ثم التثبيت يوم/03/10/2012
تيليلة

السلام عليكم
انيقاتي الغزالات كيف عاملين نتمنى من الله تكونو بألف خير و في تمام الصحة و العافية هانا جبتلكم واحد الشهيوة كتحمق و لذيذة الفلفل معمر بالكفتة و الروز كيجي هائل و الى جربتوه غيعجبكم ان شاء الله اللي دخلت تدعي معايا شي دعوة د الخير و متنشاونيشي من التقييم ديالكم الله يعطيكم متمنيتو ان شاء الله فهاد العواشر نبداو بسم الله

فالاول كنغسلوا الفلفل مزيان و نقيواه من داخل نحيدولو البذور فحال هاد الشكل و نخليوهم على جنب

دابا ندوزا ن الحشوة كنحتاجوا
ربع كيلو من الكفتة
زلافة د الروز(ماشي مسلوق)
بيضة
واحد ساشي د الزعفران
واحد ماطيشة كبيرة
واحد البصلة كبيرة
شوية د المعدنوس
ملعقة صغيرة د الفلفل حمرا
شوية د الملح و الابزار

فواحد جبانية كنحوكو ماطيشة و البصلة و نضيفو المقادير كاملين البيضة و الكفتة و زلافة د الروز و المعدنوس مدقدق و التوابل

كنخلطو كلشي مزيان حتى كتجانس المقادير كلها

ها الحشوة واجدة كنعمروا الفلفل ديالنا فحال هاد الشكل

دابا ندوزو ن لاصوص د ماطيشة اللي كترافق الفلفل معمر كنحتاجوا
6 د ماطيشات كبارين
3 ضروس د الثوم
شوية د المعدنوس
ملعقة كبيرة د صلصة د ماطيشة د عايشة
شوية د صلصة د solis
ملعقة صغرة د الفلفل حمرا
ملعقة صغيرة د الكيمون
ملح و ابزار
كويس صغير د الزيت الزيتون

كنحوكو ماطيشة هي و الثوم و ندقدقو المعدنوس نضيفو التوابل و الزيت الزيتون نعملوا كلشي فشي طنجرة صغيرة على نار هادئة

نخليوها تشحر مزياان بلا منزيدولها الماء باش تلبى فحال هيدا

من بعد متشحر لاصوص كنزلو الفلفل ديالنا ف ديك طنيجرة و نزيدوا شوية د الماء و نغطيوها نخليواه يطيب واحد 20 دقيقة

و ها هو ملي طاب

كندوزو ن المرحلة د الفران كنحوكو واحد شوية د الجبن الاحمر

كنشبرو الفلفل ديالنا و كنزلوه ف شي مول ديال الفران هو و لاصوص د ماطيشة و كنزوقوه بالجبن فحال هاد الشكل

كندخله ن الفران يتحمر و ها الشكل ديالو من بعد ما خرجتو

و ها هو الشكل النهائي ديالو فالطبق كيجي لذييذ و ديك لاصوص كتجي ملبية غزالة بالصحة و الراحة و اللي عندها شي سؤال انا رهن الاشارة كنتمنى يعجبكم و متنساونيشي عافاااااااكم هههه
اللهم ادمها نعمة و احفظها من الزوال