إعـــــــلان

تقليص
لا يوجد إعلان حتى الآن.

عاونوني قلبي غيطرطق

تقليص
X
  •  
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • عاونوني قلبي غيطرطق

    السلام عليكن انيقات. ارجو من الله ان تكن على خير و من تحبون.
    ندخل فالموضوع. انا عايشة مع اهل زوجي و لقيت صعوبات معاهم كنت كنحني الراس و نقول ماعليش نصبر و مكنت نعاود لحتى واحد حتى راجلي ماكنت نقول ليه والو. و دابة رجع معاي كلشي وندمت بزاف على زواجي و على نفسي لي كنت كنعفط عليها على قبل راحة وحدين اخرين. وليت كنعدب راسي كل نهار و نلومها نقول انا السبب كان علي نحط النقط على الحروف من النهار الاول.
    كان قال لي راجاي نصبر عام عامين و نخرج نكري قلت ليك موافقة خاصة ان عائلة كيبانو ناس دراوش و لكن مع العشرة لقيت حاجات اخرة و فهمت بلي العروسة كتبقى غير برانية مهما ضحيت معاهم. دابة مشكلتي مع نفسي ما قدرتس نسى كنتفكر حاجات كانها وقعات اليوم و هي دازت عليها سنين. كلعن الشيطان و نسي راسي ولكن والو. حاليا مقاطعني عدوزتي حتى السلام الى قلت ماتردش علي. و هادشي مؤرقني بزاف. خاصة اني ماغلطتش بشهادة ناس كانوا حاضرين معانا. و فنفس تلوقت مانقدرش نتكلم معاها لاني صافي فاض الكاس و هي جرحاتني بزاف و قدام الناس .

  • #2
    اختي هوني على راسك هاذيك ما هي امك وماهي خالتك هي ام راجلك الى كان الاحترام المتبادل والتقار يكون احسن والى شفتي راسك ما قصرتي في والو فديها في راسك وخذي لك واحد القسط من الراحة من التفكير في عباد الله وفكري في راسك جمعي قواك وتهلاي في راسك والى عفطتي على كرامتك فرحمة الله عليك عمرك تهزي الراس دبا لي غادي ديري هو تلزمي حدودك حتى يدير لك الله تاويل الخير نقوم بالي مفروض عليا وبما انك مشروكة معاهم فماعليك غير تقوي الصبر وتعفطي على امور ملزومة عليك مثلا الشقا ولا شي امور مشتركة اديها وبكل سعة صدر باش ما تمحنيش في نفسك واعصابك وصحتك ملي تكملي ما تجمعي معاهم ما تشاركي هضرتهم الى كان خاطرك مزير على لي فات فلانه كان قاصح وكبير عليك انك تعيشيه يعني ما قدرتيش تنساي والله سبحانه وتعالى لا يكلف النفس الا وسعها حاولي تكوني هادئة لراسك ماشي على عباد الله اولا باش يوقروك وثانيا باش تعرفي تفكري في راسك وفي راجلك هذا هو نصيبك لكن ما نخليش الاثار السلبية تاكل مني ومن صحتي واعصابي بدلي الوضع ولو بالقليل واش خدامة ولا ربة بيت الى ربة بيت دخلي تعلمي صنعة مثلا الجمعيات تعلمي الراندا او لي نفسك فيه على الاقل باش تخرجي من الضغوطات والروتين لي انتي عليه ويكون تغيير في حياتك يكون لك منعطف تفكري فيه وتبدلي فيه الجو واياك وتعاودي اسرارك خارج بيتك لشي وحدة الحمد لله على هاذ المساحة لي عطانا الله نفرجوا فيها على قلوبنا ويا دار ما دخلك شر وطبعا راه غير حصة ساعة او ساعتين في العشية تنفعك ماشي باش تعلمي المهم انك تبدلي النمط لي انتي عليه وبالمرة ما ضيعيش في هاذ الوقت غادي تلقاي راسك شغلتي به الوقت لي تكوني فيه باركة ويعود عليك بالنفع .
    او دخلي ديري الرياضة حصة في العشية تخليك ترفهي على نفسك وتكسري الروتين والضغط لي عليك من جهة حماتك الله يرقق قلبها ويشوف من حالها وتعرف انك بنت الناس لك حقوق وواجبات ويكفي انك صابرة وعايشة معها وكيقول المثل الوجه المشروك عمرو يتغسل لهذا عليك بالصبر وحاولي تشوفي راجلك واش معاك وفي صفك وهضري معاه باش تستقلي في السكن عليهم وعلى الزحام وهذا راه حقك مادام قالك عام ولا عامين ونكريوا فهو خاصو يوفي بالوعد ديالو وتعاملي معاه مزيان وحاولي تناقشي معاه في هدوء باش توصلي لمبتغاك .
    دبا المهم هو انتي ما تبقاي تفقصي في راسك لان هاذ الشي كيورث حزن ويطور لا قدر الله لهذا نشوفها من باب انني خاصني نتحرك ونتغير للاحسن وعيشة وحدة كاينة باش تعرفي تفكي راسك من المطبات المتكررة وتقولي كون كنت عايشة في داري بوحدي كون ما وصلت لهاذ الشي وطلبي الله يدير لك تاويل الخير وعليك بالاستغفار يدير لك ربي مخرج والله يسر امورك ويفك ضيقك ويفرجها عليك ان شاء الله .
    لي بغات متابعتي تفضل عندي هنا مرحبا بها منورة ومانسة ان شاء الله موقعنا الجديد فيه كل ما لذ وطاب من المنوعات الراقية والانيقة دائما

    https://www.aniqat.com

    تعليق


    • #3
      ان شاء الله يجعل لك مخرج ...ويسر امورك كلها ختي..تسلحي بالصبر والدعاء


      اللهم ارحم لي والدي واحفظ لي والدتي وزوجي واولادي واجعلهم قرة عيني
      اللهم اني قد استودعتك كل ماأ عطيتني من نعم فلك الحمد والثناء الحسن




      تعليق


      • #4
        الله معاك اختي ديها في صحتك نهار التالي متلقاي احد من غير هي ..البشار منو للي خلقو ..دعي الله يدير لك مخرج ويعفو عليهم ..ديري عين ميكة ووذن حتى هي ميكة وشغلك وواجباتك قومي بهم على احسن وجه باش ما يلقاوو عليك حتى حجة ودخلي سوق راسك وشغلي نفسك بشي هواية
        مقلتيش واش عندك الدراري ولا مزال ربي مكتبهم ؟
        الله يدير لك تاويل الخير

        تعليق


        • #5
          السلام عليكم اختي ربي يفرج همك و يسر امرك
          أول حاجة غانبدا بيها هي انك تعرفي أن "لو" تفتح عمل الشيطان
          يعني كلامك فيه قول لو بزاف
          كتلومي رأسك على الماضي على انك موضعتيش حدود و على الكثير و الكثير و فعلا هذا باب كبير للشيطان لغادي يدخلك في دوامة صعب الخروج منها
          أول حاجة اختي الندم على ما فات مزيان لكن ميفوتش وقت محدد و قصير لأنه إلى طول راه وسواس هذاك
          عرفي ان تصرفاتك في الماضي كانت بعقليتك في الماضي بأفكارك و وعيك فالماضي و كوني على يقين انك تصرفتي بالطريقة لي ظنتيها صحيحة علاش اليوم بعد سنوات لأن الحياة غيرات فيك و أكيد النضج كيتزاد و الوعي كذلك علاش كتلومي نفسك القديمة على قرارتها و كتجلديها كل يوم
          لو انك كنتي بهاد الوعي ديال دبا أكيد كنتي تصرفتي بشكل آخر و ممكن مستقبلا اتزاد وعيك من جديد و تفكري قراراتك دبا و ميعجبوكش
          نتمنى تكوني فهمتي المغزى
          أول خطوة لازمك ديريها هي تصالحي مع نفسك و تصرفاتها و أنها دارت لي شافتو صحيح وقتها و أنها ما تستاهلش منك الجلد كل دقيقة
          و شوفي حياتك دبا اشنو لي معجبكش فيها و فكري فالحلول و بداية التغيير
          و التغيير ممكن مع الإرادة و شوية حكمة و صبر طبعا
          أظن عندك فراغ فوقتك كيف قالت الغالية ذاكرة يعني مكديريش شي حاجة ' هواية" خاصة بيك تعمري بها وقتك و تستمتعي بها و تفرغي فيها طاقتك
          بحثي اشنو بغيتي شنو كيعجبك صنعة مثلا اقترحيه على زوجك و بداي
          الإنجاز و الاستمتاع بأشياء كنحبوها كيعطينا مساحة للتأمل و التفكير الإيجابي و حتى غادي تعرفي على ناس جداد و تجددي طاقتك كل يوم
          حاولي تشوفي الإيجابيات و النعم فحياتك
          و كتبيهم : زوجك رآه غيرك محروم من الزواج و كيتعذب
          الذرية راه غيرك محروم منها
          بيت يؤويك
          زوج خدام و كيصرف عليك و غيرك مضطرة تخرج تخدم و تدمر كل نهار
          عندك عائلتك خوتك. ...
          عندك صحتك و غيرك مريض و كيعاني
          الفكرة واضحة دائما تعلمي تشوفي الجانب المشرق أما أما تبعتي النواقص عمرك تفرحي

          حماتك امرأة كبيرة في السن و العقلية تتغير يعني انا شفت من أمي و جبد لذلك وليت احسن الظن بالآخر كنقول أعلم الله الله وصلت داك العمر إلى مكتاب كيفاش غادي نفكر و أي تصرفات غاندير. ...
          يعني إلى جات على حماتك ديري لي عليك لوجه الله و حاولي تكوني مبادرة و خلي ردة فعلها تكون ليها هي و لو انك مغلطيش
          لكن ماشي ديري هادشي و نتي ماراضياش عليه بل على العكس ديريه لوجه الله و قولي هي حماتي و امرأة كبيرة و ام زوجي مكاين لاش نهز فقلبي عليها
          و هذا لا يمنع انك تجلسي مع زوجك بكل هدوء و أريحية و تناقشي معاه لي ضارك و فكرة الاستقلالية لي كان واعدك بها مند سنوات
          لكن ماديريش هذه الخطوة حتى تسترجعي نفسيتك مزيان و تعرفي اشنو باغا بالضبط و اشنو ضارك بالضبط و تكوني مرتبة أفكارك

          رحمي نفسك اختي و رحمي بشريتك و عرفي أنه كل شخص مهما كان عنده أمور كثيرة يندم عليها في الماضي و كل واحد فينا ضر راسو وقدم تضحيات كبيرة و صغيرة من أجل الغير على اساس مبادئ لقاها من بعد أنها خاطئة و أنه ظلم نفسو
          كل واحد فينا تعرض للظلم و الألم و الصدمات
          لكن بعد العذاب النفسي كنقولو صطوب
          لي فات فات و تعلمت منو و انا بحالي بحال غيري كنتعلم من الحياة
          اخطاىي كانت كذا و كذا و قررت منعذبش راسي او نضحي في المكان او الوقت الغير مناسب
          و كنقلبو على الحلول لي دائما متاحة إلى كنا شوية مرتاحين و عقلنا إيجابي
          حطي ليك أهداف صغيرة و بداي شوية بشوية
          و الأساس فهادشي كامل هو القرب من الله عز و جل و خلي الفضفضة منك ليه سبحانه و كوني واثقة أنه كيسمعك و غادي ينور بصيرتك
          خصوصا لو تكون في جوف الليل أثناء صلاة القيام و في السجود
          يا سلام على راحة كل نهار كتغسلي قلبك من الهموم و ربي كيصيفط ليك رسائل كتفهمي منها منين تبداي و كيف تصرفي. ...
          بالتوفيق اختي

          تعليق


          • #6
            احلى تحية لك حبيبتي فاتي الله ينور عليك ويزيدك من فضله واحسانه احلى كلام نابع من قلب اخت لاختها في الله اللهم بارك في هذه الرفقة الطيبة لي يكون فيها النصح من القلب جزاك الله كل خير على كلامك المتزن والمعقول والصحيح اختي صاحبة المشكل ما بقات عندك حجة لي خاصك هو تنفضي على راسك الهم وتجمعي القوا والنوضة وديري لراسك حل راه ما يحك جلدك غير ظفرك والله يوفقك ويسر امرك يارب
            لي بغات متابعتي تفضل عندي هنا مرحبا بها منورة ومانسة ان شاء الله موقعنا الجديد فيه كل ما لذ وطاب من المنوعات الراقية والانيقة دائما

            https://www.aniqat.com

            تعليق


            • #7
              تبارك الله على فاتي كولشي قلتيه ختي مبقا عندنا منزيدوك من غير الدعاء الله اصاوب لك و شوف من حالك تبعي نصائح الاخوات فاتي ذاكرة ولطيفة وكنأكد لك غترتاحي

              تعليق


              • #8
                نفس المعانات اعاني منها الله يدير لينا تاويل الخير

                تعليق

                المحتوى السابق تم حفظه تلقائيا. استعادة أو إلغاء.
                حفظ-تلقائي
                x
                إدراج: مصغرة صغير متوسط كبير الحجم الكامل إزالة  
                x
                يعمل...
                X