ArabicEnglishFrenchSpanish

إعـــــــلان

تقليص
لا يوجد إعلان حتى الآن.

قصة بالدارجة من تأليفي بعنوان:جسد بلا روح..

تقليص
هذا الموضوع مغلق.
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة
    • WhatsApp

    #51
    رد: قصة بالدارجة من تأليفي بعنوان:جسد بلا روح..

    -الفصل 7-
    خالتي لطيفة: آش واقع مالك الحاج غواتك قالب الدنيا!
    الحاج: آجي راه هاد الخليقة مشات تقتل هاد البنت ماعرفتش شنو كايحسبو هاد العيالات ولادهم واش حمير!!
    خالتي لطيفة: ويلي الحاج باراكا.. دارت عند مي وقالت: سمحيلي ياختي ربيعة الحاج ماتايحمل لي يضرب الدراري الصغار
    مي بعصبية: واراه ماضربتهاش غير هاكداك ياختي راه خليتها تحضي الدري الصغير وورجعت لقيت رجلو مفرشخة!!
    الحاج: واش نتي بعقلك مخلية بنت قد هادي تقابل خوها الصغير وهي بنفسها خاصها لي يقابلها!!!
    خالتي لطيفة من تحت لسانها: الحاج تا نعل الشيطان ... ههه ختي ربيعة ماوقع باس آجي دخلي تشربي كويس آتاي وتبردي وترتاحي
    مي: لا أختي لطيفة الله يخلف عليك الولد راه مهرس من رجلو ماحيلتي ليه ماحيلتي للخدمة والله تاعييت..
    خالتي لطيفة:والله يحسن عوانك أحبيبتي ..شوفي أنا ندي رجاء لعندي تبات مع اسمهان ونتي بقاي على خاطرك وقابلي الوليد
    مي: لا لا أختي مانقدرش راه..
    خالتي لطيفة: والا ترديهاش في وجهي راحنا جيران والنبي وصى بسابع جار وراه عندي بنت قد بنتك تلعب معاها ويتوانسو وماتخافي عليها من حتى حاجة
    مي سكتت شوية ودوات:واخا الصباح نجي عندها بنت الحرام
    الحاج فاش سمع ديك الكلمة خنزر وقال وهو داخل للدار :لاحول ولا قوة إلا بالله العلي العظيم..
    خالتي لطيفة: كوني هانية أحبيبتي عرفتي والله تادخلتي لي لقلبي من نهار شفتك أول مرة وباينا عليك بنت الناس والله يعمرها دار
    مي :ربي يخليك..
    مي دارت لعندي وأنا مخبية مورا خالتي لطيفة وقالت:شوفي ياه ولله لابقات فيك دابا نجاك الله من بعد ونتفاهمو
    ودخلت وعاد قدرت نتنفس ...خالتي لطيفة فاش شافتها دخلات قالت: يا لطيف على مسمومة..يالله يالله الزويونة دخلي تلعبي مع اسمهان راها في بيتها..
    أنا فرحت بزاف ديك الليلة وفرحت حيت خويا تهرس باش قدرت نعس في دار اسمهان ..الأيام لي قضيتها في دارهم كانت أجمل أيام طفولتي ...
    ديك الليلة دوزتها كلها لعب وضحك مع وولاد خالتي لطيفة لي تجمعو علي وعاملوني بحال ضيفة شرف حيت عمرو باتت عندهم شي بنت صغيرة من قبلي ههه لعبت حتى عييت وتعشينا في طبلة وحدة وكان جو جميل مابين أفراد عائلة خالتي لطيفة تجاذب أطراف الحديث في الوجبة هاد الشي لي عمري جربتو.. لحاج عبد الباقي كان رجل عصامي وحازم وفي نفس الوقت حنون على ولاده كان يسول كل واحد فيهم عن يومهم كيدوزوه وقرايتهم ..كانت تجيني غريبة كيفاش كايتعامل معاهم ولكن من بعد ولفت و وليت حتى أنا ندخل معاهم في نفس الحوارات ملي كبرت..
    نعست ديك الليلة مع اسمهان في سيررها واخا كان مضيق علينا بزوج ولكن كننا فرحانين بزاف وبايتين نهرو في بعضياتنا ونضحكو حتى دانا النعاس..
    الصباح بكري فاقو الدراري باش يمشيو يقراو واسمهان للروض أنا فطرت وجلست نتسنى مي تجي لعندي قبل ماتمشي للخدمة ..جات وحلات ليها خالتي لطيفة الباب ودخلات ..باين مازال معصبة مني ولكن بردات شوية بما أنها ماجمعاتش معايا ملي شافتنا .. كانت حازمة كريم في ظهرها ..
    خالتي لطيفة: واش غاتاخديه معاك للخدمة ؟
    مي: آه ماعندي كينديرليه مانقدرش نخليه ..يالله آالخطية زيدي قدامي
    خالتي لطيفة: واش حتى رجاء تاخديها معاك؟
    مي:لا مانقدرش آختي لطيفة راه هادا وداياه بزز
    خالتي لطيفة: بغيتي تخليها في الدار بوحدها؟! حرام عليك البنت باقا صغيرة
    مي ماعجباتهاش ديك الهدرة: ماعندي مانديرليها..
    خالتي لطيفة: شوفي خليها عندي والعشية ملي ترجعي دوزي خودي بنتك واخا؟
    مي: ولكن..
    خالتي لطيفة: ماكاين لا ولكن ولا والو رني نضل بوحدي في الدار كولشي تاخوي وكانقنط خليها تونسني ومنها نقابلهالك حتى ترجعي نتي ماخاسرة والو
    مي: مانقدرش نخليها نعدك تعدبك و ..
    خالتي لطيفة: شوفي بنتك بحال الآمانة تقولي ماشي درية عندها 6 سنين شوفي الجنون لي عندي أنا وماكاينلا عداب ولا والو ولي كلاوه ولادي تاكلو معاهم وماتخافي عليها من والو
    خالتي لطيفة قدرات تقنع مي تخليني عندها وأنا كنت غانطير من فرحتي حيت غانجلس في دار اسمهان وليت نتمنى خويا مايبراش باش نبقا تما ديما...

    تعليق

      • WhatsApp

      #52
      رد: قصة بالدارجة من تأليفي بعنوان:جسد بلا روح..

      رائعة سنسن مسكينة رجاء مفتقدة لجو الاسرةوزادت قسوة الام لا حول ولا قوة الا بالله

      تعليق

        • WhatsApp

        #53
        رد: قصة بالدارجة من تأليفي بعنوان:جسد بلا روح..

        تبارك الله عليك أ سناء
        sigpic

        تعليق

          • WhatsApp

          #54
          رد: قصة بالدارجة من تأليفي بعنوان:جسد بلا روح..

          زيديش شي جزء راه خصني نوض نشرمل الدجاج يعيشك ختيتو ههه

          تعليق

            • WhatsApp

            #55
            رد: قصة بالدارجة من تأليفي بعنوان:جسد بلا روح..

            شيري غانزيد جزء ولكن بعد مانحط العشا ونجمع الماعن سيري تشرملي الدجاج ديالك ههههههه

            تعليق

              • WhatsApp

              #56
              رد: قصة بالدارجة من تأليفي بعنوان:جسد بلا روح..

              :69::69:شوفي غير زيدي شي جزء الله يرضي عليك نقراه قبل مانعس هاني كنتسنى....

              تعليق

                • WhatsApp

                #57
                رد: قصة بالدارجة من تأليفي بعنوان:جسد بلا روح..

                المشاركة الأصلية بواسطة أم أسووومة22 مشاهدة المشاركة
                شيري غانزيد جزء ولكن بعد مانحط العشا ونجمع الماعن سيري تشرملي الدجاج ديالك ههههههه
                ممممم دجاج لا. لا ماتحطيه حتى تحط لينا الدجاج
                sigpic

                تعليق

                  • WhatsApp

                  #58
                  رد: قصة بالدارجة من تأليفي بعنوان:جسد بلا روح..

                  الضروف كتخلي الانسان اولي قلبو حجرة اكون ربيعة تاهيا طاحت فشي ولد الناس متقي الله كون متمظكونش هاديك هي حالها ولا رجاء فداك الحرمان او لا اله الا الله وخلاص في انتضار باقي القصة عزيزتي

                  تفاءل فان التفاؤل طريق النجاح

                  اللهم اني اسالك بكل اسماءك الحسنى ان تحفظلي ابنتي نور عيوني

                  تعليق

                    • WhatsApp

                    #59
                    رد: قصة بالدارجة من تأليفي بعنوان:جسد بلا روح..

                    -الفصل 8-
                    من داك النهار ومي تاتخليني عند خالتي لطيفة من الصباح حتى ترجع في العشية أنا كنت ظريفة ومانديرش البسالة حيت مركبا في مي الرعب منذ نعومة أظافري..كنت بحال الحجرة وأغلب الناس كانو يقولو علي نفس الكلام..وعند دار خالتي لطيفة كنت أكثر حيت كنت خايفة غير ماتبقاش باغيا تشدني عندها لا درت شي تصرف ماشي هو هاداك..كيما دكرت ليكم من قبل كنت أكبر من سني...
                    خالتي لطيفة كانت مهلية في لدرجة تعاملها معايا كان أحسن من تعامل أمي لي ولداتني! وليت نلقا راحتي وليت نعيش كرجاء الطفلة وماشي البنت لي خاصها تقابل خوها الصغير..
                    نفس الروتين اليومي بالنسبة لي كان أكثر من لي كنت نتمناه.. في الصباح نفطر في دارنا وتجيبني مي لعند خالتي لطيفة نلقاها كاتوجد الدراري للمدرسة كاتصيفتهوم مع الحاج ومن بعد توجد اسمهان للروض ونمشيو نوصلوها .. في وقت الغدا يرجعو الدراري والحاج يجيب معاه اسمهان نتجمعو على الطلبة نتغداو و الدراري يدخلو لبيتهم وأنا واسمهان ندخلو نلعبو بعض المرات نعسو حتى تجي مي تاخدني في العشية..العلاقة ديال خالتي لطيفة ومي تحسنت بزاف ولا تقريبا صحابات أول جارة تبني معاها أمي علاقة صداقة ولاو يدخلو عند بعضياتهم بزاف واخا الحاج ماكانش يحمل في مي الشعرة من داك النهار ولكن كان يعاملني بحال وحدة من ولادو لدرجة بديت نسى أنه عندي أب وعوضته بأب جديد حنون سميتو الحاج عبد الباقي..
                    برا خويا وحيد الكبس لكن مي مازال تاتخليني عند خالتي لطيفة كيما قلتلكم علاقتهم تحسنت .. داز الربيع وداز الصيف لي دوزتو في دار الحاج بحال شي عطلة إستجمامية ...وليت نلبس الملابس لي ماكاتبقاش قد اسمهان حيت هي كانت عامرة وأنا كنت قليولة بزاف وحتى المدرسة لي ماكانتش ناوية مي دخلني ليها دخلت ليها بفضل الحاج والكتوبا المستعملين ديال محسن ..الخير لي داره في داك الإنسان عمري نساه ليوم الدين...
                    وليت نقرا مع اسمهان في نفس المدرسة نمشيو مع بعضياتنا ونرجعو مع بعضياتنا وماكناش نتفارقو وكانو ديما يحسبونا الناس أخوات ... بديت نكبر مع ديك العائلة لي عاملتني بحال فرد منها أما كريم فكانت مي تديه معاها لحضانة حداها في الخدمة ديالها حتى كبر ودخلاته لنفس مدرستي ووليت نديه وجيبو معايا..
                    عشت طفولتي مع ناس أغراب كانو بالنسبة لي أحسن من لي من لحمي ودمي..
                    السنوات دازو تيجريو وبدات معالم الأنوثة تتبرز وتما بدات مي تجرني للدار وبدا ينقص الإختلاط ديالي بعائلة الحاج بحجة الدار عامرة رجال وكانت ديما تتقولي نفس الكلام لي كان يجرحني بزاف فاش نبغي نمشي لتما:بركي الأرض دابا تمشي تجيبي لي شي كرش من تما..
                    تخيلو بنت مراهقة أو طفلة مازال في الرابع عشر من عمرها تسمع بحال هاد الكلام ..مع أنه كبرت ولكن الدراري كانو مازال حاسبيني بحال ختهم الصغيرة وعمري شفت شي تصرف لا أخلاقي منهم بالعكس كانو يعاملوني أحسن من اسمهان..مع النكير ديال مي وكلامها القاسي بديت نقص المشية لدار خالتي لطيفة واخا كنت مازال كاندخل ليها يوميا ولكن نتجنب الدراري والحاج ...
                    حتى للنهار لي كنت خارجة فيه للمدرسة وتلاقيت باسماعيل ومحسن خارجين تاهوما
                    اسماعيل شاف في وسكت أما محسن كان هو الباسل ما بين الأخوين: هيي آلعوجة شتك مابقيتي كاع دوري على دارنا ياك لاباس؟
                    أنا: محسن سير الله يخليك مافي مايتناقش معاك حتى نتا على الصباح لله
                    محسن: هاي هاي هاي وليتي تتجري علي أرجاء العوجة؟ ياك وأنا لي كنت غانعرفك على حبيبتي صفاء اليوم
                    أنا: عآاود تاني آمحسن مابغيتش تحشم وتخلي عليك بنات الناس في التيقار
                    محسن:وآنا مالي هوما لي تايحماقو علي شكون يقدر يقاوم هاد الزين وهاد الطولة وهاد...
                    اسماعيل ماخلاهش يكمل كلامو ودفعو بركلة من اللور: زيد زيد المكلخ لاخور وكان كنتي تاتديها في قرايتك كيما هاد التفاهات وكان كاع ماتكرر عامين..
                    أنا غلباتني الضحكة واخا كنت مضيومة ومكتبمة من محاضرة أمي في الصباحية ولكن ضحكوني هاد الثنائي ..
                    محسن: دابا ضحكتي والله يعطيني وجهك ..هاهو غادي ويهنيكم منو غايجي نهار تندمو فيه على هاد شي لي كاديرو في
                    اسماعيل: واش تمشى ولا نزيدك ركلة أخرى؟
                    أنا زدت ضحكت ونسيت كاع همومي ومشاكلي معاهم وهي تجي اسمهان تتجري مورانا
                    اسمهان: هآآي تسناوني أشلة المهابيل!!
                    محسن:بقيتيلينا غانتي في الحساب
                    اسمهان: مالي مزاحمة معاك؟ يالطيف كيدار
                    محسن: آه مزاحمة معايا وزايدون كيتك عندك خوك بحال هادا وتقولي عليه كيداير
                    اسمهان:سير سير الله يشافيك من جنون العظمة
                    أنا واسماعيل كنا الوحيدين الهادئين في ديك الشلة المجنونة اسماعيل كان يتمشى بهدوء وأنا كنت نشوف في دوك الأخوة وحواراتهم لي كان يعجبني نتصنت ليها...

                    تعليق

                      • WhatsApp

                      #60
                      رد: قصة بالدارجة من تأليفي بعنوان:جسد بلا روح..

                      المشاركة الأصلية بواسطة ام صفواان مشاهدة المشاركة
                      إوا ياك بعدا عارفة
                      اه تفكرت غدا مغاداش تكون عندي كونكسيون أف واقيلة نشارجي ههه حيت الويفي فالدار ههه
                      وإدمان هدا
                      هههههه واشارجي حيت الحداث المشوقة يالله غايبداو
                      المشاركة الأصلية بواسطة ام صفواان مشاهدة المشاركة
                      راحنا عايشين مع رجاء بقات فيا
                      بصاح كل. قصة وحنا عايشين فيها وهدي هيا الدنيا.
                      شحال من رجاء عاشت بيناتنا وعانت من بلحرمان العاطفي و الأبوي للأسف الله يهدي ماخلق
                      المشاركة الأصلية بواسطة مغربية24 مشاهدة المشاركة
                      اسلوبك في الكتابة رائع ماشاء الله عليك
                      ربي يخليك حبيبتيr
                      المشاركة الأصلية بواسطة هداية 3 مشاهدة المشاركة
                      ما شاء الله عندنا مواهب مدفونة كثيرة فالمنتدى الله اجازيكم بخير كتاخدو من وقتكم لتعطوا للاخرين من دون مقابل
                      ربي يحفضك عزيزتي والله كانستمع ملي كانكتب شي قصة ويمكن أكثر من القارئ
                      المشاركة الأصلية بواسطة مستغفرة لربها مشاهدة المشاركة
                      رائعة سنسن مسكينة رجاء مفتقدة لجو الاسرةوزادت قسوة الام لا حول ولا قوة الا بالله
                      فعلا ولكن من بعد غغادي تعوض جزء قليل من داك الجو لي مفتتقداه
                      المشاركة الأصلية بواسطة جوجو الحلوة مشاهدة المشاركة
                      :69::69:شوفي غير زيدي شي جزء الله يرضي عليك نقراه قبل مانعس هاني كنتسنى....
                      هاني زدتو الزين على الله تكوني مازال مانعستي
                      المشاركة الأصلية بواسطة ام صفواان مشاهدة المشاركة
                      ممممم دجاج لا. لا ماتحطيه حتى تحط لينا الدجاج
                      هههههه آشنو ندير بدجاج خضر خاصني نتنساه يطيب بزاف
                      المشاركة الأصلية بواسطة zawji 7ayati مشاهدة المشاركة
                      الضروف كتخلي الانسان اولي قلبو حجرة اكون ربيعة تاهيا طاحت فشي ولد الناس متقي الله كون متمظكونش هاديك هي حالها ولا رجاء فداك الحرمان او لا اله الا الله وخلاص في انتضار باقي القصة عزيزتي
                      ربيعة فعلا عانت وقاست تاهي ومع ذلك قسوتها كانت مبالغ فيها ولكن من بعد نتعرفو السبب ديال كاع هاد البرود

                      تعليق

                      يعمل...
                      X