ArabicEnglishFrenchSpanish

إعـــــــلان

تقليص
لا يوجد إعلان حتى الآن.

سعيدة قومي ..

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة
    • WhatsApp

    سعيدة قومي ..

    السلام عليكم ورحمة الله وبركاته

    سعيدة زوجة مهملة لدرجة الدار مغبرة، ريحة الرطوبة والنعاس في كل مكان، العنكبوت في السقف، سراق الزيت في الركاني، مواد وقطاني وطحين قديم دار الحشرات، حيوط الكوزينة معلكة، سلة الصابون ديمة عامرة، الماكينة ديمة فيها راس يبقى بلا نشير حتى يدير الريحة، كركور الحويج بدون طي ديال 2 أو 3 التصبينات، السدة عامرة ربوج، البلاكار عامر طباسل وكيسان مهرسين، شي حويج 5 سنين عمرهم تلبسو مخبياهم، سعيدة عندها بنية عندها 4 سنين، البنية ديمة مريضة بالحساسية، ديمة مريضة بالوجع، أما هي الكلف والحبوب في الوجه، القشرة في الشعر، المشك في الرجلين، حويج راجلها مكمشين، هادشي إلى لقا شي قميجة نقية يلبسها، كلشي موسخ، ديمة يغوت وينكر عمر الحال تبدل
    سعيدة نفسيتها مريضة بزاف، علاش؟ لأنها من قبل ما كانتش هكدا، بداتها الحالة من بعد الولادة، جاها إكتئاب الولادة، أهملت بيتها ونفسها وأسرتها غير 6 أشهر، صافي كلشي تراكم عليها، نفسيتها انعكست على صحتها الجسدية، أكلها اللي أصبح غير متوازن، وهادشي عطاها تعب متواصل، باغية غير تنعس وتنسى كل ما حولها
    6 أشهر تراكمت فيها أمور كثيرة، نفسية مريضة، زوج متذمر، طفلة متطلبة، سهر، تعب، نوم، شكوى، تأجيل أشغال، إهمال، هادي أصبحت حياتها من نهار ولدات
    شنو اللي وصل حالها لهاد الحال، المقلة إلى قليتي فيها تا تلصق فيها الزيت، تعاودي تقلي فيها، وهكذا.. كل مرة تتربى طبقة أخرى، حتى تولي سوداء معفنة، صعب جداً جداً تلميعها، شنو تا ديري ديك الساعة؟ تا تولي تحكيها كل نهار شوية حتى تزول أول طبقة وترجع للمعانها، لكن هاد المرة ما تهملهاش، كل قلية حكها حتى تولي تلمع، منها تشوفي مقلة ديمة نقية، ومنها تنظيفها أسهل ومنها نفسية جميلة
    سعيدة كيفاش تتغير؟ باش خاصها تبدا؟ واش راسها، وش بنتها، واش طيابها، واش كوزينتها، واش واش ... كل ما فكرتي في الحاجة كل ما جاتك أثقل، لذلك لازم تبداي أول خطوة
    أول حاجة سعيدة خاصها ديرها هي تشد دفتر وقلم وترتب الأولويات، وخصوصاً أنها تخدم غير بشوية بشوية يعني ترتب كل نهار دير حاجة والأهم تخصص وقت خاص للراحة
    لازم تعرف سعيدة أنها إلى ما قامت بالتغيير مستحيل الوضع يتغير، يعني في يدها الحل، خاصها غير تصبر شهر فقط وكلشي يرجع مزيان، وأهم حاجة تحافظ على الروتين اليومي المنظم بعد ذلك، باش ما تخلي تراكمات جديدة وترجع فحال إلى ما دارت والو
    سعيدة حاولي تنعسي بكري وتفيقي بكري باش يبقى يقدك الوقت وتسالي ترتاحي مع راسك
    قبل أي حاجة تعزف سقف الدار كلها وتمسح اللمبات والثريات كلهم وتحيد الريدوات كلهم يتصبنو
    بعدها تغسل النوافذ كلها بدون إستثناء
    أول حاجة تبدى بها هي سلة الصابون، لازم تكون نظيفة وديمة خاوية، غير يعمر راس ديرو يتصبن في الحال، ثاني حاجة غير يتصبن يتنشر في الحال، ثالث حاجة غير ينشف ينزل من الحبل يتطوى ويتحط في ركن، الخطوة التالية البلاكارات ديال الحويج، لازم يخوى وويتمسح بالخل، والحويج يتصفاو بمعنى اللي ما تلبساتش لمدة سنتين تتحط في خنشة تمشي للفقراء، واللي ما صالحة مقطعة أو مهرسة إلى النفايات أعزكم الله، نفس الشيء للسدة
    الحويج تخلي غير الحاجة اللي تا تلبس فعلاً
    ثاني حاجة الثلاجة، تخوي المجمد وتمسحو دائما بالخل وتصفي المحتوى اللي فات عليه الوقت ترميه وترجع الصالح تعملو في أكياس وترجعوا، نفس الشي للثلاجة التحت، وتمسحها من برا وتجرها وتمسح وراها وتسيق بلاصتها
    ثالث حاجة تمشي لبلاكارات الكوزينة تخويهم اللي فيه الحشرات واللي قديم ترميه الكيسان والأطقم والصحون المكسرة كلها لسلة المهملات المعالق والسكاكين مقالي طناجر.. وغيرها أي حاجة مصدية مستحيل ترجع للمعان ديالها ترميها
    وتغسل الصالح من المواعين وتنشفو وترجعوا
    تمسح زليج الكوزينة وتحت لافابو يتغسل ويتصفى من أي اغراض غير مرغوب فيها اللي صالح يتصدق واللي غير صالح للنفايات أعزكم الله
    الفرن يتغسل والبوطة أيضاً وأي آلات يتمسحو بالخل والشيتة وقماش خاص ويرجعو لمكانهم
    سالينا من الكوزينة نمشيو لبيت النعاس يتهز ويتنظف تحتو ويتغيرو البياضات كل أسبوع على الأقل ودائما يتفحتو النوافذ نصف ساعة كل صباح
    نمشيو دبا لبيت الجلوس يتهز حتى هو يتسيق من التحت وإلى كاين شي غبرة تمسح وإلى الطلامط توسخو يتغسلو ويرجعو
    الصالون نفس الشي، الزرابي شطبهم مزيان ورشهم بملح مطحون مع الخزامى ساعتين وشطبي ثاني على ما يجي الصيف وصبنهم
    المرحاض والحمام ديري ليه هجوم بالقفازات والشيتة والحلفة ومحلول مخلط جافيل وسائل المواعين وحكهم مزيان
    شري دوا سراق الزيت، وديريه لأن سراق الزيت ما بقاش مشكل كيف زمان
    سعيدة أي مكان عندك في البيت ديري ليه نهار ما تجهدش راسك ديري نهار إيه ونهار لا، حتى تكملي كلشي، وترجع دارك فيها الروح، ودوري براسك، الماسكات المناسبة مرة في الأسبوع لكن لازم تغسلي وجهك وسنانك كل يوم قبل النوم وديري زيت أو كريم مناسب، ويديك أيضاً
    رجليك حكهم مرة في الأسبوع وديري لهم كريم
    أنا عطيتك الخطوط العريضة ونتي نظمي راسك بالشكل اللي يريحك غير هو ضروري شهر تكوني مكملة كلشي وبديتي ترجعي لروتين يومي هادئ تنظيف خفيف كل يوم، ومرة في الأسبوع تجبدي ركنة من الدار، وهكدا تبقاي حتى تحسي براسك صافي تقاديتي مع شغالك، وصدقني غادية ترتاحي نفسياً، أكل نظيف نفسية طيبة مظهر جميل، هكدا تسعدي كل من حولك وتولي إسم على مسمى
    هادي رسالة لكل من وجدت نفسها في سعيدة أو وجدت قطعة منها في سعيدة، وأهم رسالة بغيت نوصل لك، لازم تعرفي أن حتى حاجة ما مستحيلة، وكل أنثى لازم تعرف أنها ماشي مخموجة أبداً، لا توجد أنثى مخموجة أو معفونة، غير هي تراكمات اللي خلاوها عاجزة على البدء، بسبب ظروف معينة، بعض الأحيان تا يكون سحر أو عين فلازم تحصن نفسها وبيتها والأسرة ديالها بشكل يومي ودير الرقية الشرعية
    ♥♥♥
    تعديل للإجابة على بعض التساؤلات التي قد تطرح :
    اخواتي بزاف تساءلوا على دور زوج سعيدة وبزاف اللي قالوا أن سعيدة مريضة خاصها تعالج أو خاصها تسافر أو خاصو يجيب مرا تعاونها أو أو....
    ما تنساوش أن سعيدة ولدات منذ أربع سنوات هادي، وجاها إكتئاب الولادة، والإكتئاب مر عليه 4 سنوات، ومعروف أن هاد النوع من الإكتئاب هو مؤقت يعني من أول أيام الولادة إلى سنة على أبعد تقدير، هاد الفترة (6 أشهر) خلات سعيدة تهمل دارها، وحياتها ونفسها وزوجها، أنا ما تكلمتش على هاد الفترة نهائي لأنها كانت معذوووورة، لكن تكلمت على الفترة اللي جات من بعد، المرض خلا بزاف الأمور تتراكم عليها، التأجيل المتكرر للأشغال خلا الأشغال تتكاثر وهنا بدا الخوف والعجز على القيام بها، كل هاد الفترة أكيد غادية تجيب مرا تعاونها مرة مرة لكن هي خاصها تقوم باشغالها اليومية، هي زوجة وأم، وعندها دور في دارها لازم تقوم بيه، ما تقولوش هي غير ملزمة، هي ملزمة بالخدمة الباطنة داخل البيت والزوج خارج البيت
    يعني توجد ليه أكل وتصبن ليه حويجو وتوفر ليه جو زوين في البيت وتربي ولادو و تهتم بهم، وإذا قامت بالزيادة فهي مأجورة، المشكل في هاد الوقت أن الزوجة خرجات تخدم وتزاد عليها الشغل، لكن تبقى ملزمة بما سبق
    هادي سنة كونية أزلية، المرأة لازم تقوم بأشغال البيت، واللي ما بغاتش تقوم بهم تجيب مساعدة تجلس معها 24/24 هي تقوم بكلشي، والزوجة ما دير والو
    حتى اللي تا يناديو بهادشي راه تا يشقاو وهازين ديورهم ما نكونوش متناقضين
    سعيدة لازم تحافظ على نظافة بيتها، هادشي كلو ماشي أنا اللي تا نقولوا، ولكن القصة كلها تا تنطق بلسان سعيدة ونفسية سعيدة وما ارادته سعيدة، سعيدة تا تبغي راجلها وبنتها وعزيز عليها دارها تكون منظمة ونقية وعزيز عليها توفر أكل طيب ونظيف وعزيز عليها التاويل كيف أي إمرأة مغربية، هي كانت هكدا قبل تحمل، وحتى في دارهم كان عزيز عليها التاويل، فاش وقعات في هادشي مرضات بسبب ضميرها اللي مأنبها لأنها حاسة أنها مقصرة باغية تنوض تبدا لكن حاسة أن التراكمات كثيرة مخوفاها
    سعيدة ما بغاتش السفر هاد الساعة، كيفاش تستمتع بالسفر ودارها مرونة، وراجلها هزها وهز مرضها ومراعي لها لكن أكيد مع الحياة اليومية ضروري غادي يطلع ليه الدم لأن الوضع طول، وأكيد جاب لها المساعدة اللي تعاونها شحال من مرة راه مستحيل الدار بلا تسياق والماعن بلا غسيل لمدة 4 سنوات، حياتها في المنشور كانت مختصرة، أكيد راجلها عاونها أكيد غسل وسيق وطيب وجاب أكل من الزنقة وأكيد صبن واكيد عومها ولبسها وأكيد قابل معاها البنت و أكيد هز و حط، لأنه تا يبغيها ومتشبت بيها وإلا كان هرب شحال هذا، لكن الرجل ما يصبرش ديمة لهادشي، غادي تقولوا المرأة حتى هي تا تخدم وتحمل وتولد وعلاش هي اللي خاصها تقوم بهادشي، هذا ماشي موضوعنا، المساواة بين الرجل والمرأة هاد الموضوع كبير بزاف، وماشي هذا مجال لمناقشته، وحتى المجموعة خاصة غير بالتاويل والتنظيف، هنا ركزت على الحلول اللي عطيت لسعيدة باش تنظم راسها شوية بغيت نساعدها لأن ضميرها مأنبها بسبب اهمالها خاصها تحفيز
    وأكيد أي زوجة فاش تا تنقي دارها وتنظم راسها وتتهلى في راسها، وتشوف الأسرة ديالها راضية وبصحة جيدة، هرمون السيروتونين تا يطلع وتا تنشط، وهنا عاد تا تولي عندها رغبة تخدم وتتعلم الصنعة وتحفظ القرآن وتقرا ودير مشاريع وتسافر وغيره.. أي إمرأة إلا وما تا ترتاح إلا ودارها نقية ومنظمة
    شعور الفرح والرضا عن النفس تا يولي غالب وهذا هو هدفي من الموضوع، أن الزوجة إلى نقات دارها ونظمت شغلها غادية ترتاح نفسياً وهادشي عن تجربة أي أنثى هنا، شوفو غير إحساس النساء هنا بعد ما نقاو لافابو، كلهم تا يحسوا بالراحة، فما بالك لو أنهم نقاو الدار كلها وتخلصوا من ال****يب وقضاو على جميع التراكمات
    تجمع :) أتحداك أن تفكري في النوم بعد صلاة الصبح :)
    https://www.anaqamaghribia.com/vb/node/17876456

    • WhatsApp

    #2
    السلام عليكم ورحمة الله وبركاته

    اختي أمينة هديل شكرا لك علی هاد الغيرة علی المرأة المغربية و لو ان الموضوع يمكن يتاخذ من جانب فكاهي للترفيه و الضحك أما في الواقع فمستحيل هاد الحالة تكون موجودة لمبالغات كثيرة في الموضوع
    هدي ثاني مرة نشوف ليك موضوع و مبغيتش ناخذ جانب دفاعي عاود ثاني و يطلع الامر كله للترفيه و انا خديتو بجدية هههه


    ممكن سؤال فضولي شوية : واش انتي لي كاتبة هاد الموضوع اختي ؟ ﻷنه كيحمل دلالات معبرة كتلقي الضوء علی جوانب خفية في الشخصية لي كتبته

    ع العموم ديما الوسطية في الأمور الحياتية كتخلي الحياة سعيدة
    لا افراط و تهلك صحتها و متبقاش قادرة تتمتع بايامها و لا تفريط و تبقی الوقت كله تشكي و تنوح

    الله يجيبنا للصواب و ييسر كل عسير يااا رب

    تعليق

      • WhatsApp

      #3
      نعم حبيبتي أنا اللي كتبتو لأن بزاف النساء عاشوا وعايشين وضع سعيدة وكتبتو لهم في واحد المجموعة، وفكرت اليوم نقلوا هنا
      نقطة مهمة جداً هي مركز الموضوع وهي أنه لا توجد أنثى مخموجة، كل أنثى تحمل داخلها حب النظام، حب النظافة، وحب خدمة بيتها، هادي فطرتها
      صدقني كاينين نساء تا يما عارفينش منين يبداو، قريت استشارات كثيرة لنساء تغلبو بسبب إهمال مؤقت وصف الحالة تقريباً نفس الوضع ديال سعيدة، خلاو التراكمات يتجمعو عليهم وهذا هو الهدف من الموضوع أنه لا شيء مستحيل، وخا الدار تولي كحلة وخانزة، ممكن تتنقا وممكن ديري برنامج وتبعيه وتحتارميه، صعيبة غير البداية، خاصهم إرادة قوية+ خطة محكمة + توكل على الله
      تجمع :) أتحداك أن تفكري في النوم بعد صلاة الصبح :)
      https://www.anaqamaghribia.com/vb/node/17876456

      تعليق

        • WhatsApp

        #4
        موضوع جد مفيد ا لالة امينة . و ما تبقايش تغبري علينا كنتوحشو مشاركاتك االمميزة . وبخصوص الموضوع فكلنا كنمرو من لي مرات منو سعيدة احيانا خصوصا بعد الولادة وبلا الاكتىئاب غير التربية الصغيرة كتخربق ليك كل اوراقك و ما كيبقاش عندك الوقت حتى لراسك ما كترجعي للطريق الصحيح على مدة كتكوني تأقلمتي مع الوافد الجديد . و الصراحة مع الوليدات مرة غالبين مرة مغلوبين الله يعينا و صافي .

        تعليق

          • WhatsApp

          #5
          الله يعطيك الصحة اختي أمينة و شكرا علی النصائح القيمة لي كتبتي ..كيبان من طريقة كتابتك أنك متأثرة بزاف بالنساء لي كيعنيو و ضايعات معرفينش كيفاش يرتبو اوراق حياتهن و باغية تنصحيهم و تبثي فيهم روح المقاومة ﻷنها هي الاساس لي عندها روح المقاومة و الارادة غدي تغلب علی كلشي و لي شخصيتها ضعيفة دغيا كتغلب كلشي غيغلبها حتی شغال الدار
          الله يكون في العون و الله يسر كل عسير
          مشكورة مجددا علی الطرح المفيييد
          دمت بود ♥

          تعليق

            • WhatsApp

            #6
            تبارك الله عليك والله ييسر على كل وحدة، والله غير هاذ الايام قلت غبرات علينا أمينة، الله يحفظك يا أختي

            تعليق

              • WhatsApp

              #7
              الله يعطيك الصحة اختي امينك مواضيعك كلها مفيدة ..احيانا كنوليوو سعيدات ولكن الحمد لله نفيقو مع راسنا ونوضو لشغالنا نطلبو غي الصحة وراحة البال
              ​​​​​​





              ربي ارحم أبا لم يحرمني شيئا و لا تذقني حياة دون أمي ! triste

              تعليق

                • WhatsApp

                #8
                تبارك الله علييك امينتي دييما كاتجيبي المفيد من الاخييير هههه

                كلامك كولو معقول و اشتقنا لك و لتواجدك بينا اختي


                تعليق

                  • WhatsApp

                  #9
                  علياء المجد : يتوحشك الخير حبيبتي، أكيد تا نمرو بفترات إحباط وكآبة بسبب الهرمونات أو غيرها وماشي بالضرورة بسبب الولادة، لكن أحياناً المرأة تا تحط السلاح لمدة طويلة ربما بسبب ظروف نفسية أو عضوية أو ربما بسبب مشاكل وغيرها الله يعين كل زوجة ويقدرها على الأشغال والروتين ويغلبها على الرتابة والملل اللي حتى هو سبب من الأسباب

                  السفيرة : مرحبا حبيبتي ربي يبارك فيك وليك، فعلاً متأثرة بالخصوص من النساء اللي تا يحطوا السلاح ويجلسو يحتاقرو نفسهم، وهادشي تا يسبب لهم أمراض نفسية وتوتر دائم الله يهدينا ويعيننا جميع

                  أم مروان1 : اللهم آمين حبيبتي، هاني مرة مرة نطل على حساب الخاطر وصافي، والله تا نشتاق لكم وللجو الدافئ لأناقة أسأل الله أن يديم هذه اللمة الجميلة

                  اخت لطيفة : اللهم آمين حبيبتي

                  انيقة فاسية : تشتاق لك الجنة ونعيمها يا رب، بوسة لك وحضن دافئ يا الغالية
                  تجمع :) أتحداك أن تفكري في النوم بعد صلاة الصبح :)
                  https://www.anaqamaghribia.com/vb/node/17876456

                  تعليق

                    • WhatsApp

                    #10
                    آمين الله يحفظك وييسر امورك حبيبتي ♡

                    تعليق

                    يعمل...
                    X