للمقشر بعد الغسيل دهني بزيت اللوز لي تيغذي البشرة ويرطبها وخاصة بالنسبة للبشرة العادية والجافة والحساسة والبشرة الدهنية تستعمل ماء الورد او خل التفاح لانه يمتص الافرازات الدهنية وتيقفل المسام الواسعة والمختلطة تعمل قطنة بماء الورد في المناطق الدهنية والجافة تدهنها بزيت اللوز الحلو طبعا.

    وهكذا غادي يبان لك الوجه تنقى وتصفى وتتبان لك العيوب ديال البشرة اكثر لي خاصك تابعيها وتمحيها باقنعة مخصصة للمشكل المطروح بالمداومة والاستمرار بحال مثلا عدم توحيد لون البشرة لي تيعانيوا منو بزاف وبقع بنية او اثار الحبوب الخ وكلها تتجي بسبب الاهمال وعدم شرب الماء الكافي للجسم وهذا لي غادي نشوفوا ان شاء الله في الموضوع القادم.







    ثم ياتي دور حمام البخار الرائع لكل انواع البشرة مرة في الشهر :






    ومن فوائد حمام البخار للبشرة انه تينظف المسام بعمق وتيساعد على ازالة حبيبات لي تتراكم على سطح البشرة بسبب التلوث او الباكتيريا ولي تتعطينا ما يسمى بالرؤوس السوداء وبهاذ الحمام تتولي ساهلة باش تزوليها لانك برزتيها بالبخار ما بقاتش مزيرة في بلاصتها وازالتها تتم بلف مناديل ورقية بين اصابع السبابة وتزوليها بشوية بلا عنف باش ما تكسريش الاوعية الدموية الرقيقة وتتبقى البلاصة فيها امارة زرقا، وهكذا بعد الحمام ديالنا تتكوني حصلتي على بشرة فيها نضارة واشراقة وبالتالي يولي فيها لمعان طبيعي لانها تخلصت من الشوائب وتنقات مزيااان.

    والان اليك طريقة عمل حمام البخار بالنسبة للخزامى فهي معروفة انها مطهر قوي طبيعي والبابونج مهدأ للبشرة من الهيجان وتيساعدها باش تخلص من الافرازات الدهنية وتيساعد كذلك على تفتيح لون البشرة
    وفي حالة البشرة الدهنية يمكن اضافة شوية الزعتر لانه تينشف البشرة من الدهون.


    وطبعا الى رجعتوا لملف الفوائد الخاصة بالاعشاب لي تفضلت به انيقتنا الرائعة قوتي في صمتي بسرد عدد كبير منها في معشبتها الغنية تجدونها بهذا الرابط :


    http://www.anaqamaghribia.com/vb/for...85%D8%AA%D9%8A



    بالتاكيد الى قمتي بهاذ المرحلتين فالبشرة ديالك غادي ترجعي لها الاعتبار وتعطيها اهتمام وهكذا غادي تحصلي على اشراقة ونضارة لي تتجي من التنظيف العميق وطبعا بعد الانتهاء من المقشر وحمام البخار غادي دهني بزيت اللوز او اركان او اي زيت مغذي عندك معتادة عليه، وغادي تخلي البشرة ترتاح الى اليوم الموالي يكون موعدنا مع قناع لجميع انواع البشرة ولي تيعطيك مفعول من اول استعمال

    المطلوب في التطبيقات:

    اول شيء ذكر نوع البشرة ديالك ومشاكل لي تتعاني منها
    القيام بتطبيق المقشر وحمام البخار
    مع وضع صور تطبيقك وتزويدنا برايك
    في النتائج المحصل عليها


    بالتوفيق للجميع








    التعديل الأخير تم بواسطة ذاكرة; الساعة 07-01-2017, 14:32.








    • WhatsApp

    #2






    الدرس الثاني الاقنعة الخاصة بكل نوع من البشرة


    كما قلنا دورتنا بوصفات مختصرة ومفيدة، وعليه غادي نديروا قناع واحد لكل نوع للبشرة و لي متبعة شي قناع مرتاحة
    عليه تبقى به الاهم هو اننا نتحركوا ونعتنيوا بروسنا، وطبعا المتابعة وعدم الخلط بين الاقنعة ماشي في صالح البشرة خاصك داومي على قناع اقل مدة وهي شهر باش تحصلي على نتيجة زوينة، واهم من كلشي هوالتنظيف اليومي كما تعودنا عليه ويتبعوا التنظيف الاسبوعي لي فيه المقشر الطبيعي لي تيزول لك الخلايا الميتة وكذلك بالمرة تزولي الشعر مرة في الشهر كافية تنقي فيها البشرة ديالك باش تولي مشرقة وفيها نضارة وتستافد اكثر من الاقنعة الطبيعية وهذا كل وحدة واشنو معتمدة في ازالة الشعر الغير مرغوب فيه في الوجه وخاصة فوق الشفاه العليا والحنيكات ــ
    ماشي نمص الحواجب لان هاذ الاخير حرام ــ ،وهناك تحذير للاخوات لي تيستعملوا التشقيرلانه تيوسع المسام ويرهل البشرة ما كاين ما احسن من لاسير الى عرفتي تزوليه راسك وهنا كل وحدة وكيفاش تتزول هاذ الشعر من الوجه و تتبقى مسالة مختلفة من انيقة لاخرى وشخصيا استعمل لاسير جاهز وتيخلي البشرة رائعة وصافية وطبعا كاينة وصفات تتبغي صبر على مدة باش يزول نهائيا وبما ان الصبر قليل ومع هاذ الدورة تنحاربوا العكز فما فيها باس الى مشيتي للصالون تقولي لها بغيت نزول فقط الشعر من الوجه وتتنقيه لك بتقنية محترفة مرة في الشهر ب 15 درهم او اقل ما فيها باس.



    البشرة العادية القناع الرائع :

    البشرة العادية وهي بشرة متوازنة رطبة وما فيها حتى عيوب مسامها رقيقة ما تيكون فيها لا حبوب ولا اي شيء صافية فضروري ما تعتني بها باش تبقى محافظة على توازنها ويكون التنظيف الروتيني بصفة منتظمة والكريم المرطب وسيروم بالليل او زيوت طبيعية مغذية

    اخترت لكم هاذ القناع الرائع للبشرة العادية ولكل انواع البشرة تتوحد اللون وتعطي اشراقة للوجه وتخليه صافي ونقي هاذ القناع فيه مميزات جد فعالة لي كتجدد الخلايا ومن اول استعمال تبان لك النتيجة الرائعة .


    هاذ القناع تعملوا البشرة العادية وكل انواع البشرة





    البشرة المختلطة:

    البشرة المختلطة هي بشرة مزيتة في الجبهة والانف والدقن وجافة في الحنيكات وتحت العينين خاصها متابعة باش يولي عندها توازن موحد وهاذ العناية تتبدا من التنظيف اليومي والاسبوعي كذلك







    البشرة الجافة :

    هاذ النوع كتكون شاحبة ولونها باهت بعض المرات حرشة ومسامها مضيقة وتتبان فيها التجاعيد بسرعة بسبب الجفاف ديالها وكذلك البقع البنية او بيضا واكثر شيء في البرد و تقدر تظهر فيها قشور كلما غسلت بالماء البارد تتحس بها
    مشكرفة وخاصة في البرد.

    و القناع لي اخترت لكم جد رائع تيعطيها طراوة واشراقة طبعا من اول استعمال غادي تلاحظي الفرق







    البشرة الدهنية:

    ولي كتكون فيها الافرازات الدهنية زايدة الشي لي تيخلي سطح الجلد مزيت والمسام فيها تتكون واسعة لكن هاذ النوع من البشرة من الايجابيات لي تتميزها وهي انها ما تتبانش فيها التجاعيد بسرعة تتبقى مجبدة وشابة مدة اطول .

    والعناية بهاذ النوع خاص التنظيف 3 مرات في اليوم مع قناع يكرر اكثر من مرة باش يولي عندها توازن
    وتقضي على نسبة الدهون الزايدة فيها





    البشرة الحساسة:

    كتكون بشرة رقيقة بزاف تتحسس بتغيرات الطقس وكتاثر فيها اي مادة سواء منظفة او كريم مرطب عادي او غاسول او اي شيء يكون فيه كحول او مواد كيماوية لي تتزيد تحرقها وتسبب لها في الهيجان والاحمرار لي تيكون عند البعض تقدر تكون بشرة دهنية او جافة حساسة ولي خاصها دائما تخضع لاختبار اي مادة غادي توضعها على بشرتها لانها تقدر تحسس من اي شيء وما خاصكش تلمسيها بايديك بلا ما تكوني غاسلاهم لان اي باكتيريا غادي تاثر على البشرة وتزيد في الهيجان ديالها خاصك تعاملي معاها بحذر وبكل عناية

    النعناع غني عن التعريف وجد رائع في علاج البشرة الحساسة فيه زيوت طيارة تتعالج البشرة من العمق وزيت اللوز معروف بنسبة الترطيب العالية لي فيه يكرر يوميا حتى يزول الاحمرار وتجبر البشرة بشكل عجيب






    التطبيقات :

    كل وحدة تختار القناع حسب نوع بشرتها وتنزل تطبيقها مع ذكر نتيجة التطبيق






















    تعليق

      • WhatsApp

      #3







      الدرس الثالث

      ولي متنوع غادي نتعرفوا فيه على طرق انتاج مواد تجميلية بايدينا :


      بعد المرحلة الاولى ولي تتبدا بالتنظيف دزنا لمرحلة القناع حسب نوع البشرة ديالنا واليوم ان شاء الله نمشيوا لمرحلة حل المشاكل لي تتكون في غالب انواع البشرة بحال المعاناة ديال عدم توحيد لون البشرة بقع بنية اثار الحبوب والحبوب لي في البشرة الدهنية البشرة الباهتة لي مافيهاش حيوية كلها امور بلمسة منك وباهتمام يولي كلشي في خبر كان وان شاء الله بما ان دورتنا فيها ما قل ودل والاهم لي يعطينا نتائج فورية ولكن اي حاجة طبيعية تتبغي المتابعة والاستمرار عليها ماشي حتى يكثروا المشاكل في البشرة وتجيك مناسبة وتبداي تقلبي على الحلول راه ما يحك جلدك غير ظفرك لهذا دورتنا بالدرجة الاولى هي محاربة للكسل ودفع العكز بعيد ونعانقوا الحيوية والنشاط باش تشوفي كلشي زوين والجسم يعمر طاقة ايجابية ان شاء الله.





      اليكم قناع لكل انواع البشرة تيصفيها ويعطيها اشراقة من اول استعمال وهذا هو لي كلشي تيقلب عليه شخصيا ملي تنتصالح مع راسي ههههههه تندير هاذ القناع الرائع لي غادي تجربوه وتلاحظوا النتيجة الفورية تيصفي البشرة من البقع ويوحد لونها ويخليها رطبة وفيها نضارة والنتيجة من اول استعمال، يستعمل 2 مرات حتى ل3 في الاسبوع لمدة شهر تيخلي البشرة رائعة ولي هو كالتالي:






      قناع صالح لكل انواع البشرة

      هاذ القناع يمكن نقولوا عليه بوتوكس طبيعي رائع وغني والنتيجة من اول استعمال مرطب وتيشد البشرة بكل صراحة تيخلي بشرتك حرير وناعمة نخليكم تكتشفوا المزايا ديالو بتطبيقاتكم صراحة يستحق التجربة فقط البشرة الحساسة ما تخليهش حتى ييبس غير يقبط شوية في مدة من 10د الى ربع ساعة باش ما يلصقش على البشرة وهي طايبة حيث ما مهلياش فيها نخليكم مع البطاقة ديال القناع الرائع في ترطيب البشرة وشدها باش ما تهرب ههههه








      مختبر منتوجاتنا الطبيعية

      ندخلوا للمفيد لي في انتظاره ولي هو كيفاش نحضروا كريمات مرطبة طبيعية بايدينا وتنعرفوا اشنو فيها على الاقل انها خالية من مواد كيماوية مهلكة وثانيا اقتصادية وبزطامك في الحفظ والصون وصحتك كذلك






      الكريم السحري الغني بالفوائد :

      طبعا اول كريم لي عمروا ما خاصو يخطاك وتنكررها مرارا انه الكريم السحري الرائع لي يصلاح لكلشي حتى للطياب ديال الجلد في المناطق الحساسة او غيرها صالح للكبار والصغار فيه مزايا متعددة غادي نطرقوا لها ان شاء الله فيما بعد و لاننا غادي نحتاجوه في تحضير كريمنا المرطب اليومي الخاص ببشرتنا يعتبر كريم جد فعال ومرطب للرجلين واليدين تنظن عرفتوه ولي هوالفازلين الكمية يمكن لك ضاعفيها حسب الرغبة طريقة تحضيره كالتالي :



      اشنو هو المحلول ؟؟ :

      بزاف المرات تنتكلموا على كلمة محلول و بزاف المرات تيتطرح سؤال على اشنو هو المحلول او المنقوع؟، فالمحلول هو مركز عشبة من الاعشاب لي تنستعملوها في وصفاتنا الطبيعية بحيث تتبقى فيه الزيوت والمكونات لي في العشبة كاملة، وكمثال جبت لكم محلول النعناع الرائع والغني وطبعا هاذ الطريقة يمكن لك تستعمليها مع اي محلول ديال اي عشبة بغيتيها والكمية انتي تحكمي فيها القاعدة الاساسية هي كمية العشبة تكون ضعف الماء باش يعطيك محلول مركز وتستافدي من المزايا لي فيه.





      زيت الورد الرائع:

      دائما تنسمعوا زيت الورد وليتنعرفوا ان الثمن ديالو غالي بحالا ما عرفت منين تيجيبوا الورد من شي كوكب اخر هههه لكن بانضمامك لاناقة مغربية حتى حاجة ما تبقى غالية عليك وبايديك تحصلي عليها وطبعا زيت الورد جد غني ومفيد فيه مميزات للبشرة رائعة تيخليها دائما شباب تيحارب التجاعيد والسيكاتريسات وطريقتو ساهلة غير الورد يكون جديد وفيه الريحة ماشي قديم ما تتكونش فيه الريحة ويبان لك ذابل لي عندها ورد الجوري الاحمر والوردي تستعملوا اي ورد عندك فيه الريحة وجديد ديريه ولي مغتربة بحالي ملي تجيب الورد من المغرب تعملوا في قرعة وتخليه في باب الثلاجة تيبقى محافظ على لونو وعلى ريحتو وكانه معقم روعة





      جيل الوي فيرا او هلام الصبار :

      عندنا فائدة اخرى ولي هي نبتة خاصها ضروري تكون متواجدة عندك في الدار تربيها وتهلاي فيها بحال الخميرة البلدية لانك غادي تحتاجيها في بزاف المواقف بحال الحريق او شي جروح الله يحفظ ، تعتبر مرطبة للجلد وللشعر مهما حكيت عليها ما نوفيش الكم الهائل لي فيها من الفوائد والمزايا هذا علاش نزلت لكم رابط معسبة قوتي في صمتي جزاها الله خيرا باش تعرفوا على العشبة او النبتة لي في الموضوع الغني ،عموما الصبار او الويفيرا هي فعلا نبات عجيب تشريها صغيرة ب 10 دراهم وتتكبر بسرعة





      السيروم الواقي من التجاعيد والمرطب والغني بعدة مزايا:

      كلشي تينتظر هاذ اللحظة ولي هي مختبر مواد التجميل يبدا في العمل ياسلام ملي تقادي السيروم الغالي الثمن ولي تيتباع بالاولوفات والكمية قليلة ، لكن السيروم لي انتي غادي تقادي اغلى واجود لان فيه هرمون الحب والتصالح مع ذاتك السيروم حبيباتي من اروع ما يكون لكل الاعمار ملي تتبدا البنت تشوف في المراية خاصها تحافظ على جمال البشرة بالسيروم لي فيه مزايا متعددة وطبعا انواع السيروم كثيرة وكتعريف فقط للسيروم انه تيعطي حماية للبشرة ما يخليهاش تفقد شبابها ويخليها محافظة على التماسك ديالها فيه بزاف الانواع كاين السيروم المرطب والسيروم لي تيشد البشرة والسيروم المغذي والسيروم ضد التجاعيد يعني كل حاجة دايرين ليها سيروم والثمن جد مرتفع وعلاش ما يديروش سيروم جامع كلشي لكن حنا غادي نديروه صالح لكلشي وبثمن في المتناول لاضرر ولا ضرار .

      البشرة الحساسة تستعمل فقط قرص واحد من فيتامين س غادي تحس بشوية الحريق لكن بسرعة تيبرد او تقدر تعوضو بكبسولات فيتامينe ، هاذ السيروم تيخلي البشرة متماسكة وزوينة ملي تجربوه ما غاديش تبقاوا تستغناوا عليه وطبعا فقط للاستعمال الليلي


      ملاحظة:

      لي كتمشي للحمام السخون ملي تجي ما تستعملش السيروم لان البشرة كتكون سخونة والمسام مفتوحة كما تنقولوا الوجه طايب فالسيروم غادي يحرق شوية لكن باش نتفاداوا اي تصادم كون الاقراص الفوارة ديال فيتامين س يعني بحال الحامض او الليمون بحال بحال فيها حمضيات و
      السترين ومواد كربوهيدراتية ما تقدريش ديريهم على البشرة وهي عاد خرجات من الحمام سخونة خليوه حتى للغذ عاد تستعملوا






      الكريم الطبيعي المرطب اليومي

      طبعا الكريم المرطب اليومي لازم يكون من بين الاساسيات ديالك بعد التنظيف يوميا كلما غسلتي وجهك مثلا للصلاة ضروري دهني وجهك باش ترطبي البشرة لان الترطيب تيخليها بعيدة على شبح التجاعيد والبقع وعدم توحيد اللون واليوم غادي نقادوا كريمنا اليومي لي فيه مكونات صالحة لبشرتنا وامنة ما منها حتى ضرر هنا ماء اوراق النعناع هو محلول النعناع لي ذكرنا من قبل .





      كريم طبيعي مرطب يومي للبشرة الجافة والحساسة :

      طبعا البشرة الجافة والحساسة خاصهم ترطيب مكثف بحيث الماء تيزيد ينشفهم فكلما غسلتي بالماء الا وخاصك دهني وجهك بكريم مرطب وطبعا مع المداومة على شرب الماء الكافي ولي هو لتر ونص على الاقل و الترطيب اليومي غادي ترجعي للبشرة طراوتها وما تبقاش شاحبة او فيها مشاكل








      المطلوب في التطبيقات :

      اختاري اي بطاقة من الاقنعة وكذلك اي كريم وضعي تطبيقك وتعليقك















      تعليق

        • WhatsApp

        #4




        الدرس الرابع



        العناية بالفم والعينين


        اولا : العناية بالفم






        طبعا السنينات هما عنوان الصحة منهم تتبدا عملية المضغ وهلم جر هههههه لهذا القاعدة تتقول لينا بعد كل اكل خاصنا نظفوا السنينات يعني اضعف الايمان بعد الغدا وبعد العشا مع الان القاعدة الصحيحة تتقول بعد الفطور وبعد الغدا وبعد العشا يعني ثلاث مرات، بعض المرات تنشوفوا ولو انك تتغسلي باستمرار تتكون واحد الصفورية على الاسنان و لي تتجي من المواد المستعملة في الاكل ديالنا او من كثرة شرب الشاي لي ما تنشربوش من بعدو الماء باش ما تبقاش الصفورية لاصقة ولهذا اليكم وصفة تحارب الاصفرار والسواد وتخلي سنيناتك جوهر مع المداومة غادي يوليوا بيضين بياض الثلج



        بعد الاسنان يجي دور العناية بالشفايف ومع هاذ البرد تيشقوا وينشفوا فما عليك غير بفازلين لي حضرتي طبيعي دوزيه عليهم تقدري ضيفي لو شوية العكر الفاسي باش يعطيهم لون وردي كذلك باش يرطبهم وباش تخلصي من التشقق والقشوراليك هاذ الوصفة الرائعة :




        ثانيا : العناية بالعينين ومحيطهما





        وطبعا العينين جمالها كذلك يحكي عنه الشعراء ولكن اياكن والنمص انا بريئة من كل من تلمس شعر حواجبها راها لعنة من الله ورسوله ولي هي الخروج من رحمة الله والعياذ بالله



        نجيوا للعناية بهاذ الركن لي تتكون فيه الهالات السوداء ويبان فيهم التعب وكاين لي تيتنفخوا لها الجفون وبزاف الامور ولي بسبب الاهمال والتفرط تتكثر غادي تعطي لهاذ المنطقة حقها من العناية ولي تتبدا بعمل محلول طبيعي ينظفها ويحميها من بزاف المشاكل




        وباش نعطيوا للعينين الانتعاشة ونظرة زوينة ويبان عليهم الارتياح



        الهالات السوداء عدو الجمال والاشراقة ديال البشرة اليك هاذ الطريقة الازلية في العناية بمحيط العينين




        وطبعا محيط العينين خاصو ترطيب لان البشرة لي محيط بهم رهيفة ورقيقة خاصها عناية خاصة وعليه خاصك تهتمي بترطيبهم بشكل مستمر باش تحاربي التجاعيد لي تتغزو هاذ المنطقة بسبب الجفاف ديالها





        ولي بغات تستافد اكثر اليك ملف الدورة الاولى لي فيه الموضوع مفصل على طريقة العناية بمحيط العينين ولي تتبقى مسالة بديهية كونك تعملي قناع للبشرة ما تنسايش منطقة العينين كذلك


        http://www.anaqamaghribia.com/vb/for...D8%A9?t=433002









        التطبيقات المطلوبة :

        ــ ضعي برنامجك المتبع للعناية بكل من الفم وبالعينين
        ــ لك حرية الاختيار في تطبيقك من هذه الوصفات الطبيعية



        التعديل الأخير تم بواسطة ذاكرة; الساعة 27-01-2017, 00:59.








        تعليق

          • WhatsApp

          #5






          الدرس الخامس

          العناية بالجسم باكمله :


          اول شيء العناية باليدين والرجلين:

          الان جا دور اليدين والرجيلات ولي خاصهم كذلك عناية واهتمام غادي نبداوا بمقشر رائع لليدين والرجلين بجوج بهم تيزول الخلايا الميتة والسواد لي تيلصق بسبب الجفاف وعدم الترطيب وخاصة اليدين لي يوميا تيتعرضوا لسوء المعاملة مع مواد التنظيف واقلها باش تنغسلوا الاواني وجافيل وامور متعددة لي تتخرب جلد اليدين وتخليهم حرشين وفيهم التجاعيد لهذا كما قلت لكم غادي نحضروا هاذ المقشر الرائع لي تيخليهم رطبين ومصقولين ولي فيه مواد كلها تتقوم بتجديد الخلايا وبتصفية البشرة ديالهم ويرطبهم .







          وطبعا المرطب الغني لي غادي يعطيهم لي فقدوه مع الماء ومواد الغسيل هو الكريم السحري لي سبق لينا واشرنا ليه ولي هو الفازلين الطبيعي من صنع ايديك جد رائع لليدين والرجلين





          العناية بالمنطقة الحساسة:



          المنطقة الحساسة خاصها عناية يومية دون اهمال والان هاذ القناع كيصفي المناطق الحساسة ولي تيدخل فيها اعلى الفخذين والابطين وكل مكان فيه سواد او لونو غامق فهاذ القناع تيعمل على تبييضها يستعمل مرة كل اسبوع وطبعا على ذكر المنطقة الحساسة ولي تنعنيوا بها اعلى الفخذين خاصها دائما تكون ناشفة ونقية ومرطبة وهنا يمكن لك دهني بفازلين طبيعي لي من انتاجك يمكن لك ضيفي لو كريم كليسوليد و لي غادي يعطيك نتائج رائعة






          وباش ما يكونش عندنا تكرار فمن الافضل القاء نظرة على الموضوع المفصل و السالف في الدورة الاولى بهذا الرابط :


          http://www.anaqamaghribia.com/vb/for...D8%A7?t=433868



          تمارين رياضية لازالة الكرش:


          اول شيء قبل ما نديروا حمامنا الاسبوعي اجيوا نشوفوا ذيك الكرش لي بزاف عاملة لهم مشكل ولكن هاذ الكرش ماشي غادي تمشي بوحدها الى ما كانت هناك تمارين رياضية لي تعينها باش تزول هاذ الطريقة غادي تهنيك منها ولكن بالاستمرار عليها ان شاء الله تحصلي على المرغوب غادي تقومي بهاذ الحركة ولي هي انك تنعسي على ظهرك وتبداي تهزي كرشك وتحسبي 1 ـ 2 ـ 3 ـ 4 ـ 5 ثم تنزلي وترجعي تكري نفس العملية اكثر من 3 مرات









          العناية بالجسم كله:


          يجي دور العناية بالجسم كلو من ترطيب وتصفية على مستوى الركب والكوعين والمرافق والعنق كذلك عموما جسمك كلو خاصو ترطيب ديري في بالك ان الماء تينشف البشرة اي نعم تينظفها ولكن مع السخون والمواد لي تنغسلوا بها فتيتعرض الجسم للجفاف وحتى هو تتبان فيه التجاعيد ومع الجفاف تتبان بقع او عدم توحيد اللون لكن الى اعطيتي شوية الاهتمام بجسمك وبراسك كلو غادي تحقي نتائج زوينة تفرحك وتخليك محافظة على جمالك بطرق بسيطة ولكن مستمرة ومتابعة دون اهمال او تفريط وطبعا حمامنا المغربي غني عن التعريف ولي يعتبر اسطورة مغربية ورثناها ابا عن جد داخل في ثقافتنا المغربية


          طبعا قبل ما ديري التبريمة خاصنا واحد الصابون لي غادي يخرج منك الفايت والبايت ديال الخلايا الميتة لي جربوه في الدورة الاولى غادين يقولوا عليه لانه فعلا تيخليك متاكدة انك زولتيها كاملة




          ومع هاذ الحمام ضروري ما يكون نصيب لجسمنا من تبريمة ولي هي اروع ما يكون تتخلي ريحة زوينة وجلد رطب وناعم وصافي








          وباش نختموا حمامنا خاصنا لي يعطر ويرطب لينا الجسم كلو من العنق الى اخر اصبع في رجليك ما لقيت لكم احسن من هاذ الوصفة لي معتمدة وجد رائعة





          وهكذا ان شاء الله بعد هذه النصائح والنقاط لي اكيد كل انيقة تتعرفها ولكن بعض المرات بالاهمال ما تتعطيش لراسها وقت فين تحس بالراحة والاسترخاء والحمام هذا هو الدور ديالو تيزول التعب ويعطيك تجديد، ديري في بالك انك تعملي حمامك الاسبوعي فرصة فين تقومي بالتجديد ماشي حمام الزربة وجري عليا نجري عليك شي تحكيه وشي تخليه اعطي لراسك وقت ترتاحي فيه وفكري فيه من بداية التحضير ليه اشنو ندير لشعري لوجهي لحمي كيسي ما يكونش بحال القرشال حرش تكايسي على البشرة خليها تبقى ناعمة، الى نهاية هاذ الحمام باش تخرجي باحساس رائع ينطلق من النظافة من الايمان ورشاقة واناقة دايزهم الكلام.

          وهكذا اختصرنا في هاذ الملف ما امكن الاهم ان نهتم بالجسم كلو شانه شأن بشرة الوجه


          التطبيقات المطلوبة :

          كل انيقة تلخص لينا مراحل حمامها الاسبوعي المعتاد واشنو ضافت ليه بعد هذا الدرس وذكرالنتائج طبعا















          تعليق

            • WhatsApp

            #6





            الدرس السادس




            الشعر تاج ونصف جمال المرأة :


            الشعر قالوا عليه نصف جمالنا وهو تاجو، ولكن الى كان شعر نيت صحيح وقوي وفيه كل معاني الجمال، وطبعا الشعر تيتاثر بصحتنا الداخلية الى كان نقص في الحديد او في الفيتامينات او الاكتئاب او مشاكل اخرى داخلية عافانا الله واياكن،وعدم شرب الماء الكافي تيادي لجفاف الشعر ويولي مكرد ومشعكك ومشنتف وتالف فهاذ الشعر تيادي الثمن وسط هاذ المشاكل كلها ولي هو التساقط ، ولهذا مشاكل الشعر تتختلف من انيقة لاخرى وفي اخر المطاف كلنا تنحلموا بسالف طويل ورطب وقوي يعني شعر جميل
            ورائع ولكن الى ما كانش الاهتمام والرعاية لهاذ الشعر فكيفاش غادي تحصلي عليه الى كنتي هاملاه
            وما معتنية به .

            لهذا حبيبتي عليك بمراجعة اش تتاكلي وثقفي راسك في اتباع برنامج منظم في الاكل ديالك وشربي الماء الكافي كلها امور باش تعالجي مشكل التساقط من الداخل ثم تيجي دور الوصفات والخلطات الطبيعية لي تتكون بمثابة الدواء المكمل بعد الاكل الصحي والمتنوع



            مشكل تساقط الشعر:


            اهم مشكل لي بزاف تيعانيوا منو هو التساقط و الوصفات كثيرة باش توقف لك هاذ المشكل، لي قليل هو الصبر عليها والمداومة وكذلك والاقبال عليها فيه شوية التبعكيك ها ريحة البصلة ها ريحة القطران ها ها ها ها الخ ....الشعر ماشي يكتفي بوصفة مرة وحدة وصافي انتهى الامر اااه ما دارت ليا والو ما خليت ما درت وهي كل مرة دير حاجة يعني الى تفكرات شي نهار الزغيبات لي بقاوا لها دير لهم الحنة ههه العناية بالشعر خاصها تكون مركزة ومستمرة ماشي نخلي الوقت يمر بزاف على التساقط بلاما نراجع القاموس الغذائي ديالي اشنو ناقصني اشنو خلا شعري يطيح ويتكمل عليه وتتكثر الشكوى بلا فايدة وكاينة لي تسمع بدل الوصفة الف ولكن غير معمرة بهم الاجندة ديالها ما تدير حتى تطبيق وما كتابعش المشكل باش تخلص منو لازم تبقاي مستمرة على علاج المشكل حتى تظهر لك النتيجة ولو بعد سنة المهم انك مهتمة به واكيد غادي تحصلي على شعر كما تمنيتي ان شاء الله

            اليك قناع الخروب لي خاصك داومي عليه وطبعا لي بغات تعرف على ميزة الخروب فما عليها غير توجه لمعشبة قوتي في صمتي جزاها الله خيرا باش تقرب لها الصورة اكثر على هاذ العشبة العجيبة.

            1



            2

            هاذ القناع جد مميز ونتائجه مذهلة وعجيبة تبعيه مدة شهر وغادي تشوفي النتيجة ولكن تقارنيه مع مراجعة الغذاء وتشربي الماء الكافي باش حاجة كتكمل اخرى قناع السكين جبير الرائع هاذ القناع ما تيخليش ريحة البصلة مجهدة الى ما بغتيهاش تبقى نهائيا في الغرف الماء الاخير ديري فيه فاني سائل او قهوة سريعة الذوبان وشلي بها شعرك واصلا ولا يهمك الى كانت رائحة البصل لان الاهم هو علاج مشكل التساقط وفكري باش ما يبقاش شعرك خاوي او حتى توصلي للصلع لا قدر الله شعرك عنوان صحتك



            3

            خيار اخر بالنسبة لرائحة البصل او الثوم ما تتبقاش مع طريقة تشلي شعرك في الاخير كما قلت لك سابقا اما فاني او بالقهوة




            الشعر الجاف والمتقصف والمكرد والحرش والمشعكك


            شعرك جاف ومكرد ومشعكك ولانطيرات شادين الاسكا، او بحال لاستيك او ملي تبغي طلقيه يتنفخ بحال الكنفوذ هههههه حرتي ما عرفتي ما ديري امام كل هاذ المعضلات ولي تتقولينا شعرك جد جد جااااف ايوا يالالة الانيقة وصفة الشعر الجاف تبعيها غير 4 المرات وغادي تفاجاي من النتيجة شعر ملس ورطب ولكن ماشي من الماء للماء راه خاصك دوري لو الباتشا بعد الغسيل باش الزغبة طوع وتشد طريق
            وحدة وتاخذ القوام ديالها المسبسب

            اول قناع مرطب جد رائع لي تيتعمل على طريقة الترطيبة المعروفة ولكن النتيجة خلاف بكثير الترطيبة الكيماوية تتنشف الشعر وتقصفو وتحسكو وتنسلو تيرطاب فقط في الماء وملي ينشف يولي محروق لكن هاذ الترطيبة الطبيعية لي يمكن نقولوا عليها كيراتين طبيعي تتقويه وتغذيه بعد الترطيب، ترطيبة الروز لي من اروع ما يكون تترجع الكيراتين لي تيفقدو شعرك وترجع لو الملمس الحريري وتغذيه وتقويه وتعطيه صحة وجمال الى داومتي عليها مرة في الاسبوع غادي تحصلي على شعر راااائع كما تمنيتي ودبا مع الفصل بارد هاذ القناع ملي تخلطيه مزياان ديريه في حمام مريم باش يجيك دافي وكذلك بالنسبة للروز صلقيه مزيان حتى يتعلك يعني يطيب بزااف وملي طحنيه يعطيك عجين ملس ورطب وضيفي لو باقي المكونات وديريه مرة في الاسبوع وبعد غسل الشعر نشفي شعرك بالفوطة ودهنيه بالسيروم لي غادي تلقاي بطاقته في الاسفل ودوري لو الباتشا واجي عاودي لينا على نتيجة تطبيقك لي غادي يخليك فرحانة وسعيدة ان شاء الله


            1








            مزيد من الوصفات الخاصة بترطيب الشعر وتغذيته

            2



            3







            لغسل الشعر دون مصيبة الشمبوان :


            اول شيء حاولي ما امكن تحذفي من قاموس حمامك الشمبوان لي تيهلك الزغبة والفروة بجوج بهم وما كاين ما احسن من الشمبوان الطبيعي ولي هو الغاسول المسقي بالاعشاب لي تيحفظ فروة الراس من التلف و من التساقط ومن الشيب المبكر لي السبب ديالو هو الشمبوان لي تيحرق الشعر هذا مرطب هذا فيه الرغوة كثيرة هذا ريحة زوينة وكلها مفاسد للشعر ما كاينش ما احسن من غاسول الجدات لي عندو تاريخ ما يمكنش يفسد لك شعرك قدما تيحميه ويخليه رطب وسليم لي باقي ما تدير الغاسول عمرها ما تكون انيقة مغربية حرة هههههه ديري الغاسول بالاعشاب واعطي حياة لشعرك .


            1





            2





            السيروم المغذي للشعر:

            لتغذية الشعر ما كاين ما احسن من سيروم مغذي ومعالج لتقصف الشعر ولي غادي تحضريه بايديك ويعطيك فوائد كثيرة ان شاء الله




            والطريقة لي تتزيد في جعل الشعر رطب والزغبة مطلوقة ومسرحة هي الباتشا طريقة سهلة مرتين في الاسبوع متتالية وهانتي مبرعة بشعر رطب ومسرح بلا مشاكل









            وفي الصباح تلقاي شعر مسبسب رطب حرير





            وفي الاخير يمكن لك تعملي مشيطة سهلة وبسيطة انيقة في نفس الوقت






            الى هنا تنتهي دورتنا المختصرة وكما قلنا الخفيفة الضريفة، والاهم فيها هو زرع الهمة والمثابرة على العناية بالجمال، اتمنى لكن
            المتعة والفائدة ونفس طيبة وجمال روح رائع دائما ان شاء الله.



            التطبيقات :

            لك كامل الحرية في اي تطبيق وقع عليه اختيارك







            وقبل ما نسدل الستار على هاذ الدورة الخفيفة ولي كنتمنى انها تكون حركت فيكم الهمة والحيوية باش تعتني براسك وبجمالك ودائما في صورة ترفع معنوياتك، ونقول لك دبا بيني وبينكم واش شميتو روائح الخزامى وعطر الورد والفرحة كيف تدخل للذات وانتي تتحضري امور خاصك بك فقط لشخصك لذاتك تيدخل السرور لك بشكل عذب كونك مهتمة بجمالك وباناقتك لراسك اولا وتعطي صورة لجمال انثى بكل ما في الكلمة من معنى وكوني على يقين ان اهتمامك بنفسك تيعطيك شعور بشخصية قوية وبثقة في النفس، فعلاش الاهمال وعلاش تنساي راسك وسط الاشغال والاعمال ديالك كما كانت، السنين تتمر وانتي مسؤولة على انك تبقاي فراشة انيقة معتنية براسها وعزيز عليها التاويل في كلشي مهما كان عمرك خليك دائما تحسي براسك انك فتاة مزال شابة بقلبك الطيب بخصالك الحميدة وبمراجعة النفس بالحفاظ على الصلاة في اوقاتها المخافظة على الاذكار يعني تقومي بما امرنا الله به باش تعيشي مرتاحة البال بحال التلميذة لي في القسم ولي هو الدنيا والحياة تتعمل كل مجهوداتها باش تنجح وهذه هي رسالتنا نحيى لنموت فيما بعد ولكن ليكن الزاد لي غادي نديوا معنا زاخر وينفعنا يوم لا ينفع لا مال ولا بنون اسال الله لي ولكن الهداية والثبات.


            اتمنى اخواتي الانيقات ان اكون عند حسن ظنكن وتكون دورتنا الخفيفة الضريفة المختصرة هذه حركت فيكم الساكن واعطت لكم اشارة ضوئية تحسي فيها بانك ملزمة بالعناية قبل ما يفوت الفوت واسال الله تعالى ان يجمعنا بدورة لاحقة ان شاء الله في ظروف طيبة مباركة، واللهم جملنا دائما بالتقوى والايمان واجعل قلوبنا بيضاء طاهرة .




            والى لقاء اخر بحول الله وقوته












            تعليق

              • WhatsApp

              #7





              سيروم جد مميز للحماية من التجاعيد ومرطب فعال لكل انواع البشرة

              الى كل حبيباتي في الله الانيقات المحبات للجمال
              طبعا تنعرفوا ان السيروم هو مستحضر مركز يعمل على حل العديد من مشاكل البشرة وخاصة التجاعيد بحيث تيوقفها ويحميها بدرجة عالية ويعطي للبشرة التماسك ويغذيها ويضيق المسام الواسعة، بحيث كيخترق البشرة في العمق ديالها خلاف الكريم لي تيرطب السطح اما السيروم فتيتوغل داخل الخلايا ولهذا اليوم اصبح السيروم ضروري وخاصة بالليل لانه يحتوي على زيوت والزيوت تنعرفوا انها عدوة لاشعة الشمس يستعمل ليلا وماشي في وقت النعاس حتى تيولي ممسوح على الوسادة بل قبل ما تنعسي تستعمليه بساعة باش البشرة تشربو ويعطيك نتيجة جد رائعة


              لي ما توفراتش لها الويفيرا باش تقاد السيروم لي طرحنا من قبل تقدر تعوض بهاذ الخيار الاخر
              للسيروم بفيتامين س الرائع بالنسبة كذلك الى ما توفرتش فيتامين س غبرة تقدري تستعملي قرص واحد من فيتامين س لي تيتباع في الصيدليات غير ما يكونش مخلط بمواد اخرى يكون فقط فيتامين س لي لونو برتقالي وهاذ السيروم يمكن الاحتفاظ به لمدة 25 يوم لكن ماشي نحتفظوا به
              دون استعمال وتخليه مهمش ولكن اقصد ان هاذ الكمية تتعطيك استعمال ديال
              كل ليلة لمدة 25 يوم









              بالصحة والراحة







              التعديل الأخير تم بواسطة ذاكرة; الساعة 03-02-2017, 00:58.








              تعليق

              يعمل...
              X