ArabicEnglishFrenchSpanish

إعـــــــلان

تقليص
لا يوجد إعلان حتى الآن.

ابنتي المراهقة

تقليص
هذا الموضوع مغلق.
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة
    • WhatsApp

    ابنتي المراهقة

    السلام عليكم ورحمة الله
    بنتي عندها 14 عام باباها صعيب بزاف كيعرف غير الضرب العنيف حتى كيخلي فيها لاتراس المهم عرفنا بلي كتشاطي مع ولد الجيران فاسد اخلاقيا الشراب و الكارو و الحشيش كتهدر معاه في الشرجم بالليل حيث ماكنخليوهاش تخرج سايستها و نصحتها و لكن والو راسها قاسح بحال باباها راسو قاسح وصعيب بزاف وماكيعرف الحوار غير العصا عييت معاها و اخبرت باباها باش اعاوني ضربها مزيان و هددها بحرق شعرها و كانت النتيجة انها هربات لينا من الدار الحمد لله مشات غير عند الجيران و لكن معرفناش حيث ماخبروناش المهم 4 سوايع و حنا كنقلبوانا سخفت و بكيت حتى قلبي غادي اسكت بنتي مكتخرجش حيث ديما سادين عليها المهم رجعاتها لي جارتي و بست رجلين راجلي باش مايضربهاش الخلاصة ان بنتي دبا كتهددني بلي باباها الى ضربها مازال عمرها ماغادي ترجع باباها قاليا خليتها ليك ربيها نتي انا كنعرف غير العصا غضب علينا الراجل فهاد العواشر مابقاش كياكل معانا وخا هو معانا فالدار ونا اخواتاتي عييت بنتي بغات تخرج عند صاحبتها والله العضيم الا كنبقى في الشرجم مقابلا باب الجيران باش متخرج بنتي وتهرب ليا وانا خدامة و كنبغي ننعس بكري انا عييت بنتي صدماتني ملي هربات و فقدت فيها الثقة و معرفتش كيفاش نرضيها كتقول بلي حنا حابسينها و مكنفهموهاش عاونوني الله اخليكوم انا حرت مع هاد البنت وكرهت راسي حيث معرفتش نربي
    • WhatsApp

    #2
    الله يهديها لك وفرج الكربة تاعك ..يارب
    sigpic

    تعليق

      • WhatsApp

      #3
      اختي الله يهديها يا ربي
      اول حاجة بنتك خاصك تصاحبي معاها باش ترتاح ليك وتعاودليك كلشي
      مشكلة الضرب لا تجدي نفعا الضغظ يولد الانفجار
      حاااولي تكسبيها خرجي معاها مرة مرة
      خليها تخرج عند صحاباتها الي انتي تتعرفيهم مزيان
      را ما يمكنش تحظيها
      وحكاية الهرب را غي سبة متخلعكش
      شرحي ليها بالسياسة المصير ديال كل وحدة خرجات من داارهم
      والاب ديالها حاولي تفهميه ان هاد السن راه شوية صعيب وراه خاص الخاطر باش ما تفقدوش البنت ديالكم
      الله يهديها ويرد بيها وانتي الله يسر ليك يا رب

      اللهم إني أستودعك نفسي وزوجي و اولادي واعيذهم بكلمات الله التامة من كل شيطان وهامة ومن كل عين لامة اللهم بارك لي في اولادي ووفقهم لطاعتك وارزقني برهم اللهم وافتح عليهم من بركات السماء والارض انك سميع مجيب.اللهم حبب اليهم الايمان وزينه في قلوبهم وكره اليهم الكفر والفسوق والعصيان واجعلهم من الراشدين .
      وصل الله علي سيدنا محمد وعلي اله اجمعين والحمد لله رب العالمين.


      اللهم ارزق اخوتي في الله الذرية الصالحة السليمة المعافاة.

      تعليق

        • WhatsApp

        #4
        اختي الله يسر امرك وهدي سر بنتك
        المراهقة مرحلة صعيبة وخصوصا الا كانو الاباء ممتفهمينش هذ المرحلة بحال الا عمرهم كانو مراهقين
        متنسايش اختي حتى حنا دوزنا المراهقة وكنا حاسين ان العالم كلو ضددنا واننا بوحدنا وحتى واحد ما فاهمنا
        اولا بنتك القيود اللي عاملين ليها هذ الشي لانه ما تتخرج ما والو اللهم تخرج بخباركم ولا تخرج من وراكم ( النت ) وشحال من وحدة ضيعت راسها بهذ الطريقة
        للاسف الاباء تينساو اش دوزو فصغرهم وتيبغيو ولادهم يكونو ملائكة ومثاليين وتينساو ان الكمال لله واهم حاجة الحوار بدل الضرب والعصى في كل ساعة وحين
        حاولي تتصاحبي مع بنتك خرجي نتي وياها وخليها هي اللي تختار الخرجات ماشي بالضرورة تمشيو بعيد ولكن المهم هو انكم تلقاو جو مناسب للحديث وضروري تكسبي تقتها وتفهمي المرحلة اللي تدوز منها خصها تحس بيك بحال صاحبتها
        وتكلمي ليها على مغامرات النت والعلاقات غير الشرعية ماشي بالضرورة مباشرة ولكن بحثي ليها على قصص كانت السبب في ضياع الفتاة وما شابهوكلنا كنساء توصلو لمرحلة من حياتنا تنوليو عاجبنا حالنا وتيعجبنا الحال نسمعو كلمة زوينة من شي راجل
        اختي ضروري تتقربي لبنتك وما تبينيش ليها انك خايفاها تهرب بالعكس قوليليها انك فهمتي تصرفها وفهمتي انها في قوقعة وحابة تخرج منها
        الهضرة كثيرة اختي ولكن نصحك بالحوار
        راجلك تصرفو ماشي مزيان اكيد خايف على بنتو ولكن ماشي بالضرب والغوت بالعكس عيخسر بنتو وفبادرو قبل فوات الاوات
        الله يعينكوم اختي لااني تنحمل هم هذ المرحلة خصوصا عندي العزارا وفي بلاد الغربة
        لهذا تنصحك تخلي بنتك تعمر وقتها بامور اهم من دين وصديقات صالحات راه معمن شفتك معمن شبهتك
        الله يوفقك



        لوحة المفاتيح العربية

        ترجمة العرنسية


        تعليق

          • WhatsApp

          #5
          الله يهديها يارب انا متفقة مع اخت nona2010

          تعليق

            • WhatsApp

            #6
            مسكينه اش هيربط واش ها يطلق
            الدريه باقا 14 عام مسكينه حابسينها قلتي متخرج ما درج و زايدينها بالعصا
            و نتي خدامه يعني تتبقا بوحدها محبوسه ، و باها غير جالس و يضرب، العادي انها تهرب حاجه متوقعه
            ولا يركبها شي مرض ، جلسي حضي بنتك ، و دخلوها ل شي نادي تعلم يا صنعه يا رياضه ، و تلقا باش تعمر
            وقتها و تلقا صحابات يونسوها راها بنادم ، راه ايلا عمرات وقتها عمرها تعرف دراري ولا تجلس تصاحب
            بدلي ليها لبيت ايلا كان فيه سرجم عل الزنقه ، و هضري مع بنتك تحاوري معاها شوفيها اش ناقصها
            و ديها مره ف سيمانا تخرج تفوج و تشوف الدنيا ، و نصحيها و خليها تقرب من الله و نتي عارفه باها صعيب ماشي شي واحد لي عاقل لاش تقوليها ليه واش منين ضربها عند بالو صلحها لا راه الضرب بزاف تيخرج عل الدراري
            خودي بنتك فالحضن ديالك و كوني ليها صديقه راها ف فتره مراهقه و ايلا عاوداتلك شي حاجه حفظي اسرارها و حاولي تصلحي الامور بالعقل ايلا قلتيها لباها و ضربتوها راه هاتزيد دير حاجات كتر ولكن بالتخبيه عمرها باقا تعاود ليك
            علميها الصلاه و لا سيرو موره لفطور لجامع باش تولف داك الجو الديني ، و وريها منتديات نسائيه تدخل ليهم
            حيدي عليها الشات المختلط ...الله يهديها يا ربي

            تعليق

              • WhatsApp

              #7
              شوفي ختي قريت قصة ديالك او فكرتني غي بخويا أنا خويا بحدو وسط البنات او هو صغير بابا كان كيضرب بزاف او كيوكلو العسى نيت او حتى هو كانت عند 14 عام وحد نهار خرجت الزنقة مبقى رجعت 11 للاو حنا مازال كنقلبو عليه او هو مولف ميفوتش الباب او هو يعيط ف تلفون عرفتي فن مشى مشى الطنجة بالعلم أنا هنا كنسكنو ف كزا إو جاب الله بابا مكانش كون قتلو إو عد مشينا جبنة او حتى هو gal ماما يبقى يضربني منبقاش نرجع خصك تعرفي أنا بنتك را خفت تهرب كون كانت عندها نية أنها تهرب ولاهل رجعت غي هي كثهددكم بش طلقوا لها الحرية ديالها نت حولي تقربي منها او قولي لها أنا دايرة فيك تقى ولكن ولاد يوم وعرين او كيتفلو على بنات صغار لبحالك كيكون بنات دارهم او حتى بنات خيبات كيبغو يجروها خصك ترقبي حتى صحبتها ولكن إلى بقيتي حبسها مازال غي غادي تبقى زايدة ف عندها او ماتعرفه فش كتفكر او خصك تعرفي أنا بنات مكيتحدوش يعني خصك تصحبي معها او تبيني لها أنك طيقة فيها او هي غادي تبدا تعود لك بلا تسوال او تحس بيك أنك لا عودة لك مغدش ضربيها او مغدش تبقي تعيرها بديك حضرة او الله يدير لك لفيها خير أختي او يصلح بنتك
              sigpic

              تعليق

                • WhatsApp

                #8
                السلام عليكم اختي بنتك وصلاات سن ميصلاحش للضرب هي في سن التمرد لمحاولة اثبات الذات سن تتعتبر هي نفسها اكثر وعي ونضج من والديها اللي عندهم افكار مغايرة ومتيفهموش بحال الشباب اليوم **حسب قول العديد من المرهقين** وكنضن كنا مرينا من هنا ولكن باقل الخسائر نصحك تكوني صاحبتها قبل متكوني امها وقبل مايكون زوجك جندي رقابة عليها بالسياسة كيف كنقولو والحلم والحيلة ختولي تعاود لك كلشي وانت هنا غتنصحيها وغتكون مستعدة تسمعك اى راجلك بغا يزر خليه لان لازم يكون شخص في الدار كلمته مسموعة وهو اللي كيحكم ماشي بنتك وفي نفس الوقت حاولي تكوني قوية معاها ماشي بالضرب لا بالافكار والتوعية ومتخليهاش تعمل اللي بغا ماشي هي صاحبة القرار وزوجك خصو يغير شوية من طيقة التربية العصا لمن يعصا مبقاتش تنفع معا جيل النت هاديك جات في وقتنا وحبسات كاين التاديب بطرق اقسى من الضرب هو الحرمان من اعز حاجة عندها مثلا الملابس الخروج التلفاز النت حرمانها من كلمة حنان من لحضة ضحك وانس مع العائلة .....حسب الجو المؤلوف للعائلة
                وانت حاولي توريها البنا اللي مزيانات باش تعمل النفس وتولي بحالهم شوفي فلانة الله يرضي عليها كيف مريحة ماما مؤدبة وحتى جارتي قالت لي بنتك نعم الاخلاق وشجعيها وخا متكونش فيها ديك الحاجة غتولي تقلب عليها باش تتحلى بها
                والاهم اختي عمرررررك تخلي بنتك مع اي بنتك او النت محلول بلا رقابة وحاولي تعمري وقتها باي حاجة تتبغيها الى تتبغي الطبخ علميها وصفات تفيد وتستافد او دخليها جمعيات خيرية تشوف كيف عايشين المعاقين وتساهم او اي حاجة تتميل لها وسمحلي طولت عليك الله يحقظها لك من كل شر ****فكرتني الباب سدي في الليل بالساروت وممنوع تعطيها الدوبل بدون متشعر طبعاااا بانها في سجن الله يصاوب
                sigpic

                تعليق

                  • WhatsApp

                  #9
                  من فضلك أختي ،اكتبي بالــعــربيــة لأن العــرنســية ممنوعــــةوأي رد معرنس حذف وسيحذف
                  التعديل الأخير تم بواسطة أم سارة; الساعة 01-08-2012, 13:10.

                  تعليق

                    • WhatsApp

                    #10
                    شوفي اختي
                    راه الاب ديالها بان لي صعيب بزاف ماشي من النوع اللي اهضر مع البنت وصاحبها واقرا افكارها
                    راه الى قديتو تقنعوه باش ارطب شوية معاها واعود اتحاور بدل الضرب كيف ماتايقول المتل ان كبر ابنك خاويه وهي تبارك الله راها كبرت وبغات دير شخصيتها وطور داتها بما يرضي الله عز وجل
                    اختي الان عندك حل وحيد وهو استغلال هدا الشهر العظيم وقيام الليل والبكاء على الله وكترة الاستغفار والانكسار بين يدي الله تعالى طالبة منه ان يهدي لك ابنتك ويلين قلب والدها عليها
                    الله اهديها وارد بيها للطريق
                    حب الدنيا ونسيان الآخرة والانكباب على هذه الدار الفانية صورة عارية من الفهم الصحيح لما يجب أن يكون عليه المسلم

                    "كلا بَل لا تُكْرِمُونَ الْيَتِيمَ وَلا تَحَاضُّونَ عَلَى طَعَامِ الْمِسْكِينِ
                    وَتَأْكُلُونَ التُّرَاثَ أَكْلاً لَّمّاً وَتُحِبُّونَ الْمَالَ حُبّاً جَمّاً"






                    تعليق

                    يعمل...
                    X