المشاركة الأصلية بواسطة ام ياسين والياس
مشاهدة المشاركة
كنت سولتيني واحد المرة على هاد الاهتمام الزائد لي عندك بدراسة وليداتك و كل مرة تنقول غادي ندخل نجاوبك و حتى كنخرج عاد نتفكر.. آسفة عزيزتي.. المهم.. غنقوليك رأيي..
الوالدين بحالك قلالو بزاف.. كاين لي غي تيدخل ولدو لمدرسة خاصة و كيدفع فلوس صحيحة كيقول صافي راه الاساتذة تما و هوما غادي يديرو الدور ديالهم و الا علاش انا تنخلص فلوسي؟ و كاين لي تيدخل ولادو لمدرسة عمومية و كيقول على مالنا حنا شكون لي كان يخدم معنا؟ ياك قرينا بلا ما يحسو بينا واليدينا!
و لكن جيل اليوم مختلف تماااااما! سواء كانو تيقراو فالعمومي او الخاص تيبقاو محتااااجين المتابعة و تيبقى الدور ديال الأسرة لا غنى عنه.. لأن هاديك الرغبة و الحماس لي كان عند جيلنا حنا، بحكم ان المدرسة كانت الوسيلة الوحيدة لبلوغ المعرفة، و بحكم أنها كانت كتزرع فينا قيم و أخلاق لي كنا نخرجو برا أسوار المدرسة و كنلقاوهم فلمة الجارات و تفاهم الأهل و الأحباب و فرزانة الشباب.. هداك الزمن الجميل ولّى للأسف الشدييييد.
دابا الأطفال و الشباب.. بل و حتى الرضع.. اصبحوا يتقنون التعامل مع الوسائط التكنولوجية.. و المحتوى صار الوصول إليه أسهل فأسهل.. و رجعت هاديك الساعتين لي تيدوزوها التلاميذ فقسم مع شي مادة تدوز عليهم و كأنه عمر! لانه و في عصر السرعة.. ساعتين على وسائل التواصل الاجتماعي كيجمعو منها ما جمعت انا من العربي و ماجد طيلة سنة!
و بالتالي رجع عندنا فالمدارس ٣ انواع من التلاميذ:
- النوابغ.. لي خاصهم غي دفيعة.. لي أصلا وكان جاو فزماننا كانو غيكونو مهتمين بدراستهم فجميع الأحوال.. و لي لحسن حظهم.. التكنولوجيا و الانترنت زاد من قدراتهم و سهل عليهم المهمة و زاد وسع آفاق البحث و المعرفة أمامهم. و هادو ممكن يقراو بلا ما تتدخل الأسرة اللهم إلا للتشجيع على بذل المزيد.
- المتلككون ههههه .. هادو أذكياء و لكن معيكيزين.. ممكن يعطيو و لكن ما فيهم ما يخدم.. كيبغيو ماقل و دل.. يبغيو يتعلمو و لكن ملي يقولو ليك صافي باراكا علينا.. ما تحاوليش تزيديهم حيت غي غضيعي طاقتك معاهم.. اذن الحل معاهم هو تستغلي اللحظات لي كيكون عندهم استعداد.. و تشجعي و تمدحي و تدللي.. و توعدي بحسن الخاتمة.. يعني ديري لي عليك باش على الأقل ما ينزلوش للفئة الثالثة ههههه
- لي ما مسوقينش أبدا! هادو موجوووودين.. يعني طيري نزلي.. شجعي.. علمي بالغنا.. علمي بالرسم.. خرجي برا القسم و فرشي فالأرض.. خدمي التكنولوجيا خدمي بالمحبرة و بالريشة.. تيقولو ليك ما تحاولييييش! عطيني غي مساحة خاصة نسرح فيها بأفكاري هههه و لك أن تتخيلي مدى تلك الأفكار. هادو بالنسبة لي و الله غالبا ما يكونون ضحايا! ضحايا مجتمع، ضحايا أسر، ضحايا أساتذة هدموا أكثر مما كان يجب ان يبنوا! ضحايا تطور أسرع مما استطاعوا استيعابه. و هادو للأسف الشديد غالبا ما ينتهي بهم الأمر داخل ورشات الحرفيين في أفضل الأحوال.
أما أنت.. و الأمهات امثالك.. زادكن الله من فضله و كرمه.. محاربات.. باغيين وليداتكم يطلعو للقمة.. و من حقكن.. و الله يحقق كل أحلامكن/أحلامهم.. و لكن .. ديري غي لي فجهدك.. ما ديريش اكثر.. هادشي لي غنقوليك.. اه.. راجعي معاهم.. اه يعرضو عليك.. و اه وقفي على كاع واجباتهم الاسبوعية.. و لكن ماشي ملي يجيبو 14 فشي فرض تسواد الدنيا فعينيك! أو ملي يلقاو صعوبة في فهم شي مادة او شي موضوع تنساي ليهم المواضييييييع لي فهموها بكل سهولة و بلا ما تعدبي معاهم.. ديما ديري فبالك "اللهم لا تحملنا ما لا طاقة لنا به" ..
نعطيك مثال: انا فالقسم عندي الثالث فرنسية.. ملي كنهدر معاهم و ننسى راسي و نطوووول شي جمل وحدة مور الاخرى بالفرنسية حتى كيفيقني السكات لي حل فجأة.. كنقول مع راسي؟! اش كديري يا ايمان!؟ زعما لو انهم يهزوني انا لي كبيرة و يحطوني فقسم ديال اللغة الكورية و تنوض الاستاذة تشد الهدرة معانا شي دقيقة ولا 2 باللغة الكورية.. شحال كاع غنفهم من داكشي لي قالتو؟! و هانا بغيت نفهم كيفاش ندير نسولها بالكورية و انا يلاه تعلمت الحروف و النص ديال الحروف باقي كيتلف لي؟! ملي كنحط راسي فبلاصتهم كنعتذر منهم.. و كنعاود و غي بشوية و غي بالكلمات البسيييطة لي تيعرفو.. و شي مرات كنلجأ للرسم.. للصور.. للفيديوهات.. المهم ننزل لمستواهم باش نطلعهم عندي.. ماشي نطلع الفوق و نقوليهم لحقوني.
حتى انت حبيبتي.. رخفي شوية على راسك.. ملي تلقاي راسك كتعصبي و كتوتري.. بدلي ساعة بأخرى. و ان شاء الله وليداتك يوصلو لأعلى المراتب.
و عااافاك سمحيليا انت و كاع الناجحات حيت طولت بزااااااف.
واقيلا غلبت السفيرة و انا لي غناخد جائزة اكبر ثرثارة ههههه
دمتن رائعات 💖
اترك تعليق: