إعـــــــلان

تقليص
لا يوجد إعلان حتى الآن.

تجمع النصح والافادة للمقبلات على الولادة هدية لحبيباتي امهات الاشهر 10 11 12/2012

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • تجمع النصح والافادة للمقبلات على الولادة هدية لحبيباتي امهات الاشهر 10 11 12/2012



    حبيباتي امهات المستقبل يتجدد اللقاء في تجمعنا الجديد اللي بادن الله نلقاو فيه كل ما نحتاجو من معلومات و نصائح لي نتعاونو بيها باش نربيو وليداتنا و نستافدو من اخطاء غيرنا و نتجاوزو من خلالو المشاكل لي يمكن تواجهنا خصوصا لاخوات لي غادي يولدو لاول مرة
    هاد التجمع بادن الله غادي يكون كلو افادة لكل المقبلات على الولادة فمرحبا بكن جميعا لتعم النصيحة
    قانون التجمع و هو بكل بساطة الدردشة الهادفة كل وحدة فينا عندها معلومات ابتداء من الحويجات لي غادي نحتاجو نوجدوها حتال طرق التعامل مع البيبي و التربية ديالو ...



    كنتمنى حتى شي اخت ما تبخل علينا بالمعلومات لي عندها و بكل تاكيد غادي يجعلها الله ليها في الميزان المقبول
    على بركة الله تفضلو حبيباتي برجلكم اليمنى الى عالم الامومة جعله الله عالم فرح و سعادة و تجربة يدوب معها قلب كل ام تنتظر سماع صوت قرة عينها



    اللهم اجعله مسلما صالحا عابدا ذاكرا..حافظا للقران الكريم وممن يعملون به..

    اللهم اجعله بارا بوالديه وأهله..
    اللهم حسن خلقه وخلقه ..
    اللهم أعذه من شياطين الأنس والجن..


    اللهم سهل ويسر حمله وولادته..
    اللهم أقر عيني به..
    اللهم ارزقني ولدا واجعله تقيا ذكيا
    واجعله سليما معافى ولا تجعل في خلقه زيادة ولا نقصان ..
    واجعل عاقبته إلى الخير...


    اللهم اصلح لي ذاتي وذريتي...
    اللهم استودعتك هذا الجنين فحسن في خلقه وأخلاقه يا رب العالمين..
    اللهم اني اسألك هون الطلق وحسن الخلق ..


    اللهم آمين.....



  • #2
    السلام عليكم و رحمة الله تعالى و بركاته

    كيف دايرين أخواتي الله يفككم على خير و يرزقكم ولادات سهلة و يسيرة يا ربي و يقر عويناتكم بشوفة لي بيبي ديالكم يا ربي و يرزق أخواتنا المنتظرات بالحمل القريب يا ربي


    بصراحة مللي فكرت نكتب قصة ولادتي بغيت نكتب شي حاجة اللي تكون مفيدة ماشي مجرد حكاية فقط داكشي باش ان شاء الله غادي نكتب لكم قبل بعض الأشياء اللي استفدت منها من الكتب و المقالات اللي على النت و نتمنى تفيدكوم ان شاء الله

    أولا قبل ما نبدا فقط نبغي نشير أنه هادشي كامل اللي غادي نكتب و اللي تقدرو تسمعوه ربما كنصائح من ناس أخرين ما غادي يجيب نتيجة الا اذا كان الجسم و البيبي بجوووج مستعدين للولادة , و الطفل الأول راه معروف غالبا كياخذ وقت طويل فوسط الرحم و كيفوت 40 أسبوع ديالو و لكن كيف قلت هذا غالبا ماشي دائما.

    غادي نبدا بالاستعدادات المبكرة للولادة من الأسبوع 34 و أولها هو


    1 - تهييئ البيبي للوضعية الصحيحة للولادة



    الحركة ثم الحركة أخواتي حاولوا ما أمكن تبعدوا على الكسل طول اليوم و الجلوس بطريقة خاطئة لأنه تيقلب الوضعية السليمة للبيبي و مللي تيكون مقبل وجهو للفوق راه المخاض تيطوااااال و كتتعذب الأم بزااااف و بعض المرات كتضطر للسيزاريان اذا البيبي عيا, بالنسبة لأنواع الجلوس اللي تتجنبوا هو :

    أولا ممنوع أي جلسة يكونوا فيها الركبتين أعلى من الحوض , دائما الحوض يكون فمستوى أعلى و الركبتين نازلين ماشي العكس , أنا كان ولدي شاد وضعية مزيانة و ظهرو لكرشي و وليت فالأسبوع 38 مع الثقل غير جالسة فوق الريكلاينر و فالكونطرول ديال الأسبوع 39 قالت لي الساج فام راه ولدك عاطي ظهرو لظهرك و وراتني كيفاش نجلس مزيان باش يرجع يشد وضعيتو الأولى و الحمد لله داكشي اللي كان فالكونطرول ديال الأسبوع 40 كلشي مزيان


    الريكلاينر ضربو عليه فالأسابيع الأخيرة






    بالنسبة للوضعيات المناسبة للحامل و اللي كتساعد البيبي ينزل فالحوض مزيان و يشد الجهة المناسبة هوما هادو :

    الجلوس على اليدين و الرجلين


    هاد الوضعية اللي درت باش رجع ولدي لوضعيتو الصحيحة , و كنت كنديرها و أنا كنتفرج فالتلفزة , أو أحيانا كنتمشى و أنا دايرها بحاليلا كنحبو و لكن ردوا البال و حاولوا تثنيوا السروال عند الركبة مع الاحتكاك مع الزربية راه كتشعل فيهم العافية هههههههه

    وضعية القرفصاء أيضا رائعة و من الأحسن فالأسابيع الأخيرة تبقاو تجلسوها و تحلوا رجليكم بحيث أن الكرش تجي فوسط الأفخاذ هادي كتساعد الرحم يتحل .

    وضعية الجلسة على الركبتين بحال اللي تنديروا بين السجدتين فالصلاة حتى هي مفيدة بزااااف باش تساعد البيبي ينزل فوسط الحوض


    كاينة الوضعية الأخيرة حتى هي كينصحوا بيها بزااااف و هي تجلسي مربعة و حاولي ما أمكين تحطي أفخاذك للأرض بحال الى غتديري اليوغا .


    2 - ثقي في نفسك و جسدك


    الجانب النفسي أخواتي من أهم الجوانب اللي تخليك مستعدة للولادة و هو أولا ثقي في نفسك بزاااف و عرفي بأن الولادة هي الوظيفة الوحيدة اللي حتى واحد من غيرك ما يقدر يديرها نعم أكيد هي صعبة و تجربة فريدة من نوعها و لكن فالأخير غادي تعطيك واحد البيبي من أروع ما يكون , كوني متفائلة و قنعي نفسك باللي ان شاء الله كلشي غادي يدوز مزيان و بالطريقة اللي جسمك تيشوفها في صالحو , و الأهم أيضا ما تستعجليش ولدك أو بنتك غادي ينزلو فالوقت المنااااسب ليهم و ليك ايضا ثقي في جسمك ثقي في طفلك و ثقي بأن كل اللي غيوقع لك ما هو الا خير من عند الله , حاولي تتخيلي الولادة شحال ساهلة و حطي قدامك واحد الفيلم عندك الحق ترسميه و تمثليه انتي بوحدك و لكن خليك واقعية ما تحطيش خيالات اللي تتبقى مجرد خيالات بل تخيلي الألم و الراحة في حدود المعقول باش ما تتصدميش عند الولادة الى لا قدر الله تعسرات بزاف بل حطي جميع الاحتمالات في بالك و حضري نفسك مزياان لهاد اللحظة التاريخية . زوجك أيضا ما خاصوش يكون مجرد متفرج أو مسجل صوتي حافظ 2 كلمات ديال التشجيع , بالعكس زوجك من أول نهار حملتي فيه دخليه في جو الحمل و لو غير مرة أسبوعيا , عني شخصيا طول فترة الحمل كنا كل نهار أحد فالصباح باقين فالفراش أول حاجة كندخل لللايميل من البورطابل و كنلقى ايميلات من مواقع مشتركة فيها ديال الحمل فيها فين وصل الجنين ديالي و شنو التطورات اللي سرات عليه الأسبوع اللي داز و معلومات و نصائح عامة أيضا حتى ولف هو براسو الى فاق قبل مني كيدخل يشوف الجديد , و بقيت متبعة هاد السيستيم حتى لأخر شهر و كنقراو بجوج على المخاض و الولادة و شنو الاحتمالات الواردة و شنو ممكن يخفف الآلام أيضا و كيفاش التعامل مع البيبي فالأسابيع الأولى , أختي تقاسمي فرحتك و مخاوفك و أفكارك مع زوجك دخليه جو المسؤولية من النهار الأول , خليه يتعلم أيضا شنو ممكن يساعدك ففترة المخاض , فالأيام الأخيرة مللي تكون كتجيك التقلصات المبكرة وريه الأماكن فين يدير لك الماساج باش يخفاف عليك الألم ديال التقلصات و الظهر .

    كاين تقنية أخرى أيضا للتخفيف من الألم و الاسترخاء و هي التنويم الميغناطيسي , أنا كنت جربت التنويم الميغناطيسي العام الفايت لانقاص الوزن و اعطاني نتيجة مرضية نوعا ما و لكن ما كملتش فيه مع العجز و صافي , و مللي قريت على تقنياتو للولادة و شحال من وحدة جرباتو و دازت ولادتها أسهل من الولادات اللي بلا بيه قررت نبدا نمارسو شوية و الحمد لله فادني فيوم ولادتي , و راه اذا كنتو فاوروبا ممكن تستأجروا المتخصصة فالتنويم الميغناطيسي كتكون معاك حتى فقاعة الولادة و لكن أنا اكتفيت بالقراءة فالكتب الخاصة و الاستماع للسيديات و البنات اللي عندهم الايفون راه كاين واحد التطبيق أيضا خاص بالتحضير للولادة بالتنويم الميغناطيسي و لكن أنا ما حسيت بيه فادني فوالو و لكن ممكن تاخذوا منو فكرة فقط و لكن تيبقى الأحسن هو تشريوا السيديات الخاصين .

    3 - تقنية الضغط على النقاط :

    هادي أيضا تقنية رائعة خدمات مع بزااااف ديال العيالات و لقيت شحال من وحدة فالانترنت كاتبة عليهم كل خير و كتحلف باللي سهلو ليها الولادة لكن بصراحة أنا ما فادتنيش يمكن ما جاتش معايا الله أعلم أو راجلي ما عرفش فين يضغط مزيان , المهم هاد التقنية معروف كتدار لعلاج الكثير من الأمراض و بالنسبة للولادة راه كاين نقاط خاصة بالجسم فين خاصكم تضغطوا على الأكتاف و الأقدام و ممنوع على المراة اللي ما وصلاتش على الأقل 37 اسبوع تستخدمها حيث ممكن تولد و تهيج المخاض فكونوا حذرات أخواتي , قلبت على صور أو رسوم تبيانية و مع الأسف كلهم فيهم صور ديال النساء الشي اللي تيمنعوا قانون المنتدى , و لكن باش تفهموا أحسن و أكثر كتبوا فاليوتيوب :
    Acupressure Points to Induce Labor/ Labor Induction: leg and foot points


    الفيديو راه فيه متخصصة فهاد التقنية و كتبين النقط اللي خاص تضغطوا عليها.

    4 - تدليك الحلمات :

    تدليك حلمات الثدي أيضا من الأشياء اللي كتساعد على تسريع الطلق و المخاض بشهادة الكثيرات و حتى علميا مثبت أن تدليك الحلمات بلطف كيطلق هرمون الاوكسيتوسين المسؤول على التقلصات الرحمية , هاد المعلومة عرفتها متأخرة و بالصدفة كنت فالأسبوع 39 و قالتلي ماما بداي تدلكي صدرك بالزيت دالزيتون و خصوصا الحلمات باش يخرجوا و يرطابوا و يسهال على البيبي الرضاعة , و فعلا جربتهم ديك الليلة دلكت برفق بزيت جونسون لمدة 10 دقائق و هو يشدني الوجع حتى صافي بديت كنقول الليلة نولد و بقا واحد ثلث ساعة و مشا فحالو و ما عرفتش كاع العلاقة بيناتهم حتى قريتها فاحدى المجلات و قلبت فالنت لقيتها طريقة متداولة و مللي قلتها للساج فام ما نصحاتنيش بيها قالتلي خلي كلشي يجي على طبيعتو و ما تسرعيش الوجع حتى يبداك الطلق و فوقت الطلق نسيت ما درتهاش و لكن ننصحكم بيها بزاااف و ممكن تديروا عليها بحث و تقراو آراء المجربات .

    5 - شاي أوراق التوت البري :


    هذا مللي قريت عليه لقيت شحال من وحدة أيضا كتحلف باللي سهل ليها المرحلة ديال الدفيع فالولادة و هو علميا معروف كيقوي عضلات الرحم و كيساعد باش الرحم يرجع لبلاصتو و لحجمو قبل بسرعة و هادي بشهادتي أنا النهار الثالث دالولادة مللي جات عندي الطبيبة قلباتني قالتلي برافو الرحم ديالك رجع بالزربة , بالنسبة لاستعمالو أنا شريت بكية فيها 20 ساشي كنشرب 2 فالنهار يعني خدات ليا 10 ايام و شربتهم فالأسبوع 39 , و كاين اللي كتبدا تشربهم من الأسبوع 35 حتى تولد و هوما بالعكس ما عندهم حتى مضرة و كينظفوا الجسم مزيان من السموم و مضادين للأكسدة و ينصح أنكم تشربوهوم حتى بعد الولادة , و ردوا البال مللي تشريوا خودوا شاي أوراق التوت البري ماااشي شاي التوت البري و راه حتى هوما مللي كيتطلقوا فالماء كيولي لونهم أحمر

    6 - كرة الولادة :

    هادي كانت بالنسبة ليا هدية في فترة المخاض ريحتني بزااااف بزااااف و ساعدات باش ولدي ينزل راسو دغيا و ندمت بصراحة اللي ما شريتهاش من قبل و بقيت نتدرب عليها فالدار حيث راااائعة و كتحل الرحم و كتخلي البيبي ينزل بسهولة , و السر أنك مللي كتجلسي عليها ماشي بحاليلا جلستي على كرسي أو غيرو هي كتخلي الحوض ينزل و عندها تمارين خاصين و كثاااار , و أنا نشجعكم عليها
    بزااااف بزااااف



    7 - الجنس :

    الجنس من الحوايج اللي كينصحوا بيها الأطباء عند اقتراب موعد الولادة , فسبحان الله معلومة غريبة ما عرفتش واش الأخوات عارفينها و هو أن الحيوانات المنوية فيها نسبة عالية من هرمونات اسمها prostaglandins كتساهم في فتح عنق الرحم و هي نفففس الهرمونات اللي كتستخدم على شكل جيل فالطلق الصناعي , فزوجك أولى بيها و استمتعي مع زوجك بآخر اللقاءات الحميمية لأنه جايك شهر أو ما يفوق فين غادي تتحرموا بزوج من دوك اللحظات , و احرصي أيضا على الوصول لنشوتك الجنسية لأن الأورغازم كيطلق هرمون الاوكسيتوسين و كيهيج الرحم للبدء بالتقلصات , كنظن هاد الجزء غادي يعجب أغلب الرجال هههههه , أنا عارفة و مقدرة الأيام الأخيرة تيكون صعيب فيها الاورغازم مع الثقل و التعب و حتى الكريشة و كيلزم محاولات كثيرة و لكن حاولي ما أمكن تستمتعي قبل قدوم اللحظة المعهودة .

    كاين طرق أخرى منتشرة عبر النت و لكن أخواتي تحراو داااائما قبل التجربة راه ماشي كلشي اللي كيتنشر صحيح و مفيد و آمن و حطوا 1000 سطر تحت هاد الأخير , كاين وصفات و طرق ممكن تسرع الولادة و لكن تيكون فيه نسبة كبيرة ديال الخطر على صحة الام و الجنين فأرجوووووكم أخواتي بعدوا على هادشي و قراو و بحثوا على أي حاجة قبل ما تجربوها قبل ما يوقع ما لا تحمد عقباه .

    و أخيرا و ليس آخرا و هو فالصراحة أول شيء خاصو يكون قبل من هادشي كامل هو الدعاااااااااء الله يرزقكم ولادة طبيعية و يسيرة و أطفال بكامل صحتهم و هذا هو الأهم

    جزاها الله كل خير الاخت لي حاولات تقربنا من كل حاجة فادتها (منقول للافادة بما انني باقي ممجربة ههههه) آمين .

    تعليق


    • #3
      شكرا حبيبتي اسية على الموضوع وعلى الإهداء الخاص لتجمع أمهات شهر 10-11-12 2012 الله يجعلو في ميزان حسناتك وان شاء الله نستفدو منو ونفيدو بيه أخواتنا على قد المستطاع ويشرفني نكون اول وحدة تشارك في موضوعك اللي باين غادي يكون مفيد وممتع
      sigpic

      سأل الحـــــــــــب الصــــــــــــداقة: ما قيمة وجودك في الدنيا ما دمت انا موجود؟

      فأجابت الصــــــــــداقة:خلقت لأصنع الابتســــــــــامة حينما تترك انت الدمـــــــــــوع


      تعليق


      • #4
        مشاء الله عليك اسية وربي اجعلو في ميزان حسناتك يارب وولادة سهلة ياارحم الراحمين
        انا ملي كنقرى مشاركتك بديت كنقول يعني اسية فايت مجربة هههههههههههه
        ربي اجيب الكتكوتة بالف سلامة ويارب نفيدو ونستافدو من هذا التجمع





        تعليق


        • #5
          المشاركة الأصلية بواسطة تسليت الاطلس مشاهدة المشاركة
          شكرا حبيبتي اسية على الموضوع وعلى الإهداء الخاص لتجمع أمهات شهر 10-11-12 2012 الله يجعلو في ميزان حسناتك وان شاء الله نستفدو منو ونفيدو بيه أخواتنا على قد المستطاع ويشرفني نكون اول وحدة تشارك في موضوعك اللي باين غادي يكون مفيد وممتع
          مرحبا بيك ختي الله يوفقنا جميعا باش نجمعو اكبر قدر من المعلومات المفيدة على الله يتفاعلو معانا الامهات بكل ما يمكن يسهل علينا لا الولادة و التوجاد وما الى دالك


          المشاركة الأصلية بواسطة وحي الخاطر مشاهدة المشاركة
          مشاء الله عليك اسية وربي اجعلو في ميزان حسناتك يارب وولادة سهلة ياارحم الراحمين
          انا ملي كنقرى مشاركتك بديت كنقول يعني اسية فايت مجربة هههههههههههه
          ربي اجيب الكتكوتة بالف سلامة ويارب نفيدو ونستافدو من هذا التجمع
          مشكورة حبيبتي مريم نورتيني اي حاجة لقيتيها يمكن تفيدنا حطيها هنا و الله يسر للجميع

          تعليق


          • #6
            قصة ولادة اكثر من رائعة للافادة

            اللهم صل على سيدنا محمد و على آله و صحبه و سلم

            نبدا ليكم بشنو وقع ليا قبل الولادة , طبعا هادي أول ولادة ليا فكنت متوقعة أنني غادي نفوت الموعد دالولادة اللي حددات لي الطبيبة و مخلياها فايد الله , المهم فاش دخلات سيمانتي قالت ليا الساج فام الى ما جاكش الوجع هاد الأسبوع رجعي نهار الأربعاء المقبل نديروا تحريض لعنق الرحم بالاصبع, فعلا داكشي اللي كان مشيت باش ندير التحريض مع 2 دالعشية ايوا آش نقولكم هاد الساج فام من عند الله ما تتدخلش للقلب ديما مزروبة و مدروكة و تتهدر تتحس بيها عندها 100 مطرقة فالراس ماشي بحال الأخرين عندهوم الخاااطر , المهم مللي دخلت لقيتها هي قلت يا ربي يا ستار , ايوا كيف العادة بالزربة خدات العينة ديال البول و عبرات لاطونسيو و دقات القلب ديال ولدي و قالتلي يلاه طلعي فوق السرير ايوا جات و بغات تدخل 2 صبعان فمرة وحدة أنا غوتت و راجلي جالس بعيد عليا ناض تخلع و هي تبقى كتشوف قالتليا انتي مضيقة بزاااف و مشات للدفتر دالمتابعة بقات تتكتب الملاحظات ديالها و قالتليا سيري حتى للأسبوع الجاي الى ما جاكش الوجع آجي ندير لك تحريض الآربعاء الماجية و الى ما جاكش الوجع من بعد سيمانة أخرى نديروا لك طلق صناعي , ايوا ما نقولكمش كتهدر معايا بواحد الزربة و أنا تعصبت كنحس بالحرااارة كتطلع معايا و السيدة كتهدر بديك الطريقة , غير خرجنا ركبت فالطوموبيل و بديت كنبكي راكوم عارفين أصلا فالأيام الأخيرة كيكثر التعب و كان ظهري كيضرني و كلي تنفخت و غير تنساير تنقول ما بقا والو ايوا بقيت كنبكي شي نص ساعة حتى راجلي تفقس قاليا أنا غنرجع عندها دابا نغسلها قلت ليه صافي ديني للدار , ايوا دخلنا للدار و هو يعطيني التلفون قاليا هاكي عيطي لهم قوليهم يبدلو ليك هاد الساج فام ايوا فعلا عيطت ليهم هدرت معا الشافة ديالهم بقات كتعتذر قالت ليا الى بغيتي آجي أنا نتسناك اليوم مع 7 دالعشية , فعلا مشينا لقيناها كتسنى تشكيت ليها من ديك خيتي و أسلوبها قالت ليا صافي من اليوم الى عندك شي حاجة آجي عندي نيشان و هي تقوليا واش تبغي ندير لك التحريض أنا دابا قلتلها واخا , راجلي بقا كيشوف حيث غادين ما معولينش المهم دارتو لي آش نقولكم ايدها بحال البلسم و الله ما حسيت بحتى حاجة و بقات معايا بشوية و كتقوليا تنفسي مزيان بعمق و صافي قالتليا راكي بديتي كتتحلي الرحم مفتوح بـ 1 سنتم و التحريض راه تيخدم فخلال 48 ساعة و راه ماشي ديما تيصدق من المرة الأولى , و قالتلي الى ما جاكش الوجع فهاد المدة رجعي السبت مع 1 دالعشية نعاودوا تحريض ثاني , و قالتلي تمشاي شوية و كولي الاناناس و نعسي مع راجلك باش تعاوني الرحم يتحل , و فعلا غير خرجنا طاحت الشتا ما عندي فين نتمشى دخلنا لواحد السوبرماركت و بقيت كنتمشى فيه سير و آجي واحد ربع ساعة و شريت الاناناس و مشينا للدار و درت بنصائحها , و بقيت كنتفرج فالتلفزة و أنا كنحبو على رجلي حتى طابو لي الركابي هههههههه وصلت 11 دالليل قبل الاحم احم طلعت لبيت النعاس سديت عليا و جاني الحماس للشطيح ههههه درت أغنية لوبيز On The Floor و بقيت كنشطح لما اتهد حيلي هههههه مللي دخلت دوشت من بعد حطيت الرشاشة على كرشي على درجة 38 و بقيت كندير المساج بحركات دائرية .

            الغد ليه نهار الخميس مع 3 دالعشية طاحت ليا السدادة ديال عنق الرحم و بقيت كنضحك فالطواليط بحال الحمقة ههههههه عرفت باللي ما بقا والو دقت ساعة العمل الى الامام ثورة ثورة هههههه , بالنسبة للبنات بزاف ما عارفينش كيف داير شكل سدادة عنق الرحم و كنلقى استفسارات بزاف واش هي بحال الافرازات , لا يا أخواتي هي كتكون ثقيلة و فيها كتل صغييرة ديال الدم بعض المرات تتكون على شكل خيوط فوسط دوك الافرازات , اللي تبغي تشوفها بالصور تكتب في قوقل ايمدج Mucus Plug ( اللي تتعيف بزاف ما ننصحهاش آسفة ) .

            المهم بقاو الافرازات كينزلوا كثار كنت كندير بروطيج سليب كيف العادة و ما تيشد لي والو حيث أعزكم الله الافرازات كانو كثار , و الغد نهار الجمعة زادوا وليت كندير أولويز فبلاصة بروطيج سليب مللي وصلات العشية ولاو افرازات سائلة بزاف , المهم اتصلت بيهم فالمركز ديال الولادة قلت ليهم شنو وقع قالتليا واش تتظني باللي السائل الامنيوسي هداك اللي تينزل قلتلها ما عرفتش و لكن ما تنظنش حيث الكمية ماشي كبيرة , و هو فالحقيقة راه طرطقات المشيمية من الفوق و بقا تينزل الماء بشوييية بشوييية, هادشي باش ردوا بالكم البنات أنا هادي عمرها كانت لي فالبال ديما تنسمع باللي المشيمة كتطرطق فمرة وحدة و كتحسي بالما تينزل كثير مع رجليك , المهم قالتليا اذا كنتي شاكة ديري فوطة صحية و مللي تحسي بيها تثقلات بالافرازات جيبيها هنا نحللوها نشوفوا واش افرازات عادية و لا فعلا السائل الامنيوسي هداك , كانت ديك الساعة 8 دالعشية و مللي رجعت قلبت لقيت الافرازات نقصو قلت صافي غير افرازات هادو , وصلات 10 دالليل بديت كنحس بشي وجيعات و جاني البرد , تعشيت و اتكيت و مشا راجلي صاوبلي لابويوط درتها عند رجلي و تغطيت بقيت فبلاصتي و الوجع خفيف كيمشي و يجي وصلات 12 دالليل و هو يبدا كيتجهد ايوا طلعنا باش ننعسوا و بقيت كنضحك حيث صافي و أخيرا جاني الوجع الحقيقي حيث قبل موالف كيجيني و كنقولوا صاااافي هو هذا و مكيكمل حتى 20 دقيقة و يمشي , المهم بقيت كنضحك و مللي كتشدني الوجعة كنبقى نشطح فبلاصتي راجلي ما بغاش يتيق كيقوليا كتضحكي عليا ايمبوسيبل يكون فيك الوجع ديال المخاض هههههههه المهم كان ديك الساع كيجيني كل 20 دقيقة , مع 1 دالليل اتصلت بالمركز ديال الولادة قلت لهم راه جاني الوجع و لكن ما مجهدش بزاااااف كيف كنت متوقعاه , المهم قالتليا نعسي دابا و ارتاحي و ما حدو خفيف و مللي يتجهد عليك عاودي عيطي , فعلا مشيت نعست و هو يفيقني الوجع نهار السبت مع 5 و نص ديال الصباح و كان مجهد نيت على ديال البارح , اتصلت بيهم قالتليا شحال بين كل وجعة و وجعة قلتليها تقريبا 9 دقائق قالتليا صافي هاهي الغرفة ديالك محجوزة , خدات المعلومات اللي بغات و قالتليا مللي يولي على الأقل 5 دقائق ما بين الوجعات عاد آجي , ايوا قطعت معاها فيا الجوع صاوبت كاس ديال الحليب بالحبة السوداء و آدوشن و الحلبة و العسل و فطرت مزيان , و عمرت البانيو بالماء دافي و درت فيه جيل دوش ديال كلارنس ديال الأعشاب المهدئة و درت المقطع ديال بداية المخاض ديال التنويم الميغناطيسي و دخلت تما و استرخييييييت مع راسي ما بقيت كنحس بحتى وجعة حتى تخلعت قلت واقيلا مشا الوجع , المهم جلست شي ساعة و نص من بعد فيقت راجلي قلت ليه وجد راسك راه اليوم أكيد أكيد جاينا واحد الضيف ان شاء الله قاليا مرحبا بيه هههههه , بقيت متكية فالسرير و مللي كتجيني الوجعة كنتنفس بعمق و الوجع أنا بداني بالظهر ما كنتش كنحس كاع بالوجع فالبطن غير الظهر , و مللي كتجيني الوجعة راجلي مهمتو هو المساج الحمد لله نفعني بزااااف فديك البداية الله يجازيه كل خير , بقيت هكاك حتى وصلات 12 ونص مورا الظهر , صاوب لي راجلي عشبة كف مريم و درت فيها 2 ملاعق كبار ديال العسل الحر و درتها فقرعة صغيرة قريت عليها القرآن و خديتها معايا ,بدا الوجع كيجيني كل 5 دقائق , لبسنا حوايجنا و خدينا اللوازم دالمستشفى و مشينا .

            مللي وصلت خداو المعلومات اللازمة و عبروا ليا لاطونسيون و لقيت واحد الساج فام بحال الحلوى فرحت بزااف قلت الحمد لله هادشي حتى أنا نيت علاش اختاريت مركز الولادة عوض المستشفى , المهم قلباتني و قالتليا الافرازات ديالك فيهم السائل الامنيوسي قلتلها ايوا صافي راه من البارح مع 4 ديال العشية و هو كينزل قالتليا احنا ما عندناش الحق نشدوك هنا أكثر من 24 ساعة من بداية خروج السائل نقدروك نديرو لك ترانسفير للمستشفى هوما عندهم أطباء متخصصين في حالة لا قدر الله وقع شي حاجة و لكن غادي نحاولوا و ان شاء الله كلشي يدوز مزيان و تولدي هنا بخير, و لقات الرحم محلول 3 سنتم قلت الحمد لله , و نبغي نقول للبنات اللي خايفين من التقلاب أبدا ما تخافوش راه كلللللشي فهاد الدنيا اللي كيتخاد باللين كيدوز يسير خاص غير الساج فام تكون واعية و ماشي شي كانيبال أنا بعدا و الله مكنحس بوالو فالتقلاب يكفي غير تتنفسي مزيان و ترخي راسك , المهم من بعد قالتليا واش تبغي تمشي للدار و لا تجلسي هنا قلت ليها غنجلس هنا , و جابت ليا الكرة ديال الولادة نبقى جالسة عليها عاوناتني بزاااف , بقيت كنشرب فديك العشبة حتى ساليت نص لتر , و الماء الماء الماء ضروووري البنات ما تهملوش شرب الماء , بقات كل ربع ساعة تتجي تقلب دقات القلب ديال البيبي و أنا مللي كيشدني الوجع كيف العادة التنفس العمييييق , وصلات 3 دالعشية بدا كيجيني كل 2 دقائق جابو لينا الماكلة كليت شوية و أنا ننوض أنا و راجلي كنديروا المشية ديال العسكر فالجريدة ديال المركز ههههههه بقيت كنتمشى بالزربة شي ربع ساعة , وصلات 4 دالعشية بديت كنعيا شوية و بغيت نتكا و هي تجي قالتليا آجي نقلبك دابا أنا بالفرحات عليا هههههههه المهم قلباتني لقات الرحم محلول 6 سنتيم , فرحت بزاااف اللهم لك الحمد هاديك كف مريم و الكرة دالولادة عاونوني بزااف , من بعد التقلاب و هو يتجهد الوجع أكثر و أكثر



            المهم تكيت تما واحد الشوية و هي تجي ساج فام جديدة هاديك الأولى سالى الشيفت ديالها و بقا فيا الحال كنت بغيتها تبقى معايا و لكن ما عليش كنت باغا نبقى بوزيتيف الى آخر رمق , المهم عمرات لياا الحوض بالماء و قالت ليا مللي تحسي براسك بغيتي تدخلي للماء دخلي و اعطات لراجلي جهاز ديال الاتصال قالتلو الى بغيتو شي حاجة عيطو ليا , المهم أنا الوجع ديك الساع مجهد دخلت للطواليط بدلت و صاوبت و لبست بيكيني و دخلت فالحوض ديال الماء و الله يا ربي على راحة فاش دخلت حسيت بالماء هز عليا كاع الثقل ديال جسمي و سكت كاع الآلام بحال رحمة الله , جاني النعااااس و بقيت جالسة تما و هي كتجي كل مرة تشوف دقات القلب ديال البيبي , وصلات 6 و نص ديال العشية صافي تنقول لراجلي عييت ما بقيتش قدرت نهدر هو تيحاول يهدرني و يضحكني و أنا وااالو تنقول غير ممممممممممممممم و كنتقلب من هنا لهنا و كندعي فخاطري اللي تفكرتو كندعي معاه , مللي جات الساج فام عاوتاني بقات جالسة معايا و كتحاول تهدرني و أنا نبقى فيها قالت لراجلي مرتك شجاعة باقا صغيرة و من البداية ما بغات لا مسكنات لا والو و هي تقولي واش نعطيك شي حاجة قلتليها لا , ايوا دازت ربع ساعة أخرى صافي حسيت بالصبر تقادى قلت لراجلي عيط ليها تجي دابا فعلا جات قلتليها اعطيني الغاز و الاوكسيجين حيث هو الوحيييييد اللي ما عندو حتى آثار جانبية لا على الأم و لا على الجنين و غير كتزوليه من فمك كيخرج من جسمك ديك الساع, ايوا غير شميتو المرة الأولى جاتني الدوخة و ناض عليا قلبي قلتليها بغيت نرد قالت ليا لا راه غير احساس هداك اللي جاك دابا شوية و يمشي و أنا نقوليها آري ليا داك البول بليز فعلا غير مداتو ليا و أنا نرد فيه كاع داكشي اللي كليت أعزكم الله عاد حسيت براسي ارتاحيت بقيت كنشرب فالماء و أنا نعاود خشيت الغاز ففمي تاني و حسيت بيه خفض ليا نسبة الاحساس بالوجع , هو ماشي تيخفيه بمرة و لكن بعدا أحسن من بلاش , مللي تتجيني الوجعة تنبقى نشم فيه حتى كندوووووووووووخ و راجلي طبعا ما فلتش الفرصة باش يبقى يموت عليا بالضحك مسجل ليا شي فيديوات و أنا مرفوووووعة بحاليلا ضاربة زلافة دالمعجون ههههههه , المهم وصلات 7 و نص صافي الغاز ما بقا كيقضي ليا واااااالو و تجهد عليا الوجع بالمعقووووول و هو كان متوقع حيث المسكن الوحيد اللي تيقضي على الوجع دالولادة هو ليبيدورال الباقي تينفعوك فالأول و فالأخير تجابدي بوحدك , المهم بقيت كنعراق و هي فينما كتجي كتسخن الما فالحوض باش حتى الى خرج البيبي يلقا الماء دافي بحال كيف كان الداخل و أنا تنقوليها باراكا راني تنموت بالصهد و لكن مللي تنخمم لولدي كنسكت , واحد الشوية حسيت براسي ما بقيتش قديت نحرك رجلي حيث ولدي كنحس براسو هابط و قرب يخرج ايوا واحد الوقت درت ايدي غير من باب الفضول و أنا نقيس الشعر ديال ولدي و جاني واحد الاحساس سبحان الله قلت لراجلي عيط ليها دابا غير جات قلتليها الشعر راني قستو بقات كتضحك قاتليا عاادي صافي ما بقا ليك والو ان شاء الله , قلتليها شحال قالت ليا واحد ساعة أخرى قلت ليا واااااو باقا ساعة كاملة آميمتي ديك الساعة 8 و نص دالعشية , ايوا صافي مشات هاديك الساج فام حتى هي سالى الشيفت ديالها و جابو ليا وحدة أخرى و أنا نتعصب آو واش هادو كل مرة غيبقاو يتبدلو , بقيت كنتوجع فوسط الماء قلتليهم حاسة براسي غندير بيبي ( أعزكم الله ) و هي تجي هي و وحدة أخرى حاولوا يعاونوني نخرج من الحوض و لكن وااااالو غير كنخرج من الماء كنحس بالالم كيقتلني مكنقدرش نوقف و هوما يجيبوا ليا بول قالو ليا حاولي تبولي واقفة فبلاصتك واااالو كنتعصر مكاين والو غير الضغط ديال ولدي هداك , رجعت بقيت فالحوض تاني حتى لـ 10 و ربع و هي تقوليا صافي ما نقدروش نغامرو أكثر ولدك راه فاقد الماء ديالو أكثر من 24 ساعة و هوما يعيطوا لامبيلونس , يلاه خرجوني من الحوض مكنقدرش نتمشى كنحس بديك البلاصة أعزكم الله كتتقطع , تكيت فوق السرير قلباتني لقات الميكونيوم ديال ولدي خارج و هي تتخلع قالت ليا الترانسفير ضروري نخافوه يشرب , قلتليها نجرب الولادة فالكرسي جابت ليا الكرسي ماااااا قديتش نجلس عليه أكثر من 5 ثواني تنحس بالراس صافي فررق ليا العظام , بقيت كنتألم حتى دخلوا رجال الاسعاف جاب ليا راجلي بيجامتي لبستها دغيا و هوما يهزوني مشات معنا الساج فام , أنا غير ركبت فلامبيلونس صافي أخواتي كنشوف الموت بعينيا من شدة الالام ما بقيتش كاع تسمع حسي سكت و ترخى عليا لساني راجلي كنشوف فيه أصفففر و شاد ليا ايدي و كيتبسم ليا تيقوليا حبيبتي ما بقا والو و الله ما قدرت حتى نجاوبو هزيت صبعي و بقيت كنشهد و كنعاود هو غير شاف هاد المنظر تخلع بقا كيقول لداك الفرملي شوف مالها مكتردش عليا بقاو كيحاولوا معايا عاد بالكشايف باش جاوبتهم , الترانسفير خدا تقريبا شي نص ساعة حيث المستشفى كاين فمدينة أخرى, غير وصلنا للمستشفى لقينا كلشي واجد لقيت الغرفة عامرة بالأجهزة و الفرمليات تخلعت بقيت غير كنقول مممممممممممممممم خفت لا يقولوليا السيزاريان , ركبوا ليا أجهزة التخطيط للقلب ليا و لولدي و السيروم و دخل الطبيب البناج قلبني قاليا ما بقا ليك والو أنا الألم ديك الساع ربي اللي عالم بيه , جات واحد الساج فام تما قالتلي هاكي شوية دالغاز غير ينقص عليك الالم باش تسترجعي شوية الطاقة باش تدفعي , بقيت كنشم فداك الغاز كنحس بيه ما دار ليا وااااالو , كنشوف داك المنظر اللي ما بغيتش من الأول ديال المستشفى و السيروم و الأجهزة و راجلي جالس شاد راسو تخلع بزاااف و أنا نسهى و بقيت كنطلب ربي تنقول يااااا ربي راه ما عندي غيرك شكون من غيرك يفكني يا ربي بقيت كنبكي فخاطري , حتى دخل الطبيب دالولادة غير دخل شفتو من دوك الانجليز السود و أنا سبحان الله كنتفائل بهادوك السود فالطب ديما خدمتهم من داكشي الرفيع , المهم دخل قلبني بقا كيهدر معايا و كيضحك أنا كاعما ديتها فيه كنتسنى يقول ليا الفورسيبس و لا الفونتوز و هو يقول ليا شوفي راه ما بقا ليك والو حيدي عليك داك الغاز و ركزي مع الدفيع , ايوا غير سمعتو و أنا نرمي الغاز نيت و بقيت كنتعصر و هو مشا كيهدر مع راجلي بعاد عليا من بعد قاليا راجلي راه قاليه باللي الولد تبارك الله كبير و أنا عندي المهبل صغير و فآخر لحظة الولد دور راسو للجنب داكشي باش ما هبطش دغيا قالو لو ما دارش كون راها ولدات و سالات بلا ما تجي للمستشفى , المهم شوية جات عندي الساج فام قالتلي شوفي بلا ما تتعصري و تجهدي راسك و تجهدي البيبي معاك , خلي حتى تحسي بالوجعة جاتك و خودي نفس عميييق و دفعي مرة واحدة , و فعلا كانت نصيحتها من ذهب , ارتاحيت واحد 20 ثانية حسيت بالوجعة و أنا ندففففففففع كنحس براسي بحال شي ورقة كتقطع بشوييييية , واحد 10 ثواني أخرى الوجعة الثانية و أنا ندفع بنفس الطريقة حتى كيتقطع فيا النفس و كنحس بالراس كيخرج , من بعد 5 ثواني أخرى دفعة أخرى خرج الراس و الدفعة الأخيرة خرج بيها الجسم بالزربة جراتو , خرج ولدي للحياة مع 11 و 47 دقيقة ديال الليل فيه 3 كيلو و 900 غرام,و قطعات ليه الحبل السري و خداتو كتمسح بالزررررربة فيه أنا يلاه كناخد النفس ديالي سمعتو كيبكي , يا ربي على ديك اللحظة يا ربي ما تحرم حتتتتتى شي امراة فالعالم من هاد الاحساس يا ربي , حليت عيني شفت راجلي واقف حداها و كيضحك و ولدي كيبكي و هي كتنظف فيه , ديك الساع جات طبيبة الأطفال قلباتو قالتلي الحمد لله راه بصحة جيدة و راه ما شربش , جا الطبيب ضرب لي الابرة ديال المشيمة ففخذي و راجلي واقف كيبوس ليا فالراس هههههههه , و الساج فام كتلبس ليه لاكوش و اعطاتو ليا لأول مرة نعنقو و نرضعو بغيت نبكي بقيت شادة دموعي بزز كنحس براسي تكرفست و عييت و لكن الحمد لله ربي ما خيبنيش فالأخير , ديك الساع نيت عيطات ماما مسكينة النهار كلو و هي كتعيط و أنا مكنجاوبهاش باش ما نخلعهاش غير جاوبتها حطيت التلفون عند فم ولدي و هو كيبكي غير سمعاتو مسكينة بقات كتبكي بالجهد ما قدراتش تصبر و كتدعي معايا , ايوا صافي من بعد خداوه يلبسوا ليه و أنا خرجوا ليا المشيمة , الله على راحة مللي كتخرج ديك المشيمة عاد كتحسي براسك نيت ولدتي و تفكيتي على خير , جا الطبيب قلب الجرح قاليا تقطعتي بزاف و هادشي كان متوقع ما يمكنش نديروا لك الغراز هنا خاصك خياطة تجميلية من الداخل و من برا باش نضمنوا أن الجرح يلتئم دغيا و يرجع كلشي لوضعو الطبيعي قبل الولادة , قلتليه على بركة الله , بقا ولدي مع باباه و أنا خداوني للبلوك ديال العمليات ديك الساع جا البناج و الطبيبة الجراحة ديال التجميل و الطبيب النسائي و الفرمليات , غير بنجوني نعست ما بقيت عقلت على وااااالو حتى سالاو و فيقوني مساكن بقاو خدامين جاية لساعتين , عاد طلعت للغرفة ديالي مع 3 دالصباح .


            ايوا هادي هي قصة ولادتي البنات نتمنى نكون فدتكم و لو بالقليل , و بصراحة راه بغيت نقول واحد الحاجة و فينما كتبتها كنمسحها و لكن غنقولها و صافي , من بعد ما ولدت واحد المرة دخلت للمنتدى و طلعوا ليا آخر المشاركات فواحد الموضوع ديال واحد الأخت الله يسعدها كتتشكى من عدوزتها كتجلس القدام و هي كتجلس اللور , و بصراحة لو قبل الولادة كنت غنجاوبها نقولها خليها تجلس القدام من باب الصواب و لكن من بعد الولادة وليت كنشوف أنها تجلس القدام من باب الوااااجب , الله يسمحلينا من الوالدين و يعيننا على تربية وليداتنا تربية صالحة يا ربي , و يا ربي يا ربي ترزق المنتظرات يا ربي فالقريب العاجل راكم كنتوا ديما فالبال الله يسهل عليكم فالقريب العاجل يا ربي و تجيوا تحكيوا لما قصص ولاداتكم



            و السلام عليكم و رحمة الله تعالى و بركاته

            تعليق


            • #7
              السلام عليكم حبيباتي
              انا تبعتكوم هههههه مرحباً بيا معاكوم فهاد التجمع انشاا الله حتا الولادة وما بعد الولادة
              حبيبتي آسية بارك الله افيك علا المعلومات المفيدة واتمنا الإفادة للجميع


              Rayan ino je l'´aime bcq

              تعليق


              • #8
                اهلااا بيك حبيبتي فرح مرحبا بيك راه اصلا الدار دارك اوا ديري يديك معانا لي بانت ليك مفيدة حطيها حتى داك شي توجاد و ما الى دالك

                تعليق


                • #9
                  صراحة حبيبتي قصتك مثيرة وصعبة الله يسمح لينا من الوالدين
                  عرفتي اختي كل ما نفكر فداك اليوم كنترعش من بلاصتي او كيجيني الخوف كنقول معرفت كيغادوز وخاصة أني معنديش تجربة او معندي هنا حد أرشدني الله معانا او خلاص والله يعطينا ولادة سهلة يا ربي
                  Rayan ino je l'´aime bcq

                  تعليق


                  • #10
                    المشاركة الأصلية بواسطة فرح 33 مشاهدة المشاركة
                    صراحة حبيبتي قصتك مثيرة وصعبة الله يسمح لينا من الوالدين
                    عرفتي اختي كل ما نفكر فداك اليوم كنترعش من بلاصتي او كيجيني الخوف كنقول معرفت كيغادوز وخاصة أني معنديش تجربة او معندي هنا حد أرشدني الله معانا او خلاص والله يعطينا ولادة سهلة يا ربي
                    قصتها ههههههههههه ضحكتيني هاديك ما عرفناكاع قصة من ومشكوووورة عليها و بصراحة شبعت منها بكا الاسلوب د الاخت كان رائع عشنا معاها ديك اللحظة
                    اسية مشكوووووووووورة على المجهود و الله يسمعك خبر مفرح را كتبت شحال من حاجة غاتفيدني


                    تعليق

                    يعمل...
                    X