السلام عليكم الغزالات
تبارك الله عليك اختي الله يجازك بالخير على هاد الموضوع و الله يكمل عليك بالخير يا رب
دخلت نستافد معاكم و عندي بعض الاسئلة حيت حتا انا عندي العرس ان شاء الله فشهر 8 و بغيت نستاشر معاكم
انا كل مرة كنخرج نشري حاجة
انا راجلي غادي يجي شهر و الاسبوع الاول غادي يكون غير ديال التحضيرات يعني هاديك 3 الاسابيع هي اللي غادي ناخدها بعين الاعتبار
اللي بغيت نسولكم على حوايج الدار و قمصان النوم خديت بجمات منوعين شي 5 و لا 7 المهم كاين اللي نقدر نعس بيهم بحال شكل دالنعاس و لي شميز خديت 3 فقط معرفت واش نزيد و لا بلاش شنو رايكم خفت ناخد بزاف و منقدرش نلبسهم خاصة فاول مغديش نزعم نلبس شي حاجة هكداك داكشي علاش خديت بجمات بزاف عاديين و الله راني حايرة و حيت باقي ليا حوايج الخروج مزال مخديت والو خاصني نخيطهم يلاه خديت واحد الصباط و شي لفلارات و مزال خاصني ساك الخروج و داكشي

و التقليدي مبغيتش نكتر منو حيت ان شاء الله مغديش نبقا هنا يعني فبلاد الغربة مغديش نستعملهم بزاف خيطت قفطان و تكشيطة الخطبة بيضة و2 قمايص دالرندة و 2 جلالب وحدة كخيطاها من الخطبة و وحدة عاد غادي نشريها واجدة
بغيت نسولكم عاوتاني على وسيلة لازالة الشعر معرفتش واش ناخد براون ولا لا مبغيتش نضيع فيها الفلوس خفت منقدش عليها شنو بان ليكم حيت راكم عارفين ديك الايام الاولى خاص شي حاجة تكون عملية و لاسير خاصها وقت و عاد خاصك تسناي الشعر ينوض عاد تخيديها و الله معرفت اش ندير بغيت ناخد فينوس ولكن خفتها تكتر لي الشعر
اه و بغيت نفكركم بشي حوايج صغار و نقدرو نساوهم بحال البلاك و لا السشوار و اكسسوارات الشعر يعني كل مرة خاص تصاوبي شي حاجة زوينة فشعرك ماشي كل نهار نفس المشطة و صنادل الدار حتا هوما خاصهم يكونو منوعين
اه بغيت نسولكم على المكياج و الروايج مغديش ناخد بزاف بغيت نشويهم خفت يخسرو

السلام عليكم لبنااات الله يجمع بينكم و بين ازواجكم على خيير و يرزقكم الذرية الصالحة انا مازال عازبة و كنقرا و لكن فسن زواج موضوع غزال و مفيد حاليا شريت مذكرة زوينة فاللون الغوز و غنبدا نكتب شنو خصني نشري و نوجد و حبيبتي بنت باشا عطيتيني فكرة كيفاش نزيد نظم افكار المذكرة و خاصة فكرة لي شريتيها ضربي عليها بهاداك الملون حيت كنت كنفكر كيفاش ندير بلا منضرب بستيلو حيت المذكرة بغيت نحتافض بيها و تبقى ذكرى زوينة عندي الله يتمم اموركم على خير و يجعل الحب و المودة بيناتكم دائمين

البنات فاش وريت واحد البنت داكشي ليشريت وداكشي لغادي يخصني وبدات كضحك عليا قالت ليا واش خاديا لشي كوكب مافيه المحالات قالت ليا ماتخديش كلشي باش الى مشيتي تلقاي باش تساعدري باش تخرجي وتفوجي

حبيبتي
الله يكمل علينا بخير
3 شوميز دونوي ماكافيينش اختي
علاش الحشمة حنا في مايرضي الله عز وجل ماتنديرو حتى حاجة حرام راه ازواجنا اختي
زيدي منهم وبيجمات باركة منهم خاصك تلبسي حوايج زوينين في دارك الحشمة غير حيديها راه الحيا مزيان ولكن راه رجال هادو غادي يعدرك الشهر الاول من بعد طلعي ليه بحشمتك في راسو ههههههههه

بالنسبة للتقليدي متكتريش منو في الغربة ماغاديش تلبسيه نهائيا
مضيعيش فلوسك فيه اختي
بالنسبة لبراون انا عندي راها شوية صعيبة خصوصا لي لحمو عزيز عليه المناطق الحساسة دابا غير عادي ولكن بعد الزفاف تنفكر في لاسير


حبيبتي الله يسهل عليك مزيان فاش خديتي مدكرة صافي
اي حاجة طرحناها وباتنت ليك غادي تفيدك سجليها ومنصحكش تشري قبل الخطبة لانه كلشي تيديمودا جمعي فلوسهم

ههههههههههههههه اوى حبسي من شريان لي عندك صافي ولي ناقصاك هي لي تاخديها
بالنسبة للروايح وكريمات فيهم تاريخ ميخسروش تيكون دايرين فيهم عامين اختي غير انت ماتكتريش راكي غادة لبلاصتهم خودي باش تقضي في الاول فقط

هههه narssicee* ضحكتيني الله اعطيك الخير غير فاش قلتي ماغاديش تسناي حتا ابانو الزغبات احياني احبيبتي راه دوام هاداك غادي تجي الوقت ليغادي اطوالو كاع هههههه وبالنسبة لبراون انا عندي ولكن صعيبة بالنسبة للمناطق الحساسة هي زوينة غير الليدين و الرجلين دغيا كتحيد ولكن لمعندو تلحساسية انا كاينوض فيا الحبوب ف فخاضي سواء لاسير ولا براون كتوافقني غير دوك البومادات ايكايحيدو ياختي الرحمة ماكين لا الم لحكة لا حبوب

بغيتو تعرفو لحاجة لي ماتنسوهش



















نقول
هي ذكاء المسافة


الحب هو ذكاء المسافة. ألّا تقترب كثيراً فتُلغي اللهفة، ولا تبتعد طويلًا فتُنسى. ألّا تضع حطبك دفعةً واحدةً في موقد من تُحب. أن تُبقيه مشتعلًا بتحريكك الحطب ليس أكثر، دون أن يلمح الآخر يدك المحرّكة لمشاعره ومسار قدره.” ― أحلام مستغانمي

ختي فرحو براسكم و حويجتكم لكن منتسوش هاد لكلمة


سمحو ليا تطفلت عليكم راني ماشي عروسة لكن كنت ف واحد نهار هههههه

هههههه يطوالو لا الطول ممعاناش مزال الا كنت بحدي ممعايا حد غير ياخدو راحتهم و لكن اختي ديك الوقت غتكوني حدا راجلك يوميا كل نهار و الله الا كنفكر فيها من دابا عرفتي بغيت نشري فينوس هادي اللي كدير 100 درهم و كارتوش ديالها و بغيت نستعملها داك الشهر و لكن خفت الشعر يتزاد من بعد و نصدق واحلة حيت كانو قالو انها ماشي بحال مكينات الحلاقة لاخرين مكتنودوش قاصح