ArabicEnglishFrenchSpanish

إعـــــــلان

تقليص
لا يوجد إعلان حتى الآن.

روتيني اليومي مع الحفظ...عااادي ما تغيرت حتى حاجة!!

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة
    • WhatsApp

    روتيني اليومي مع الحفظ...عااادي ما تغيرت حتى حاجة!!

    الكثير منا(كنت انا براسي ) الى سمع هاد الجملة "حفظ القران الكريم" كايتخايلو راسو خاص ازير راسو و اعتاكف فالمسجد اولا تزير راسك بالحفظ عند اخوات في المسجد او خاص تكون نيييت اخواني مع راسك باش تاخد هاد الخطوة...!!
    في حين ان الامر بسيط للغاية و ما غادي تبدل روتينك اليومي بواااالو و الى ما تيقتوني قراو تقريري اليومي مع الحفظ و قارنو بروتينكم و ردو عليا الخبار.
    اول هاجس ان اول مرة احفظ بنادم كيبدا اتهاون فيما حس براسو جاه الحفظ صعيب في حين خاص العكس.باشما حسيت براسك ما قادراش تزيدي تحفظ او كتلفي بزااف حبسي الحفظ و بداي تراجعي حتى اتشد لك داكشي اللي حفظت واخا يكون غي بضع ايات.و كل مرة زيدي غي شوي بشوي.غاتجي واحد الوقت تلقاي راسك بديتي تشدي احسن من الاول و كتزيدي تشجعي تحفظي اكثر و هكذا...
    بلا ما نكثر عليكم وقبل ما ننسى انا وحدة بحاااالكم.حجابي عادي ما دايرة لا خمار لا سادل ...ماشي عيبت عليهم حاشة(ما كرهت ندير بحالهم) ولكن اغلبية حنا ولينا نلصقو الدين غي اللي لابسة الخمار و ثوب اسود هي اللي خصها تحفظ القران!!!ما عرفت منين جاتنا هاد الفكرة؟!!!
    نخليكم الان مع روتيني اليومي.
    الفياق كنفيق ربع ساعة قبل الاذان د الفجر(مع العلم كنسهر حتال 12:30 او 1:00.عندي ولدي صغير ما ابغي انعس لي بكري). كنصلي الوتر و نجلس نحفظ الاية ديال اليوم فين وصلت.الى كانت طويلة الاية كنكتفي باية وحدة والى كانو قصار كنحفظ اكثر.(هادشي كيدوم ربع ساعة فقط)
    كنصلي صلاة الفجر و الصبح و ندير شوي اذكار و نرجع ننعس تقريبا مع ديك 7(حيت نعاسي صعيب ما اديني النعاس دغيا).
    الفياق على حساب ولدي هههه بعض المرات نفيق 8 او 8:30 ما افوتها لي ههه(قولو اش بغيت مازال).
    كنبدل لولدي و نغسلو و اجلس استناني نصايب الفطور(ملي كان صغير كنت ضروري نفيق قبلو باش نوجدلو الفطور قبل ما افيق.دابا لا )
    كنصايب الفطور ديالنا انا و اياه(مرة بيض مرة عصيدة مرة شعرية....).و انا كنصايب الفطور كنرد الماعين اللي غسلت بالليل لبلاكار.و نوجد داكشي اللي غاندير للغدا(ما كنخمم بزاف حيت ملصقة برنامج الاكل على الثلاجة )
    كنجمع الطبلة و ندور للوالدة وانا كنهضر معاها(ضروري يوميا فنفس التوقيت صبح و عشية) و انا كنصايب مثلا نقشر خضرة او نعجن المهم ....شي حاجة خدامة فيدي.
    كنسالي معاها كنبدا نسبح شوي و انا كنغسا ماعين الفطور.
    كنبدا الغدا وانا كنعاود نحفظ الايات اللي حفظت فالفجر.كنعاودهم حتى كنسالي.و على حساب اش دايرة فالغدا الى كانت شي حاجة اللي خصها ما تطيب حتى تبغي تحط راه كنخليها حتال من بعد.
    كنمشي نجمع دغيا دغيا الدار و ندوز تجفيفة دغيا دغيا(عندي كولشي بالزربة ههه ).والى كانو حوايج كنديرهم فالماكينة تصبنو.نطلع نشرهم كنبقى فالسطح شوي باش اتشمش ولدي ههه امص شوي فيتامين د حيت ما نخرجوه بالنهار غي بالليل.و انا كندخل نطل على اناقة طبعا لا استغني عنها.
    وانا كندير شغليطبعا ولدي مرة مرة اقاطعني ابغي شي حاجة و خصني نديرلو خاطرو حتى هو بوحدو كيبقى فيا .
    نكمل من بعد ان شاء الله......


    • WhatsApp

    #2
    تبارك الله عليك نتسناك تكملي و الله يحفظ ليك الوليد

    تعليق

      • WhatsApp

      #3
      ماشاء الله عليك اختي
      سمحيلي نفيدك بوسيلة غاتساعدك بزاااف على الحفظ ملي تكوني تشقاي خدمي السورة الي كاتحفظيها فبيسي او هاتف او اي وسيلة عندك انت خدامة وكتسمعي غاتحفظي بسرعة قياسية اضافة لتعلم مخارج الحروف بشكل صحيح وحتى احكام التجويد غاتجودي غاتعلميه بالسماع كيما تعلموه الصحابة والله اجعلك ممن يقال لهم يوم القيامة ”اقرأْ وارقَ ورتِّلْ، كما كنتَ تُرَتِّلُ في دارِ الدنيا، فإِنَّ منزِلَتَكَ عندَ آخِرِ آيةٍ كنتَ تقرؤُها”

      تعليق

        • WhatsApp

        #4
        تبارك الله عليك حياة والله ابارك لك في وقتك و صحتك
        في انتظار التتمة
        [url=https://www.anaqamaghribia.com/pic/][/url]


        تعليق

          • WhatsApp

          #5
          ملي كنوجد الغذاء.كنبالي براسي شوي دغيا دغيا و نجلس نلعب ولدي.و انا كنعاود نراجع الايات اللي حفظت الصبح و كنعاود من الايات اللي قبل في انتظار ادخل مول الدار.
          ملي كيدخل كيبقى هو العب مع الولد و انا كنمشي نوجد الغذا نتغداو و نجمع الطبلة و نمشي نصلي الظهر.فداك الوقت مول الدار كيبغي اتكى.و انا كنستاغل في حفظ المزيد من الايات .انا كنحفظ و و لدي حدايا كيلعب طبعا مرة مرة اقاطعني نلعب معاه ههه.(الحفظ يتمثل في:حفظ ايات الفجر+مراجعة حفظ الامس+مراجعة من بداية السورة).هادشي كامل نصف ساعة من بعد الظهر.
          من بعد كنعس الولد(ضروري قيلووولة ) الى ما نعس ابقى النهار كولو مبرزطني.
          و انا عندي خيارات ههه وايما ننعس حداه و اما نمشي نطيب شي حاجة لكوتي و اما نصايب شي حاجة فالدار(نرتب حوايج فبلاكار ،نصبن حوايجو حيت هو يوميا عندو التصبين ما نستنا الماكينة خاص مرة مرة نصبن حويجاتو بيدي،و اما نحل اناقة ههه......المهم كل نهار و هو)
          قبل ما افيق خاص نوجدلو ما ياكل كيفيق طبعا كاعي ههه خاص نتحزر نستنى امتى اتقاد مزاجو(بلا ما ضحكو عليا راه شي حوايج تعود عليهم من صغرو حيت كنت خدامة نخليه للوالدة و هي حنيييييييييينة بزااااف كانت تدلعو لاقصى درجة الله اسمح لي منها و خلاص).
          كنت نقول لها ما عرفت كيفاش كبرتينا بداك الحنان كولو داك الصبر كولو (و حنا كثار تبارك الله هه).بنات اليوم ما فيهم صبر (كنهضر غيييي على راسي )حيت انا ما نعقل عليه كندلعو شوي و فالبلاص نقلب عليه الى كثر عليا.
          طولت عليكم غي باش ابان لكم بلي الحفظ ما غير حتى حاجة يعني كندير داكشي اللي كتدير اي زوجة ربة بيت(واخا راني غي عطلة مطولة حاليا اما راني خدامة و ايام الخدمة كنستغل الوقت اللي كنكون فيه فالطريق للعمل نصف ساعة تقريبا الى غادية و الى راجعة يعني ساعة كافية نحفظ عدد الايات اللي بغيت).
          نرجع نكمل الروتين وصلنا للكوتي كيدخل مول الدار ناخدو كوتي......من بعد صلاة المغرب كيخرج زوجي الولد و انا و اما نخرج معاهم و اما نجلس .و غااالبا كنختار نبقى فالدار هههه حيت كيخرجو يوميا
          كنجمع ماعين الكوتي و نرد العشا.و نجلس نراجع شوي غي بضع دقائق .و من بعد نتكونيكطا.طبعا النت ديما حالة مرة مرة نطل على اناقة (وفية ♡ ههه ولفتكم).
          والى خرجت معاهم راه كنهز معايا البورتابل هما كيلعبو وانا جالسة مكونيكتية وراكم وراكم ههه طبعا بلا ما ننسى نراجع حتى على برا.غي مراجعة فيما حصلت نطل على البورتابل دابا الحمد لله كولشي ساهل غي اللي ما بغا(ولدي كيلعب فدوك الطونوبيلات و باه صايك بيه و انا نتمشى معاهم و نحفظ الايات غي فخاطري او نبقى جالسة نشوف فيهم من بعيد فداك الجو د الليل واو روعة)
          و طبعا العشا و اما نجيبوه معانا واما ندير غي شي حاجة خفيفة سريعة.(الى خرجت)
          ناكلوها و حنا كنتفرجو.و صافي النهار كمل كنغسل دوك الميعنات عاود على السريع و ندوز تجفيفة خفيفة لكوزينة و نجمع العاب و روينة باش تصبح الدار شوي نقية ما نحمل تصبح لي الروينة.و الى كنت غادي نوجد شي حاجة للغدا(شي دجاج خصو اتشرمل او حوت او...كنصابو نحطو).
          صافي نهاري سالا كنجلس عاود نلعب مع ولدي(او بالاحرى نقريه ههه) غي بالالعاب نيت .زربانة عليه اتعلم حتى كنديه بزز انعس مع ديك 11:30 كنبقا نعس فيه و انا طافية الضو و نعاود نقرا من بدااية السورة و الى حصلت و سكت اشدلي فمي اقولي كملي ههه.بعض المرات نتفكر بعض المرات نهز بورتابل حتى نتاكد و نكمل.
          طبعا اقدر ما ذكرت كولشي و لكن هادي هي القاعدة العااامة ديال الروتين اليومي ههه.

          تعليق

            • WhatsApp

            #6
            المشاركة الأصلية بواسطة sousoufara4 مشاهدة المشاركة
            ماشاء الله عليك اختي
            سمحيلي نفيدك بوسيلة غاتساعدك بزاااف على الحفظ ملي تكوني تشقاي خدمي السورة الي كاتحفظيها فبيسي او هاتف او اي وسيلة عندك انت خدامة وكتسمعي غاتحفظي بسرعة قياسية اضافة لتعلم مخارج الحروف بشكل صحيح وحتى احكام التجويد غاتجودي غاتعلميه بالسماع كيما تعلموه الصحابة والله اجعلك ممن يقال لهم يوم القيامة ”اقرأْ وارقَ ورتِّلْ، كما كنتَ تُرَتِّلُ في دارِ الدنيا، فإِنَّ منزِلَتَكَ عندَ آخِرِ آيةٍ كنتَ تقرؤُها”
            اختي ربي ابارك فيك.جربت هاديك الوسيلة .ما نفعاتني.انا دماغي فشكل هههههه.كنلقى راسي احسن اني نعرض بوحدي حتى نحصل و نمشي نصحح .اما ال كنسمع الى جاب الله نسيت كيسبقني المقرئ بحال الى كايعطيني الجواب على الجاهز اعني ما اخلي لي فرصة فين نفكر و نخدم الذاكرة.و سبحان الله والله الى ملي بحرا بديت كان اكون شبه مستحيل نتفكر الى جاب الله نسيت.دابا لا دغيا كنتفكر مع العلم اني فالاول كانو غي بضع ايات و الان الحمد لله ولفت فولات الاستجابة ديال الذاكرة سريعة.دغيا اتحلو دوك المجور اللي كانو مصدين هههه

            تعليق

              • WhatsApp

              #7
              الله يوفقك كلشي على الاصرار

              تعليق

                • WhatsApp

                #8
                اللهم يسر اختي

                تعليق

                  • WhatsApp

                  #9
                  اللهم امين يا رب

                  تعليق

                    • WhatsApp

                    #10
                    جميل جدا ان يكون حفظ القران من روتينك اليومي يسر الله لك حفظه وجعللك من الحافظين والعاملين به

                    تعليق

                    يعمل...
                    X