رد: برنامجي الخاص لتنظيف ولطبخ

تعديل الموضوع السابق

السلام عليكم حبيباتي
اليوم غادي نوريكم برنامجي في ترتيب وتنظيف الملابس والفراش وتعطيرهم وبعض الافكار اللي تعلمتها من امي الله يخليها لي والبعض الاخر تعلمتو من المدرسة (في الثمنينات وقبل كانو المدارس البلجيكية فيهم برامج تخص الاناث وبرامج تخص الذكور مثلا كل يوم اثنين كان عندنا من الساعة 8:30 حتى الساعة 10 برنامج ترتيب البيت وللذكور برنامج في نفس التوقيت الميكانيك والنجارة والبريكول والبستنة) وفاش وليت بداري تعلمت من النصرانيات بزااف ديال لحوايج لاني انا كانمووت على شي حاجة كاتهم البيت والاسرة من وانا صغيرة، واليوم قررت نعطي من هذ الافكار وفايت حطيت موضوع بهذ الخصوص غادي نحط لكم الرابط ديالو هنا
http://www.anaqamaghribia.com/vb/sho...d.php?t=407527


والباقي غادي نكتبو لكم الان و ان شاءالله ومن بعد نحط الصور لهذه الافكار والصور من بيتي وداري باش تكون شاهدة وماشي من قوقل وهذا غادي يشجع الحادقات اكثر ويشاركونا حتى هما بافكارهم وبصور من تجاربهم ونصائحهم ونديرو النفس في لبنات اللي عاد تزوجو وماكانوش يقربو لشغل الدار .

==============

نبداو على براكات الله
برنامجي في تصبين وطي الملابس:
ملي نبغي نصبن
كانلبس شي حاجة قديمة مانخاف يقيسها جافيل وﻻ تفزق وحسب الصابون الى كان فراش كانلبس شي بيجامة من جوج قطع سروال قصير وتيشرت باش نكون مرتاحة وشي صندالة ميكة ونحط فشي بلاصة قريبة ليا التلفون باش مانبقى غادية جاية
نوجد الصابون جافيل الصابون لبلدي ومعطر لحوايج الى غادي نصبن لفراش كانجبد لبانيوات والسطولة وشي غراف وﻻ سطيلة صغيرة والتيو ونخلط الصابون tide / omo او اي صابون كانستعمل ونبدى نصبن بعد مانكون شطبت السطاح مزياان حتى ماتبقى فيهﻻوﻻ ريحة الغبرة نخوي الماء حتى نفزg الزربية مزين ونحط من فوقها البانيو وندير فيه الماء والصابون وجافيل ونخلط مزيان وندير الكواش وحدة بحدة ونبدى من اللي مامسخاش بزاف والجدادات نرقدها وندوز نعمر بانيو ثاني ومن بعد نرجع نشتف عليها مزياان كاندير جوج عمليات في وحدة صابون ورياضة مخيرة ونخرجها نحطها على كرسي ونزيد الماء والصايون وندير لوخرا وهكا حتى نكملهم نرجع ندير لهم الراس الثاني والثالث ونسقطرهمةمزيان وكل هذ الشي على الزربية باش تفزg مزيان ومع المشي فوق منها والشتيف حتى هيا كاتصبن ومن بعد نوجد 3 بانيوات فيهم الما والاخير فيه الماء والمعطر نبدى نشلل لكواش حتى ماتبقاش تطلع رغوة الصابون ويولي الماء صافي نقي عاد نديرهم في المعطر ونديهم ونجيبهم ونحطهم يستقطرو فشي بلاصة بعيدة على الزرابي وتكون مطرفة ونجي لزرابي هاك بالاك الشيتة والزلافة والكراطة وجميع الاسلحة الفتاكة مع التيو والصابون وجافيل
(جافيل كايجي لكل الزرابي العصريات tapis acrylique et polyester مايخسر عليهم والو)
ونحك ونفرك حتى ترجع تشعل وتقول واك واك الحق نبرمها بحال السيgار وانا نخوي عليها الماء بالتيو مع مرة مرة نجر الماء منىتحتها بالكراطة ملي نبرمهاﻻنجرها بعيد (لهذ الغراض دائماىمعي لمرأة المساعدة فالتنظيف ولكن انا دائما المسييرة والمتحكمة لان لفراش فراشي وهيا غير تساعد مانتكل عليها راه ماغاديش تبرد لي الخاطر) نشلل لبلاصة ونكرطها ونرجع الزربية نفتحها ونبدى نشلل مزياان الى ماتشلوش مزيان يولو حرش فاش توطاي عليهم وحتى لكواش الى ماتشلوش مزيان تشوفيهم بحال الى صوفتهم هابطة وملبدة ولكن كل ناتشلو وتنقاو يولو مفتوحين وبحال لحرير ونشد جو كراسا ونحط عليهم الزربية ونبدى في الفرشات الصغار (طابيات ديال السرير والكوزينة وو الخ) نفس التصبين وننشرهم بعد ساعات نجبد لكواش في لحبل والزربية حتى لليوم الثانية ونرسرحها فالسطاح فاش ينشفو لكواش نسوسهم باش تطير منهم الخملة ونعطرهم بشي عطر مايديرش الطبايع ونطويهم وندخلهم للميكان ونجمعهم والان في داري الجديدة عندي بيت صغيرة خاصة للفراش نانحتاجش ندير لهم الميكة لان البيت مافيها حتى بلاصة تدخل منها الغبرة ومرة مرة بالليل كانخلي البيت مفتوحة تتهواء وكل 3 شهور نطلعهم لسطاح يتشمسو والورابي فاش ينشفو نطلع سبيراتور لسطاح ندوزها عليهم ونبرمهم الجيهة لمصوفة لداخل ونجمعهم بالسكوتش ودخلهمةلبيت لفراش والى ديال لفراش كانفرشهم هذيك الساعة
لتصبين لحوايج كانفرزهم كاين اللي نصبنو في ماكينة اتوماتيك وكاين ديال الماكينة العادية لانها كاتخرج واقتصادية في الماء وكانتحكم في التوقيت نبدى دائما بلحوايج لكحل نصبنهم نشللهم وننشرهم بعد مامسحت لحبل مزياان بخرقة فازgة وندير لكحل في ابعد بلاصة على البيض باش مايطير عليهم الماء ديالهم ونبدى بالسراول نقلبهم ونشدهم من الصمطة ماشي من الرجلين ونقادهم ومانطويهنش على لحبل ومن بعد لبيجامات حداهم ومنةبعد ننشر التريكوات ونخلي حبل خاص للتاقشر والسليبات والوفيتمات والستيانات وزيوف الشعر
نرجع للحوايج لملونين واخير شي البيض ديال جافيل (واي حاجة فيها دم كاندير لها ما بارد والصابون البلدي ونفركها بيدي ونشللها عاد نديرها فالماكينة )انا بصراخة حوايجي مامسخينش بزاف كاندير جوج رووس لول ربع ساعة والثاني 7 دقايق ونشلل 3 مرات الاخيرة فيها المعطر ونبدى ننشر من لكبير لصغير وكل بيجامة حداها تريكوها كل بينوار حداه حزامو كل حاجة حداها ختها باش في الكي مانتلف والتقاشر كاننشر كل 2 فرادي مع بعض باش مايتجلاوش عليا وماعمرني لقيتى مشكلة مع التقاشر لاني كانجمعهم مع بعض
وحوايج ولدي كانديرهم في حبل بحدهم وحوايجي نفس الشي وزيوف الكوزينة متابعين والفوطات متابعين وحسب اللون وماكنديرش لحوايج على لحبل من النص لقوامج كاتشدهم من لتحت ومجبدين والتريكوات الى كانو ثقال مانشدهم من لتحت والى خافا من لكتاف ولكن كانراعي باش ماتبقاش بلاصة المقبط دايرة العلامة
وغير نحيد لحوايج من لخبل ديال النشير كانطويهم كانشد جوج سلال مربعين وكانوجدهم حداية فالسطح ونحط سطيلة لمقابط ديال لحوايج les pinces à linge وﻻ فيليلات وﻻ القباضات كل واحد وشنو يقول ليهم
تكون خاصة بيهم وماعمرني خليت وﻻ حتى مقبط واحد في لحبل ديال هاكاك معلق بحال لهبيل كاتجيني من قلة لحداكة
كانبدى بلحوايج لكبار وحسب كل شخص باش الى كانفرقهم على الماريوات مانلقاش صعوبة ونكثرعليا الخدمة وكانحيد حاجتين مع بعض ولا اكثر نحط في سلة ونبدى نسوسهم ونقلبهم ونقاد ونطوي والى كانو ديال المصلوح كاندويهم غير نصف طية والتقاشر نقادهم ونقلبهم ونطويهم على جوج وندخل وحدة في ختها وفاش نكمل حوايجنا نجي لسلة الثانية دنير فيها حوايج المصلوح وحوايج الكوزينات وجوايج الحمامات وايزور النعاس ونبدى بالحاجة اللي مكانها هو الاخيرواخر حاجة اللي مكانها قريب مني (مثلا انا عندي3 طوابق كانبدى بحوايج الطابق التحتاني ومن بعد حوايج طابق بيوت النعاس واخر شي حاجة هيا حوايج بيت الصابون وكوزينة السطاح لان الصابون فالسطاح ) وكل مانحيد لحوايج نجمع لمقابط ونرجعم لسطيلة ديالهم وفاش نكمل نرجع السطية بلاصتها ونبدى نصلح حوايج المصلوح انا حاطة المصلوح في بلاصت الصليح وموجد دائما ومفرشة ازار للصليح باش الى اضطر شي حد يصلح شي حاجة بسرعة يلاقي كل شي موجود وملي نكمل المصلوح للقوامج والسراول(معلومة مهههههههههمة جدا جدا جدا السراول ماعمرك تحطي المصلوح مباشرة عليهم دائما ديري منديل فازg بما نقي وعاد تصلحي من فوق منو وكل ماينشف الالمنديل فزgيه وعصريه ونشريه على السروال وصلحي باش ماديرش المصلوح لطراص) فاش نكمل نبدى نرجع لحوايج لبلاصتهم من الفوق وانا هابطة
انا دايرة لي ولبنتي 4مجورة في ماريواتنا ولولدي 2 مجورة مجر لتقاشر والسليبات والكاصكيطات ومجر للاغراض الاخرى
لبنتي مجر لستيانات وواحد لسليبات وواحد لشيلان وصماطي التاgاشط واحد لتقاشر
ونفس الشي لمجورتي واحد لسليبات واحد لستيانات واحد لتقاشر وزيوف الحمام وواحد للفوط الصحية

وللكوزينات دايرة مجورة للزيوف لماعن ومجر لسرابت وفي كوزينة السطاح زايدة مجر للgرارص ديال الخبز وفي بيت الصابون حاطة فوطات لسطااح ولحمام بيوت النعاس
وفي بيت النعاس عندي غرفة خاصة للفراش وفيها واحد الطبلة كانحط عليها الفوطات والنابات وايزور النعاس وجويا ديال لمخاد ولكل شخص حاطة ايزار ديال النعاس رزرف الى كان الصهد ولا بغا غير يتجبد ماكان لاش يفتح فراش الناموسية
راه باين على ناموسيتي في الصورة اللي في الموضوع السابق محطوط جنب بيجامتي ملوي بحال السيgار
وبيت لفراش كانسدو بالساروت باش ماترجعش فوضة وكل واحد يجبد على كيفو
وفوطات الحمام انا كانمشي لعند مول ثوب الفاطي كانشري لكل شخص لون ديال الفوطات وكانعبر 1 مترو ونصف حتى لمترو و80 لكل شخص باش يلويها وتشيط وتسترو مزياان وكانعطيها للخياط يكف لجناب ودير لهم الستان وهذو خاصين للحمام البلدي ونحطهم بعد كل صابون في سيكان الحمام ديال كل واحد مع اغراضو وهكا كل واحد متهمي مايقيس حد الكيس ديالو ووفين مابغا يمشي للحمام مايحتاج يجمع كل شي واجد غير يجمع حوايجو وهاهو واجد

يـــ تــ بـــ ع

رد: برنامجي الخاص لتنظيف ولطبخ

هذه صور تنظيفات هذا الاسبووع

هنا تنظيف حمام طابق الصالات وهذ الحمام درت فيه دوش وقدامو واحد الفاسكي ودرتو بين لاكور والكوزينة بعيد على صالة الضياف

























يتبع

رد: برنامجي الخاص لتنظيف ولطبخ

بعد واحد التسييقة فاعلة تاركة وريحة المعطر وساني كروا ولات كاتعيط في الدار



















يتبع

رد: برنامجي الخاص لتنظيف ولطبخ

وهذا بيت الخزين درت ليه واحد التنظيف خفيف ظريف

غسلت الغلاقات ديال لباطات وجددت بعض الاسامي وغيرت شي حاجة من مكانها وجمعت شي عسل في قرعة وحدة وجبدت الحاجات اللي تاريخها قريب حطيتها لقداام
وشي سميدة ولات قليلة درتها في باطات صغار وجففت البيت وهاهوما التصاور باش يشجعوكم



































يــتــبــ ع

رد: برنامجي الخاص لتنظيف ولطبخ

تفضلو



يــ تــبــ ع

رد: برنامجي الخاص لتنظيف ولطبخ

اليوم غادي نحط لكم تصاور بيت الصابون ديالي هو عبارة عن غرفة صغيرة فيها الدروج ديال السطاح ودرتها بيت لصابون وحطيت فيها واحد المجمد ديال لمجورة قريب لكوزينة السطااح وفيه ماكينة الصابون الاتوماتيك والعادية ومجورة ديال الميكة فيهم لبريزات واغراض بحال السكان ديال التقدية والاشياء ديال لبريكولاج وحاطة فيه السطولة والسلال ديال اصابون وسطولة الحمام وسيكان الحمام وفوطات وزيوف كوزينة السطاح وتيوات ديال الماء ومكان لتصليح لحوايج وصابون الماكينة ودرت فيه واحد الزاجات كانحط عليهم باطات فيهم اغارض مثل الماسكات والخلطات للجسم والصابون البلدي والعكر الفاسي .. الخ ووحدة حاطة عليها اغراض التنظيف اللي تخص بيت النعاس ومطبخ السطح ووحدة حاطة عليها باطات فيهم لمسامر والفيسات والجلدات ديال البوطة... الخ وكل شي باين في التصاور


هذ لباطات وحدة فيها اكسيسوارات الحمام لمشاطي مقابط الشهر ...الخ
وحدة فيها الكيسات ديال الحمام كانشري منهم بزاف فاش نلقاهم زوينين
وحدة فيها التيليكومندات ملي رحلنا جمعتهم فيها وباقي ماقديت كل الفيسيديات والديفيديات وباقي مجموعين
وحدة فيها الستيلوات وحوايج لمدراسة
وحدة فيها اكسيسوارات الكمبيوتر
...الخ


كارتونة فيها شي ديمورات ديال النحاس خاصهم يتمسحو وانا اكره امسح النحاس وراه كانستنى يعفو عليهم الله
حداهم زيوف كوزينة السطاح طبعا كانستعمل ليهم غير الزيوفة لقداام

فراشات الحمامات


غوطات الحمامات


هذ لبلاصة كانصلح عليها لحوايج


هذو لمصالح كانغطيهم على العبرة


عندي شحال من واحد فيهم واحد عمره ملي تزوجت كايعجبني نصلح بيه ولكن اكثر واحد براتيك هو هذ لكبير راائع وساهل



هذ السندوقة جابتها لي امي الله يخليها لي وماعرفت شنو ندير فيها وانا تجيني واحد الفكرة وجمعت فيها التيوات وتهنيت
وكانحط فوق منها صنادل الميكة الى جا شي حد بغى يتوضى ولا شي حد بغى يساعدني فالصابون مايخصوهش الصنادل :)

وهذا ميزان اللي باغي يشوف ياك ماغلاض اجو يالانيقات نشوف شحال كاتوزنو واللي غليضة ممنوعة من دخول مطبخ اناقة مغربية


سلال الصابون وسطولة الصابون والتسياق وجفاف بيت الصابون والدروج



سطولة الحمام وسبيراتور صالة السطااح




المجمد ديال الفوق وسلال الطي وفوقهم سلال طوال
والماكينة الاتوماتيك انا عندي سيرة بعد مادوزت ماركات كثيرة عجباتني وصابونها زوين



لمجورة ديال بيت الصابون والماكينة العادية


الباربكيو



هنا الزاجات اللي هدرت لكم عليهم


هذه عليها حاجات الماسكات والحنا والعكر والصابون البلدي زيت الشعر



هذه عليها قراعي فيهم جلدات البوطة ولمسامر والفيسات والشفيات ..الخ




هذه عليها اغارض التنظيف














يـــتـــبــ ع

رد: برنامجي الخاص لتنظيف ولطبخ

نكمل مع كوزينة السطاح
هذ الكوزينة لطياب الخبز الحلويات لعراضات الشواء الحوت اي حاجة للقلي كاتقلى هنا اي حاجة فيها الفاخر كاتكون هنا
وحاطة فيها ماعن الالومينيوم ولبانيوات والكوكوتات لكبار والطواجن ولمجامر وفيها ماعن ديال اتاي والعاصير وميكرو ومكينة لعجينة ومولينكسات للعصير والعطرية يعني مثل اللي في كوزينة الدار تحت كاين هنا غير هنا زايد لماعن لكبار
ملي نكون هنا مانحتاج نجيب والو من التحت




































































*هذ الصو صورتهم فاش كنت نصبن ونفس الوقت كانعجن ونطيب بما اني في السطح
وكانطلع معايا حوايجي وتروس لبيديكير باش ملي نكمل ندوش فدوش السطاح ونفي رجليا ونهبط معايا الخبز

يتبع

رد: برنامجي الخاص لتنظيف ولطبخ

كنت هدرت لكم على طريقتي في الصابون
اليوم غادي تحط لكم صور الصابون ديال يوم الثلاصاء الماضي
اول كانفرز لحوايج ونبدا بلحوايج الحكل وبعدهم الملونين وحتى ننشرهم عاد نصبن لبيض ديال جافيل

بعد ماكنسيق السطاح باش الى فيه الغبرة ماتطيرش على لحوايج وكانمسح لحبل




















































اتمنى اكون افدتكم ولو بالقيل من خبرتي البسيطة

وان شاءالله كل مرة نحط لكم الجديد

رد: برنامجي الخاص لتنظيف ولطبخ

نسيت فاش كنت كانصبن عجنت لفطور والخبز للغداء

رد: برنامجي الخاص لتنظيف ولطبخ

السلام عليكم
اليوم حبيت نشاركم واحد الطريقة ديالي في ترتيب الفواكه اللي غادي نستعمل في الاسبوع
انا ماكنشريش كثرة الفواكه مرة وحدة غير الى كانو عندي الضياف وكانحاول نشري التفاح والليمون دائما يكونو فالدار ونزيد كل مرة نوع اخر من فواكه الموسم دلاح منون سويهلة توت عنب حسب المواسم ونبدل كل اسبوع كانغير
وملي كانجيبهم كانعسلهم باماء البارد والبيكاربونات ونشللهم مزياان ونعزلهم والليمون والتفاح كانقطعهم ونديرهم في طاسات ونغطيهم بالسولوفان
باش اللي بغا شي حاجة يلقاها موجودة وبدون تعب ونايرن المكان والان غادي نوريكم بالصور


طاسة فيها الليمون مقطع دواير والرمان منقي وباش يسهال عليا كلي نقسم ارمانة كانكفيها في يدي ونضربها من القشرة بملعقة وكل الحبوب تنزل بسهولة






التفاح نقطعو




هنا الى بغيت ناخذ قياسي ونغطيهم ونرجعهم


وهنا في الثلاجة


بالصحة والراحة عليكم

يتبع