إعـــــــلان

تقليص
لا يوجد إعلان حتى الآن.

الجزء الثاني من دورة خريف 2019/ 2020

تقليص
هذا موضوع مثبت
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • الجزء الثاني من دورة خريف 2019/ 2020








    الجزء الثاني من دورة العناية بالجمال لخريف 2019



    بعد السلام احييكن انيقاتي الكريمات واتمنى لكن دوام الصحة والعافية ودوام صلاح الحال وعليه جئتكن مجددا لنكمل ما بدأناه معا في العناية بالجمال ودائما شعارنا العناية بشكل روتيني لا نستغني ابدا مهما حصل ونسال الله تعالى ان يبارك لنا في اوقاتنا وان ييسر امورنا لما يحب ويرضى وكما هو هدفنا ان نحقق بلمسات طبيعية جمال طيب وجميل على محيانا لا ننسى جمال الروح الذي به تتم الصورة لان بدونه مهما وضعت من مساحيق الماركات العالمية لن تحصلي على ما ترغبين في ابرازه لهذا غذاء الروح وتطهير القلوب من اهم اي وصفة كيفما كانت ... اوصي نفسي واياكن بتقوى الله وبتطهير القلب والروح معا وفقني الله واياكن لما يحب ويرضى ، اما بعد :

    بدينا دورة الخريف لهاذ السنة 2019 بامور بسيطة ولكن جد مهمة باش تزولوا اثار الصيف من شوائب وبزاف الامور ما كانش ليها الوقت حيث كتجي حتى لراسك وما كيبقاش لك الوقت مسكينة باش تهلاي فيه وهذا باش كتعاقبي البشرة بالتسويف وتسناوا ذاكرة حتى تجيب لكم شي عصى سحرية تقول لكم ابرا كدابرا ياك هاذ الشي لي كاين هههههه المهم دورتنا باش تخليك عاملة اتصال مع البشرة ديالك وكما قلت لكم هاذ الدورة اساسها روتين يومي تعتمدي عليه للحصول على نتائج ايجابية من خلال المرحلة الثانية لي غادي نشوفوا مع بعض وكتبقى الوصفات الطبيعية لتحقيق نتائج فعالة نمحيوا بها بعض المشاكل لي كتظهر على البشرة ديالنا والهدف من هاذ الدورة كذلك هو نعطيوا اهمية للروتين اليومي للعناية بالجمال يكون بحال روتين الاكل والشرب اليومي هكذا كما سبق واشرت لكم في الجزء الاول من الدورة بهذا الرابط :

    https://www.anaqamaghribia.com/vb/node/17922987




    وعليه كما قلت لكم ان الاساس من الجزء الاول هو الحصول على بشرة نقية وسليمة من الشوائب والاثار لي كتبقى عالقة بها مهما غسلتي بالماء والصابون فما تظنيش انها صافي تنقات بقدر ما هي تكرفسات باستعمالك السيء للصابون لي عندو سلبيات على البشرة يكفي انه كيسرع لك من التجاعيد واخص بالذكر صاحبات البشرة الجافة والحساسة اما صاحبات البشرة الدهنية والمختلطة فالصابون صديقها لا خوف من ذلك لكن باعتدال
    وتقدري تختاري صابون طبيعي يكون من صنع ايديك رجعي لرابط الدورة الاولى تلقاي منشور تما، ثم المقشر كما قلنا مرة في الاسبوع لاننا متعودات على حمامنا المغربي لي كينقي البشرة بعمق بفعل البخار والسخونية لي فيه.





    واليوم الجزء الثاني من دورتنا فيه كريمات طبيعية غادي نخدموها بمختبراتنا المتواضعة ولي هي مطابخنا، عندنا سيرومات وكريمات اي نعم كلها طبيعية لكنها خالية من مواد حافظة ولي في الغالب كتكون كيماوية وكتبقى هاذ الحلول عملية وجد مفيدة وغنية لانها امنة، لكن الى بغيتي تخرجي بها فضروري من الواقي الشمسي طبعا الى كانت الشمس وبما ان الوقت دبا الحال بارد والشمس حشمانة فما فيها باس فقط ديري واحد الحيلة ولي هي انك تاخذي كمية من الواقي وتخلطيه مع كريمك الطبيعي ودهني به ، و الواقي حسب نوع بشرتك خاصو يكون حاضر دائما سواء في البرد او في الصيف الدور ديالو كيقي بشرتك من عوامل الطقس الى كان بارد فالجلدة ما تقشبش او تنشف او تصاب بالجفاف او يتحسس الجلد من البرد ..



    بلاما نطول عليكم هاذ الكريمات الطبيعية اغلبيتها تستعمل كمرطبات سواء بالنهار او بالليل ودورها انها كتعالج البشرة بطريقة طبيعية وكذلك الهدف منها لاحظت الكسل تسرب للانيقات فلقيت الحل انه يكون تحضير لكريم طبيعي يقوم لك بمهمة الماسكات ديال نص ساعة وتغسلي او لوصفة كل يومين خاصك تحضريها ومع هاذ البرد بقيتوا فيا وقلت نبدل الخطة حيث ما فيكم ما يغسل ويتسنى ويبقى يكبكب بالبرد ههههه .




    الكريمات تحل محل الماسكات الطبيعية

    قبل من اي كريم لازم تكون البشرة نظيفة ولازم تبعي الروتين ديال الجزء الاول بقاي عليه كما هو فقط غادي ضيفي كريمك الطبيعي من صنع ايديك

    ملاحظة:
    كاين وصفات فيها الشمع باش يكون كمادة تجمع باقي العناصر ويكون لينا كريم وهاذ الشمع العسل هو هذا لي في الصورة تلقاوه في مرجان كيتباع في اكياس



    كريمات خاصة بالبشرة الجافة

    هاذ الكريمات كترطب بالدرجة الاولى وتجبد البشرة وتغذيها وتعطيها بريق واشراقة




    ما كاينش فرق كبير بينو وبين هذا لكن اي اضافة مهما تكون قليلة الا وعندها دور وكبير في علاج البشرة الجافة لي مشكلتها التجاعيد بدرجة 1



    البشرة الجافة ديما كتلقايها بلون باهت وما فيهاش حيوية كتبان متعبة وهاذ الكريم صديقها رقم 1



    البشرة الدهنية والمختلطة تقريبا بحال بحال

    بزاف من صاحبات البشرة الدهنية كيعانيوا من المسام الواسعة وهذا راجع لعدم اعطائها حقها في التنظيف المسام لازم تنظف بعمق وهنا نقترح عليك ماء ميسيلار الغني عن التعريف لي كيحميها وينظفها بعمق من بينها المسام من بعد حضري هاذ الكريم الرائع ودهني به مرة في الصباح ومرة في الليل بعد التنظيف دائما




    وماتقوليش ان بشرتك دهنية ما محتاجاش للترطيب او للسيروم لي جد مهم وخاصة مع تقدم السن وملي تنقولوا تقدم السن راه من 25 سنة كتبدا مرحلة العناية بشكل مركز والسيروم عندو فوائد كثيرة على البشرة كما كان نوعها فقط يكون حسن الاختيار





    كريم خاص بالبشرة المختلطة :

    هاذ البشرة المختلطة لي فيها مزيج بين البشرة الدهنية والجافة وهنا خاصك تعرفي ان التنظيف هو الاساس لي غادي يرجع لها التوازن تابعي الروتين اليومي لي في الجزء الاول، واليك هاذ الكريم لي غادي يغذي لك البشرة ويعطيها توازن اهم شيء التنظيف قبل الاستعمال




    البشرة الحساسة:

    البشرة الحساسة تقدر تكون جافة وحساسة او دهنية وحساسة الى كانت جافة فكتكون معرضة لظهور التجاعيد المبكرة لي كتزيد تعمق فيها الى ما كانش الترطيب بشكل مستمر ومداوم ، والى كانت دهنية حساسة فكتحمار بسرعة وكتبان مسلوخة يعني طايبة ، لهذا نصيحة لصاحبات البشرة الحساسة عليكم بشرب الماء بكثرة ديروا لترين في اليوم شربوهم على مدار اليوم باش تعالجي المشكل من الداخل، والبشرة الحساسة كتكون عندها ردات فعل مختلفة على باقي انواع البشرة بحيث كيصيبها هيجان الى دارت شي كريم غير مناسب وهنا خاص يكون عندك حذر من الكريمات يعني قبل ما تشريها او ديريها قراي المحتوى ديالها يكون خالي من الكحول وبعض التركيبات لي كتهيج البشرة وتسبب لك في الاحمرار وكتولي طايبة، لهذا الى ما كان عندك والو احسن سيروم بالليل هو زيت الزيتون لي اعتبره الاخصائيون في الطب البديل وفي الجمال الطبيعي انه صديق البشرة بشكل عام وخاصة الحساسة ويعتبر سيروم الشباب الدائم.
    وبهاذ المناسبة اليك هاذ الكريم الرائع لي غادي يرطب و يهدأ لك البشرة من الهيجان ويجعلها متوازنة ان شاء الله





    كريم للبشرة العادية ولكل انواع البشرة

    هاذ الكريم من اروع ما يمكن ان تحضري سهل والنتيجة اكثر من رائعة وهدف كل الانيقات انه تبان عندهم بشرة متماسكة وصافية وفيها اشراقة ونضارة وما تبانش عليها اثار السن نصح به كل الانيقات
    ملاحظة لباان الذكر فيه ريحة زوينة كيدار في البخور ( وكاين شي شعودة كيقولك ها الجاوي ها حصلبان ها لي فيه الحال يبان ههههه اشمن حال الله يرد بالامة ويحفظ من هاذ الناس) .. ماعلينا نرجعوا لموضوعنا، كاين انواع كثيرة من اللبان الذكر كلها كتشابه الصورة الاصلية ديالو هي هاذي :


    الى كان شي حد مشى للحج او العمرة عندكم فغادي تجبروه في البخور لي جابو معاهم، او تشري كمية قليلة من عند العطار لي حتى هو احترسي منو الف مرة حيث الى بغا يدير فيها فهيم ويغشك يعطيك المسكة الحرة الحبات الكبار ويبدا يهضر معاك بشوية باش ما يسمعوا حد ولكن كوني عايقة عليه وفاهمة اش غادي ديري قولي لو عطيني درهم ولا 2 دراهم حتى تجربيه عاد ترجعي تاخذي منو الى كان اللبان الذكر فغادي تكبي عليه الماء مغلي بالليل وفي الصباح غادي تلقايه دايب ويولي بحال الحليب..




    نتابع مسيرتنا مع الجمال والعناية به





    بعض المرات البشرة كتولي باهتة وهذا المشكل جاي من الداخل كيدل على ان هناك خلل ما ولي خاصك تداركيه باعادة نظرك في الهرم الغذائي يكون متوازن ومتنوع ولي اهم كذلك هو الخضر والفواكه الموسمية وعاد شرب الماء لي يعتبر اسياسي باش يخلص الذات من السموم لان هاذ السموم هي لي كتعطي لون باهت على برا وتبان البشرة شاحبة ولونها باهت ...ماشي غير البشرة الجافة لي كيكون لونها باهت بعض المرات بسبب خلل في الجسم ديالنا هرمونات او بعض الاعضاء الداخلية كتعطيك صورة بحالا مريضة ولهاذ الغرض اختاريت لكم هاذ الكريم الرائع لي كيعطي لون براق ووردي مرطب وكيغذيها في نفس الوقت .

    بالنسبة للكركديه كبي عليه ماء مغلي وخليه يطلق مزيااان عاد صفيه وخذي منو الكمية المطلوبة




    ترطيب اليدين والرجلين

    ما كاين ما احسن من فازلين ديالنا لي تعلمنت نديروه بطريقة طبيعية غني كيرطب بشكل كبير اليدين لي واكلين الدق مع الاستعمال اليومي للماء يعني ربات البيوت الله يكون في العون كله بتواب واجر عند الله ولكن لا للاهمال اليدين بطاقتك الشخصية لي كتكلم على جمالك وانوثتك ورقتك ، طبعا ما تنسايش ايديك من التقشير مرة في الاسبوع ...



    وكهدية لكل الانيقات هاذ السيروم السحري :

    السيروم لي كيتباع غالي لي كيعتمدوا فيه على الاغراء الشكلي بحال القرعة والعلبة، ولكن مافيهش مقومات غنية مفيدة للبشرة نعتمد عليها بقدر ماهو تجاري اما السيروم ديالنا فهو غني وبدرجة عالية بمواد مفيدة تحتاجها البشرة ولي هي امور ما غادي تلقايها غير في هاذ العناصر لي فيه، اذن حضروا هاذ السيروم السحري لي فعلا خيالي باش تحصلي على بشرة فيها كل معايير الجمال صفاء وسحر وخاصة في هاذ الفصل البارد طبعا الاستعمال بالليل وتبقاي به حتى للصباح، علاوة على ان السيروم جزء مهم في العناية بالبشرة اهمها هاذ النقاط لي غادي نشير لها :

    كيقضي على التجاعيد وشيخوخة البشرة
    كيحسن ملمس البشرة ويعطيها نعومة
    يغلق المسام الواسعة ويقضي عليها
    كيحميها من الجفاف ويرطبها بعمق
    كيحميها من الترهل ويقبض المسام
    كيعطي البشرة اشراقة ونضارة
    كيوحد لون البشرة ...
    يعني بشكل عام انه صديق حميم للبشرة وجمالها



    وما تنسايش العينين والاهتمام بهم

    تنظيف العينين بماء الورد واضافة زيت اللوز مزيج رائع لتنظيف العينين بالليل وكذلك وضع شرائح البطاطا او الخيار لامتصاص الهالات السوداء وهاذ الكريمات او السيروم صالح حتى لدائرة العيون لي حتى هي محتاجة لترطيب



    ديري الكحل المغربي الغني عن التعريف اي وحدة اكيد عندها حاضر بقاي تكحلي عينيك باستمرار لانه مفيد لهم وللشفار وكذلك الحواجب حيث مكوناتو طبيعية وكيخلي العينين ديما مكحلين وقبل ما يكون زينة فهو دواء كيصفي ويزول الحريق لي كيكون فيهم ، وان شاء الله شي نهار نقادوه بطريقتنا لي تكون سليمة وصحيحة ونتعرفوا على كل الخبايا ديالو باذن الله تعالى


    دور الشعر كذلك في دورتنا


    كلنا كنعرفوا ان الجمال ما يكتمل الا الى كان الشعر واخذ حقو كذلك من العناية كما يقال نصف جمال المرأة شعرها وانا نقول لك جمالك كله في الحياء وفي الطهارة والعفاف والكفاف ، لكن مع ذلك خاصنا نتهلاوا في السوالف وبما انه فصل البرد ما فيك ما ديري شي خلطة وتولي تكبكبي من جديد ههههه المهم اختاريت لك هاذ السيروم لي غادي طبقيه كل 3 ايام وقبل ما تعملي الحمام الاسبوعي المعتاد غادي ديريه بساعتين من قبل هاذ السيروم او الخلطة لي قديمة وجديدة في نفس الوقت ملي كانوا الامهات ديالنا ضروري تلقاي عندهم واحد القرعة فيها خلطة الحرمل والزيت البلدية والقرنفل وغيرها من الاعشاب وهاذ الشي كلو باش الشعر يكون سالف نيت صحيح وفيه لمعان طبيعي وطويل وقوي بدون تساقط بدون قشرة وهاذ السيروم ديالنا ان شاء الله يكون محل ثقة باش يرجع لينا سوالف كما زمان اذن نخليكم مع سيروم مغذي ومقوي ومرطب ومانع للتساقط كيحمي الاطراف .





    ولتكتمل صورة الجمال الطبيعي

    وطبعا ما تنساوش اعادة نظر في الماريو وشوفوا اشنو فيه خوي وصدقي وشري الجديد كيبعث الفرحة والبهجة في النفس من موسم لاخر تلقاي راسك بالف خير وبصحة وعافية و يبان لك كلشي جديد اعيدي نظر في ملابسك سواء الداخلية او لي كتلبسي في الدار يكون دائما شعارك التجديد في كلشي هكذا تشوفي الدنيا بنظرة جميلة ومتجددة غيري في لباسك للدار وخليه يكون انيق وجميل لانك كتعطي صورة مفرحة تبعث الاطمئنان والهدوء والاعجاب عند اهل بيتك من اطفالك وزوجك وحتى اهلك لي يجيوا لزيارتك فخليك انيقة شيك قدامهم وهكذا يعجبك راسك اكثر واكثر وتولفي على هاذ العادة من حين لاخر ديري دويرة على حالتك بصفة عامة ولا للاهمال ولا للتسويف، وما تنسايش دائما تجدي عهدك مع الله وتراجعي حساباتك مع الخالق الحجاب ثم الحجاب لاننا مسلمات مأمورات به وهو شخصيتنا لي كتميزنا عن الباقيات واسال الله تعالى ان يصلح احوالنا ويجملنا بالتقوى والزيادة في الايمان .




    نكتفي بهذا القدر من الكريمات وخاصة في هاذ الفصل البارد باش ما تبقاوش مرهونين بقناع او بوصفة في هاذ البرد لي كلنا سواء ماشي قضية العكز بقدر ما هي طبيعة الفصل لهذا كريم من صنع ايديك بمكونات طبيعية يحل لك مشكلة الكسل والعكز ويعوض لك كل ما تحتاجه البشرة من عناية

    انيقاتي الكريمات ان شاء الله نلتقي على خير و لقاء متجدد باذن الله وقوته، وبهذا اقول لكن استودع الله دينكم وخواتيم اعمالكم دمتن بود ../.




    التعديل الأخير تم بواسطة ذاكرة; الساعة 14-01-2020, 22:48.
    لي بغات متابعتي تفضل عندي هنا مرحبا بها منورة ومانسة ان شاء الله موقعنا الجديد فيه كل ما لذ وطاب من المنوعات الراقية والانيقة دائما

    https://www.aniqat.com


  • #2
    ملاحظة:
    اي انيقة قامت بتطبيقها تفتح صفحة خاصة بها او لي سبقلها شاركات في الدورة الاولى لي كانوا فيها تطبيقات فمن الاحسن ترجع لذيك الصفحة وتنزل فيها تطبيقها وهكذا يبقى لها ملف محفوظ بتحضيراتها
    واي استفسار مرحبا
    لي بغات متابعتي تفضل عندي هنا مرحبا بها منورة ومانسة ان شاء الله موقعنا الجديد فيه كل ما لذ وطاب من المنوعات الراقية والانيقة دائما

    https://www.aniqat.com

    تعليق


    • #3
      للرفع ..ذاكرتي الانيقات كااع ماشافو هاد الموضوع


      تعليق


      • #4
        انا كنت متغيبة لأسباب صحية بسبب الحمل وعاد الان شفت الرابط ان شاء الله غدا تبدا تطبيق وبخصوص الجزء الاول فانا كنت مداومة على الروتين المعتاد
        الله يسعد قلبك حبيبتي ذاكرة على كل ماتقدمينه لنا

        تعليق


        • #5
          يالاه شفت هاد المنشور .. بارك الله فيك اختي ذاكرة نوجد اللوازم للي ناقصاني و نبدا فالتطبيقات ان شاء الله حاليا باقا متبعة الروتين الدورة الاولى ماشفتش انو بدينا مرحلة تانية




          تعليق


          • #6
            السلام عليكم ورحمة الله وبركاته انيقاتي
            للاسف يالله شفت الرابط في دريرة المشاركات حطاتوت شيماء الله اجازيها كل خير
            ​​​​


            تعليق


            • #7
              نزلت الرابط في صفحة الدردشة بالتوفيق للجميع
              لي بغات متابعتي تفضل عندي هنا مرحبا بها منورة ومانسة ان شاء الله موقعنا الجديد فيه كل ما لذ وطاب من المنوعات الراقية والانيقة دائما

              https://www.aniqat.com

              تعليق

              يعمل...
              X