السلام عليكم يا حوامل
و يا منتظرات الله يسهل أمركم و يرزقكم الدرية الصالحة

دكتورة الله يجازيك و ينورك بنوره
هاد الأيام كيجيني شد عضلي في الساق
و آخره كان يوم الأحد مع الساعة 6 و النصف صباحا
و كان مؤلممممممممم و بقى راجلي كيدلك ليا باش بفوتني غير نقص
و هو يشدني فنفس الساق مكان مجانب للسابق
و بقى شحال مبغاش يطلق مني غير بزز لدرجة بديت كنبكي لشدة الالم
و لدابة مزال الأماكن اللي شدني فيهم هاد التشنج كيضروني
و مكنقدرش نتمشى على رجلي مزيان
مشيت للمدرسة وخا ضارني رجلي
1 واش هداشي طبيعي ولا خاص نمشي عند الطبيبة تخرج ليا شي طريطمو
2 واش مشي مشكل إلى تمشيت عليها علما أن المدرسة كتبعد عليا غير 10 دقائق و كنمشي ليها فالصباح و فالعشية

السﻻم عليكم دكتورة كيدايرة لباس عليك الله يجزيك بالخير على هاد اامبادرة الطيبة
سمحيلي غادي نصدعك شوية ااى جات على خاطرك
انا حاملة عندي 14 سيمانة الحمدلله وهاد سيمانة جاني ااحريق في النبولة وكان معاه دم ماشي بزاف مشيت لطبيب وعطاني ندير تحاليل والحمدلله كلشي كان مزيان وعطاني شي دوايات اواخا هاكدك باقيلي الحريق ولكن بﻻ دم
ممكن تغيديني شنو ندير عطاني بزاف دوايات وراني نخاف مشربهم واش يقدو يضر الجنين؟
وسمحيلي بزااف طولت عليك

سلام وعليكوم انا صراحة عندي مشكل اخر
انا ولدت وولدي عندو 7 شهور ونص وراجلي بغا لولاد انا ماكاتجيني دم الحيض من نفاس وبغيت نسوول الطبيبة بشرى واش ممكن نولاد و انا مازال ماكاتجيني الحيض
علما انني ماكانراضاعش بزاف غير يلا بغا ينعس ولدي الله ايخليك مابييتش نفطمو دابا حتا ييديير 1 عام


نتمنا تجاوبيني

سلام الله عليكم شكراً أدكتورة على هاد مجهود لكدري معنا الله اسهل عليك أنا عند واحد مشكل مفهمت فيه ولو احتى أطباء مشرحوش لي أنا هادي 3 ديل مرات كتعطل علي دورة كندير تست ديل حمل كيطلع ليا بوزيتيف حتى كنفرح كنمشي لطبيب ماكيبن كنجلس غير شي أيام كتهود علي دم كتبقة فيا حتال 15 جور معرفتش مناش هاد مشكل واحد لمرة حتى بان لي كيس حمل مي خاوي دبى راح طبيب عيتاني أترجستن نبدها من نهار 16 من دورة مدة 3 شهور الله ارحم وليدك أدكتورة إما قلي لي اشنو بان لك فالحالة ديالي اشكراً بزاااااف

صباح الخير دكتورة تبارك الله عليك و الله يجازيك بالخير
عندي سؤال صغير هههه واشنو هي دلالة ديال دورة منتظمة وش تعني أنو لمرأة عندها قابلية للحمل؟ و شنو هما الفحوصات لي ممكن ندير أنا و زوجي باش نشوفو وش لأمور مزيانة أم لا؟؟

دكتورتي الغالية عندي سؤال الله اجازيك بالخيرقلتلي بلي الدورة غير منتضمة بين 23 و28 مشيت عند الطبيب هنا اعطيني دوا لكينتضمها قالي راه منتضمة ممحتجاج دوا راه غير نفسية ديال المرا كتلعب الدور دكشي علاش كتجيك بين 23 و28 غير متفوت 35 او قل من 21 هل هذا صحيح

الله اجازيك بالخير شرحلي اكتر

دكتورة ضرووووووووووووووووووري تجاوبيني بسرعة الله يخليك
انا درت اجهاض شهر 12 في 23 مني مشيت شفت طبيبة قالت لي كان عندك الحمل في 5 اسابيع و نصف عاودت درت تست عندها لقلت خط غامق و خط خفيف لكن مني دارت تلفزة ما لقات والو حيت اصلا قبل منمشي عندها نزلت مني واحد جليدة
لمهم انا شهر هدا درت الدوا لي عطاتني لكن مادرت حتا مانع للحمل و استعملت اتروجستان 200 قويلبات من نهار 16الى 25
لمهم دورة ما جاتش لكن نهار 22 في شهر 1 في ليل نزل مني قطرات دم قلت هادي دورة صافي ما بقا نزل مني والو واخة كان شوية دالوجع من بعد درت تست منزلي لقيت خطواضح و خط خفيييييف نهار تقريبا 34 في دورة

لكن من بعد 3 ايام جاني حريق في ظهري و نزل مني افرازات وردية
واش كاين حمل او لا و الا هادي غير دورة اخرى
او اجهاض
دخت و مرضت فيديني الله يبشرك بالخير

السلام عليكم دكتورتنا جاني لبارح وجع خفيف لتحت و كنحس بيه جنب فخادي و فات جاني مشيت عند طبيبتي قالت لي من المصران منفوخ هو لي دارلك هداك لوجع اشنو رايك ادكتورتي العزيزة و حسيت لبارح بشي حاجة بحال العصبة كتحرك في كرشي تحت السرة واش هو الجنين بدا يتحرك مع العلم اليوم 1 في الشهر الرابع شكرا

سلم عليكم دكتورة بشرى عند صديقة ديلي بغى منك إستفسر الله يخليك إلى متسعدها هي كاتشرب فنيد مانع الحمل هادي 6 شهور او من ديك لوقت لحضات أن لعادة شهرية مالي كتجهة katab9aliha 3 أيام فقط بغت تعرف وش هاد لحالة
طبيعية أو لا مع لعلم قبل متخد فنيد مانع الحمل كانت لعادة شهرية katab9aliha 8 أيام
انشا الله نتسناو جواب ديالك او عفاك إلى متجاوبين على سؤالي او شكراً docteura

شكرا ليك ادكتورة انا ملي ديتهوم ليها قالت ليا كولشي مزياااان غاتحليلة ديال الطوكسو اللي قالت ليا فيا راه معنديش المناعة ونبعد على القطط واللحم نطيبها مزياااان والخضر والفواكه نغسلهوم مزيااان وومقالت ليا نعاودها وقالت ليا منخاف والو

شكرا دكتورة بشرى بزاف على المساعدة ديالك لينا و ربي افرح قلبك بالذرية الصالحة
الله اخاليك قولي ليا كيفاش نقدر نحسب ايام التبويض للدورة للي المدة ديالها اكتر من 33 يوم و خا غير الطريقة باختصار راكي عارفة ضروري خاصني نعرف حيت جاتني الدورة و انا كنت كنشك بلي حاملة و بغيت نحسب الاباضة بغيت نحمل ان شاء الله مع العلم ان رجلي مكيكونش نعايا بازاف عافاك مبغيتش افوتني هاد الشهر و نهار 8 خايفة منكونش معكم حيت مكنكونكتش بزاف و شكرا و سمحلي طولت عليك

السلام عليكم دكتورة شكرا على مجهوداتك بغيت نسولك فولادتي الاولى ولدت بلا وجع وهادشي عدبني حيت مكانوش الزحمات وبالتالي كنت كندفع عشوائيا بغيت نعرف علاش معنديش الوجع وواش هدشي فيوقع لي فالولادة التانية لاني دابا حاملة في ثلاثة اشهر وسؤال اخر عافاك ولدي كان الوزن ديالو اكثر من 4 كيلو وبصعوبة خرج اشنو ندير باش نتفادا زيادة الوزن ديال الجنين فحملي هذا وواش ضروري كل شيولادي يتزادو بوزن كبير وخا مكنتش كناكل بزاف وماعنديش سكر شكرا بزاف بزاف

صباح الخير
الله يجعل هذ لعمل في الميزان المقبول
لبارح جاني آلم دورة حاد جدا معمرو جاني لدرجة آني كنت كنصرخ بصوت عال واش هذا آمر طبيعي؟؟

salam docteura labass zidini 3ela laani9at li m3ak ana 3ad 3reft wach 7amla hadi 6jour walkin galt liya tbiba ani 3ndi 1mois o ana kent tanakoul fanid ma3 l7aml wach maykounch maatr 3ela ljanin et merci

دكتورة بشرى كما اخبرتك سابقا فاختي حامل بسبع اسابيع لاتحس باعراض الوحام وعملت اول سونار وظهر نبض الجنين ما يخيفها انها فيما سبق كانت تعاني من نقص كبير في هرمون بروجسترون وهي خائفة ان يؤثر ذلك النقص على سلامة الجنين او يتوقف نموه فماذا عليها فعله وهل يوجد دواء يعوض هذا النقص علما ان الطبيبة لم تصرف لها اي دواء بعد فما نصيحك لها وهل مثبتاتالحمل مثل الدوفاستون وبرونتجست يعوض ذلك النقص

دكتور بشرى الوزن ديالي 94 ونسبة سكر قبل الفطار 95 واليوم بعد الفطار111 الله يجزيك بالخير على مجهوداتك
سمحيلي عود خطات حيت يلاه كنتعلم تمركات3
دكتورا بغيت نصحح ليك واحد اخطئ يلاه شريت لبراي باش كنقيس السكر ولكن كانت كطلع لي 111 ومني سولت الفرماسي قال لي هداك رغير رقم الكود ومني عبر لي بعد الفطار تمركات 3وقال لي الا كانت هاك رعندك طالع وخصني نعود تحاليل الدم وطبيبه لي متبع معاها مشات تولد عقب ليك وللجميع المنتضرات ولي كتنوب عليها عطتني روندفو على سمانه حيت هنا كلشي بالموعد الله يوفقك وشكرا لاخت لي جوبتني

المشاركة الأصلية كتبت بواسطة دكتورة بشرى
المشاركة الأصلية كتبت بواسطة em hoda
السلام عليكم يا دكتورتنا عندي استفسار احس في اسفل البطن بالنبض هل هو من الجنين ام لا .

نعم هو نبض الجنين .

و عندي سؤال 2 احس ببطني كبرت شوية و خرج لي فيها خطوط بيضاء مع العلم انا غدا نكمل 3 شهور هل ممكن تبان بطن الحمل في 3 شهور شكرا.

ممكن أعرف هل كانت عندك كرش قبل الحمل وكم وزنك حتى أجيب على سؤالك هذا ؟ .

كانت عندي الكرش شوية ووزني 76 كلغ و قبل الحمل كان في 73كلغ شكرا ليك يا احلي دكتورة

دكتورة أنا من مدينة بركان و أعاني من مشاكل عديدة في المصارن و لغازات و لوجع و زيد ؤ زيد و مشاكل في آلام دورة زوج ديالي قالي باش نجي ندوز فرباط حيث دوزت هنا بركان و لكن ما زلت أعاني ! واش نتي إختصاصك حوامل فقط و لا بإمكاني زيارتك؟